Mosisi Buluku ne mɔɔ tɔ zo nwiɔ mɔɔ bɛfɛlɛ ye Adendulɛ 8 - BAEBOLO ANZƐƐ BULUKU NWUANZANWUANZA

Ahɛlɛne

¹ Akee Ɛdɛnkɛma zele Mosisi kɛ, “Kɔ kɔze Yigyibiti belemgbunli ne kɛ, ‘Kɛ Ɛdɛnkɛma se la ɛne: Maa me menli ne ɛhɔ, amaa bɛazonle me.

² Saa wɔammaa bɛangɔ a, nea, mebava ahɛlɛne meazɛkye wɔ maanle ne.

³ Azule Naele ne bawula ahɛlɛne ngome, bɛbayi wɔ suakunlu ɛkɛ, wɔ sua ne mɔɔ ɛda nu la akunlu, wɔ ɛsokpa ne azo, wɔ mgbanyima nee wɔ menli ne mɔ kɔsɔɔti azua nu yɛɛ bɛ fonlomo ne mɔ nee bɛ ahyɛnze mɔɔ bɛfa bɛto kpanwo bɔbɔ la, ahɛlɛne bayiyi bɛ tetɛkɛɛ.

⁴ Ahɛlɛne bavo wɔ, wɔ menli ne, yɛɛ wɔ mgbanyima ne mɔ anwo.’ ”

⁵ Ɛdɛnkɛma zele Mosisi kɛ, “Ka kile Aalɔn kɛ, ‘Fa wɔ kpɔma ne tende azule ne mɔ, azudenle mɔɔ bɛdudu, nee nzubula ne mɔ azo ye ahɛlɛne maa bɛva Yigyibiti azɛlɛ ne.’ ”

⁶ Yemɔti Aalɔn dendenle ɔ sa wɔ Yigyibiti azule ne mɔ azo, na ahɛlɛne vi bɛ nuhua ravale Yigyibiti azɛlɛ ne amuala bɔkɔɔ.

⁷ Na ngonyiama ne noko yele ngonyia yele ahɛlɛne guale Yigyibiti azɛlɛ zo.

⁸ Akee belemgbunli ne vɛlɛle Mosisi nee Aalɔn na ɔzele bɛ kɛ, “Bɛzɛlɛ Ɛdɛnkɛma bɛmaa ɔye ahɛlɛne ne mɔ ɔvi me nee me menli ne anwo ɛke, na mebamaa menli ne ahɔbɔ azu amaa Ɛdɛnkɛma.”

⁹ Mosisi hanle hilele belemgbunli ne kɛ, “Si ahonle, kile mekɛ mɔɔ menzɛlɛ memaa wɔ nee wɔ mgbanyima nee wɔ menli ne, amaa bɛaye ahɛlɛne ne mɔ bɛavi bɛ nee bɛ azua nu na yeaha Azule Naele ne anu ɛdeɛ ne mɔ ala la.”

¹⁰ Na belemgbunli ne hanle kɛ, “Ɛhyema.” Mosisi hanle kɛ, “Ɔyɛ zɔhane, kɛmɔ ɛdawɔ ɛse la, amaa wɔanwu kɛ nyamenle biala ɛnle ɛkɛ ne kɛ Ɛdɛnkɛma, yɛ Nyamenle ne ala.

¹¹ Ahɛlɛne ne mɔ bavi wɔ, wɔ mgbanyima, nee wɔ menli ne mɔ azua nu ahɔ, na yeaha mɔɔ wɔ Naele ne anu la ala.”

¹² Yemɔti Mosisi nee Aalɔn vi belemgbunli ɛkɛ ne hɔle. Mosisi zɛlɛle Ɛdɛnkɛma, kɛmɔ ɔ nee belemgbunli ne hyehyɛle mɔɔ fane ahɛlɛne ne mɔ ɛyelɛ nwo la.

¹³ Na Ɛdɛnkɛma yɛle mɔɔ Mosisi zɛlɛle ye la, ahɛlɛne ne mɔ wule wɔ azua nu, awuke ne mɔ, nee ɛya avule ne mɔ anu.

¹⁴ Bɛhuohuanle bɛ nloa edukue edukue, akee maanle ne anu bɔnle nvoanvoa.

¹⁵ Na mɔɔ belemgbunli ne nwunle kɛ ahɛlɛne ne mɔ ɛwu la, ɔyɛle dapele bieko, yeandie mɔɔ Ɛdɛnkɛma hanle la.

Ngɔkɔwule

¹⁶ Akee Ɛdɛnkɛma zele Mosisi kɛ, “Ka kile Aalɔn kɛ, ‘Tende wɔ kpɔma ne na fa fi azɛlɛ nwo maa ɔye ngɔkɔwule ɔmaa bɛva Yigyibiti maanle ne kɔsɔɔti.’ ”

¹⁷ Na bɛyɛle ye zɔhane; Aalɔn dendenle ye kpɔma ne finle aze, na ngɔkɔwule vale menli nee nyɛmoa; Yigyibiti azɛlɛ mumua ne azo yɛle ngɔkɔwule ngome.

¹⁸ Ngonyiama ne bɔle mɔdenle kɛ bɛdabɛ bɛye ngɔkɔwule ne mɔ bie, noko bɛangola. Yemɔti ngɔkɔwule vale menli nee nyɛmoa.

¹⁹ Ngonyiama ne hanle hilele belemgbunli ne kɛ, “Nyamenle asa ɛrɛlɛsɛka ko bɔbɔ ɛhye o! Nyamenle a ɛyɛ ɛhye a.” Na belemgbunli ne zile ye ɛbolɛ na ɔyɛle dapele. Yeammaa menli ne angɔ, kɛmɔ Ɛdɛnkɛma hanle la.

Nrɛzenra

²⁰ Akee Ɛdɛnkɛma zele Mosisi kɛ, “Dwazo nwonlomɔ mangyee ne na kendɛ belemgbunli ne. Saa ɔse yeahɔ azule ne anu a ka kile ye kɛ, ‘Kɛ Ɛdɛnkɛma se la ɛne: Maa me menli ne ɛhɔ, amaa bɛazonle me.

²¹ Saa wɔammaa me menli ne angɔ a, nea, mebamaa nrɛzenra adɔka ara ɛdawɔ, wɔ mgbanyima, nee wɔ menli ne mɔ anwo zo; bɛbayiyi bɛ azua ne mɔ, Yigyibitima kɔsɔɔti azua ne mɔ anu bayɛ nrɛzenra adɔka, akee azɛlɛ mumua ne mɔɔ bɛgyi zolɛ la, nrɛzenra bava ye bɔkɔɔ.

²² Kenle zɔhane mebaye Gohyɛn, azɛlɛ ne mɔɔ me menli ne de zolɛ la meazie ahane, amaa nrɛzenra adɔka ne bie angɔ ɛkɛ, na bɛanwu kɛ medame a mele Ɛdɛnkɛma wɔ azɛlɛ ye azo a.

²³ Mebava ɛweɛne meado me menli ne nee wɔ menli ne avinli. Ɛhyema yɛɛ sɛkɛlɛneɛ ɛhye bazi a!’ ”

²⁴ Na Ɛdɛnkɛma yɛle ye zɔhane; nrɛzenra adɔka ravale belemgbunli ne nee ye mgbanyima ne mɔ azua ne. Nrɛzenra ne mɔ zɛkyele Yigyibiti azɛlɛ ne.

²⁵ Akee belemgbunli ne vɛlɛle Mosisi nee Aalɔn na ɔzele bɛ kɛ, “Bɛhɔ bɛhɔbɔ azu bɛmaa bɛ Nyamenle ne wɔ maanle ye anu.”

²⁶ Na Mosisi hanle kɛ, “Ɔnle kpalɛ kɛ yɛkɛyɛ ye zɔhane, ɔluakɛ saa yɛyɛ a yɛkɛva Yigyibiti bɛkyi azubɔdeɛ ne mɔ bie yɛkɛbɔ azu yɛkɛmaa Ɛdɛnkɛma yɛ Nyamenle ne. Saa yɛfa azubɔdeɛ mɔɔ Yigyibitima kyi la yɛbɔ azu wɔ bɛ nye zo ɛke a, bɛkɛkpa yɛ awolɛ.

²⁷ Ɔwɔ kɛ yɛtia kenle nsa adenle yɛkɔ fienemgbole ne anu yɛkɔbɔ azu yɛmaa Ɛdɛnkɛma yɛ Nyamenle ne, kɛmɔ ɔdaye ɔkɛhile yɛ la.”

²⁸ Yemɔti belemgbunli ne hanle kɛ, “Memaa bɛahɔ bɛahɔbɔ azu bɛamaa Ɛdɛnkɛma bɛ Nyamenle ne wɔ fienemgbole ne anu, na moa yɛɛ ɔnle kɛ bɛkɔ a. Bɛzɛlɛ bɛmaa me.”

²⁹ Akee Mosisi hanle kɛ, “Nea, mevi ɛ nwo ɛke melɛkɔ, na mebazɛlɛ Ɛdɛnkɛma kɛ nrɛzenra adɔka ne ɛvi belemgbunli, ye mgbanyima, nee ye menli ne anwo zo ɛhyema; na Nana, mmabɛlɛbɛla yɛ bieko kɛ ɛnrɛmaa me menli ne ɛnrɛhɔbɔ azu ɛnrɛmaa Ɛdɛnkɛma.”

³⁰ Yemɔti Mosisi vi belemgbunli ne anwo ɛkɛ ne hɔzɛlɛle Ɛdɛnkɛma.

³¹ Na Ɛdɛnkɛma yɛle mɔɔ Mosisi bizale ye la, na ɔmanle nrɛzenra adɔka ne vile belemgbunli, ye mgbanyima, nee ye menli ne anwo zo; ko bɔbɔ anga ɛkɛ.

³² Na belemgbunli ne zile ye ɛbolɛ, na ye dapele ne akee yɛle kpole kpalɛ.