Ɛzoanvolɛma Gyima ne 8 - BAEBOLO ANZƐƐ BULUKU NWUANZANWUANZA

¹ Na Sɔɔlo liele ye ɛhunlɛ ne dole nu. Ɔvi kenle ko ne ala bɛbɔle ɔ bo kɛ bɛyɛ diedima mɔɔ wɔ Gyɛlusalɛm la kpɔdekpɔde. Yemɔti diedima ne amuala zandele; bie mɔ hɔle Dwudiya nee Samɛlea maanzinli ne mɔ anu, na ɔhale ɛzoanvolɛma ne ala.

Sɔɔlo yɛ Asɔne ne kpɔdekpɔde

² Na Nyamenlezonlenlɛma bie mɔ hɔvale Sitivin hɔziele ye na bɛzunle ye kpole kpalɛ.

³ Na Sɔɔlo bɔle mɔdenle ala kɛ ɔkɛzɛkye Asɔne ne. Ɔwolowolole azua nu ɔhɔhwenle mraalɛ nee mrenya mɔɔ ɛzɔ diedi ne anu la na ɔvale bɛ ɔvindele ɔmanle bɛguale bɛ efiade.

Bɛka Edwɛkpa ne wɔ Samɛlea

⁴ Diedima ne bɔle asande la bɛnriandile bɛhɔle azua azua zo na bɛhɔhanle Edwɛkpa ne.

⁵ Felepe hɔle Samɛlea suakpole bie azo hɔhanle Mɛzaya ne anwo edwɛkɛ hilele menli mɔɔ wɔ ɛkɛ ne la.

⁶ Mɔɔ menli ne diele na bɛnwunle nwanwane ninyɛne mɔɔ ɔyɛle la, bɛ muala bɛliele bɛlile,

⁷ ɔluakɛ ɔmanle sunsum ɛtane dɔɔnwo deɛdeanle nu na bɛvile menli somaa ne ala anwo. Menli mɔɔ ɛdwidwe nee abuburama dele kpɔkɛ,

⁸ na suakpole ne azo amra lile fɛlɛko kpole.

⁹ Nrenya bie wɔ suakpole ne azo; bɛfɛlɛ ye Saemɔn. Nrenya ɛhye ɛva ngonyiayelɛ ɛha Samɛlea maanlema ne ɛzulolɛ, na ɔka kɛ ɔdaye ɔle sonlakpole.

¹⁰ Awie biala mɔɔ wɔ maanle ne anu, mgbanyinli nee ngakula muala tie ye. Bɛse, “Sonla ɛhye a le Nyamenle tumi ne mɔɔ bɛfɛlɛ ye ‘Tumi Bedevinli’ la.”

¹¹ Ɔvale ngonyia ɔdanle bɛ nye zo na ɔmanle bɛzulole ye kpalɛ na bɛliele ye bɛlile.

¹² Na mɔɔ bɛdele Edwɛkpa ne mɔɔ fane Nyamenle Belemgbunlililɛ ne anwo nee Gyisɛse Kelaese duma ne mɔɔ Felepe hanle nwolɛ edwɛkɛ la, mraalɛ nee mrenya kɔsɔɔti liele lile na bɛmanle bɛzɔnenle bɛ.

¹³ Saemɔn ɔdaye ɔliele ɔlile na bɛzɔnenle ye. Nzinlii ɔvale ɔ nwo ɔbɔnenle Felepe, na ɔ nee ye luale. Mɔɔ ɔnwunle sɛkɛlɛneɛ nee nwanwane ninyɛne mɔɔ Felepe yɛle la, ɔyɛle ye azibɛnwo kpole.

¹⁴ Ɛzoanvolɛma ne dele wɔ Gyɛlusalɛm kɛ menli mɔɔ wɔ Samɛlea la ɛzɔ Nyamenle edwɛkɛ ne anu la bɛzoanle Pita nee Dwɔn wɔ lɔ.

¹⁵ Bɛhɔle la bɛzɛlɛle Sunsum Nwuanzanwuanza ne bɛmanle diedima ne mɔ.

¹⁶ Ɔluakɛ ɛnee bɛzɔne bɛ wɔ Awulae Gyisɛse duma nu ɛdeɛ, noko Sunsum Nwuanzanwuanza ne ɛtɛbale bɛ nwo zo.

¹⁷ Pita nee Dwɔn vale bɛ sa guale menli ne mɔ ati zo zɛlɛle, na bɛnyianle Sunsum Nwuanzanwuanza ne.

^18-19 Mɔɔ Saemɔn nwunle kɛ ɛzoanvolɛma ne fa bɛ sa gua menli ti zo a bɛnyia Nyamenle Sunsum ne la, ɔhanle kɛ, “Bɛlie ezukoa na bɛmaa medame noko tumi ɛhye bie, amaa awie biala mɔɔ menwɔva me sa menwɔgua ɔ ti zo la anyia Sunsum Nwuanzanwuanza ne bie.”

²⁰ Na Pita buale ye kɛ, “Abule ɛbu wɔ nee wɔ ezukoa ne amuala, kɛ ɛkɛdwenle kɛ bɛfa ezukoa a bɛtɔ Nyamenle ahyɛlɛdeɛ a!

²¹ Ɛyɛ yɛ gyima ɛhye bie a ɔnrɛyɛ boɛ, ɔluakɛ ɛnli nɔhalɛ wɔ Nyamenle anyunlu.

²² Zɔhane ati, nu ɛ nwo wɔ wɔ amumuyɛ adwenle ɛhye anwo, na sɛlɛ Awulae kɛ saa ɔyɛ na ɔkɛyɛ boɛ a, ɔva wɔ ɛtane ɔhyɛ wɔ kɛ wɔdwenle zɔhane a.

²³ Ɔluakɛ menwu kɛ ɛle anyebolo kpole kpalɛ na ɛtane ɛbɔ wɔ kpanwu.”

²⁴ Saemɔn zele Pita nee Dwɔn kɛ, “Mekpa bɛ kyɛlɛ, bɛzɛlɛ Awulae bɛmaa me, amaa mɔɔ bɛha la biala anzi me nwo zo.”

²⁵ Nzinlii Pita nee Dwɔn hanle Edwɛkpa ne, lile Awulae anwo daselɛ, na bɛziale bɛhɔle Gyɛlusalɛm. Bɛkɔ la bɛvale Samɛlea namunamu ne mɔ dɔɔnwo azo bɛhanle Edwɛkpa ne.

Felepe nee Yiteyopeanli kpanyinli ne

²⁶ Awulae soanvolɛ dendɛle zele Felepe kɛ, “Kɔ nyiakɛ nehane, wɔ Gyɛlusalɛm nee Gaza adenle ne azo.” (Adenle ɛhye la ɛsɛlɛ zo; ɛnɛ bɛnva zolɛ.)

^27-28 Na Felepe zile nu hɔle. Ɛnee Yiteyopeanli kpanyinli bie mɔɔ le abɔlɔba kpanyinli mɔɔ nea Yiteyopea Belemgbunli Raalɛ ne gya zo la ɔdaye ɔlua adenle ne azo. Ɔhɔle Nyamenle ɛzonlenlɛ wɔ Gyɛlusalɛm na ɔde ye ehwili nu yezia ɔlɛkɔ ye sua zo. Mɔɔ ɔde ehwili ne anu la ɛnee ɔlɛkenga Nyamenle kpɔmanvolɛ Ayezaya nwoma ne.

²⁹ Sunsum ne zele Felepe kɛ, “Twe bikye ehwili ne.”

³⁰ Yemɔti Felepe nriandile hɔle ehwili ne anwo, na ɔdele kɛ ɔlɛkenga Nyamenle kpɔmanvolɛ Ayezaya nwoma ne, na ɔbizale ye kɛ, “Asoo ɛte mɔɔ ɛlɛkenga la abo?”

³¹ Nrenya ne buale ye kɛ, “Na kɛ mesi meyɛ mete ɔ bo ɛ? Kyesɛ awie kilehile nu kile me.” Na ɔmanle Felepe radɛnlanle ehwili ne anu wɔ ɔ nwo ɛkɛ ne.

³² Ɛleka mɔɔ ɛnee ɔlɛkenga la se, “Ɔle kɛ boane mɔɔ bɛ nee ye ɛhɔ ahunleɛ, anzɛɛ boaneralɛ mɔɔ bɛlɛpepɛ ye enrinli la, yeambuke ɔ nloa.

³³ Bɛgolole ɔ nwo, bɛbuale ye mgbɔvondɛne, awie ɛnrɛhola ɔ bo zo amra kile, ɔluakɛ bɛpɛle ye ɛbɛla ne sinli wɔ ewiade ye anu.”

³⁴ Na abɔlɔba ne bizale Felepe kɛ, “Kile ɛhye anu kile me. Nwane anwo edwɛkɛ a Nyamenle kpɔmanvolɛ ne ɛlɛka a, ɔdaye ɔ nwo edwɛkɛ yɛɛ ɔlɛka a anzɛɛ awie gyɛne ɔ?”

³⁵ Na Felepe bɔle ɔ bo wɔ Nyamenle Edwɛkɛ ɛhye azo, na ɔhanle Edwɛkpa ne mɔɔ fane Gyisɛse anwo la ɔhilele ye.

³⁶ Mɔɔ bɛlua adenle zo bɛlɛkɔ la, bɛrale azule bie anloa, na nrenya ne zele Felepe kɛ, “Nea, nzule ɛ! Duzu a si wɔ adenle mɔɔ ɔmaa ɛsɔne me a ɔnyɛ boɛ a?” [

³⁷ Felepe zele ye kɛ, “Saa ɛdie ɛdi bɔkɔɔ wɔ wɔ ahonle nu a, bɛsɔne wɔ a ɔyɛ boɛ.” Ɔbuale ye kɛ, “Ɛhɛe, medie medi kɛ Gyisɛse Kelaese a le Nyamenle Ara ne a.”]

³⁸ Nrenya ne manle ehwili ne gyinlanle, ɔ nee Felepe bɛhɔle azule ne anu na ɔmanle Felepe zɔnenle ye.

³⁹ Mɔɔ bɛvi azule ne anu bɛvole file zo la, Sunsum ne vale Felepe minliminlinle. Nrenya ne annwu ye bieko, na ɔvale fɛlɛko ɔhɔle.

⁴⁰ Felepe hɔvindele Azotɛse na ɔhɔkpɔsale namunamu ne mɔ anu ɔhanle Edwɛkpa ne toonwo ɔradwule Sizalia.