3 Dw 1 - BAEBOLO ANZƐƐ BULUKU NWUANZANWUANZA

¹ Kɛlata ɛhye vi medame “Nrenya Kpanyinli ne” ɛkɛ. Melɛkɛlɛ meahɔmaa me gɔnwo Gayɛse mɔɔ mekulo ye nɔhalɛ nu la.

² Ayi, mesɛlɛ kɛ debie biala ɛhɔ zolɛ kpalɛ ɛmaa wɔ na ɛde kpɔkɛ kpalɛ; meze kɛ ɛte kpɔkɛ wɔ sunsum nu.

³ Me nye liele kpole wɔ mekɛ mɔɔ mediema ne bie mɔ rale ralile wɔ nɔhalɛlilɛ ne anwo daselɛ kɛ amgba ɛli nɔhalɛ ne anzi la. Kɛkala, ɛtɛdi nɔhalɛ ne anzi.

⁴ Debie biala ɛnyɛ me anyelielɛ ɛndɛla kɛ menwɔde kɛ me mra ne mɔ lua nɔhalɛ adenle ne anu a.

Gayɛse ɛhanvolɛ

⁵ Ayi, nɔhalɛ gyima ne ala a ɛlɛdi wɔamaa mediema ne mɔ la, bɔbɔ bɛdabɛ mɔɔ bɛle nyɛvolɛ la.

⁶ Bɛhanvo ɛhulolɛ ne mɔɔ ɛlɛ ye la bɛhile asɔnema mɔɔ wɔ ɛke la. Mebodo wɔ, bɔ mɔdenle nea na gua bɛ adenle gyɛlɛɛnye, kɛmɔ ɛnea a ɔkɛzɔ Nyamenle anye la.

⁷ Ɔluakɛ sumunli kɛ bɛbɔle bɛ adendulɛ ne abo kɛ bɛbɔ Kelaese edwɛkɛ ne nolo la, bɛtɛdiele moalɛ biala bɛtɛfile bɛdabɛ mɔɔ bɛnle Kelaese ɛdoavolɛma la ɛkɛ.

⁸ Ɛhye ati, ɔwɔ kɛ yɛmɛ mɔɔ yɛle Kelaese ɛdoavolɛma la yɛboa menli ɛhye mɔ, amaa yɛ nee bɛ ali nɔhalɛ ne anwo gyima ne mɔɔ bɛlɛdi la.

Dayɛtelɛfizi nee Dimiteleɛse

⁹ Mehɛlɛ asɔnema kɛlata ezinraa bie, na Dayɛtelɛfizi mɔɔ kpondɛ kɛ ɔdi bɛ kpanyinli la ɛmbu me bie.

¹⁰ Zɔhane ati, saa meba a menwɔye ye gyima mɔɔ yeli, yɛ nwo nzekue mɔɔ ɔbɔ nee adalɛ mɔɔ ɔbɔ ye yɛ nwo la menwɔdo gua. Yeanga ye zɔhane, saa mediema ne mɔ ba a, yemɔ a, ɔnrɛlie bɛ yɛɛ akee noko ɔndie bɛdabɛ mɔɔ bɛkulo kɛ bɛkɛlie bɛ la, na ɔbɔ mɔdenle kɛ ɔye zɛhae menli ne mɔ ali yeavi asɔne ne anu.

¹¹ Ayi, mmasukoa ɛyɛ mɔɔ le ɛtane la, sukoa yɛ mɔɔ le kpalɛ la. Awie biala mɔɔ yɛ mɔɔ le kpalɛ la le Nyamenle ɛdeɛ, yɛɛ awie biala mɔɔ di ɛtane la ɛtɛnwunle Nyamenle.

¹² Awie biala ka Dimiteleɛse anwo edwɛkɛ kpalɛ; nɔhalɛ ne ɔdaye ɔka ɔ nwo edwɛkɛ kpalɛ, na medame noko medi ɔ nwo daselɛ, yɛɛ ɛze noko kɛ mɔɔ meka la le nɔhalɛ.

Edwɛkɛ ne awieleɛ

¹³ Melɛ edwɛkɛ dɔɔnwo meka mekile wɔ, noko akee menrɛhulo kɛ menwɔva kɛlata nee ɛnke menwɔhɛlɛ.

¹⁴ Me nye la kɛ ɔnrɛhyɛ biala na meara ɛ nwo lɔ na yɛava edwɛkɛ ne mɔ yɛali adwelie.

¹⁵ Anzonudwolɛ ɛha wɔ. Agɔnwolɛma amuala biza wɔ ahye; yɛbiza yɛ gɔnwo mɔ amuala noko ahye.