Ɛzoanvolɛma Gyima ne 5 - BAEBOLO ANZƐƐ BULUKU NWUANZANWUANZA

Ananayase nee Safaela

¹ Nrenya ko wɔ ɛkɛ, bɛfɛlɛ ye Ananayase. Ɔ ye bɛfɛlɛ ye Safaela. Bɛdabɛ noko bɛdɔnenle bɛ agyadeɛ mɔɔ bɛlɛ la;

² ɔ nee ɔ ye yɛle adwenle ko, ɔdele ezukoa mɔɔ bɛnyianle ye la bie ɔziele, na ɔvale mɔɔ hale la ɔradole ɛzoanvolɛma ne anyunlu.

³ Pita zele ye kɛ, “Ananayase, duzu ati a wɔmaa Seetan ɛvo ɛ nwo zo na yemaa wɔbɛlɛbɛla Sunsum Nwuanzanwuanza ne na wɔde ezukoa mɔɔ ɛnyianle ye la bie wɔvea ɛ?

⁴ Mɔɔ ɛtɛtɔnenle wɔ agyadeɛ ne la, ɛnee ɔle wɔ ɛdeɛ, yɛɛ mɔɔ ɛdɔnenle wɔ agyadeɛ ne la, ɛnee ɔle wɔ ɛdeɛ, yɛɛ mɔɔ ɛdɔnenle ye la, ɛnee ezukoa ne noko le wɔ ɛdeɛ. Na duzu yɛɛ hanle wɔ manle ɛvale adwenle ɛhye a? Adalɛ ɛhye wɔambɔ wɔangile sonla; wɔbɔ wɔhile Nyamenle!”

⁵ Ananayase dele edwɛkɛ ɛhye la, ɔpɛle ɔfinle na ɔwule ɛkɛ ne ala; na ɛzulolɛ kpole hanle bɛdabɛ mɔɔ bɛdele edwɛkɛ ne la amuala.

⁶ Mgbavolɛ ne mɔ dwazole, bɛyɛle ɔ nwo boɛ na bɛhɔziele ye.

⁷ Nzinlii, kɛyɛ dɔnehwele nsa anzi, ɔ ye noko rale; na ɛnee ɔtɛtele mɔɔ ɛzi la anwo bie fee.

⁸ Pita bizale ye kɛ, “Ka nɔhalɛ kile me, ɛ nee ɛ hu bɛ agyadeɛ ne mɔɔ bɛdɔnenle ye la mɔɔ bɛnyianle ye la amuala a le ɛhye ɔ?” Raalɛ ne buale ye kɛ, “Ɛhɛe, ɔ muala ɔ.”

⁹ Na Pita zele ye kɛ, “Duzu ati a ɛ nee ɛ hu bɛyɛ adwenle ko kɛ bɛbazɔ Awulae Sunsum ne bɛanlea ɛ? Nea, menli mɔɔ hɔziele ɛ hu la agyakɛ abo a ɛte ye wɔ anuhɔlɛ lɔ la, na bɛ nee ɛdawɔ noko bahɔ.”

¹⁰ Ɛkɛ ne ala ɔdaye noko ɔpɛle ɔfinle Pita anyunlu ɛkɛ na ɔwule. Mɔɔ mgbavolɛ ne mɔ ziale rale la, bɛranwunle kɛ ɔdaye noko yewu, na bɛvale ye bɛhɔziele ye ɔ hu anwo ɛkɛ ne.

¹¹ Na ɛzulolɛ kpole hanle diedima ne nee menli mɔɔ dele edwɛkɛ ne la amuala.

Nwanwane ninyɛne nee sɛkɛlɛneɛ ngakyile

¹² Ɛzoanvolɛma ne yɛle sɛkɛlɛneɛ ngakyile nee nwanwane ninyɛne dɔɔnwo wɔ menli ne avinli. Ɛleka mɔɔ diedima ne amuala bɔ nu yia la a le Ɛzonlenlɛ Sua ne kpɔda ne mɔɔ bɛfɛlɛ ye “Sɔlɔmɔn Kpɔda” la abo.

¹³ Awie mɔɔ ɛmboka diedima ne anwo la ɛnwolo bɛ nu, noko menli kɔsɔɔti hanle bɛ nwo edwɛkɛ kpalɛ.

¹⁴ Menli dɔɔnwo kpalɛ, mraalɛ nee mrenya mɔɔ liele Awulae lile la rabokale bɛ nwo.

¹⁵ Na ɔlua ɛzoanvolɛma ne gyima zo, nzinlii ɛnee akee bɛsoa wuleravolɛma bɛbagua ɛkpa zo wɔ awɔdenle ne mɔ azo, amaa ngyengyene nu bie ala Pita se ɛkɛ a ye ɛlawolɛ adɔ bie anwo zo na ɔ nwo aza.

¹⁶ Na menli mɔɔ wɔ azua mɔɔ bikye Gyɛlusalɛm la amuala vale bɛ awuleravolɛ nee bɛdabɛ mɔɔ sunsum ɛtane gyegye bɛ la amuala rale manle bɛyɛle bɛ ayile.

Bɛyɛ ɛzoanvolɛma ne kpɔdekpɔde

¹⁷ Ɛzoanvolɛma ne anwo anyebolo dɔle Sɛlɛvolɛ Kpanyinli ne nee ɔ sa zo ne mɔ, mɔɔ le fane ne mɔɔ bɛfɛlɛ ye Sadusii la anu amra anwo, na bɛvale adwenle kɛ bɛyɛ nwolɛ bie.

¹⁸ Yemɔti bɛdwazole ɛzoanvolɛma ne anwo zo na bɛhyele bɛ bɛguale efiade.

¹⁹ Na kenle ko ne nɔe ne, Awulae soanvolɛ rabukele efiade ne nlenkɛ ne mɔ na ɔvale bɛ ɔvindele na ɔzele bɛ kɛ,

²⁰ “Bɛhɔ Ɛzonlenlɛ Sua ne anu na bɛhɔha ngoane fofolɛ ɛhye anwo edwɛkɛ bɛhile menli kɔsɔɔti.”

²¹ Aleɛ hyenle nwonlomɔ mangyee ne la, ɛzoanvolɛma ne hɔle Ɛzonlenlɛ Sua ne anu na bɛbɔle ɔ bo kɛ bɛkilehile. Sɛlɛvolɛ Kpanyinli ne nee ɔ sa zo ne mɔ manle bɛvɛlɛle mgbanyima ayia, na bɛdule menli kɛ bɛhɔye ɛzoanvolɛma ne wɔ efiade ne bɛrɛla.

²² Na mɔɔ menli ne mɔ hɔle la bɛannwu ɛzoanvolɛma ne mɔ na bɛziale bɛrabɔle amaneɛ kɛ,

²³ “Yɛhɔle la ɛnee efiade ne nlenkɛ ne mɔ wɔ nyinlira nu, yɛɛ sinzavolɛma ne noko amuala gyigyi nlenkɛ ne mɔ anloa; noko yɛbukele nlenkɛ ne mɔ la, yɛannwu awie biala wɔ ɛkɛ.”

²⁴ Ɛhye yɛle kpanyinli ne mɔɔ nea Ɛzonlenlɛ Sua ne sinzavolɛma ne anwo zo, nee sɛlɛvolɛ mgbanyinli ne mɔ naa ekyii, na bɛdwenlenle nwo kɛ kabezɛ edwɛkɛ bie ɛzi ɛzoanvolɛma ne anwo zo.

²⁵ Na yeangyɛ yɛɛ nrenya ko rabɔle bɛ amaneɛ kɛ, “Bɛnlea, menli ne mɔɔ bɛguale bɛ efiade la wɔ Ɛzonlenlɛ Sua nu lɔ ɛlɛkilehile menli.”

²⁶ Yemɔti sinzavolɛ kpanyinli ne vale ye ɛlɔnema ne na bɛhɔvale ɛzoanvolɛma ne mɔ bɛrale, noko bɛanyɛ bɛ mgbane mgbane biala, ɔluakɛ ɛnee bɛsulo kɛ saa bɛyɛ ye kikilikikili a ɛlɔne ne kɛzi bɛ awolɛ.

²⁷ Bɛvale bɛ gyɛlɛɛnye bɛragyinlanle ayiama ne anyunlu, na Sɛlɛvolɛ Kpanyinli ne bizale bɛ kɛ,

²⁸ “Bɛmɛ, yɛbɔ bɛ kɔkɔ kɛ bɛmmabɔ sonla zɔhane duma bɛkilehile menli wɔ ɛleka biala, noko nea mɔɔ akee bɛlɛyɛ a. Bɛva bɛ ngilehilelɛ ne bɛkponde Gyɛlusalɛm amuala; bɛyɛ bɛamaa yɛmɛ yɛali ɛzonle wɔ sonla ne ewule nwo!”

²⁹ Na Pita nee ɛzoanvolɛma ne buale kɛ, “Ɔwɔ kɛ yɛtie Nyamenle yɛtɛla sonla.

³⁰ Yɛ nlenya mɔ Nyamenle ne dwazole Gyisɛse mɔɔ bɛmɛ bɛbɔle ye meanubaka nu bɛhunle ye la vile ewule nu.

³¹ Na yemɔ yɛɛ Nyamenle ɛmaa ye zo ɛzie ye ye fema zo ɛyɛ ye Adenlekilevolɛ nee Dievolɛ kɛ ɔhile Yizilayɛma adenle ɔmaa bɛnlu bɛ nwo na bɛanyia ɛtanefakyɛ a.

³² Na yɛmɛ yɛɛ Sunsum Nwuanzanwuanza ne mɔɔ le Nyamenle ahyɛlɛdeɛ ne mɔɔ ɔfa ɔmaa bɛdabɛ mɔɔ bɛtie ye la, yɛdi ɛhye anwo daselɛ.”

³³ Ɛhye yelale ayiama ne kpole manle bɛyɛle kɛ bɛku ɛzoanvolɛma ne.

³⁴ Na bɛ nuhua ko dwazole. Ɔle Falasiinli, bɛfɛlɛ ye Gameeleɛle. Ɔle mɛla kilehilevolɛ yɛɛ maanlema bu ye kpole kpalɛ. Ɔmanle bɛvale ɛzoanvolɛma ne mɔ bɛvindele,

³⁵ na ɔzele ayiama ne kɛ, “Yizilayɛ mgbanyima, bɛnlea boɛ wɔ mɔɔ bɛkpondɛ bɛayɛ menli ɛhye mɔ la anwo.

³⁶ Mekɛ bie mɔɔ ɛraze ɛhɔ la, Tiyudase dwazole na ɔyɛle ɔ nwo kɛ ɔle sonlakpole bie, na ɔhwenle menli ala kɛyɛ ɛya nna ɔlile ɔ nzi. Na nzinlii bɛhunle ye, na ye ɛdoavolɛma ne bɔle asande manle ye fane ne gule.

³⁷ Ɛhye anzi, wɔ menli ɛdianlɛ mekɛ ne anu, Dwudase mɔɔ vi Galeli la ɔdaye ɔdwazole. Ɔdaye ɔhwenle menli dɔɔnwo ɔlile ɔ nzi. Na ɔdaye bɛhunle ye na menli mɔɔ li ɔ nzi la amuala zandele.

³⁸ Yemɔti mɔɔ meka meahile bɛ wɔ ɛhye anwo la a le kɛ, bɛgyakyi bɛ, bɛmmayɛ bɛ ɛhwee. Na saa mɔɔ bɛlɛyɛ la le sonla ngyehyɛlɛ a, ɔbazɛkye.

³⁹ Saa ɔvi Nyamenle noko a, yemɔ ɔyɛ se kɛ bɛkɛhola ye sɛkye, yɛɛ eza noko bɛannea boɛ a, bɛbaho bɛatia Nyamenle.” Ayiama ne vale Gameeleɛle folɛdulɛ ne.

⁴⁰ Bɛvale ɛzoanvolɛma ne bɛrale ayiama ne anyunlu bieko, bɛbilale bɛ empele, na bɛduale bɛ kɛ bɛmmabɔ Gyisɛse duma bieko ɛlɛ ɛleka biala; na bɛgyakyile bɛ.

⁴¹ Ɛzoanvolɛma ne vale fɛlɛkolilɛ vile ayia sua ne anu hɔle, kɛ bɛdabɛ bɔbɔ Nyamenle ɛbu bɛ bie, na ɔlua Gyisɛse duma ne ati bɛnwu amaneɛ a.

⁴² Yemɔti dahuu bɛhɔle Ɛzonlenlɛ Sua ne anu nee azua nu bɛhilehilele na bɛbɔle Edwɛkpa ne mɔɔ fane Gyisɛse anwo la nolo kɛ yemɔ a ɔle Mɛzaya ne a.