Emɔzo Buluku ne 3 - BAEBOLO ANZƐƐ BULUKU NWUANZANWUANZA

¹ O Yizilayɛma, bɛdie edwɛkɛ mɔɔ Ɛdɛnkɛma ɛha ɛtia bɛmɛ maanle mumua ko mɔɔ ɔyele bɛ ɔvile Yigyibiti la.

² Ɔse, “Maanle maanle mɔɔ wɔ azɛlɛ ye azo la kɔsɔɔti, ɛdawɔ ɛ ngomekye ala yɛɛ meze wɔ na menlea wɔ gyɛlɛɛnye a, yemɔti mebadea wɔ, wɔ wɔ amumuyɛ ne mɔ ati.”

Nyamenle kpɔmanvolɛ ne gyima

³ Menli nwiɔ ɛngola ɛmbɔ nu ɛndu adenle, kyesɛ bɛka bɛsie.

⁴ Awenade ɛmkpo kpɔkɛ nu, kyesɛ yenwu nane mɔɔ ɔkye ye yeali la. Awenade ralɛ ɛnzu mgbane wɔ ye tunli ne anu, kyesɛ yenyia debie mɔɔ ɔdi la.

⁵ Asoo anloma to ɛhane wɔ azɛlɛ nwo, wɔ mekɛ mɔɔ bɛtɛsuale ye ɛhane la? Asoo ɛhane fuandi, wɔ mekɛ mɔɔ debie ɛtɛkanle ye la?

⁶ Asoo bɛwu aweɛne tendenle ne anu wɔ suakpole ne azo a menli ahonle ɛndu? Asoo munzule to suakpole, kyesɛ Ɛdɛnkɛma yɛɛ ɛyɛ a?

⁷ Nɔhalɛ, Awulae Nyamenle ɛnyɛ debie wɔ mekɛ mɔɔ ɔtɛyele ɔtɛkilele ye sonvolɛma, Nyamenle kpɔmanvolɛma la.

⁸ Awenade ne ɛkpo, nwane a ɛzulolɛ ɛnga ye a? Awulae Nyamenle ne ɛdendɛ, nwane a kɛkpo kɛ ɔnrɛha ye nrɛlaleɛ ne a?

Samɛlea ɛbɔlɛ

⁹ Bɛbɔ ye nolo bɛhile bɛdabɛ mɔɔ bɛwɔ Yigyibiti nee Ahyedɔdo aranemgbole ne mɔ anu la kɛ, “Bɛboɔboa bɛ nloa wɔ Samɛlea awoka ne mɔ azo, na bɛnlea ninyɛmunli mɔɔ bɛlɛyɛ, nee nzisi mɔɔ bɛlɛdi wɔ zolɛ la.”

¹⁰ Ɛdɛnkɛma se, “Menli ɛhye mɔ ɛnze boɛlilɛ deɛ holɛ yɛɛ bɛva konle nee awule ninyɛne bɛyiyi bɛ aranemgbole ne mɔ.

¹¹ Yemɔti medame Awulae Nyamenle mese: Kpɔvolɛma babɔ ayia bɛ azɛlɛ ne, abubu bɛ nwo banebɔlɛ ne na bɛave bɛ aranemgbole ne mɔ anu ninyɛne kɔsɔɔti.”

¹² Ɛdɛnkɛma se, “Kɛmɔ awenade kye boane na mboaneneavolɛ ne kɔ ye ɛlielɛ a debie mɔɔ ɔnwu ye ala la a le ye ndwɛlɛ nwiɔ anzɛɛ ɔ nzo ko la, zɔhane ala yɛɛ Yizilayɛma mɔɔ de Samɛlea la ɛlielɛ bayɛ a; bɛbanwu ebia mɔɔ bɛda nu la ebule na bɛanwu ɛkpa sinli.

¹³ Bɛdie, na bɛbɔ Gyekɔbo abo zo amra ne kɔkɔ kɛ, kɛ medame Awulae Nyamenle, Tumivolɛ Ɛdɛnkɛma mese la ɛne:

¹⁴ Kenle mɔɔ menwɔdea Yizilayɛma wɔ bɛ ɛtane ne mɔ ati la, mebazɛkye Bɛtɛle azukponle ne mɔ, na azukponle biala mgbɛne zo nna ne azo kpokpɔkoo ne mɔ babubu agua aze.

¹⁵ Mebabubu bɛ fɔsɛlɛ nee wawaa mekɛ azua ne mɔ. Azua mɔɔ bɛva ɛzɛlɛ bɛziezie nuhua la bagologolo agua; azua mgbole ne mɔ abo zo baminli. Medame Ɛdɛnkɛma a mese a.”