Emɔzo Buluku ne 7 - BAEBOLO ANZƐƐ BULUKU NWUANZANWUANZA

Abɛbɛ nwo ɛnyelɛzodeɛnwunlɛ

¹ Awulae Nyamenle ne yele ninyɛne hilele me wɔ ɛnyelɛzodeɛnwunlɛ nu. Wɔ ɛnyelɛzodeɛnwunlɛ ne anu, menwunle kɛ mɔɔ bɛpɛle belemgbunli ne ndile ne mɔɔ nyɛmoa di la bɛwiele la, Ɛdɛnkɛma yele abɛbɛ tɔka wɔ mekɛ mɔɔ ɛnee bɔ zo mɔɔ ndile ne ɛbɔ ɔ bo kɛ ɔfifi bieko la.

² Wɔ me ɛnyelɛzodeɛnwunlɛ ne anu, menwunle kɛ abɛbɛ ne mɔ ɛli nya nee ndile amolɛ biala mɔɔ wɔ azɛlɛ ne azo la, na menganle kɛ, “O Awulae Nyamenle, mebodo wɔ, fa wɔ menli ne mɔ ɛtane kyɛ bɛ! Kɛ ɔkɛyɛ na Yizilayɛma adɛnla ngoane nu ɛ? Bɛ nwo anzo!”

³ Ɛdɛnkɛma hakyile ye adwenle na ɔhanle kɛ, “Mɔɔ ɛnwunle ye la ɛnrɛyɛ zɔhane.”

Senle nwo ɛnyelɛzodeɛnwunlɛ

⁴ Eza Awulae Nyamenle ne yele ɛhye hilele me. Menwunle kɛ Ɛdɛnkɛma ɛlɛboɔboa ɔ nwo ava senle adea ye menli ne. Senle ne yelale nyevile ne na ɔbɔle ɔ bo kɛ ɔyela azɛlɛ ne.

⁵ Na menganle kɛ, “O Awulae Nyamenle, mebodo wɔ, gyakyi! Kɛ ɔkɛyɛ na Yizilayɛma adɛnla ngoane nu ɛ? Bɛ nwo anzo!”

⁶ Ɛdɛnkɛma hakyile ye adwenle na ɔhanle kɛ, “Ɛhye noko ɛnrɛyɛ zɔhane.”

Ɛzuzunyɛma nwo ɛnyelɛzodeɛnwunlɛ

⁷ Awulae yele debie bieko hilele me. Menwunle kɛ Awulae gyi bane bie mɔɔ bɛvale ɛzuzunyɛma bɛdole nwo a bɛdole la anwo, na ɔlɛ ɛzuzunyɛma ne ɔ sa nu.

⁸ Na Ɛdɛnkɛma zele me kɛ, “Emɔso, duzu a ɛnwu ye a?” Membuale ye kɛ, “Menwu ɛzuzunyɛma” Na ɔzele me kɛ, “Melɛfa ɛhye meahile kɛ me menli ne le kɛ bane mɔɔ ɛndenrɛ la. Me adwenle mɔɔ meva kɛ metea bɛ la, menrɛhakyi ye bieko.

⁹ Ɛleka ne mɔ mɔɔ Ayezeke zonlenle la, mebazɛkye bɛ. Mebazɛkye Yizilayɛ ɛleka nwuanzanwuanza ne mɔ. Mebamaa belemgbunli Gyɛlɔbowam abo zo amra amuala awu dadeɛ nloa.”

Emɔso nee Amazaya

¹⁰ Amazaya, Bɛtɛle sɛlɛvolɛ ne hɔdoanle Emɔso hilele Yizilayɛ Belemgbunli Gyɛlɔbowam kɛ, “Emɔso ɛlɛmaa menli ne ɛ nwo adwenle ɛtane. Ye ngehanleɛ ne mɔ ɛbo maanle ne anwo zo.

¹¹ Ye edwɛkɛ mɔɔ ɔka la ɛne: ‘Gyɛlɔbowam bawu dadeɛ nloa, yɛɛ bɛbahye Yizilayɛma bɛavi bɛ maanle nu bɛ nee bɛ ahɔ nlɔnu.’ ”

¹² Akee Amazaya hanle hilele Emɔso kɛ, “Nyamenle kpɔmanvolɛ, wɔha bie a yeyɛ boɛ! Sia kɔ Dwuda, kɔbɔ wɔ Nyamenle nrɛlaleɛ ne nolo wɔ nehane na di nwolɛ aleɛ.

¹³ Mmaka Nyamenle nrɛlaleɛ bieko wɔ Bɛtɛle ɛke. Ɛke a le belemgbunli ne ɛleka nwuanzanwuanza ne a, yɛɛ ɔle maanle ne ɛzonlenlɛ sua.”

¹⁴ Na Emɔso buale Amazaya kɛ, “Menle Nyamenle kpɔmanvolɛ, yɛɛ menle Nyamenle kpɔmanvolɛ ra. Meka mboane, yɛɛ feege mbaka ɛnleanlɛ gyima a meyɛ a.

¹⁵ Na Ɛdɛnkɛma manle mengyakyile mboaneneavolɛ gyima ne, na ɔzoanle me kɛ mengɔnga mɔɔ kenle bie bazi la anwo edwɛkɛ mengile ye menli Yizilayɛma.

¹⁶ Yemɔti bɛdie mɔɔ Ɛdɛnkɛma ɛlɛka la. Bɛdua me kɛ memmaka Nyamenle nrɛlaleɛ ne mɔɔ tia Yizilayɛma la, yɛɛ memmabɔ Nyamenle edwɛkɛ ne mɔɔ tia Ayezeke abo zo amra la nolo mekile bɛ.

¹⁷ Yemɔti, Amazaya, Ɛdɛnkɛma se menga mengile wɔ kɛ, ‘Ɛ ye bayɛ tuutuu ala suakpole ye azo, yɛɛ ɛ mra mrenya nee ɛ mra mraalɛ badɔ dadeɛ nloa. Bɛbahyɛ wɔ azɛlɛ ne bɛamaa awie mɔ, yɛɛ ɛdawɔ mumua ne ɛbawu menli mɔɔ ɛnze Nyamenle la maanle nu. Na Yizilayɛma ɛdeɛ, bɛbahye bɛ bɛ nee bɛ avi bɛ maanle ye anu ahɔ nlɔnu.’ ”