2 Sam 9 - BAEBOLO ANZƐƐ BULUKU NWUANZANWUANZA

Devidi nee Mɛfebɔhyɛte

¹ Kenle ko Devidi bizale kɛ, “Awie tɛbɔ Sɔɔlo abusua ne anu mɔɔ Dwɔnatan ati ɔwɔ kɛ meyɛ ahunlunyele memaa ye ɔ?”

² Ɛnee sonvolɛ bie wɔ Sɔɔlo awuke nu, bɛfɛlɛ ye Zaeba. Bɛvɛlɛle ye bɛmanle Devidi, na belemgbunli ne bizale ye kɛ, “Wɔmɔ a bɛfɛlɛ wɔ Zaeba la ɔ?” Ɔzele kɛ, “Nana, medame ɔ. Mele wɔ sonvolɛ.”

³ Belemgbunli ne bizale ye kɛ, “Awie tɛbɔ Sɔɔlo abusua ne anu mɔɔ ɔwɔ kɛ meyɛ ahunlunyele memaa ye, kɛmɔ menvale membɔle ɛwɔkɛ la ɔ?” Zaeba buale belemgbunli ne kɛ, “Dwɔnatan ara nrenya ko tɛbɔ ɛkɛ, na kɛkala ɔle abubura.”

⁴ Belemgbunli ne bizale ye kɛ, “Ɔwɔ nienwu?” Zaeba buale belemgbunli ne kɛ, “Ɔwɔ Ameɛle ara Meekɛ sua nu wɔ Lodɛbaa.”

⁵ Yemɔti Belemgbunli Devidi manle bɛhɔvale ye.

⁶ Mɔɔ Dwɔnatan ara Mɛfebɔhyɛte, Sɔɔlo anlɔnra ne rale la, ɔvale enililɛ ɔbɔle ɔ ti aze ɔbizale Devidi ahye. Devidi vɛlɛle ye, “Mɛfebɔhyɛte.” Na ɔliele zolɛ, “Wɔ sonvolɛ a le me.”

⁷ Devidi zele ye kɛ, “Mmasulo; ɔlua ɛ ze Dwɔnatan ati mebayɛ ahunlunyele meamaa wɔ. Eza mebava ɛ nlenya Sɔɔlo azɛlɛ ne kɔsɔɔti meamaa wɔ. Akee ɔvi ɛnɛ mɔɔ kɔ la, me nee wɔ badɛnla ɛkponle ko anwo yɛado ɛsalɛ.”

⁸ Mɛfebɔhyɛte bɔle ɔ ti aze bieko na ɔzele kɛ, “Mame bɔbɔ a le nwane? Twea funli bɔbɔ tɛla me ɛkpɔyɛ. Duzu ati bɔbɔ yɛɛ wɔyɛ nyele kpole ɛhye wɔmaa me a?”

⁹ Akee belemgbunli ne vɛlɛle Zaeba na ɔzele ye kɛ, “Debie biala mɔɔ le Sɔɔlo nee ye abusua ne ɛdeɛ la, meva memaa ɛ menle ara nrenya ye.

¹⁰ Akee ɛdawɔ nee ɛ mra mrenya nee wɔ sonvolɛma bazo ɛya amaa ye, na bɛava nuhua aleɛ bɛara, amaa ɛ menle anyia debie ali. Na Mɛfebɔhyɛte, ɛ menle ara nrenya ne, dahuu ɔ nee me bado ɛsalɛ.” (Zaeba lɛ mralɛ mrenya bulu nee nnu yɛɛ sonvolɛma abulanwiɔ.)

¹¹ Akee Zaeba zele belemgbunli ne kɛ, “Debie biala mɔɔ Nana ɛha ɛhile ye sonvolɛ la, zɔhane ala yɛɛ ye sonvolɛ ne bayɛ a.” Yemɔti Mɛfebɔhyɛte lile aleɛ wɔ Devidi ɛkponle zo dahuu kɛ asɛɛ belemgbunli amra ne mɔ ko ala la.

¹² Mɛfebɔhyɛte wole ralɛ nrenya ko, bɛfɛlɛ ye Maeka. Na Zaeba abusua ne anu amra kɔsɔɔti yɛle Mɛfebɔhyɛte sonvolɛma.

¹³ Yemɔti Mɛfebɔhyɛte mɔɔ ɛnee le abubura la dɛnlanle Gyɛlusalɛm na ɔlile aleɛ dahuu wɔ belemgbunli ne ɛkponle zo.