Ɛseta Buluku ne 6 - BAEBOLO ANZƐƐ BULUKU NWUANZANWUANZA

Belemgbunli ne wula Mɔdekae anyunlunyia

¹ Kenle ko ne nɔe ne belemgbunli ne angola da. Yemɔti ɔzele kɛ bɛva buluku ne mɔɔ bɛhɛlɛ ninyɛne kpalɛ mɔɔ menli ɛyɛ la wɔ nuhua la bɛrɛla. Bɛvale bɛrale na bɛgengale bɛhilele ye.

² Na bɛnwunle kɛ bɛhɛlɛ ye wɔ buluku ne anu kɛ, mekɛ mɔɔ Begeteena nee Tilɛhye mɔɔ anrɛɛ sinza nwolodo ne mɔɔ kɔ belemgbunli suakunlu ɛkɛ ne la vale adwenle kɛ bɛku belemgbunli ne la, Mɔdekae a dele nwolɛ bie mɔɔ ɔfetele zolɛ ɔhilele belemgbunli ne a.

³ Na belemgbunli ne bizale kɛ, “Duzu a bɛyɛ bɛmaa Mɔdekae wɔ ɛhye anwo a?” Belemgbunli sonvolɛma ne hanle kɛ, “Bɛtɛyɛle ɛhwee bɛtɛmanle ye.”

⁴ Belemgbunli ne bizale kɛ, “Na nwane a wɔ ɛkɛ ne a?” Mekɛ ne anu ala ɛnee Heeman ɛra suakunlu ɛkɛ ne alie ne anwo kɛ ɔbaha Mɔdekae ɛhunlɛ nwo edwɛkɛ yeahile ye. Ɛnee Heeman ɛziezie ɛleka mɔɔ bɛbazinze Mɔdekae bɛahu ye la ɛwie.

⁵ Sonvolɛma ne hanle hilele belemgbunli ne kɛ, “Heeman a wɔ ɛkɛ a, na ɔkulo kɛ ɔnwu wɔ.” Belemgbunli ne zele kɛ, “Bɛze ye kɛ ɔrɛla.”

⁶ Heeman wolole sua ne anu ala la, belemgbunli ne bizale ye kɛ, “Duzu debie yɛɛ ɔwɔ kɛ bɛyɛ bɛmaa sonla mɔɔ belemgbunli anye ɛlie ɔ nwo na ɔkulo kɛ ɔdi ye eni la a?” Heeman hanle ye ɔ ti anu kɛ, “Ɛnee nwane ala bɔbɔ yɛɛ belemgbunli kɛli ye eni kɛdɛla me a? Medame ala ɔ!”

^7-8 Na Heeman hanle kɛ, “Saa belemgbunli kulo kɛ ɔwula awie anyunlunyia a, ɛnee ɔmaa bɛva belemgbunli adɛladeɛ mɔɔ ɛdawɔ wɔwula ye ɛlɛ la bɛrɛla, bɛva ɛkpɔnwɔ mɔɔ belemgbunli ɛdɛnla zolɛ na bɛzoa ye belemgbunli kyɛlɛ la bɛrɛla,

⁹ na bɛva adɛladeɛ ne mɔ nee ɛkpɔnwɔ ne bɛmaa belemgbunli mgbanyima ne mɔ mɔɔ di munli la anu ko. Akee maa kpanyinli zɔhane ɛziezie sonla ne mɔɔ belemgbunli kulo kɛ ɔdi ye eni la, ɔva ye ɔdɛnla ɛkpɔnwɔ ne azo, na ɔva ye ɔdudu gua wɔ suakpole ye azo ɛleka wienyi ne mɔɔ bɛyia la, na ɔli ɔ nyunlu ɔbɔ nolo kɛ, ‘Kɛ ɔwɔ kɛ bɛyɛ sonla ne mɔɔ belemgbunli kulo kɛ ɔwula ye anyunlunyia la ɛne!’ ”

¹⁰ Na belemgbunli ne zele Heeman kɛ, “Ka ɛ nwo kɔva belemgbunli adɛladeɛ ne mɔ bie nee ɛkpɔnwɔ, kɛmɔ ɛdawɔ wɔha la, na yɛ mɔɔ wɔha la maa Dwuunli Mɔdekae mɔɔ de suakunlu ɛke anuhɔlɛ ne la. Debie biala mɔɔ wɔha la, mmagyakyi bie nuhua.”

¹¹ Yemɔti Heeman hɔvale adɛladeɛ ne nee ɛkpɔnwɔ ne. Ɔzieziele Mɔdekae, ɔvale ye ɔdɛnlanle ɛkpɔnwɔ ne azo na ɔvale ye ɔdudule gua wɔ suakpole ne azo ɛleka wienyi ne mɔɔ ɔyɛ a bɛyia la, ɔbɔle nolo kɛ, “Kɛ ɔwɔ kɛ bɛyɛ sonla ne mɔɔ belemgbunli kulo kɛ ɔwula ye anyunlunyia la ɛne!”

¹² Akee Mɔdekae ziale hɔdɛnlanle ɔ bo zo ne wɔ belemgbunli ne anuhɔlɛ ne. Na Heeman hedale ɔ ti zo na ɔvale nyane nee nyiane ɔhɔle sua nu ndɛndɛ.

¹³ Heeman hanle mɔɔ ɛzi ɔ nwo zo la amuala hilele ɔ ye Zilɛhye nee ɔ gɔnwo mɔ amuala. Na ye menli ne mɔɔ tu ye folɛ la nee ɔ ye Zilɛhye zele ye kɛ, “Saa Mɔdekae mɔɔ kɛkala wɔbɔ ɔ bo kɛ ɛlɛtu ɛtɔ ɔ nyunlu la le Dwuunli ɛdeɛ a, ɛnee noko ɛnrɛhola ye, ɔbali ɛ nwo zo konim.”

Bɛku Heeman

¹⁴ Mɔɔ Heeman agɔnwo mɔ nee ɔ ye anloa wɔ zolɛ bɛ nee ye ɛlɛtendɛ la, yɛɛ belemgbunli ne sonvolɛma rale a, na bɛvale ye bɛ nee ye hɔle ɛkponle ne mɔɔ Ɛseta ɛdo ɛmaa belemgbunli ne la abo.