2 Sam 22 - BAEBOLO ANZƐƐ BULUKU NWUANZANWUANZA

Devidi konimlilɛ edwɛne ne

¹ Mɔɔ Ɛdɛnkɛma liele Devidi wɔ Sɔɔlo nee ye kpɔvolɛma mɔɔ ɛha la asa anu la, ɔdole edwɛne ɛhye ɔyele Ɛdɛnkɛma ayɛlɛ:

² Ɛdɛnkɛma le me bodane, ɔle me aranemgbole nee me dievolɛ.

³ Me Nyamenle, me bodane mɔɔ mefea nu a, ɔpepɛ ɔdie me na ɔfa me ɔsie gyɛlɛɛnye. Ɔle me aranemgbole nee me ɛvealeka, ɔle me dievolɛ, ɔdie me ɔfi konle nu.

⁴ Mesu mefɛlɛ Ɛdɛnkɛma, mɔɔ fɛta ayɛlɛyelɛ, ɔdie me ɔfi me kpɔvolɛma asa anu.

⁵ Ewule azɛlɛkye bɔle yiale me; azɛlɛkye sɛkyelera bule vale me nwo zo.

⁶ Ɛbolɔ nyɛma bɛkɛbɛkale me, na funli kuma zuale me ɛhane.

⁷ Wɔ me ngyegyelɛ nu, menvɛlɛle Ɛdɛnkɛma; menzɛlɛle me Nyamenle kɛ ɔboa me. Ɔdele me ne wɔ ye Ɛzonlenlɛ Sua ne anu, na me ɛzunlɛ dwule ɔ nzo nu.

⁸ Azɛlɛ bɔle twitwi na ɔkpusule, anwumaneamra abo kpusule na bɛdudule, ɔboalekɛ Nyamenle vale ɛya.

⁹ Esike vi ɔ bonyi nu kpunle, na senle gɔhyee vi ɔ nloa anu vindele, samɛnlankɛ mgbomgbɔɔnwo vi ɔ nwo kpomgbɔle guale.

¹⁰ Ɔmanle anwomanyunlu kpakyele nwiɔ na ɔdwule aze, awozinli kabii wɔ ɔ gyakɛ abo.

¹¹ Ɔdɛnlanle tease abɔdeɛ zo ɔdule, bɛnwunle kɛ ɔluolua anwomanyunlu.

¹² Ɔvale awozinli ɔmundunle ɔ nwo, nzulemungu kisii bɔle yiale ye;

¹³ ɛsɛnlɛmanye guaanye vi wienyi ne mɔɔ li ɔ nyunlu la anu kpakyele.

¹⁴ Ɛdɛnkɛma hulule anwuma lɔ, na Nyamenle Bedevinli ne ane lieliele.

¹⁵ Ɔtotole ye ɛda ne mɔ ɔbɔle kpɔvolɛma ne asande; ɔkpakyele ɛsɛnlɛmanye, na bɛnriandile.

¹⁶ Nyevile bo azɛlɛ ne yele dɔle zo, ewiade adiabo ne mɔ anwo yele guale zo wɔ mekɛ mɔɔ Ɛdɛnkɛma hwile ye kpɔvolɛma anyunlu, na ɔvale ɔ bonyi nu anwoma ɔkpanle bɛ nu la.

¹⁷ Ɛdɛnkɛma vi anwuma dwule razɔle me, ɔyele me ɔvile azule buma ne anu.

¹⁸ Ɔliele me ɔvile me kpɔvolɛma mɔɔ anwo yɛ se, nee bɛdabɛ mɔɔ ɛnee bɛkyi me la asa anu, ɔluakɛ bɛ anwosesebɛ ne bo me nwo zo.

¹⁹ Menwunle me nyunlu la, bɛratetale me; na Ɛdɛnkɛma liele me ti.

²⁰ Ɔyele me ɔvile munzule nu; ɔliele me, ɔboalekɛ ɔ nye liele me nwo.

²¹ Ɛdɛnkɛma lole me, wɔ me pɛlepɛlelilɛ ti, me sa anwo bɔkɔbɔkɔ ti, ɔlole me.

²² Meli Ɛdɛnkɛma mɛla ne mɔ azo, metɛkakyile me nzi metɛsile me Nyamenle amumuyɛ nu.

²³ Menlile ye mɛla ne mɔ amuala azo; meambulu ye mɛla ne mɔ azo.

²⁴ Meanli fɔlɛ wɔ ɔ nyunlu, mendwenle me nwo menvile fɔlɛlilɛ nwo.

²⁵ Yemɔti me pɛlepɛlelilɛ ti, me nwo bɔkɔbɔkɔ wɔ ɔ nyunlu ti, Ɛdɛnkɛma ɛlo me.

²⁶ O Ɛdɛnkɛma, ɛle nɔhalɛ ɛmaa bɛdabɛ mɔɔ bɛdi nɔhalɛ bɛmaa wɔ la; mɔɔ nvonleɛ ɛnle ɔ nwo la, ɛmaa ɔnwu kɛ nvonleɛ ɛnle ɛ nwo.

²⁷ Ɛ nwo te maa menli mɔɔ anwo te la, na ɛyɛ kokonyinli wɔ maamɔvoma anwo zo.

²⁸ Ɛdie bɛdabɛ mɔɔ bɛle bɛlɛvo la, na ɛbɛlɛ adubɛnwoma aze.

²⁹ O Ɛdɛnkɛma, wɔmɔ, ɛle me kɛnlaneɛ; O me Nyamenle, ɛkpa me awozinli.

³⁰ Ɛmaa medi ɛlɔne nwo zo konim, medua me Nyamenle ne tumi zo mesɛkye bɛ nwo banebɔlɛ.

³¹ Nyamenle ɛhye, ye nyɛleɛ di munli, ye edwɛkɛ ɛnli mgbanwo! Ɔle enyinlike ɔmaa bɛdabɛ mɔɔ bɛtane ye la.

³² Nyamenle a le nwane? Ɛdɛnkɛma ɔ. Nwane a le bodane a? Kyesɛ yɛ Nyamenle ne.

³³ Nyamenle ɛhye le me ɛvealeka ɛsesebɛ, ɔmaa me adenle nu yɛ wienyi.

³⁴ Ɔzieziele me gyakɛ kɛ kɛtɛboɛ, me nwo kɔlɔnwo wɔ awoka zo.

³⁵ Ɔtete me konle nu, amaa meahola ɛda mɔɔ anu yɛ se la to.

³⁶ O Ɛdɛnkɛma, wɔva wɔ ngoanelielɛ enyinlike ne wɔwowa me, wɔ moalɛ ne ɛmaa meyɛ sonlakpole.

³⁷ Ɛvale me ɛziele azɛlɛ mɔɔ tɛlɛ la azo, na meamkpo aze ɛlɛ.

³⁸ Menvoanle me kpɔvolɛma menzɛkyele bɛ, meangyinla toonwo menwiele bɛ ku.

³⁹ Membobɔle bɛ, menuanle bɛ bo zo; bɛguale aze, bɛangola me nyunlu gyinla.

⁴⁰ Ɛmanle me konle nu anwosesebɛ; ɛmanle menlile me kpɔvolɛma anwo zo konim.

⁴¹ Ɛmanle me kpɔvolɛma nriandile vile me nyunlu, menzɛkyele bɛdabɛ mɔɔ bɛkyi me la.

⁴² Bɛkpondɛle moalɛ, na bɛannyia bie; bɛvɛlɛle Ɛdɛnkɛma na yeanlie zo.

⁴³ Mendinle bɛ kɛ munlutu, mentietiale bɛ nwo zo kɛ awɔdenle zo ndɛtɛlɛ.

⁴⁴ Ɛliele me ɛvile menli mɔɔ dele atua la asa anu; ɛyɛle me maanle maanle belemgbunli; na menli mɔɔ menze bɛ la zonlenle me.

⁴⁵ Maanle gyɛne gyɛne nu amra rabɔle bɛ ti aze manle me; bɛte me ne ala a bɛtie me.

⁴⁶ Bɛ nwo mɔra tu, na bɛfa anwowozolɛ bɛfi bɛ ɛvealeka ne mɔ bɛfinde.

⁴⁷ Ɛdɛnkɛma de aze! Ayɛlɛyelɛ ɛha me pepɛdievolɛ ne! Bɛbɔ me ngoanelielɛ pepɛdievolɛ Nyamenle ne nolo!

⁴⁸ Nyamenle mɔɔ maanle menlile me kpɔvolɛma anwo zo konim, na ɔbɛlɛle maanle maanle aze wɔ me nyunlu a;

⁴⁹ Nyamenle mɔɔ liele me vile me kpɔvolɛma asa anu la, manle menlile me kpɔvolɛma anwo zo konim, na ɔliele me ɔvile nzakadolɛma asa anu.

⁵⁰ Yemɔti Ɛdɛnkɛma, mebaye wɔ ayɛlɛ wɔ maanle maanle avinli; na meado ayɛlɛyelɛ edwɛne meamaa wɔ.

⁵¹ Nyamenle maa ye belemgbunli ne di konim mgbole; ɔkile ye ɛhulolɛ kpundii ne ɔmaa sonla ne mɔɔ yekpa nu yeye ye la, Devidi nee ɔ bo zo amra, wɔ mekɛ mɔɔ ɛnlɛ awieleɛ la.