2 Sam 8 - BAEBOLO ANZƐƐ BULUKU NWUANZANWUANZA

Devidi ɛlɔnema konimlilɛ ne mɔ

¹ Ɛhye anzi, Belemgbunli Devidi tetale Filisitiama, ɔlile bɛ nwo zo konim, ɔbɛlɛle bɛ aze fɛɛnye na ɔliele maanle ne ɔvile bɛ tumi bo.

² Eza ɔlile Mowabema anwo zo konim. Ɔmanle bɛdedale aze ɛhonlone ɛhonlone. Menli nsa biala bɛhunle nuhua nwiɔ na bɛgyakyile ko. Yemɔti Mowabema yɛle Devidi ngɛkɛlɛ na bɛduale adwule bɛmanle ye.

³ Devidi eza lile Rilihɔbo ara Hadadizɛ, Zoba belemgbunli ne, anwo zo konim wɔ mekɛ mɔɔ Hadadizɛ ɛnee ɛlɛkɔ Azule Yufileti sɔlɔ kɛ ɔkava ɛkɛ ne maanle ne la.

⁴ Devidi hyele ye ɛlɔnema mɔɔ ka mgbɔnwɔ la anu apenle ko ɛya nsuu, yɛɛ ɛlɔnema mɔɔ ko aze la apenle ngoko abulanwiɔ. Devidi gyakyile mgbɔnwɔ dodo mɔɔ kɛhola kɛhwe konle ehwili ɛya ko la na ɔbubule mɔɔ ɛha la agyakɛ.

⁵ Seleama mɔɔ wɔ Dɛmasekɛse la rale kɛ bɛbaboa Zoba Belemgbunli Hadadizɛ na Devidi hunle bɛ nuhua apenle ngoko abulanwiɔ nee nwiɔ.

⁶ Akee Devidi yɛle ye ɛlɔnema azokoɛleɛ dɔɔnwo wɔ maanle ne anu na Seleama yɛle Devidi ngɛkɛlɛ na bɛduale adwule bɛmanle ye.

⁷ Na Devidi yeyele nvutuke enyinlike ne mɔ mɔɔ Hadadizɛ mgbanyima ne mɔ lɛ la amuala hɔle Gyɛlusalɛm.

⁸ Belemgbunli Devidi vale kɔbele dɔɔnwo kpalɛ wɔ Bita nee Bilotae; ɛhye mɔ le azuamgbole mɔɔ Hadadizɛ ɛnee sie bɛ la.

⁹ Mɔɔ Heemate Belemgbunli Towae dele kɛ Belemgbunli Devidi ɛli Hadadizɛ ɛlɔnema ne anwo zo konim la,

¹⁰ ɔzoanle ɔ ra nrenya Dwolam kɛ ɔhɔbiza ye ahye na ɔyɛ ye mo kɛ yeli Hadadizɛ mɔɔ ɔdaye Towae ɔ nee ye ɛho fane dɔɔnwo la anwo zo konim a. Dwolam vale ezukoa nvutuke, dwɛtɛ fufule nee kɔbele ahyɛlɛdeɛ hɔmanle Devidi.

¹¹ Belemgbunli Devidi dule ahyɛlɛdeɛ ne nee mɔɔ ɔnyianle bɛ wɔ maanle maanle mɔɔ ɔlile bɛ nwo zo konim la anu la manle Ɛdɛnkɛma.

¹² Ɔnyianle ninyɛne ne ɔvile Yidɔm, Mowabe, Amɔn, Filisitia, Amalɛke yɛɛ ɔnyianle bie noko ɔvile Zoba Belemgbunli Hadadizɛ ɛkɛ.

¹³ Akee Devidi duma yɛle kpole kpalɛ wɔ mekɛ mɔɔ ɔhunle Yidɔmma apenle ngoko bulu nee mɔtwɛ wɔ Ngyenle Bɔnza na ɔziale ɔrale la.

¹⁴ Ɔyɛle ye ɛlɔnema azokoɛleɛ dɔɔnwo wɔ Yidɔm maanle ne anu, na Yidɔmma yɛle Devidi ngɛkɛlɛ. Ɛleka biala mɔɔ Devidi hɔle la, Ɛdɛnkɛma manle ɔlile konim.

¹⁵ Yemɔti Devidi ziele Yizilayɛ maanle ne kɔsɔɔti. Ɔvale nɔhalɛlilɛ nee pɛlepɛlelilɛ ɔziele menli ne.

¹⁶ Zɛluaya ara Dwowabe a nea ɛlɔnema ne anwo zo a; Gyɛhɔhyafate mɔɔ ɔ ze a le Ahaelɛde la a le maanle ne kɛlɛhɛlɛvolɛ a;

¹⁷ Ahaetɛbe ara Zeedɔko nee Abayata ara Ahemɛlɛke a le sɛlɛvolɛma a; Sɛlaya le kɔɔto kɛlɛhɛlɛvolɛ;

¹⁸ Gyɛhɔyada ara Bɛnaya a nea Devidi sinzavolɛma ne anwo zo a yɛɛ Devidi amra mrenya ne mɔ le sɛlɛvolɛma.