Ɛzoanvolɛma Gyima ne 15 - BAEBOLO ANZƐƐ BULUKU NWUANZANWUANZA

Gyɛlusalɛm ayia ne

¹ Menli bie vi Dwudiya rale Anteɔko na bɛbɔle ɔ bo kɛ bɛkilehile diedima ne kɛ, “Saa bɛanyɛ bɛ mrenyanu nzonlɛ, kɛmɔ Mosisi mɛla ne kile la a bɛnrɛnyia ngoane.”

² Pɔɔlo nee Baanabase nee bɛ zule ɛhye anwo kpolera kpole kpalɛ. Zɔhane ati bɛdule menli kɛ bɛboka Pɔɔlo nee Baanabase anwo bɛhɔ Gyɛlusalɛm bɛhɔnwu ɛzoanvolɛma ne nee mgbanyima ne mɔ wɔ nwolɛ.

³ Asɔnema ne guale bɛ adenle, na bɛkɔ la bɛvale Fonehyea nee Samɛlea, na bɛhanle kɛ bɛdabɛ mɔɔ bɛnle Dwuuma la ɛzi ɛhakyi, na bɛlie Nyamenle bɛli la anwo edwɛkɛ bɛhilele bɛ. Na diedima ne lile nwolɛ fɛlɛko somaa.

⁴ Mɔɔ bɛdwule Gyɛlusalɛm la, bɛvale mɔɔ Nyamenle ɛva bɛ ɛyɛ la amuala bɛbɔle amaneɛ bɛhilele bɛ, na asɔnema ne, ɛzoanvolɛma ne, yɛɛ mgbanyima ne mɔ liele bɛ gyɛlɛɛnye.

⁵ Na diedima ne bie mɔ mɔɔ boka Falasii fane ne anwo la dwazole na bɛhanle kɛ, “Ɔwɔ kɛ bɛdabɛ mɔɔ bɛnle Dwuuma la yɛ bɛ mrenyanu nzonlɛ na eza bɛdi Mosisi mɛla ne azo.”

⁶ Ɛdoavolɛma ne nee mgbanyima ne mɔ yiale nu vale edwɛkɛ ɛhye anwo adwenle.

⁷ Na bɛhehanle nwolɛ bie dedee la, Pita dwazole na ɔzele bɛ kɛ, “Ayi mɔ, bɛze kɛ mekɛ bie mɔɔ ɛraze ɛhɔ la, Nyamenle yele me bɛ avinli manle mengɔmbɔle Edwɛkpa ne nolo mengilele bɛdabɛ mɔɔ bɛnle Dwuuma la, amaa bɛdabɛ noko bɛade edwɛkɛ ne na bɛalie bɛali.

⁸ Na Nyamenle mɔɔ ze sonla ahonle nu la hilele kɛ yelie bɛdabɛ mɔɔ bɛnle Dwuuma la noko, na ɔmanle bɛ Sunsum Nwuanzanwuanza ne bie, kɛmɔ ɔvale ɔmanle yɛdayɛ ala la.

⁹ Yeangile kɛ asolo yɛmɛ nee bɛmɛ. Ɔluale bɛ diedi zo yɛɛ ɔvale bɛ ɛtane ɔhyɛle bɛ a.

¹⁰ Duzu ati yɛɛ akee bɛkɛzɔ Nyamenle bɛkɛnlea, na bɛkɛva kpomgbolo kpole bɛkɛgyela diedima ne akɔme, wɔ mekɛ mɔɔ yɛ nee yɛ nlenya mɔ yɛangola ye soa la ɛ?

¹¹ Kyɛkyɛ! Kɛmɔ yɛdie yɛdi na ɔlua Awulae Gyisɛse ɛlolɛ zo bɛbalie yɛ ngoane la, zɔhane ala yɛɛ bɛdabɛ noko bɛ ɛdeɛ ne de a.”

¹² Ɔhanle ɛhye la bɛ muala bɛyɛle koonwu na akee bɛdiele Baanabase nee Pɔɔlo kolakola ne, nee sɛkɛlɛneɛ nee nwanwane gyima mɔɔ Nyamenle ɛlua bɛ nwo zo ɛyɛ wɔ bɛdabɛ mɔɔ bɛnle Dwuuma la avinli la amuala.

¹³ Mɔɔ bɛ nloa penle la, Gyemise dendɛle na ɔzele kɛ, “Mediema, bɛdie me.

¹⁴ Saemɔn ɛha ɛhile nu kɛkala kɛ ɔzile ɔyɛle mɔɔ Nyamenle anye hɔle bɛdabɛ mɔɔ bɛnle Dwuuma la anwo zo na ɔyele menli wɔ bɛ avinli ɔrayɛle ye ɛdeɛ bɔkɔɔ la.

¹⁵ Ɛhye nee Nyamenle kpɔmanvolɛma edwɛkɛ ne le ko. Nyamenle Edwɛkɛ ne se,

¹⁶ ‘Awulae se, ɛhye anzi mebazia meara, na meamaa Devidi belemgbunlililɛ ne mɔɔ dɔle aze la zo. Mebayɛ ye fofolɛ na meamaa ye zo meazie ɔ gyakɛ anu,

¹⁷ amaa ewiade amra mɔɔ ɛha la ara me ɛkɛ, na bɛdabɛ mɔɔ bɛnle Dwuuma na mevɛlɛ bɛ la arayɛ me ɛdeɛ.

¹⁸ Awulae a vale ɛhye dole gua dɛbadɛba ne a.’ ”

¹⁹ Gyemise hɔle zolɛ zele kɛ, “Me adwenle a le kɛ, ɔnle kɛ yɛta bɛdabɛ mɔɔ bɛnle Dwuuma na bɛhakyi bɛlɛba Nyamenle ɛkɛ ne la anye zo.

²⁰ Bɛmaa yɛhɛlɛ kɛlata yehɔmaa bɛ kɛ bɛhwe bɛ nwo bɛvi ninyɛne mɔɔ anwo ɛnde, mɔɔ le kɛ aleɛ mɔɔ bɛva bɛkpa munzule anzɛɛ bɛva bɛzɔ amonle la anwo, nee ninyɛne mɔɔ le kɛ adwɔmane ɛbɔlɛ nee nane mɔɔ bɛlofo ye bɛhu ye na bɛampɛ ɔ kɔme la ɛlilɛ nee mogya nwo.

²¹ Ɔluakɛ Mosisi mɛla ne, bɛkenga ye Ɛnwomenlelielɛ Kenle biala wɔ nyianu azua ne mɔ anu, yɛɛ ɔ nloa edwɛkɛ noko bɛbɔ ye nolo wɔ sua biala azo.”

Kɛlata mɔɔ bɛhɛlɛle bɛhɔmanle diedima mɔɔ ɛnle Dwuuma la

²² Ɛzoanvolɛma ne nee mgbanyima ne mɔ, nee asɔnema ne mɔ amuala akee bɔle kpɔkɛ kɛ bɛsoa menli bɛamaa bɛ nee Pɔɔlo nee Baanabase ahɔ Anteɔko. Bɛdule menli nwiɔ mɔɔ bɛbu bɛ kpalɛ la bɛmanle bɛ nee bɛ hɔle. Bɛmɛ a le Dwudase mɔɔ eza bɛfɛlɛ ye Baasabase la, yɛɛ Saelase.

²³ Na bɛvale kɛlata ɛhye bɛmanle bɛ kɛ bɛva bɛhɔ: “Yɛdayɛ bɛ mediema ɛzoanvolɛma nee asɔne mgbanyima, yɛlɛ mediema ɛhulolɛ yɛbiza mediema mɔɔ ɛnle Dwuuma mɔɔ wɔ Anteɔko, Selesea, yɛɛ Selea la amuala ahye.

²⁴ Yɛde kɛ yɛ bie mɔ mɔɔ yɛanzoa bɛ la ɛra bagyegye bɛ aha edwɛkɛ azɛkye bɛ adwenle.

^25-26 Zɔhane ati yɛyia nu yɛbɔ kpɔkɛ na yɛdu menli kɛ bɛ nee Pɔɔlo nee Baanabase, mɔɔ ɛva bɛ ngoane ɛdo nzeleba wɔ yɛ Awulae Gyisɛse ɛzonlenlɛ ti la ɛrɛla.

²⁷ Bɛmɛ a le Dwudase nee Saelase, bɛ nloa edwɛkɛ bamoa mɔɔ yɛhɛlɛ ye wɔ kɛlata ye anu la azo.

²⁸ Sunsum Nwuanzanwuanza ne nee yɛdayɛ yɛdie yɛto nu kɛ yɛnrɛva kpomgbolo kpole biala yɛnrɛkpolo bɛ kɔme kɛ ngyehyɛlɛ ɛhye mɔ mɔɔ hyia la ala.

²⁹ Bɛmmadi aleɛ mɔɔ bɛva bɛkpa munzule anzɛɛ bɛva bɛzɔ amonle la; bɛmmadi mogya; bɛmmadi nane mɔɔ bɛlofo ye na bɛampɛ ɔ kɔme la, na bɛhwe bɛ nwo bɛvi adwɔmane ɛbɔlɛ nwo. Saa bɛtwe bɛ nwo bɛfi ɛhye mɔ anwo a ɛnee bɛlua adenle fɔɔnwo ne anu. Yɛbiza bɛ ahye.”

³⁰ Menli mɔɔ bɛzoanle bɛ la hɔdwule Anteɔko la, bɛboɔboale diedima ne kɔsɔɔti anloa na bɛyele kɛlata ne bɛmanle bɛ.

³¹ Mɔɔ diedima ne gengale kɛlata ne la, bɛlile fɛlɛko kpole wɔ akɛnrazilɛ mɔɔ kɛlata ne ɛva ɛrɛlɛ bɛ la anwo.

³² Dwudase nee Saelase, mɔɔ bɛdabɛ mumua ne bɛle Nyamenle kpɔmanvolɛma la dendɛle dɔɔnwo hilele bɛ manle bɛnyianle anwosesebɛ.

³³ Bɛlile kenle ekyi wɔ ɛkɛ ne la, diedima ne akee gyakyile bɛ adenle kɛ bɛzia bɛhɔ menli mɔɔ zoanle bɛ la anwo lɔ. [

³⁴ Na Saelase ɛdeɛ, ɔhulole kɛ ɔkɛdɛnla ɛkɛ ne.]

³⁵ Pɔɔlo nee Baanabase dɛnlanle Anteɔko hyɛle ekyii; bɛ nee diedima ne bie mɔ hilehilele na bɛbɔle Awulae edwɛkɛ ne nolo.

Pɔɔlo nee Baanabase avinli ɛtetelɛ

³⁶ Mekɛ guale nu la Pɔɔlo zele Baanabase kɛ, “Maa yɛzia yɛhɔkpɔla azua mɔɔ yɛha Awulae edwɛkɛ ne wɔ zo la, na yɛhɔnlea kɛ mediema ne mɔ si kɔ la.”

³⁷ Baanabase hulole kɛ bɛkɛva Dwɔn Maake bɛkɛboka bɛ nwo,

³⁸ noko Pɔɔlo adwenle a le kɛ suzuamgba ala mɔɔ Maake kpole bɛ wɔ Pamefelea, ɔgyakyile bɛ ɛkɛ ne na ɔ nee bɛ anyɛ gyima ne anwie la, ɔngyia kɛ bɛ nee ye kɛhɔ.

³⁹ Ɛhye anwo kpolerazulɛ yɛle kyengye kpalɛ manle bɛ mu nwiɔ bɛ avinli tetele. Baanabase vale Maake na ɔ nee ye pɛle azule hɔle Saepelɛse.

⁴⁰ Pɔɔlo noko vale Saelɛse hɔle, na mediema ne mɔ vale Pɔɔlo wulale Awulae ɛlolɛ ne abo.

⁴¹ Ɔhɔle Selea nee Selesea ɔhɔmanle diedima mɔɔ wɔ asɔne ne mɔ anu la anwosesebɛ.