Mosisi Buluku ne mɔɔ tɔ zo nwiɔ mɔɔ bɛfɛlɛ ye Adendulɛ 11 - BAEBOLO ANZƐƐ BULUKU NWUANZANWUANZA

Mosisi bɔ belamunli mralɛ ewule nolo

¹ Ɛdɛnkɛma zele Mosisi kɛ, “Akee yeha ewule ko mɔɔ meye meado belemgbunli ne nee Yigyibitima anwo a; ɛhye anzi belemgbunli ne bamaa bɛahɔ. Ɔnrɛha ye kɛ bɛhɔ ala na ɔbavoa bɛ.

² Bɔ wɔ menli ne amaneɛ kɛ, nrenya biala ɛbiza ye manivolɛ yɛɛ raalɛ biala ɛbiza ye manivolɛ raalɛ ɛlie dwɛtɛ fufule nee ezukoa nvutuke anwoneɛ.”

³ Ɛdɛnkɛma manle Yigyibitima lile Yizilayɛma ne eni. Ɛnee Mosisi mumua ne ɛyɛ sonlakpole wɔ Yigyibiti maanle ne anu, wɔ belemgbunli mgbanyima ne nee menli ne mɔ anye zo.

⁴ Na Mosisi hanle kɛ, “Kɛ Ɛdɛnkɛma se la ɛne: Alevinli mu nwiɔ avinli, mebazi mealɔ Yigyibitima nu.

⁵ Yigyibitinli biala belamunli ralɛ nrenya bawu, ɔvi belemgbunli ne mɔɔ de ebia ne azo la ara belamunli ralɛ nrenya ne anwo zo toonwo mɔɔ kɔdwu sonvolɛ raalɛ ne bɔbɔ mɔɔ ɛlɛkyiba melahyinli ne mɔɔ ti abɛlɛ la belamunli ralɛ nrenya ne anwo zo. Nlankɛ ne mɔ amra mɔɔ lumua la kɔsɔɔti bawu.

⁶ Na ɛzunlɛ nee awolɛyelɛ bazi Yigyibiti maanle ne anu kɔsɔɔti; ɛhye le debie mɔɔ bie ɛtɛsile ɛlɛ yɛɛ bie ɛnrɛzi ɛlɛ.

⁷ Na wɔ Yizilayɛma anu, twea ɛnrɛkpo sonla na yeayɛ nane bɔbɔ, amaa wɔanwu kɛ Ɛdɛnkɛma ɛgya ɛweɛne ɛdo Yizilayɛma nee Yigyibitima avinli.

⁸ Wɔ mgbanyima ɛhye mɔ kɔsɔɔti bara arabɔ bɛ ti aze amaa me na bɛaze kɛ, ‘Ɛ nee ɛ sa zo ne mɔ kɔsɔɔti bɛvi ɛke bɛhɔ.’ Na ɛhye anzi mebavi maanle ye anu meahɔ.” Na Mosisi vale ɛya kpole, na ɔvile belemgbunli ne anyunlu ɛkɛ ne ɔhɔle.

⁹ Akee Ɛdɛnkɛma zele Mosisi kɛ, “Belemgbunli ne ɛnrɛdie wɔ, amaa meayɛ nwanwane ninyɛne mɔnwo mɔnwo wɔ Yigyibiti azɛlɛ zo.”

¹⁰ Mosisi nee Aalɔn yɛle nwanwane ninyɛne ɛhye mɔ kɔsɔɔti wɔ belemgbunli ne anye zo, na Ɛdɛnkɛma manle belemgbunli ne ahonle yɛle se, yemɔti yeammaa Yizilayɛma anvi maanle ne anu angɔ.