Ɛzoanvolɛma Gyima ne 23 - BAEBOLO ANZƐƐ BULUKU NWUANZANWUANZA

¹ Pɔɔlo nleanle bagua ne na ɔzele bɛ kɛ, “Mediema Yizilayɛma, me adwenle ɛmbu me fɔlɛ wɔ me ɛbɛlabɔlɛ nu wɔ Nyamenle anyunlu toonwo a yeradwu ɛnɛ a.”

² Sɛlɛvolɛ Kpanyinli Ananayase dele ɛhye la ɔhanle kɛ bɛbɔ ɔ nloa ne azo.

³ Pɔɔlo zele ye kɛ, “Ɛ kunlu le bile, Nyamenle babɔ wɔ bie adua, kɛ ɛde ɛkɛ ne kɛ ɛfa mɛla wɔali me edwɛkɛ, noko wɔbulu mɛla ne azo ɛse bɛbɔ me la.”

⁴ Menli mɔɔ gyi Pɔɔlo anwo ɛkɛ ne la zele ye kɛ, “Hɛe, ɛyɛ Nyamenle Sɛlɛvolɛ Kpanyinli ne aholoba ɔ?”

⁵ Pɔɔlo buale bɛ kɛ, “Mediema Yizilayɛma, menze kɛ ɔle Sɛlɛvolɛ Kpanyinli. Nyamenle Edwɛkɛ ne se, ‘Mmaka wɔ kpanyinli mɔɔ nea wɔ menli nwo zo la anwo edwɛkɛ ɛtane.’ ”

⁶ Mɔɔ Pɔɔlo nwunle kɛ menli mɔɔ ɛrayia la bie mɔ boka Sadusiima fane ne anwo na foa ko dɔɔnwo noko boka Falasiima fane ne anwo la, ɔdeanle nu ɔzele kɛ, “Mediema Yizilayɛma! Mele Falasiinli, yɛɛ Falasiinli a wole me a. Bɛ nee me ɛra ɛke kɛ bɛbali me edwɛkɛ, ɔboalekɛ melɛ anyelazo kɛ bɛbadwazo mɔwuamra bɛara ngoane nu bieko.”

⁷ Ɔhanle ɛhye ala la, Falasiima ne nee Sadusiima ne mɔ bɔle ɔ bo kɛ bɛdi butule, na ɛlɔne ne lile abunwiɔ.

⁸ (Ɔluakɛ Sadusiima se bɛnrɛdwazo mɔwuamra bɛnrɛvi ewule nu yɛɛ, eza Nyamenle soanvolɛ anzɛɛ sunsum biala ɛnle ɛkɛ. Noko Falasiima, bɛmɛ bɛdie edwɛkɛ nsa ɛhye mɔ bɛto nu.)

⁹ Bɛdeanle kpalɛ, na mɛla kilehilevolɛma bie mɔ mɔɔ boka Falasiima fane ne anwo la dwazole hanle kɛ, “Yɛnnwu ɛtane biala wɔ sonla ne anwo! Ɔkɛyɛ zɔhane kɛ Nyamenle soanvolɛ bie anzɛɛ sunsum bie ɛdendɛ ɛhile ye amgba.”

¹⁰ Nzinlii akee ɛdeanlɛ ne bole zolɛ na sogyama kpanyinli ne zulole kɛ bɛkɛhu Pɔɔlo la ati, ɔmanle sogyama ne mɔ dwule aze hɔle bagua ne anu hɔyele Pɔɔlo wɔ ayiama ne avinli bɛ nee ye hɔle aranemgbole ne anu bieko.

¹¹ Kenle ko ne nɔe ne, Awulae ragyinlanle Pɔɔlo anwo ɛkɛ ne na ɔzele ye kɛ, “Gyinla kpundii! Wɔli me nwo daselɛ bɔkɔɔ wɔ Gyɛlusalɛm ɛke, na ɔwɔ kɛ ɛyɛ ye zɔhane noko wɔ Wulomu.”

Bɛkɔ Pɔɔlo ati akpamo

¹² Aleɛ hyenle la, Dwuuma bie yɛle ko vale adwenle na bɛlile amonle kɛ saa bɛtɛkunle Pɔɔlo a bɛnrɛli aleɛ yɛɛ bɛnrɛnlo nzule.

¹³ Bɛdabɛ mɔɔ bɛvale adwenle ɛhye la bo abulanla.

¹⁴ Na bɛhɔle Sɛlɛvolɛ Kpanyinli ne nee mgbanyima ne mɔ ɛkɛ, na bɛzele bɛ kɛ, “Yɛli amonle kɛ yɛnrɛli aleɛ yɛɛ yɛnrɛnlo nzule kyesɛ yɛku Pɔɔlo kolaa.

¹⁵ Yemɔti, bɛ nee ayiama ne ɛbɔ nu na bɛzoa bɛmaa bɛhɔze Wulomu sogyama kpanyinli ne kɛ ɔmaa bɛva Pɔɔlo bɛrɛla na bɛkpondɛ kɛ bɛbizebiza ye edwɛkɛ ne anu kpalɛ. Na kɛ ɔkɛyɛ biala la toonwo mɔɔ ɔkadwu ɛke la ɛnee yɛhu ye.”

¹⁶ Pɔɔlo awozoa nrenya ne dele ɛhye anwo bie. Zɔhane ati ɔhɔle aranemgbole ne anu ɔhɔfetele zolɛ ɔhilele Pɔɔlo.

¹⁷ Na Pɔɔlo vɛlɛle sogya kpanyinli ko na ɔzele ye kɛ, “Fa kpavolɛ ye kɔ sogyama kpanyinli ne ɛkɛ na ɔlɛ edwɛkɛ ɔka yeahile ye.”

¹⁸ Sogya ne vale kpavolɛ ne hɔle bɛ kpanyinli ne ɛkɛ ne na ɔzele kɛ, “Pilizanli Pɔɔlo vɛlɛle me na ɔzele me kɛ menva kpavolɛ ye membɛlɛ wɔ na ɔlɛ edwɛkɛ ɔka yeahile wɔ.”

¹⁹ Na sogyama kpanyinli ne zɔle kpavolɛ ne asa, ɔvale ye ɔhɔle ahane, na ɔbizale ye kɛ, “Duzu edwɛkɛ a ɛ nee ye rale a?”

²⁰ Kpavolɛ ne zele ye kɛ, “Dwuu mgbanyima ne ɛli bɛ nloa kɛ ɛhyema bɛbaraha bɛahile wɔ kɛ ɛva Pɔɔlo ɛrɛla bagua ne anyunlu ɛmaa bɛdie ye edwɛkɛ ne kpalɛ.

²¹ Na bɛba a mmatɛne bɛ zo, ɔluakɛ bɛ nuhua mɔɔ bo abulanla la barazia adenle nu. Menli ɛhye mɔ ɛli amonle kɛ saa bɛtɛkunle Pɔɔlo a bɛnrɛli aleɛ yɛɛ bɛnrɛnlo nzule. Yemɔti kɛkala bɛwie bɛ nwo boɔboa, wɔmɔ ala a bɛlɛkendɛ kɛ ɛkɛkponle zolɛ a.”

²² Na sogyama kpanyinli ne zele ye kɛ, “Mede. Mmabɔ zolɛ ɛkile awie biala kɛ wɔraha ɛhye wɔhile me.” Na ɔmanle ɔhɔle.

Bɛva Pɔɔlo bɛhɔmaa Amɛnlado Filekese

²³ Sogyama kpanyinli ne vɛlɛle sogya mgbanyinli nwiɔ na ɔzele bɛ kɛ, “Bɛmaa ɔyɛ ndɛ bɛhɔva sogyama mɔɔ dua aze la ɛya nwiɔ yɛɛ atwɛdolɛ sogyama ɛya nwiɔ na bɛ nee sogyama mɔɔ tɛnla ɛkpɔnwɔ zo la abulasuu bɛhɔ toonwo bɛhɔdwu Sizalia. Bɛha bɛ nwo na bɛdu bɛ bo ɛke ɛnɛ nɔsolɛ dɔne ngɔnla.

²⁴ Bɛziezie ɛkpɔnwɔ ko noko bɛmaa Pɔɔlo ɛdɛnla zolɛ na bɛva ye gyɛlɛɛnye bɛhɔmaa amɛnlado Filekese.”

²⁵ Na sogyama kpanyinli ne hɛlɛle kɛlata ɛhye manle bɛhɔle:

²⁶ “Medame Kolɔdeɛse Lesease a melɛkɛlɛ kɛlata ɛhye mearɛlɛ Amɛnlado Filekese a, mebiza wɔ ahye.

²⁷ Dwuuma zɔle nrenya ɛhye nu mɔɔ anrɛɛ bɛku ye a. Na mendele kɛ ɔle Wulomunli la ati menvale sogyama mengɔnliele ye.

²⁸ Memkpondɛle kɛ menwɔnwu ye nvoleɛ, yemɔti menvale ye mengɔle bɛ ayia ne anyunlu kɛ mekadie nu kpalɛ.

²⁹ Na menwunle kɛ ɔtɛyɛle debie mɔɔ fɛta ɛhunlɛ anzɛɛ efiade ɛdolɛ bɔbɔ a. Bɛ ɛzonledonlɛ ne fane bɛdabɛ bɛ mɛla nwo.

³⁰ Eza mede kɛ bɛvua kɛ bɛnyia ye a bɛkɛhu ye, yemɔti meyɛ kɛ bɛva ye bɛrɛlɛ wɔ. Meze menli mɔɔ donle ye ɛzonle la noko kɛ bɛva bɛ edwɛkɛ ne bɛrado ɛ nyunlu.”

³¹ Sogyama ne yɛle bɛ gyima ne kɛmɔ bɛhilele bɛ la na nɔe ne ala bɛvale Pɔɔlo bɛ nee ye hɔle toonwo bɛhɔdwule Antepatelese.

³² Aleɛ hyenle la sogyama ne mɔɔ dua aze la ziale rale aranemgbole ne anu na sogyama ne mɔɔ tɛnla ɛkpɔnwɔ zo la vale Pɔɔlo hɔle.

³³ Bɛ nee ye hɔdwule Sizalia la bɛyele kɛlata ne bɛmanle amɛnlado ne na bɛvale Pɔɔlo noko bɛwulale ɔ sa nu.

³⁴ Amɛnlado ne gengale kɛlata ne wiele la, ɔbizale Pɔɔlo maanzinli mɔɔ ɔvi nu la. Mɔɔ ɔdele kɛ ɔvi Selesea la

³⁵ ɔzele ye kɛ, “Saa menli mɔɔ ɛdo wɔ ɛzonle la ba a mebanlea wɔ edwɛkɛ ne anu.” Na ɔzele kɛ bɛva Pɔɔlo bɛhɔzie Hɛlɔdo aranemgbole ne anu ɛleka mɔɔ ɔdaye amɛnlado ye gyima ne abo wɔ la na bɛzinza ye.