2 Sam 23 - BAEBOLO ANZƐƐ BULUKU NWUANZANWUANZA

Devidi edwɛkɛ mɔɔ li amozi la

¹ Gyɛsi ara Devidi a le sonla mɔɔ Nyamenle kpogyale ye zo a. Yemɔ yɛɛ Gyekɔbo Nyamenle ne kpale nuhua yele ye ziele ye belemgbunli a. Yemɔ a ɔsesale Yizilayɛma edwɛne fɛlɛko ne mɔ agbɔkɛ a. Ye edwɛkɛ mɔɔ li amozi la ɛne:

² Ɛdɛnkɛma Sunsum ne dua me nwo zo tendɛ; ye edwɛkɛ ne dua me nloa.

³ Yizilayɛ Nyamenle ne ɛdendɛ; Yizilayɛ pepɛdievolɛ ne ɛze me kɛ, “Belemgbunli mɔɔ fa pɛlepɛlelilɛ sie ye menli, na ɔfa Nyamenlezulolɛ ɔsie bɛ la,

⁴ kpakye bɛ nwo zo kɛ nwonlomɔ ewia, ɔle kɛ nwonlomɔ sɛnzɛne mɔɔ amungu ɛnle ɔ nyunlu, ɔle kɛ ezule mɔɔ maa ndile fifi la.”

⁵ Ɛhɛe, kɛ Nyamenle bayila me bo zo amra la ɛne, ɔboalekɛ ɔ nee me ɛyɛ ngyekyeleɛ mɔɔ ɛntulu ɛlɛ a, ɔle ngyekyeleɛ mɔɔ bɛnrɛtulu nu noko ɛlɛ, ɛwɔkɛ mɔɔ ɛngakyi ɛlɛ a. Ɔbamaa meakpazi wɔ me anyelazo nu, na meanyia moalɛ kɔsɔɔti.

⁶ Anzenyamenlema le kɛ mbowunzaka mɔɔ bɛfuandi bɛgua la, ɔluakɛ bɛfa bɛ sa bɛfula a ɔnyɛ boɛ.

⁷ Sonla mɔɔ ɔsɔ bɛ nu la, kyesɛ ɔfa bulalɛ anzɛɛ atwɛ baka; bɛbayela bɛ bɔkɔɔ.

Devidi ɛlɔnema ne anu katakyiema

⁸ Katakyiema mɔɔ ɛnee Devidi lɛ bɛ la aluma ɛne: mɔɔ lumua la a le Dwohyɛbe Bahyibɛte mɔɔ vi Takemɔn, mɔɔ li “Nsa Ne” ati la. Ɔvale atwɛ ɔ nee menli ɛya mɔtwɛ honle na ɔhunle bɛ muala.

⁹ Katakyiema nsa ne, mɔɔ tɔ zolɛ nwiɔ la a le Ɛlieza; Dodo mɔɔ vi Aho abusua nu la ara ɔ. Kenle ko ɔ nee Devidi bɛhɔdoale Filisitiama mɔɔ ɛboɔboa bɛ nloa la na bɛ nee bɛ honle. Yizilayɛma nriandile,

¹⁰ na ɔgyinlanle ɔ gyakɛ anu kpundii ɔ nee Filisitiama honle toonwo ɔ sa nyianle mɔɔ ɛnee akee ɔgyakyi dadeɛ ne anu a ɔnyɛ boɛ a. Ɛdɛnkɛma lile konim kenle ko ne. Konle ne wiele la, Yizilayɛma ziale hɔle ɛleka mɔɔ Ɛlieza wɔ la na bɛhɔyeyele avunli ne mɔ konle adɛladeɛ ne mɔ.

¹¹ Katakyie mɔɔ tɔ zolɛ nsa la a le Egi mɔɔ vi Hɛla la ara Hyama. Filisitiama boɔboale bɛ nloa wɔ Lihae aluba ɛya avule bie anu; Yizilayɛma guale ɛbɔ nu,

¹² na Hyama gyinlanle ɔ gyakɛ anu kpundii wɔ ɛya ne anu. Ɔbɔle nwolɛ bane na ɔhunle Filisitiama bɔkɔɔ; Ɛdɛnkɛma lile konim kpole bie.

¹³ Ɛbuhenle ne anu, ɛnee Filisitiama ɛyɛ bɛ azokoɛleɛ wɔ Relɛfeeyem Bɔnza, na “Abulasa Ne” anu menli nsa rale Devidi anwo ɛkɛ ne wɔ Adɛlam bolɛ bɔne ne anu.

¹⁴ Mekɛ ne anu ɛnee Devidi wɔ boka bie mɔɔ bɛbɔ nwolɛ bane la azo, na Filisitia ɛlɔnema ekpunli bie ɛhɔva Bɛtelɛhɛm.

¹⁵ Akee Devidi anwo lɔle sua nu na ɔhanle kɛ, “Anrɛɛ meanyia awie aza nzule wɔ bula ne mɔɔ wɔ Bɛtelɛhɛm anlenkɛ kpole ne anloa la bie arɛlɛ me yeamaa meanlo.”

¹⁶ Na katakyiema nsa ne bɔle vale Filisitiama azokoɛleɛ ne hɔle Bɛtelɛhɛm hɔzale nzule wɔ bula ne mɔɔ wɔ anlenkɛ kpole ne anloa la bie rɛlɛle Devidi. Bɛ nee ye rale la yeanno. Ɔguale ye aze ɔmanle Ɛdɛnkɛma;

¹⁷ na ɔzele kɛ, “O Ɛdɛnkɛma, menrɛhola nzule ɛhye no. Saa meyɛ ye zɔhane a ɛnee menlo menli ne mɔɔ vale bɛ ngoane dole nzeleba hɔzale la mogya.” Yemɔti yeanno. Ɛhye a le ninyɛne mgbole mɔɔ katakyiema nsa ne yɛle a.

¹⁸ Dwowabe adiema Abehyae (mɔɔ bɛ nli a le Zɛluaya la) a le katakyiema “Abulasa Ne” kpanyinli a. Ɔvale ye atwɛ ne ɔ nee menli ɛya nsa honle ɔhunle bɛ kɔsɔɔti na ɔnyianle duma kpole wɔ bɛdabɛ “Abulasa Ne” anu.

¹⁹ Ɔnyianle duma kpole wɔ katakyiema “Abulasa Ne” avinli na ɔyɛle bɛ kpanyinli, noko yeando katakyiema “Nsa Ne.”

²⁰ Gyɛhɔyada mɔɔ vi Kabezili la ara Bɛnaya ɔdaye ɔle ɛlɔnenli katakyie kpalɛ; ɔyɛle ninyɛne mgbole na eza ɔhunle Mowabe ɛlɔnema nwiɔ mɔɔ ze konle nye zo kpalɛ la. Eza ɔhunle awenade wɔ kuma bie anu wɔ mekɛ mɔɔ ɛnee ezukɔtweaba ɛlɛtɔ la.

²¹ Eza ɔhunle Yigyibitinli nrenya anwo fɛlɛko bie. Ɛnee Yigyibitinli ne lɛ atwɛ. Bɛnaya lɛ kokolobaka ala; ɔzale Yigyibitinli ne ɔliele ye atwɛ ne na ɔvale ɔwɔle ye ɔhunle ye.

²² Ninyɛne mgbole mɔɔ Bɛnaya mɔɔ le katakyiema abulasa ne mɔ anu ko la yɛle la ɛne.

²³ Ɔle katakyie wɔ katakyiema abulasa ne avinli, noko ɔndo “Nsa Ne.” Na Devidi manle ɔnleanle ye sinzavolɛma ne anwo zo.

^24-39 Menli mɔɔ boka katakyiema “Abulasa Ne” anwo la ɛne: Dwowabe adiema nrenya Asahɛle Dodo mɔɔ vi Bɛtelɛhɛm la ara nrenya Ɛleheenan Hyama nee Yilaeka mɔɔ vi Hɛlɔdo la Hilɛze mɔɔ vi Pɛlɛte Yekɛhye mɔɔ vi Tɛkowa la ara nrenya Ayela Abayizɛ mɔɔ vi Anato Mɛbɛnae mɔɔ vi Huhya Zalemɔn mɔɔ vi Aho Meehalae mɔɔ vi Nɛtɔfa Beeyana mɔɔ vi Nɛtɔfa la ara nrenya Hilɛbe Relaebeeyae mɔɔ vi Gebɛya na ɔvi Bɛngyaman abusua ekpunli ne anu la ara nrenya Yeteyae Bɛnaya mɔɔ vi Paeleetɔn Hedeeyae mɔɔ vi mbɔnza ne mɔ mɔɔ zua Geeyahye la anu la Ebayalebɔn mɔɔ vi Aaleba Azemeevɛte mɔɔ vi Bahulem Yilayaba mɔɔ vi Hyeeyalebɔn Gyahyɛn amra mrenya ne mɔ Dwɔnatan Hyama mɔɔ vi Hɛla Hyɛlaa mɔɔ vi Hɛla la ara nrenya Ehayam Ahahyebae mɔɔ vi Meeyaka la ara nrenya Yilefɛlɛte Ahetɔfɛle mɔɔ vi Gaelo la ara nrenya Yilayam Hɛzelo mɔɔ vi Kamɛle Peeyalae mɔɔ vi Arelabe Neetan mɔɔ vi Zoba la ara nrenya Ayegale Beenae mɔɔ vi Gaade Zilɛke mɔɔ vi Amɔn Neehalae mɔɔ vi Bilo mɔɔ yemɔ a soa Zɛluaya ara Dwowabe konle ninyɛne ne la Ayela nee Gɛlɛbe mɔɔ vi Gyatɛɛ Hɛtenli Yulaya Bɛ muala bɛle katakyiema abulasa nee nsuu.