Mosisi Buluku ne mɔɔ tɔ zo nwiɔ mɔɔ bɛfɛlɛ ye Adendulɛ 3 - BAEBOLO ANZƐƐ BULUKU NWUANZANWUANZA

Nyamenle fɛlɛ Mosisi

¹ Ɛnee Mosisi nea Sɛlɛvolɛ Gyɛtulo, ɔ ye ɔ ze ne mɔɔ vi Medean la nyɛmoa. Kenle ko ɔhanle nyɛmoa ne mɔ ɔhɔle fienemgbole ne aduduleɛ na ɔrale Nyamenle Boka Saenae abo.

² Na Ɛdɛnkɛma soanvolɛ yɛle kɛ senle mɔɔ ɛlɛsɔ la na ɔyele ɔ nwo ɔhilele ye wɔ kpɔkɛ ne anu. Ɔnleanle, na ɔnwunle kɛ kpɔkɛ ne ɛlɛsɔ, noko ɔnyela.

³ Na Mosisi zele kɛ, “Megyinla ahane meanlea nwanwane deɛ ɛhye, kɛ ɔyɛ mɔɔ kpɔkɛ ne ɛlɛsɔ, noko ɔnyela la.”

⁴ Mɔɔ Ɛdɛnkɛma nwunle kɛ yehwe ahane kɛ ɔnea la, Nyamenle vɛlɛle ye wɔ kpɔkɛ ne anu, “Mosisi! Mosisi!” Na Mosisi zulole zolɛ kɛ, “Mewɔ ɛke.”

⁵ Na Nyamenle zele kɛ, “Mmabikye me; yeye mgbɔlaboa ne mɔɔ ɛwula la, ɔluakɛ azɛlɛ ne mɔɔ ɛgyi zolɛ la le nwuanzanwuanza.”

⁶ Eza ɔzele kɛ, “Mame a mele ɛ ze mɔ Nyamenle ne, Ebileham Nyamenle ne, Ayezeke Nyamenle ne, nee Gyekɔbo Nyamenle ne.” Na Mosisi hedale ɔ ti zo, ɔluakɛ ɔsulo kɛ ɔkɛnlea Nyamenle.

⁷ Akee Ɛdɛnkɛma zele kɛ, “Menwu me menli mɔɔ wɔ Yigyibiti la amaneɛnwunlɛ ne, eza mede bɛ ɛzunlɛ ne, ɔlua abodelɛ mɔɔ bɛ gyima zo neavolɛma ne ɛlɛfa ahile bɛ la.

⁸ Meze bɛ amaneɛnwunlɛ ne, na mera kɛ mebalie bɛ meavi Yigyibitima asa anu, meaye bɛ meavi azɛlɛ ɛhye azo me nee bɛ ahɔ azɛlɛ kpalɛ mɔɔ tɛlɛ, azɛlɛ kpalɛ mɔɔ kye aleɛ mɔɔ Keenama, Hɛtema, Amɔlema, Pɛlɛzema, Haevaema, yɛɛ Gyibɛsema a de zolɛ la azo.

⁹ Kɛkala, Yizilayɛma ɛzunlɛ ne ɛdwu me nwo ɛke, yɛɛ menwu ɛsisilɛ mɔɔ Yigyibitima fa sisi bɛ la.

¹⁰ Bɛla, mesoa wɔ wɔ Yigyibiti belemgbunli ne ɛkɛ amaa wɔahɔye me menli, Yizilayɛma wɔavi Yigyibiti.”

¹¹ Na Mosisi hanle hilele Nyamenle kɛ, “Na nwane bɔbɔ a le medame, mɔɔ mekɔ Yigyibiti belemgbunli anyunlu, meahɔye Yizilayɛma meavi Yigyibiti a?”

¹² Nyamenle zele ye kɛ, “Me nee wɔ balua, na ɛhye bayɛ sɛkɛlɛneɛ amaa wɔ kɛ medame a mezoa wɔ a. Mekɛ mɔɔ ɛ nee menli ne kɛvi Yigyibiti la, bɛbarazonle Nyamenle wɔ boka ɛhye azo.”

¹³ Mosisi bizale Nyamenle kɛ, “Saa mekɔ Yizilayɛma ɛkɛ ne na meka mekile bɛ kɛ, ‘Bɛ ze mɔ Nyamenle ne ɛzoa me bɛ nwo ɛke’, na bɛbiza me kɛ, ‘Kɛ bɛfɛlɛ ye?’ a, duzu edwɛkɛ a menga mengile bɛ a?”

¹⁴ Nyamenle zele Mosisi kɛ, “Medame a le Medame.” Na ɔzele kɛ, “Ka ɛhye kile Yizilayɛma kɛ, ‘Medame ɛzoa me bɛ nwo ɛke!’

¹⁵ Ka ɛhye kile Yizilayɛma kɛ, ‘Ɛdɛnkɛma, bɛ ze mɔ Nyamenle ne, Ebileham Nyamenle ne, Ayezeke Nyamenle ne, nee Gyekɔbo Nyamenle ne ɛzoa me bɛ nwo ɛke! Ɛhye a le me duma wɔ melɛ mɔɔ ɛnlɛ awieleɛ, na ɛhye yɛɛ ɔwɔ kɛ awolɛndoazo kɔsɔɔti fa fɛlɛ me a.

¹⁶ Kɔboɔboa Yizilayɛ mgbanyima kɔsɔɔti anloa na ka kile bɛ kɛ: Ɛdɛnkɛma, bɛ ze mɔ Nyamenle ne, Ebileham Nyamenle ne, Ayezeke Nyamenle ne, nee Gyekɔbo Nyamenle ne ɛye ɔ nwo ɛhile me. Ka kile bɛ kɛ menwu mɔɔ bɛva bɛyɛ bɛ wɔ Yigyibiti la,

¹⁷ na mebɔ ɛwɔkɛ kɛ mebaye bɛ meavi bɛ amaneɛnwunlɛ nu wɔ Yigyibiti na me nee bɛ ahɔ Keenama, Hɛtema, Amɔlema, Pɛlɛzema, Haevaema, nee Gyibɛsema azɛlɛ zo. Ɛkɛ ne azɛlɛ ne le kpalɛ na ɔkye aleɛ.’

¹⁸ “Me menli ne badie ɛ ne; na ɛdawɔ nee Yizilayɛ mgbanyima bahɔ Yigyibiti belemgbunli ne ɛkɛ bɛahɔze ye kɛ, ‘Ɛdɛnkɛma, Hibuluma Nyamenle ne nee yɛ ɛyɛ nyianu, yemɔti yɛsɛlɛ wɔ, maa yɛ adenle maa yɛdia kenle nsa adenle yɛhɔ fienemgbole ne anu, amaa yɛabɔ azu yɛamaa Ɛdɛnkɛma, yɛ Nyamenle ne.’

¹⁹ Meze kɛ Yigyibiti belemgbunli ne ɛnrɛmaa bɛ adenle, kyesɛ tumi kpole bie kolo ɔ nwo zo.

²⁰ Yemɔti mebadenrɛ me sa meayɛ nwanwane ninyɛne meadua Yigyibiti kakɛ, na ɛhye anzi, ɔbamaa bɛahɔ.

²¹ “Mebamaa menli ne azɔ Yigyibitima anye. Saa bɛkɔ a, bɛmbangɔ mgbane.

²² Yizilayɛnli raalɛ biala bahɔ ye manivolɛ Yigyibitinli raalɛ mɔɔ ɔ nee ye de nee mɔɔ ɛradɛnla ye sua nu la ɛkɛ ahɔlie dwɛtɛ fufule nee ezukoa nvutuke anwoneɛ nee ndanlɛ, na bɛava bɛaziezie bɛ mra mrenya nee mraalɛ. Na ɛhye bamaa bɛakpokpo Yigyibitima.”