2 Sam 20 - BAEBOLO ANZƐƐ BULUKU NWUANZANWUANZA

Hyiba atuadelɛ ne

¹ Ɛnee sonlamgbane bie wɔ Gelegale. Bɛfɛlɛ ye Hyiba. Ɔ ze a le Bekelae mɔɔ vi Bɛngyaman abusua ekpunli ne anu la. Ɔwule aweɛne nu na ɔdeanle nuhua kɛ, “Yɛ nee Devidi ɛnlɛ ɛhwee ɛnyɛ. Yɛnli Gyɛsi ara agya. Yizilayɛma e! Awie biala ɛhɔ ye sua nu.”

² Yemɔti Yizilayɛma kpole Devidi na bɛlile Hyiba anzi. Na Dwudama lile bɛ belemgbunli ne anzi vi Dwɔdan ne anloa hɔle Gyɛlusalɛm.

³ Akee Devidi hɔle ye sua nu wɔ Gyɛlusalɛm. Belemgbunli ne manle ye mgbɔnla bulu ne mɔɔ ɔgyakyile bɛ ɔ nzi kɛ bɛzinza ye suakunlu ɛkɛ ne la sua na ɔmanle bɛzinzale bɛ. Ɔnleanle bɛ gyɛlɛɛnye, noko yeanva ɔ nwo yeanga biala fee. Bɛwulale bɛ sua nu na bɛmanle bɛyɛle kɛ asɛɛ bɛle ahunlanvolɛ mraalɛ la toonwo bɛwule.

⁴ Akee belemgbunli ne zele Ameesa kɛ, “Memaa wɔ kenle nsa, boɔboa Dwudama kɔsɔɔti anloa na ɛdawɔ noko boka nwolɛ bɛrɛla.”

⁵ Yemɔti Ameesa hɔboɔboale Dwudama anloa, noko kenle nsa ne mɔɔ bɛhilele ye la kpale nwolɛ.

⁶ Na Devidi zele Abehyae kɛ, “Bekelae ara Hyiba bayɛ maamɔvo adɛla Abesalɛm. Fa me ɛlɔnema ne toa ye ndinlizo, saa ɔnyia azuamgbole mɔɔ bɛlie nwolɛ la bie azo ɔfea a ɔbayɛ ngyegyelɛ yeamaa yɛ.”

⁷ Na Dwowabe ɛlɔnema ne, belemgbunli sinzavolɛma nee ɛlɔnema mɔɔ ɛha la lile Abehyae anzi bɛvi Gyɛlusalɛm bɛhɔle Bekelae ara Hyiba ɛhyelɛ.

⁸ Mɔɔ bɛhɔdwule bolɛ kpole ne mɔɔ wɔ Gebɛyɔn la anwo la, Ameesa rayiale bɛ adenle. Dwowabe wula konle tɛladeɛ, ɔhye akyeso na konle dadeɛ mɔɔ wɔ boa nu la zia nuhua. Mɔɔ ɔkɔ ɔ nyunlu la, ɔyele dadeɛ ne ɔvile ye boa ne anu.

⁹ Na Dwowabe bizale Ameesa kɛ, “Me diema, wɔ agbɔkɛ nu ɛ?” Dwowabe vale ɔ sa fema ne zɔle Ameesa akɛsa kɛ asɛɛ ɔfo ɔ nloa anwo.

¹⁰ Ameesa annwu dadeɛ ne mɔɔ wɔ Dwowabe asa bɛne ne anu la, yemɔti Dwowabe vale dadeɛ ne wɔle Ameesa akunlu tulule ye anyalɛ manle ɔwule. Yeanwɔ ye fane nwiɔ. Akee Dwowabe nee ɔ diema Abehyae hɔle zolɛ voanle Hyiba.

¹¹ Dwowabe menli ne mɔ ko gyinlanle Ameesa funli ne anwo na ɔdeanle nuhua kɛ, “Awie biala mɔɔ kulo Dwowabe nee awie biala mɔɔ wɔ Devidi afoa la ɛdoa Dwowabe.”

¹² Ɛnee Ameesa funli ne mɔɔ mogya ɛbia ye takaa la la ademgbole ne anu. Yemɔti ɛnee awie biala mɔɔ kɛdwu ɛkɛ ne la gyinla. Na Dwowabe sonvolɛ ne nwunle kɛ awie biala ɛlɛgyinla anlea funli ne la, ɔmanle ye zo ɔhɔdole kpɔkɛ ne anu na ɔdule kundu ɔguale ɔ nwo zo.

¹³ Mɔɔ bɛyele funli ne ademgbole ne anu la, menli ne mɔ amuala doale Dwowabe kɛ bɛfoa Hyiba bɛahɔhye ye.

¹⁴ Na Hyiba luale Yizilayɛ mbusua ekpunli ekpunli ne mɔ kɔsɔɔti avinli hɔle suakpole Ebɛle Bɛte Meeyaka azo, na Bekelae anwo amra ne kɔsɔɔti doale ye wɔ suakpole ne azo.

¹⁵ Dwowabe ɛlɔnema ne dele Hyiba nganeɛ, yemɔti bɛrabɛnrale bɛyiale suakpole Ebɛle Bɛte Meeyaka. Bɛvunvunle bane ne mɔ abo kɛ bɛyɛ bɛamaa yeaha yeagua. Eza bɛhuohuanle ndɛtɛlɛ wɔ suakpole ne bane ne mɔ anzi na bɛzile bane ne anzi kɛ bɛbubu ye bɛagua aze.

¹⁶ Raalɛ nrɛlɛbɛvolɛ bie wɔ suakpole ne azo. Ɔdeanle nuhua ɔzele kɛ, “Bɛdie, bɛdie! Bɛha bɛhile Dwowabe kɛ ɔrɛla ɔmaa menga edwɛkɛ mengile ye.”

¹⁷ Dwowabe bikyele ye. Raalɛ ne bizale ye kɛ, “Wɔmɔ a bɛfɛlɛ wɔ Dwowabe la ɔ?” Dwowabe buale ye kɛ, “Ɛhɛe, medame ɔ.” Raalɛ ne zele ye kɛ, “Yɛmenle, tie me.” Dwowabe zele ye kɛ, “Melɛtie wɔ.”

¹⁸ Akee raalɛ ne zele kɛ, “Tete ne ɛnee bɛka ye kɛ, ‘Bɛhɔ Ebɛle Bɛte Meeyaka bɛhɔbiza’, kolaa na bɛahola edwɛkɛ biala di.

¹⁹ Anzonudwolɛ menli nee menli mɔɔ di nɔhalɛ wɔ Yizilayɛ la ko a le me. Ɛkpondɛ kɛ ɛbɔ suakpole ɛhye mɔɔ le tete wɔ Yizilayɛ la ɔ? Ɛkpondɛ kɛ ɛsɛkye debie mɔɔ le Ɛdɛnkɛma ɛdeɛ la ɔ”

²⁰ Dwowabe buale ye kɛ, “Nyamenle ɛkpa ɛgua kɛ menwɔzɛkye suakpole ye.

²¹ Ɔnle nɔhalɛ. Tɛ yɛ adwenle mɔɔ yɛlɛ ye la ɛne. Nrenya bie mɔɔ bɛfɛlɛ ye Hyiba mɔɔ vi Yifelaem awoka ne mɔ azo lɔ la ɛbɔ ɔ bo kɛ ɔko yeatia Belemgbunli Devidi na yenriandi yeravea ɛke. Bɛye ɔ ngomekye ala bɛmaa me na menwɔye me nwo wɔ suakpole ye azo.” Raalɛ ne zele Dwowabe kɛ, “Nea, bɛbavuandi ɔ ti ne bɛado bane ne anzi bɛamaa wɔ.”

²² Raalɛ ne vale ye adwenle ne manle ezuavolɛ ne, na bɛpɛle Hyiba ati bɛvuandinle bɛmanle Dwowabe wɔ bane ne anzi lɔ. Na Dwowabe wule aweɛne tendenle ne anu manle menli ne vile suakpole ne azo hɔle bɛ azua nu. Na Dwowabe ziale hɔle belemgbunli ne anwo lɔ wɔ Gyɛlusalɛm.

Devidi mgbanyima ne mɔ

²³ Dwowabe nea Yizilayɛ ɛlɔnema ne anwo zo. Bɛnaya nea belemgbunli ne sinzavolɛma anwo zo;

²⁴ Adɔlam nea menli mɔɔ yɛ akɛlɛ gyima la anwo zo; Ahaelɛde ara Gyɛhɔhyafate kɛlɛhɛlɛ edwɛkɛ mɔɔ kɛsisi la.

²⁵ Hyiva le kɔɔto kɛlɛhɛlɛvolɛ. Zeedɔko nee Abayata le sɛlɛvolɛma,

²⁶ yɛɛ Ayela mɔɔ vi Gyeeyɛɛ la le Devidi sɛlɛvolɛ.