Dw 15 - BAEBOLO ANZƐƐ BULUKU NWUANZANWUANZA

Gyisɛse a le vanye baka kpalɛ ne a

¹ “Mame a mele vanye baka kpalɛ ne a, yɛɛ Egya a le tola ne amenle a.

² Me sa ngane biala mɔɔ ɛnzo ma la, ɔkpane ye ɔto, na ɔsiezie ngane ne mɔ mɔɔ so ma la, amaa bɛazo ma dɔɔnwo.

³ Ngilehilelɛ mɔɔ meva memaa bɛ la ɛziezie bɛ ɛwie.

⁴ Bɛhɔ zolɛ bɛdɛnla me nu, na medame mendɛnla bɛ nu. Baka ɛhane ngome ɛngola ɛnzo ma; saa ɔwɔ vanye baka ne anwo a yɛɛ ɔso ma a. Zɔhane ala yɛɛ bɛdabɛ noko bɛnrɛhola bɛnrɛyɛ Nyamenle ɛhulolɛdeɛ ne a, kyesɛ bɛmeta me nwo kɛ baka ngane la.

⁵ “Mame a mele vanye baka ne a, yɛɛ bɛmɛ a bɛle ye ngane ne mɔ a. Mɔɔ kɛdɛnla me nu na menwɔdɛnla ye nu la bazo ma dɔɔnwo; ɔluakɛ saa menle nu a bɛ ngome bɛnrɛhola ɛhwee yɛ.

⁶ Awie biala mɔɔ andɛnla me nu la bɛfuandi ye bɛto kɛ baka ɛhane mɔɔ bɛpɛ la; ɔwe na ɔkyengye. Mbaka ngane mɔɔ le zɛhae la, bɛboɔboa bɛ nloa na bɛfuandi bɛ bɛgua senle nu bɛyela bɛ.

⁷ Saa bɛde me nu na me edwɛkɛ ne de bɛ nu a, ɛnee bɛbiza debie biala mɔɔ bɛkulo la, na bɛ sa kɛha ye.

⁸ Saa bɛyɛ Nyamenle ɛhulolɛdeɛ a, ɛnee bɛlɛye Egya anyunlunyia bɛahile; na ye zɛhae azo a bɛlua a bɛkɛhile kɛ bɛle me ɛdoavolɛma a.

⁹ Mekulo bɛ kɛ mɔɔ Selɛ ne kulo me la; bɛdɛnla me ɛhulolɛ ne anu.

¹⁰ Saa bɛdi me mɛla ne mɔ azo a ɛnee bɛde me ɛhulolɛ ne anu, kɛmɔ meli Selɛ ne mɛla zo na mede ye ɛhulolɛ ne anu la.

¹¹ “Meha ɛhye mehile bɛ, amaa me fɛlɛkolilɛ adɛnla bɛ nu na bɛdabɛ noko bɛ fɛlɛkolilɛ ne ali munli.

¹² Me mɛla ne a le ɛhye: Bɛhulo bɛ nwo ngoko ngoko, kɛmɔ mehulo bɛ la.

¹³ Ɛhulolɛ kpalɛ mɔɔ sonla kɛnyia ye wɔ ɔ gɔnwo mɔ anwo la a le kɛ ɔkɛva ye ngoane ɔkɛdo aze ɔkɛmaa bɛ.

¹⁴ Saa bɛyɛ mɔɔ meha mehile bɛ la a, ɛnee bɛle me gɔnwo mɔ.

¹⁵ Menvɛlɛ bɛ sonvolɛma bieko, ɔboalekɛ sonvolɛ biala ɛnze mɔɔ ɔ menle ne ɛlɛyɛ la. Mefɛlɛ bɛ me gɔnwo mɔ, ɔboalekɛ mɔɔ mendele ye wɔ Egya ɛkɛ ne la meha ye kpokpoti mehile bɛ.

¹⁶ Tɛ bɛmɛ a bɛnleanle bɛyele me a; medame a memkpale nu menyele bɛ a, yɛɛ mezoa bɛ kɛ bɛhɔlua Nyamenle edwɛkɛ ne bɛmaa ɔzo ma dɔɔnwo kpalɛ mɔɔ ɛmkpɔlɔ ɛlɛ la a. Yemɔti Selɛ ne bava debie biala mɔɔ bɛkɛbiza ye wɔ me duma nu la amaa bɛ.

¹⁷ Ɛhye ati, mɔɔ meka meahile bɛ la a le kɛ; bɛhulo bɛ nwo ngoko ngoko.

Ewiade ɛkpɔlɛ

¹⁸ “Bɛhakye kɛ saa ɛtane ewiade ye kpɔ bɛ a, ɛnee bɛnwu ye kɛ yelumua yekpɔ me.

¹⁹ Saa bɛle ewiade ɛdeɛ a ɛnee ewiade bahulo bɛ kɛ ɔ ti anwo ɛdeɛ la. Na mekpa nu meye bɛ mevi ɛtane ewiade ɛhye anu amra avinli, yemɔti bɛnle ɛtane ewiade ɛdeɛ. Ɛhye ati ɛtane ewiade ɛhye anu amra kpɔ bɛ.

²⁰ Bɛhakye mɔɔ meha mehile bɛ la; ‘Akɛlɛ ɛnle kpole ɛndɛla ɔ menle.’ Saa bɛyɛle me kpɔdekpɔde a ɛnee bɛbayɛ bɛdabɛ noko kpɔdekpɔde; saa bɛlile me ngilehilelɛ zo a, ɛnee bɛbali bɛdabɛ noko bɛ ngilehilelɛ zo.

²¹ Bɛbayɛ bɛ ɛhye mɔ amuala ɔboalekɛ bɛmɛ, bɛle me ɛdeɛ, na ɛtane ewiade ɛnze mɔɔ zoanle me la.

²² Saa meamba meammanga edwɛkɛ ne meangile bɛ a anrɛɛ bɛnli ɛtane nwo fɔlɛ; kɛkala, bɛnlɛ bɛ ɛtane nwo nyelebɛnloa biala.

²³ Awie mɔɔ kpɔ me la kpɔ Egya.

²⁴ Saa meambanyɛ nwanwane gyima ɛhye mɔ mɔɔ awie ɛtɛyɛle bie ɛlɛ la wɔ bɛ avinli a, anrɛɛ bɛnli ɛtane nwo fɔlɛ; na kɛkala, bɛnwu mɔɔ menyɛle la yɛɛ bɛkpɔ me nee Egya a.

²⁵ Na kɛ ɔwɔ kɛ ɔba ye noko ala la ɛne, amaa mɔɔ bɛhɛlɛ ye wɔ bɛ mɛla ne anu la ayɛ nɔhalɛ kɛ, ‘Mgbane gyɛne ne ala yɛɛ bɛkpɔle me a.’

²⁶ “Boavolɛ ne mɔɔ le Sunsum ne, mɔɔ ye nɔhalɛ ne mɔɔ fane Nyamenle anwo la finde, na ɔvi Selɛ ne ɛkɛ ne la bara. Mebazoa ye wɔ bɛ nwo meamaa ɔvi Selɛ ne ɛkɛ yearaha me nwo edwɛkɛ yeahile bɛ.

²⁷ Na bɛdabɛ noko bɛbaha me nwo edwɛkɛ, ɔboalekɛ ɔvi mɔlebɛbo ne amuala, bɛ nee me a lua a.