Emɔzo Buluku ne 6 - BAEBOLO ANZƐƐ BULUKU NWUANZANWUANZA

Yizilayɛ Ɛzɛkyelɛ

¹ Munzule ɛha bɛdabɛ mɔɔ bɛ nwo ɛdɔ bɛ wɔ Zayɔn, nee bɛdabɛ mɔɔ bɛdwenle kɛ bɛ nwo le kɔlɔnwo wɔ Samɛlea la, bɛmɛ mgbolema mɔɔ bɛwɔ Yizilayɛ, mɔɔ menli ba bɛ ɛkɛ babiza moalɛ la!

² Bɛhɔnlea suakpole Kaleni. Akee bɛhɔ suakpole Heemate maanzinli ne anu na bɛtele zolɛ bɛhɔ Filisitia suakpole Gate azo. Ɛnee bɛle kpalɛ bɛtɛla Dwuda nee Yizilayɛ arelemgbunli maanle ne mɔ ɔ? Ɛnee bɛ maanzinli ne le kpalɛ tɛla bɛ maanzinli ɛdeɛ ne ɔ?

³ Bɛnlie bɛndo nu kɛ munzule kenle ne ɛbikye, na konle ala a bɛtwe bɛba ɔ?

⁴ Munzule ɛha bɛdabɛ mɔɔ bɛda ɛzɛlɛ ɛkpa zo na bɛtenrɛdenrɛ bɛ nwo wɔ mbia ndendenle nu bɛdi mboane nee nlankɛ la.

⁵ Bɛkulo kɛ bɛyɛ edwɛne, kɛmɔ Devidi yɛle la, na bɛbɔ wɔ bɛ getaa ne mɔ azo.

⁶ Bɛno nwanye wɔ ahyɛnze bonkuma nu na bɛgua anatele evuanlɛ, na bɛnzu Yizilayɛ nee ye ɛzɛkyelɛ.

⁷ Yemɔti bɛdabɛ a bɛbalumua bɛahye bɛ bɛahɔ nlɔnu a. Bɛ ɛvoyialilɛ nee bɛ ɛkponledolɛ ne mɔ kɔsɔɔti bara awieleɛ.

⁸ Ɛdɛnkɛma, Tumivolɛ Nyamenle ne se, “Medame Awulae Nyamenle, meka me ngome me nwo kɛ: Mekyi Yizilayɛma mgbanyizonleyɛlɛ ne, mekpo bɛ azua mgbole ne mɔ mɔɔ bɛbɔ nwolɛ bane la. Mebava bɛ suakpole ne nee zolɛ debie biala meamaa kpɔvolɛma!”

⁹ Saa menli bulu ka awuke ko anu a bɛbawu.

¹⁰ Awie mɔɔ kɛwu la anwo sonla, ahenle ne mɔɔ ɛlɛnea yeamaa bɛayela funli ne la baye funli ne wɔ sua ne anu avinde, na yeadea nu yeavɛlɛ awie mɔɔ wɔ sua ne anu la kɛ, “Awie bieko tɛbɔ ɛkɛ ɔ?” Ahenle babua kɛ, “Kyɛkyɛ!” Akee funli ne anwo sonla ne baha kɛ, “Yɛ koonwu! Ɔnle kɛ yɛbɔ Ɛdɛnkɛma duma bɔbɔ.”

¹¹ Saa Ɛdɛnkɛma ka ye tumi edwɛkɛ ne a, azua mgbole nee ngyikyi kɔsɔɔti badwulu agua.

¹² Asoo mgbɔnwɔ kola wuluwulu bodane zo? Asoo menli kola fa nlankɛ nyinli so ɛya wɔ nyevile nye? Noko bɛmɛ, bɛmaa pɛlepɛlelilɛ ɛhakyi pɔezen, yɛɛ bɛmaa tenleneyɛlɛ ɛyɛ ɛnwonle.

¹³ Bɛfa bɛtu bɛ nwo kɛ bɛva sua Lodɛbaa aze. Bɛfa bɛtu bɛ nwo kɛ, “Yɛlua yɛdayɛ yɛ anwosesebɛ zo yɛva Kaaneeyem yɛyɛ yɛ ɛdeɛ.”

¹⁴ Ɛdɛnkɛma, Tumivolɛ Nyamenle ne se, “Yizilayɛma, bɛnlea, mebamaa maanle gyɛne arava bɛ aze. Bɛbasisi bɛ, ɔvi Heemate Ademgbolezo mɔɔ wɔ sɔlɔ la toonwo yeahɔdwu Alaba Bɔnza wɔ nyiakɛ.”