2 Sam 19 - BAEBOLO ANZƐƐ BULUKU NWUANZANWUANZA

Dwowabe twi Devidi anyunlu

¹ Bɛhanle bɛhilele Dwowabe kɛ, “Devidi ɛlɛdi nyane na ɔlɛsu ɔ ra Abesalɛm.”

² Yemɔti kenle ko ne konimlilɛ ne hakyile nyanelilɛ manle menli ne kɔsɔɔti, ɔluakɛ bɛdele kɛ, “Belemgbunli ɛlɛdi ɔ ra ne ewule ne anwo nyane.”

³ Ɛlɔnema ne ziale hɔle suakpole ne azo koonwu kɛ ɛlɔnema mɔɔ bɛli bɛ nwo zo konim na bɛva nyiane bɛlɛnriandi la.

⁴ Belemgbunli ne hedale ɔ nye na ɔdukuele nuhua ɔzunle kɛ, “O me ra Abesalɛm, O Abesalɛm, me ra ye o!”

⁵ Dwowabe rale belemgbunli sua nu ɛkɛ ne na ɔzele ye kɛ, “Ɛnɛ wɔmaa nyiane ɛhu wɔ mgbanyima kɔsɔɔti mɔɔ ɛlie wɔ ngoane, na bɛlie ɛ mra mrenya nee mraalɛ, wɔ mraalɛ nee wɔ mgbɔnla ngoane la.

⁶ Ɔboalekɛ yɛnwu kɛ ɛkulo bɛdabɛ mɔɔ bɛkpɔ wɔ la na ɛkpɔ bɛdabɛ mɔɔ bɛkulo wɔ la. Ɛnɛ wɔmaa yela ali wienyi kɛ safohyenlema nee ɛlɔnema ɛnle ɛhwee wɔ ɛ nye zo. Ɛnɛ wɔhile wɔmaa menwu ye wienyi kɛ, saa Abesalɛm anwu yɛɛ yɛmɛ ɛlɔnema ne kɔsɔɔti yɛwule a anrɛɛ ɛ kunlu dwo.

⁷ Dwazo na kɔdendɛ ɛdendɛlɛ kɛnlɛma kile wɔ menli ne. Na anrɛɛ meka Ɛdɛnkɛma kɛ, saa wɔangɔ a, ɛnɛ nɔe toonwo mɔɔ aleɛ kahye la sonla kokye bɔbɔ ɛnrɛha ɛ nwo ɛke. Na anrɛɛ ɛhye bayɛ munzule kpole adɛla munzule mɔɔ sumunli kɛ ɛbɔle ye wɔ mgbavolɛ nu bɛra ɛ nwo zo la amuala.”

⁸ Belemgbunli ne dwazole na ɔhɔdendɛle suakpole ne anlenkɛ kpole ne anloa. Bɛhɔhanle bɛhilele menli ne mɔ kɛ, “Belemgbunli ne de anlenkɛ kpole ne anloa.” Na menli ne mɔ kɔsɔɔti hɔbɔle yiale ye. Yizilayɛma kɔsɔɔti ɛnriandi. Ko biala ɛhɔ ɔdaye ye sua zo.

Devidi sia ahɔ Gyɛlusalɛm

⁹ Butule dɔle Yizilayɛ mbusua ekpunli ekpunli ne mɔ avinli. Bɛzele kɛ, “Belemgbunli ne liele yɛ vile yɛ kpɔvolɛma asa anu, ɔliele yɛ ɔvile Filisitiama asa anu; na kɛkala, yenriandi Abesalɛm na yegyakyi maanle ne yedo ye ɛkɛ.

¹⁰ Abesalɛm noko mɔɔ yɛziele ye yɛ belemgbunli la ɛwu konle nu. Duzu ati yɛɛ bɛnrɛmaa yɛnrɛhɔva Belemgbunli Devidi yɛnrɛra ɛ?”

¹¹ Na belemgbunli vale nrɛlaleɛ ɛhye hɔmanle sɛlɛvolɛma, Zeedɔko nee Abayata kɛ bɛha bɛhile Dwuda mgbanyima kɛ, “Duzu ati a bɛanlumua bɛanga ye kɛ bɛmaa yɛhɔva belemgbunli yɛrɛla sua nu ɛ? Ɔluakɛ mɔɔ Yizilayɛma kɔsɔɔti ɛha wɔ me ɛralɛ nwo la, mede ɔ muala.

¹² Bɛmɛ Dwudama, bɛle me nwo amra, mogya ne mɔɔ wɔ me nuhua la, ko ne ala bie a wɔ bɛ nu a. Duzu ati a bɛkɛha amozi wɔ me ɛvalɛ nu ɛ?

¹³ Bɛze Ameesa kɛ, ɔle me nwo sonla. Saa meandu Dwowabe, meanva ɔdaye Ameesa meanyɛ me Safohyenlema Kpanyinli mɔɔ nea me ɛlɔnema ne anwo zo la a, Nyamenle ɛdua me kakɛ ɛgua me bie zo.”

¹⁴ Devidi edwɛkɛ ne hanle Dwudama kɔsɔɔti ahonle na bɛmanle bɛhɔzele belemgbunli ne kɛ, “Ɛ nee wɔ mgbanyima ne mɔ kɔsɔɔti bɛzia bɛrɛla sua nu.”

¹⁵ Yemɔti belemgbunli ne rale Azule Dwɔdan ne anloa, na Dwudama mɔɔ ɛnee ɛra Gelegale la rayiale ye kɛ bɛbava ye bɛapɛ Azule Dwɔdan ne.

¹⁶ Gila ara Hyemɛyae mɔɔ le Bɛngyamanenli na ɔvi Bahulem la nee Dwudama a rale rayiale Belemgbunli Devidi a.

¹⁷ Ɔba la, ɔ nee Bɛngyaman abusua ekpunli ne anu menli apenle a rale a. Na Zaeba, mɔɔ le sonvolɛ wɔ Sɔɔlo awuke nu la, vale ɔ mra mrenya bulu nee nnu ne nee sonvolɛma abulanwiɔ nriandile rale Dwɔdan ne anloa kolaa na belemgbunli ne adwu ɛkɛ.

¹⁸ Bɛpɛle azule ne na bɛboale belemgbunli anwo amra bɛmanle bɛpɛle azule ne na bɛyɛle mɔɔ belemgbunli kpondɛ la bɛmanle ye. Mɔɔ belemgbunli ne ɛlɛboɔboa ɔ nwo apɛ Dwɔdan ne la, Gila ara Hyemɛyae radule dɔle belemgbunli ne agyakɛ anu,

Devidi yɛ atiakunlukɛnlɛma amaa Hyemɛyae

¹⁹ na ɔzele kɛ, “Nana, mesɛlɛ wɔ, mmanea me ɛtane ne na ɛkakye munzule mɔɔ wɔ sonvolɛ, membɔle wɔ kenle ko ne mɔɔ ɛvile Gyɛlusalɛm la. Nana, mebodo wɔ, ye ye ɛ ti anu bɔkɔɔ,

²⁰ ɔluakɛ menwu ye wienyi kɛ meyɛ ɛtane; yemɔti a mera la. Mame a mele sonla mɔɔ ɛlumua ɛvi Dwosefi abusua ekpunli ne anu ɛra kɛ meba mearayia me awulae belemgbunli a.”

²¹ Zɛluaya ara Abehyae zele kɛ, “Ɛhye ɔdaye bɛgyinla nwolɛ ɔ? Ɔwɔ kɛ bɛku Hyemɛyae kɛ ɔbɔle sonla mɔɔ Ɛdɛnkɛma ɛkpokpa ye nwole ɛzie ye belemgbunli la sasa a.”

²² Na Devidi zele kɛ, “Bɛmɛ Zɛluaya amra, duzu adwenle a me nee bɛ yɛva mɔɔ bɛyɛ bɛahwe ngyegyelɛ bɛamaa me a? Ɛnɛ le mekɛ mɔɔ ɔwɔ kɛ bɛku sonla wɔ Yizilayɛ ɔ? Anzɛɛ bɛnze kɛ ɛnɛ mele Yizilayɛ belemgbunli ɔ?”

²³ Akee belemgbunli ne hanle ndane na ɔzele Hyemɛyae kɛ, “Bɛnrɛhu wɔ.”

Devidi yɛ atiakunlukɛnlɛma amaa Mɛfebɔhyɛte

²⁴ Sɔɔlo ara Mɛfebɔhyɛte ɔdaye ɔrayiale belemgbunli ne. Ɔvi kenle ko ne mɔɔ belemgbunli vile Gyɛlusalɛm toonwo mɔɔ eza yera sua nu anzonudwolɛ nu la, yeanrinzi ɔ gyakɛ anwo bɔbɔ, yɛɛ yeamkpa ɔ kɛsa na yeakpo ye adɛladeɛ ne mɔ.

²⁵ Mɔɔ ɔvi Gyɛlusalɛm ɔrayiale belemgbunli ne la, belemgbunli bizale ye kɛ, “Mɛfebɔhyɛte, duzu ati a ɛ nee me angɔ a?”

²⁶ Ɔbuale ye kɛ, “O me awulae, me belemgbunli, me sonvolɛ ne bɛlɛbɛlale me. Menzele ye kɛ, ‘Boɔboa me asoaso ne maa me maa me nee belemgbunli ɛhɔ,’ na yeanyɛ. Kɛmɔ ɛdawɔ ɛze la, mele abubura.

²⁷ Ɔdoanle me ɔmanle wɔ, Nana. Noko, awulae me belemgbunli le kɛ Nyamenle soanvolɛ la; yemɔti debie biala mɔɔ fɛta la fa yɛ me.

²⁸ Nana, anrɛɛ ɛnee ɔwɔ kɛ bɛku egya abusua ne anu amra kɔsɔɔti, noko ɛvale wɔ sonvolɛ, medame, ɛbokale menli mɔɔ kpula bɛ sa wɔ wɔ ɛkponle ne anwo la anwo. Na ɛnee akee duzu bieko bɔbɔ yɛɛ mekpondɛ wɔ belemgbunli ɛkɛ a?”

²⁹ Na belemgbunli ne zele ye kɛ, “Ɔngyia kɛ ɛkɛha edwɛkɛ biala. Mezi ye pi kɛ, ɛdawɔ nee Zaeba bɛbahyɛ ɛ ze Sɔɔlo azɛlɛ ne.”

³⁰ Na Mɛfebɔhyɛte hanle kɛ, “Sumunli kenle ala mɔɔ Nana ɛzia ɛra sua nu anzonudwolɛ nu la, maa Zaeba ɛva azɛlɛ ne amuala.”

Devidi yɛ atiakunlukɛnlɛma amaa Bazeleeyae

³¹ Geleadenli Bazeleeyae vi Wulogɛlem rale na ɔ nee belemgbunli hɔle kɛ ɔkaboa ye yeamaa yeapɛ Dwɔdan ne.

³² Bazeleeyae le sonla koatee mɔɔ anye ɛvi a; yeli ɛvolɛ abulatwɛ. Mɔɔ belemgbunli ne wɔ Meehaneeyem la ɔzieziele ye dahuu, ɔluakɛ ɔle sukoavolɛ kpole kpalɛ.

³³ Na belemgbunli ne zele Bazeleeyae kɛ, “Maa yɛhɔ Gyɛlusalɛm na mebanlea wɔ kpalɛ.”

³⁴ Bazeleeyae hanle kɛ, “Medame mumua ne, yeha me kenle nyɛ mɔɔ me nee me belemgbunli kɔ Gyɛlusalɛm a?

³⁵ Kɛkala, meli ɛvolɛ abulatwɛ. Debie biala ɛnzɔ me nye bieko. Debie mɔɔ wɔ sonvolɛ, medi na meanlo la fɛlɛko, anzɛɛ edwɛne mɔɔ mrenya nee mraalɛ mɔɔ ane yɛ fɛ la to la fɛlɛko bɔbɔ, mende bie. Duzu ati a ɔwɔ kɛ wɔ sonvolɛ, menwɔyɛ adesoa menwɔmaa Nana ɛ?

³⁶ Nana, me nee wɔ yɛbahɔdwu Dwɔdan ne anloa ala. Duzu ati a ɔwɔ kɛ Nana wula me anyunlunyia kpole ɛhye a?

³⁷ Mesɛlɛ wɔ, maa menzia mengɔ me sua zo na mengɔnwu menla egya nee ɔmɔ akunlu. Wɔ sonvolɛ Kyemeham ɛne, maa ɔ nee Nana ɛhɔ; debie biala mɔɔ ɛkulo la, fa ye yɛ.”

³⁸ Na belemgbunli ne buale ye kɛ, “Me nee Kyemeham bahɔ, mebayɛ debie biala mɔɔ fɛta la meamaa ye. Eza debie biala mɔɔ ɛkɛbiza la, mebayɛ meamaa wɔ.”

³⁹ Na menli ne kɔsɔɔti pɛle Dwɔdan ne, belemgbunli ne ɔdaye ɔpɛle. Belemgbunli vole Bazeleeyae anvoka anwo na ɔyileyilale ye kosoɛ kosoɛ. Na Bazeleeyae ziale hɔle sua nu.

Dwudama nee Yizilayɛma su belemgbunli ne anwo kpolera

⁴⁰ Belemgbunli ne hɔle Gelegale; Kyemeham nee ye a hɔle a. Dwudama kɔsɔɔti nee Yizilayɛma anu foa ko lile ɔ nzi hɔzɔhonle ye.

⁴¹ Yizilayɛma kɔsɔɔti rale belemgbunli ɛkɛ ne rabizale ye kɛ, “Nana, duzu ati a yɛ mediema Dwudama ɛrava wɔ nee ɛ nwo amra nee wɔ ɛlɔnema ne ɛpɛ Dwɔdan ye a?”

⁴² Na Dwudama buale Yizilayɛma kɛ, “Ɔboalekɛ belemgbunli ne le yɛ nwo sonla. Duzu ati a bɛva edwɛkɛ ɛhye anwo ɛya a? Yebɔ yɛ aleɛlilɛ nwo kakɛ anzɛɛ yehyɛ yɛ nwolɛ debie ɔ?”

⁴³ Na Yizilayɛma buale Dwudama kɛ, “Kanza ɔvi bɛ nu bɔbɔ a yɛ nwo zonle tɛla bɛ fane bulu. Duzu ati a bɛambu yɛ bie a? Tɛ yɛmɛ a yɛlumuale yɛhanle kɛ yɛkava ye yɛara ɔ?” Noko akee Dwudama mgbolehanlɛ ne bole Yizilayɛma anwo zo.