Emɔzo Buluku ne 5 - BAEBOLO ANZƐƐ BULUKU NWUANZANWUANZA

Bɛnlu bɛ nwo

¹ O Yizilayɛma, bɛdie awolɛyelɛ edwɛne ɛhye mɔɔ meto meagua bɛ ti zo la:

² “Belamunli Yizilayɛ ɛdɔ aze, Ɔnrɛdwazo bieko ɛlɛ! Bɛkpo ye, wɔ ɔdaye ye azɛlɛ zo, Awie biala ɛnrɛkpogya ye zo.”

³ Awulae Nyamenle ne se, “Suakpole mɔɔ vale ɛlɔnema apenle ko hɔle la bava ɛya ko ala a azia ara a; yɛɛ suakpole mɔɔ vale ɛya ko hɔle la, bulu ala a bazia ara Yizilayɛ a.”

⁴ Ɛdɛnkɛma ɛlɛse Yizilayɛma kɛ, “Bɛkpondɛ me bo zo na bɛkɛnyia ngoane.

⁵ Bɛmmakɔ Biyɛhyiba bɛkɔsonle. Bɛmmakpondɛ me wɔ Bɛtɛle, Bɛtɛle bayɛ mgbane. Bɛmmakɔ Gelegale noko, ɔluakɛ bɛbahye ye menli ne kɔsɔɔti bɛahɔ nlɔnu.”

⁶ Bɛkpondɛ Ɛdɛnkɛma abo zo, na bɛnyia ngoane. Saa bɛamkpondɛ ɔ bo zo a, ɔbayɛ senle yeazɔ Dwosefi sua nu, yeayela Bɛtɛle, na awie ɛnrɛhola ye nua ɛlɛ.

⁷ Bɛmɛ, bɛmaa pɛlepɛlelilɛ yɛ ɛnwonle, na bɛtietia tenleneyɛlɛ zo.

⁸ Mɔɔ bɔle nwɔlɔra Nsuu nee Apea Nsa, na ɔmaa awozinli kakyi alehyenlɛ, ɔmaa alehyenlɛ du yɛ aledwolɛ; yemɔ mɔɔ ɔtwe nyevile nu nzule ɔkɔ na ɔmaa ɔkakyi ezule ɔtɔ azɛlɛ ye azo la, ye duma a le Ɛdɛnkɛma.

⁹ Yemɔ yɛɛ ɔsɛkye anwosesebɛma na ɔbubu bɛ aranemgbole ɔgua a.

¹⁰ Bɛkyi awie biala mɔɔ twi sonla mɔɔ ɛnli pɛlepɛle la anyunlu, yɛɛ bɛngulo awie biala mɔɔ ka nɔhalɛ la edwɛkɛ.

¹¹ Yemɔti, kɛmɔ bɛsisi ehyianvolɛma na bɛwua bɛ hwiiti ne mɔ la ati bɛva awolɛ bɛsisi azua ngɛnlɛma, noko bɛnrɛla nuhua, yɛɛ bɛyɛ vanye egyinli ngɛnlɛma, noko bɛnrɛnlo bɛ ma ne mɔ anu nwanye.

¹² Ɔluakɛ meze bɛ mɛladonlɛ mgbole ne mɔ nee kɛ bɛ ɛtane ne mɔ mgbole si de la. Bɛkile tenlenema nyane, bɛdie ndoloboa, na bɛdi bɛtia ehyianvolɛma.

¹³ Yemɔti mɔɔ ze nrɛlɛbɛ la bayɛ koonwu wɔ mekɛ zɛhae anu, ɔluakɛ ɔle munzule mekɛ.

¹⁴ Yɛ mɔɔ le kpalɛ la, mmayɛ mɔɔ le ɛtane la, amaa wɔadɛnla ngoane nu, na Ɛdɛnkɛma, Tumivolɛ Nyamenle ne nee wɔ alua, kɛmɔ ɛdawɔ wɔha la.

¹⁵ Kyi mɔɔ le ɛtane la, na kulo mɔɔ le kpalɛ la, na nea maa nɔhalɛlilɛ ɛrɛla edwɛkɛlilɛ ɛleka ne mɔ; wɔannea a Ɛdɛnkɛma, Tumivolɛ Nyamenle ne kɛnwu Dwosefi abo zo amra ne mɔɔ ɛha la anwunvɔne.

¹⁶ Yemɔti Ɛdɛnkɛma, Tumivolɛ Nyamenle ne, Awulae se, “Menli bazu, aye awolɛ wɔ suakpole ne ɛleka kpatawienyi ne nee guabile ne mɔ azo. Bɛbavɛlɛ ɛyazonlɛma kɛ bɛboka menli mɔɔ ze awolɛ ye kpalɛ kpalɛ la anwo bɛmaa bɛzu mɔwuamra.

¹⁷ Ɛzunlɛ bade vanye egyinli ne mɔ kɔsɔɔti anu, ɔboalekɛ melɛba mearadea bɛ.” Ɛdɛnkɛma a ɛdendɛ la.

¹⁸ Munzule ɛha bɛdabɛ mɔɔ bɛ kunlu a anrɛɛ Ɛdɛnkɛma kenle ne ɛdwu la! Duzu nvasoɛ a kenle zɔhane bayɛ amaa bɛ a? Ɔluakɛ ɔle awozinli kenle, ɔnle kenle mɔɔ anu te a.

¹⁹ Ɔbayɛ kɛ sonla mɔɔ ɛnriandi awenade na yehɔyia bedi la! Anzɛɛ sonla mɔɔ ɛhɔ ye sua nu, ɔhisa bane ne na yeva ɔ sa yedo bane ne azo na ɛwɔlɛ ɛha ye la!

²⁰ Ɛdɛnkɛma kenle ne le awozinli, ɔnle wienyi; ɔle kabii, nuhua ɛnde.

²¹ Ɛdɛnkɛma se, “Mekyi yɛɛ mekpo bɛ nyamenlezonlenlɛ ɛvoyia ne mɔ; yɛɛ me nye ɛnlie bɛ ɛzonlenlɛ ne mɔ anwo.

²² Bɛfa bɛ ɛyelalɛ azubɔdeɛ nee bɛ ma azubɔdeɛ ne mɔ bɛba bɔbɔ ɛdeɛ, noko menrɛlie, yɛɛ menrɛnlea bɛ nane dɔlera anzonudwolɛ azubɔdeɛ ne mɔ bɔbɔ.

²³ Bɛva bɛ alɛra edwɛne ne mɔ mɔɔ bɛlɛto la bɛhɔ nehane; mengulo kɛ mete bɛ getaa ne mɔ ane bɔbɔ.

²⁴ Kɛ bɛkɛyɛ ɛhye mɔ la, bɛmaa pɛlepɛlelilɛ ɛze kɛ azudenle, na tenleneyɛlɛ ɛze kɛ azule mɔɔ ɛnsesa ɛlɛ la.

²⁵ “Yizilayɛma, ɛvolɛ abulanla ne mɔɔ menlile bɛ ti wɔ fienemgbole ne anu la, bɛbɔle azu bɛmanle me anzɛɛ bɛvale azubɔdeɛ bɛrɛlɛle me ɔ?

²⁶ Na kɛkala, kɛmɔ bɛsonle bɛ Bozonle Belemgbunli Sakɛte, nee bɛ Ɛwɔlɔra Bozonle Kaewan ne mɔ ananze ne mɔ, mɔɔ bɛdabɛ bɛyɛ la,

²⁷ mebava bɛ meahɔ nlɔnu wɔ Dɛmasekɛse anzi lɔ,” kɛ Ɛdɛnkɛma, mɔɔ ye duma a le Tumivolɛ Nyamenle la se la ɛne.