Ɛseta Buluku ne 7 - BAEBOLO ANZƐƐ BULUKU NWUANZANWUANZA

¹ Na belemgbunli ne nee Heeman hɔle Belemgbunli Raalɛ Ɛseta ɛkɛ ne kɛ bɛ nee ye kakpula bɛ sa bieko.

² Na ye kenle nwiɔ ne azo, mekɛ mɔɔ ɛnee bɛlɛno nwanye la, belemgbunli ne eza bizale Ɛseta kɛ, “Belemgbunli Raalɛ Ɛseta, duzu a ɛkulo kɛ meyɛ memaa wɔ a? Duzu a ɛkpondɛ a? Debie biala mɔɔ ɛkulo la ka na mebava meamaa wɔ. Saa ɛkpondɛ me maanle ye foa ko bɔbɔ a, ɛ sa baha ye.”

³ Belemgbunli Raalɛ Ɛseta yele ɔ nloa kɛ, “Nana, saa mezɔ ɛ nye na ɔyɛ Nana ɛhulolɛ kɛ ɔkɛyɛ mɔɔ mekpondɛ la amgba a ɛnee Nana, mesɛlɛ wɔ, die me nee me menli ne fi ewule nu.

⁴ Ɔluakɛ bɛdɔne me nee me menli ne bɛmaa kɛ bɛhu yɛ bɛbɔ yɛ bo zo bɔkɔɔ. Saa bɛdɔnenle yɛ kɛ ahanra mrenya nee mraalɛ ala a, anrɛɛ ɔnvane me nwo. Ɔluakɛ yɛ kpɔvolɛ ne ɛhunlɛ mɔɔ ɔbamaa bɛahu yɛ la ɛnrɛhola ɛnrɛzie mɔɔ belemgbunli ne baminli ye la abo zo.”

⁵ Belemgbunli Zɛzɛse bizale Belemgbunli Raalɛ Ɛseta kɛ, “Ɛnee nwane a ɔdaye yehola yeyɛ debie zɛhae a, yɛɛ ahenle wɔ nienwu?”

⁶ Ɛseta buale ye kɛ, “Kpɔvolɛ ne mɔɔ ɛwie yɛ yɛ la a le Heeman amumuyɛ ɛhye!” Heeman ahonle dule na ɔ nye hale belemgbunli ne nee Belemgbunli Raalɛ Ɛseta anyunlu.

⁷ Na ɛkɛ ne ala belemgbunli ne vale ɛya, na ɔdwazole ɛkponle ne anwo, ɔhɔle suakunlu ɛkɛ ne tola ne anu. Heeman andwazo bie; ɔhale ɛkɛ ne kɛ ɔkpa Belemgbunli Raalɛ Ɛseta kyɛlɛ kɛ ɔlie ye ngoane, ɔluakɛ ɛnee yenwu kɛ belemgbunli ɛva ɛya kpole, na mɔɔ li ɔ nzi la le munzule kpole maa ye.

⁸ Yemɔti Heeman dule dɔle ebia ne mɔɔ Ɛseta la nu la azo kɛ ɔkpa ye kyɛlɛ. Mekɛ ne anu ala yɛɛ belemgbunli ne vindele ɛkɛ ne a, na ɔzele kɛ, “Wio o! Akee eza me nyunlu ɛke ala, wɔ me gyakɛ azo ɛke yɛɛ Heeman akee bafunlofunla belemgbunli raalɛ ye a?” Belemgbunli ne anloa ampe bɔbɔ yɛɛ sonvolɛma ne mɔ hedale Heeman ati zo a.

⁹ Na Haabona, belemgbunli ne sonvolɛma ne mɔ ko mɔɔ ɛnee li ɔ nzi la hanle kɛ, “Ɛzinzelɛ ɛhuleka mɔɔ Heeman mumua ne manle bɛzieziele kɛ bɛbava bɛahu Mɔdekae, mɔɔ ɛkenle liele belemgbunli ne ngoane la tɛbɔ ɔdaye Heeman ye sua nu lɔ. Ye anwuma ɛhɔlɛ le mita abulanwiɔ nee nwiɔ.” Belemgbunli ne zele kɛ, “Bɛva ye bɛhɔzinze zolɛ.”

¹⁰ Na bɛvale Heeman bɛhɔzinzele ɛhuleka ne mɔɔ ɔmanle bɛzieziele kɛ ɔbava yeahu Mɔdekae la azo. Na akee belemgbunli ne akunlu dwole fɔɔnwo.