2 Tem 3 - BAEBOLO ANZƐƐ BULUKU NWUANZANWUANZA

Awieleɛ mekɛ ne

¹ Mekpondɛ kɛ ɛnwu ye kɛ, awieleɛ mekɛ ne anu, anwongyelelɛ dɔɔnwo bara.

² Menli bayɛ angomedi nee ezukoa nwo anyebolo, bɛbamemaa bɛ nwo zo na bɛazua anyetele; bɛbabɔ aholoba, bɛnrɛdie bɛ awovolɛma, bɛbakpo amunli, bɛnrɛzonle Nyamenle;

³ bɛ ti bayɛ se, bɛnrɛze anwunvɔne, bɛbabɔ nzekue, bɛbali mgbonde, bɛbava ɛya mgbane mgbane na bɛahyi kpalɛ,

⁴ bɛbaye bɛ gɔnwo mɔ bɛamaa, bɛbayɛ mgbaha na bɛ ti anu ayɛ bɛ fɛ; bɛbahulo anyelielɛ bɛadɛla Nyamenle,

⁵ bɛbazɔ nyamenlezonlenlɛ nu, na bɛnrɛlie ye tumi kpalɛ ne bɛnrɛdo nu. Twe ɛ nwo fi menli zɛhae mɔ anwo.

⁶ Menli ɛhye bie mɔ luolua nu wolowolo azua di mraalɛ mɔɔ anwo ɛhyele bɛ na bɛ nwo yɛ anwunvɔne, na bɛ ɛtane nwo fɔlɛlilɛ ɛyɛ adesoa ɛlɛbu bɛ kɔme, na nwonane nu atiakunluwɔzo ngakyile ɛndie bɛ la anzo.

⁷ Mraalɛ zɛhae mɔ dahuu bɔ mɔdenle kɛ bɛkɛzukoa noko bɛngola bɛnnwu nɔhalɛ ne ɛlɛ.

⁸ Kɛmɔ Gyanize nee Gyambilize dwazole tiale Mosisi la, zɔhane ala yɛɛ menli ɛhye mɔ tia nɔhalɛ ne a. Bɛle menli mɔɔ bɛ adwenle ɛnli munli na bɛ diedi tɔ sinli a.

⁹ Na bɛnrɛdwu moa biala, ɔluakɛ awie biala banwu kɛ bɛle agbamgbanvolɛ. Gyanize nee Gyambilize kɛ hɔwiele ye la ɛne.

Ngilehilelɛ mɔɔ li awieleɛ

¹⁰ Na wɔmɔ, wɔli me ngilehilelɛ, me nyɛleɛ nee me ɛbɛlabɔlɛ nu bodane ne anzi; wɔnwu me diedi, me abotane, me ɛhulolɛ, nee me kpundii mɔɔ megyi,

¹¹ me amaneɛnwunlɛ nee kpɔdekpɔde mɔɔ bɛyɛ me, ɛze mɔɔ zile me nwo zo wɔ Anteɔko, Ayekoneɛm yɛɛ Lesetela la amuala, ɛzulolɛ mɔɔ menwunle ye la le kpole. Noko Awulae yele me vile ɔ muala anu.

¹² Nɔhalɛ, awie biala mɔɔ kpondɛ kɛ ɔbɔ ɛbɛla kpalɛ na ɔ nee Kelaese Gyisɛse dua la, bɛbayɛ ye kpɔdekpɔde.

¹³ Amumuyɛma nee adalɛma bahɔ zolɛ amaa bɛ ti ayɛ se kpalɛ, bɛbabɛlɛbɛla awie mɔ na bɛabɛlɛbɛla bɛdabɛ bɛ ngome bɛ nwo.

¹⁴ Na wɔmɔ, kɔ zolɛ sɔ nɔhalɛ ne mɔ mɔɔ bɛhilehile wɔ na ɛdie ɛdi ɛsesebɛ la anu. Ɛze wɔ kilehilevolɛma ne mɔ,

¹⁵ yɛɛ ɛkakye kɛ sumunli wɔ ngakula nu yɛɛ ɛzukoale Nyamenle Edwɛkɛ ne mɔɔ maa wɔ nrɛlɛbɛ mɔɔ saa ɛdie Kelaese Gyisɛse ɛdi a, ɔkola ɔmaa wɔ ngoanelielɛ la.

¹⁶ Bɛfa Nyamenle Sunsum a bɛkɛlɛ Nyamenle Edwɛkɛ ne a, na ɔle kpalɛ ɔmaa nɔhalɛ ne ɛhilehilelɛ, sonla nyunlu ɛhwilɛ, folɛdulɛ, yɛɛ menli ɛtetelɛ wɔ ɛbɛla kpalɛ ɛbɔlɛ nu,

¹⁷ amaa sonla ne mɔɔ sonle Nyamenle la ali munli na bɛaziezie ye bɛamaa yeayɛ gyima kpalɛ.