Ɛzoanvolɛma Gyima ne 2 - BAEBOLO ANZƐƐ BULUKU NWUANZANWUANZA

Sunsum Nwuanzanwuanza ne ɛralɛ

¹ Mɔɔ Pɛntekɔso kenle ne dwule la, ɛnee diedima ne amuala ɛboa bɛ nloa ɛleka ko.

² Na arɛlevilɛ nu ala alɛra bie vi anwuma kɛ ahumu kpole bie la rayile sua ne mɔɔ bɛwɔ nu la.

³ Na bɛnwunle kɛ debie mɔɔ le kɛ senle ndafinlima la zandele na bɛzinzele bɛdabɛ mɔɔ bɛwɔ ɛkɛ ne la ati zo ngoko ngoko.

⁴ Sunsum Nwuanzanwuanza ne rayile bɛ tɛkɛɛ na bɛbɔle ɔ bo kɛ bɛka aneɛ ngakyile, kɛmɔ Sunsum ne vale manle bɛ kɛ bɛha la.

⁵ Dwuuma mɔɔ Nyamenle ɛzonlenlɛ ti bɛvi maanle gyɛne gyɛne nu bɛrale la tɛbɔ Gyɛlusalɛm.

⁶ Mɔɔ bɛdele ɛnelɛ ɛhye la, bɛ nuhua dɔɔnwo kpalɛ rale ɛkɛ, na ɔyɛle bɛ ɛzulolɛ kpole; ɔluakɛ bɛ nuhua ko biala dele kɛ diedima ne ɛlɛka ye sua zo aneɛ ne bie.

⁷ Ɔyɛle bɛ nwanwane ɔmanle bɛhanle kɛ, “Na menli ɛhye mɔ, se bɛ muala bɛle Galelima o?

⁸ Na kɛ ɔyɛ mɔɔ akee yɛte kɛ bɛlɛka yɛdayɛ yɛ maanle nu aneɛ ɛ?

⁹ Yɛdayɛ mɔɔ yɛvi Patea, Medea, yɛɛ Yilam, Mɛsɔpɔteemea, Dwudiya, yɛɛ Kapadosea, Pɔntɛse, yɛɛ Ehyea,

¹⁰ Felegyea, Pamefelea, Yigyibiti nee Lebea maanzinli ne mɔɔ bikye Saelin. Yɛ bie mɔ noko vi Wulomu,

¹¹ Dwuuma nee bɛdabɛ mɔɔ bɛnle Dwuuma na bɛhakyi bɛsonle Dwuuma Nyamenle ne la, Kilitima nee Areleebeama, noko yɛ muala yɛte kɛ bɛlɛfa yɛ maanle nu aneɛ bɛaha ninyɛne mgbole mɔɔ Nyamenle ɛyɛ la.”

¹² Na azibɛnwo nu ala, bɛbizale kɛ, “Ɛnee ɛhye abo a le duzu?”

¹³ Na bie mɔ golole bɛ nwo na bɛzele kɛ, “Menli ɛhye mɔ ɛbo nza.”

Pita tendɛ ahile menli ne

¹⁴ Na Pita nee ɛzoanvolɛma bulu nee ko ne mɔɔ hale la dwazole na ɔmanle ɔ ne zo ɔzele ɛlɔne ne kɛ, “Ebiamɔ Dwuuma nee bɛdabɛ mɔɔ bɛwɔ Gyɛlusalɛm ɛke la amuala, bɛdie bɛmaa mengile bɛ ɛhye mɔ abo.

¹⁵ Menli ɛhye mɔ ɛtɛbole nza, kɛmɔ bɛ adwenle yɛ bɛ la, ɔluakɛ aleɛ hyenle la bɔ zo mɔɔ dɔne ngɔnla ɛbɔ a.

¹⁶ Na ɛhye a le mɔɔ Nyamenle kpɔmanvolɛ Dwowɛle hanle dole ɛkɛ ne la. Ɔse,

¹⁷ ‘Nyamenle se, mɔɔ mebayɛ wɔ mekɛ mɔɔ li awieleɛ la ɛne. Mebamaa me Sunsum ne ara menli muala anwo zo. Na bɛ mra mrenya nee mraalɛ baha Nyamenle nrɛlaleɛ. Bɛ mgbavolɛ banwu ɛnyelɛzodeɛnwunlɛ, na bɛ mrenya mgbanyinli aha ɛlalɛ.

¹⁸ Ɛhɛe, mebamaa me Sunsum ne ara me ngɛkɛlɛ mrenya nee mraalɛ anwo zo, na bɛaha Nyamenle nrɛlaleɛ ne.

¹⁹ Mebayɛ nwanwane ninyɛne wɔ anwomanyunlu na meayɛ sɛkɛlɛneɛ wɔ azɛlɛ ye azo. Bɛbanwu mogya, senle, yɛɛ esike mungumungu.

²⁰ Sɛnzɛne ne bayɛ awozinli, na siane ne ayɛ yɔɔnwo kɛ mogya, kolaa na Awulae anyunlunyia kenle kpole ne adwu.

²¹ Na ɔbara kɛ awie biala mɔɔ kɛbɔ Awulae duma la bɛkɛlie ye ngoane.’

²² “Yizilayɛma, bɛdie! Gyisɛse mɔɔ vi Nazalɛte la le sonla mɔɔ Nyamenle yele ye manle bɛ a; ɔluale ɔ nwo zo ɔlile gyima mgbole, ɔyɛle nwanwane ninyɛne nee sɛkɛlɛneɛ wɔ bɛdabɛ bɛ nye zo, mɔɔ bɛdabɛ bɛze a.

²³ Nyamenle ɔdaye ye ɛhulolɛ zo, ɔliele ɔdole nu kɛ bɛkɛye Gyisɛse bɛkɛmaa bɛ; yɛɛ bɛdabɛ noko bɛmanle menli mɔɔ ɛnze Nyamenle la bɔle ye meanubaka nu hunle ye a.

²⁴ Na Nyamenle dwazole ye vile mɔwuamra anu na ɔyele ye ɔvile ewule asa nu; ɔluakɛ ɔnle kɛ ewule di ɔ nwo zo konim.

²⁵ Devidi ɛha ɔ nwo edwɛkɛ kɛ, ‘Menwu Awulae dahuu kɛ ɔgyi me sa fema zo, yemɔti menzulo.

²⁶ Ɛhye ati medi fɛlɛko me ahonle nu, na me nwo sande me wɔ me ɛdendɛlɛ nu, kɛ medame zɛhae ala, mɔɔ ewule a fɛta me la mede anyelazo nu;

²⁷ Ɔluakɛ wɔmɔ Nyamenle, ɛnrɛgyakyi me ɛkɛla wɔ mɔwuamra anu, yɛɛ ɛnrɛmaa wɔ Nwuanzanwuanza Ko ne nwonane ɛnrɛkpɔlɔ.

²⁸ Wɔhile me ngoane adenle ne, na medi fɛlɛko kɛ ɛ nee me lua.’

²⁹ “Mediema, bɛmaa menga ye wienyi mengile bɛ kɛ yɛ ze Devidi wule na bɛziele ye, na ye sɛka wɔ ɛkɛ kɛkala.

³⁰ Ɔle Nyamenle kpɔmanvolɛ yɛɛ ɔze ɛwɔkɛ mɔɔ Nyamenle ɛbɔ ye a: Nyamenle hanle ndane dole zolɛ kɛ ɔbamaa Devidi abo zo amra ne bie ali belemgbunli kɛ ɔdaye Devidi la.

³¹ Devidi noko nwunle mɔɔ Nyamenle bayɛ la, yemɔti a ɔhanle Mɛzaya ne ewudwazo ne anwo edwɛkɛ kɛ, ‘Bɛangyakyi ye wɔ mɔwuamra anu, yɛɛ ye nwonane amkpɔlɔ.’

³² Nyamenle ɛdwazo Gyisɛse ɛhye ɛvi mɔwuamra anu, kɛmɔ yɛ muala yɛdi nwolɛ daselɛ la.

³³ Bɛmaa ye zo bɛzie Nyamenle asa fema zo, na yenyia Sunsum Nwuanzanwuanza ne, kɛmɔ ɔze vale bɔle ye ɛwɔkɛ la; na mɔɔ bɛnwu ye nee mɔɔ kɛkala bɛte la a le ye ahyɛlɛdeɛ mɔɔ yeva yemaa yɛ la a.

³⁴ Ɔluakɛ Devidi ɔdaye mumua ne yeangɔ anwuma, noko ɔhanle ɔdole ɛkɛ ne kɛ, ‘Awulae Nyamenle ne zele me Awulae kɛ, tɛnla me sa fema zo ɛke,

³⁵ kɔkpula kɛ menwɔva wɔ agbɔvolɛ muala menwɔwula ɛ gyakɛ abo.’

³⁶ “Zɔhane ati, bɛmaa Yizilayɛma amuala ɛnwu ye wienyi kɛ, Gyisɛse ɛhye mɔɔ bɛbɔle ye meanubaka nu la, yemɔ ala yɛɛ Nyamenle ɛyɛ ye Awulae nee Mɛzaya a.”

³⁷ Mɔɔ menli ne dele ɛhye la, ɛzulolɛ kpole hanle bɛ na bɛbizale Pita nee ɛzoanvolɛma ne mɔ kɛ, “Ayi mɔ, duzu a ɔwɔ kɛ yɛyɛ a?”

³⁸ Pita zele bɛ kɛ, “Bɛnlu bɛ nwo na bɛgyakyi ɛtane ɛyɛlɛ, na bɛmaa bɛzɔne bɛ wɔ Gyisɛse Kelaese duma nu, amaa bɛava bɛ ɛtane bɛahyɛ bɛ na bɛanyia Nyamenle ahyɛlɛdeɛ ne, mɔɔ le Sunsum Nwuanzanwuanza ne.

³⁹ Ɔluakɛ Nyamenle ɛwɔkɛ ne le bɛ nee bɛ mra nee menli mɔɔ wɔ ɛleka muala, mɔɔ yɛ Awulae Nyamenle ne kɛvɛlɛ bɛ la ɛdeɛ.”

⁴⁰ Na Pita hɔle zolɛ hanle edwɛkɛ dɔɔnwo hilele bɛ na ɔdule bɛ folɛ kɛ, “Bɛhwe bɛ nwo bɛvi amaneɛ mɔɔ amumuyɛma ɛhye mɔ banwu ye la anu.”

⁴¹ Bie mɔ dɔɔnwo liele lile na bɛmanle bɛzɔnenle bɛ. Na kenle ko ne menli kɛyɛ apenle nsa rabokale ekpunli ne anwo.

⁴² Na bɛdule bɛ nwo bɛmanle ɛzoanvolɛma ne ngilehilelɛ ne, bɛ nee bɛ zonlenle, na bɛbɔle nu bɛlile debie wɔ mediema ɛyɛlɛ nu.

Diedima ne ɛdɛnlalɛ

⁴³ Ɛzoanvolɛma ne mɔ yɛle nwanwane ninyɛne dɔɔnwo manle ɔyɛle awie biala ɛzulolɛ nee azibɛnwo.

⁴⁴ Bɛdabɛ mɔɔ bɛliele Gyisɛse bɛlile la lile ahua na bɛhyɛle ninyɛne mɔɔ bɛlɛ la bɛmanle bɛ nwo.

⁴⁵ Bɛdɔnedɔnenle bɛ nwo ninyɛne nee bɛ agyadeɛ ne mɔ na bɛhyɛle ezukoa ne bɛmanle bɛ muala, kɛmɔ biala ɛhyianlɛ de la.

⁴⁶ Kenle biala bɛyia nu wɔ Ɛzonlenlɛ Sua ne anu bɛyɛ nzɛlɛlɛ, bɛbɔ nu bɛdi debie wɔ koyɛlɛ nu,

⁴⁷ na bɛye Nyamenle ayɛlɛ. Bɛnyianle bɛ nyunlu wɔ menli kɔsɔɔti avinli, na dahuu Awulae fa menli mɔɔ bɛlɛdie bɛ ngoane la baboka bɛ nwo.