2 Sam 12 - BAEBOLO ANZƐƐ BULUKU NWUANZANWUANZA

Neetan nrɛlaleɛ ne nee Devidi anwo ɛvulɛ

¹ Ɛdɛnkɛma zoanle Neetan wɔ Devidi anwo ɛkɛ. Ɔhɔle la ɔzele ye kɛ, “Menli nwiɔ woale suakpole bie azo. Ko le sukoavolɛ yɛɛ ko ne noko le ehyianli.

² Sukoavolɛ ne lɛ mboane nee nlankɛ dɔɔnwo.

³ Na ehyianli ne, debie mɔɔ ɔlɛ ye wɔ aleɛabo la a le boane ralɛ kokye mɔɔ ɔdɔle la. Ɔnleanle ye boɛ; awuke ne anu ngakula nee ye luoluale ɛkɛ ne toonwo ɔnyinle kɛnlɛma bie. Ehyianli ne anloa anu aleɛ bɔbɔ mɔɔ ɔwɔ kɛ ɔdi la, ɔvale ɔmanle boane ne. Ye kanrɛlɛ mɔɔ ɔdaye mumua ne ɔno nuhua la yɛɛ boane ne no nu a. Ɔyɛle boane ne kɛ ɔ ra raalɛ la, dahuu kɛ ɔde ɔ gyakɛ azo ala ɛne.

⁴ Kenle ko sukoavolɛ ne nyianle ɛyɛvolɛ. Kɛ ɔkɛva ɔdaye ye nlankɛ anzɛɛ mboane ne mɔ bie ɔkɛzo ye ɛyɛvolɛ la, kyɛkyɛ, nrenya ehyianli ne boane ɛdwoba ko ne yɛɛ ɔhyele ye ɔhunle ye ɔdonle ɔmanle ye ɛyɛvolɛ ne a.”

⁵ Mɔɔ Devidi dele edwɛkɛ ne la, ɔvale nrenya sukoavolɛ ne anwo ɛya kpole. Ɔzele Neetan kɛ, “Meka tease Ɛdɛnkɛma kɛ, sukoavolɛ ne mɔɔ bɔle ɛbɛla ɛhye la fɛta ewule.

⁶ Sumunli kenle ala mɔɔ sonla zɔhane ɛnze anwunvɔne la, ɔwɔ kɛ ɔsie ɔ bo zo fane nna.”

⁷ Neetan zele Devidi kɛ, “Sonla zɔhane, yemɔ a le ɛdawɔ. Na kɛ Ɛdɛnkɛma, Yizilayɛ Nyamenle ne se la ɛne: Menziele wɔ Yizilayɛ belemgbunli, menliele wɔ menvile Sɔɔlo asa anu;

⁸ menvale ye belemgbunlililɛ ne nee ye mraalɛ ne mɔ memanle wɔ; menziele wɔ Yizilayɛ nee Dwuda belemgbunli, na saa ɛhye mɔ le ekyi a, anrɛɛ memanle wɔ ye mɔnwo.

⁹ Duzu ati a wɔbulu Ɛdɛnkɛma edwɛkɛ ne azo na wɔyɛ ɛtane ɛhye ɛ? Wɔmaa bɛhu Yulaya wɔ konle nu. Wɔmaa Amɔnoma ɛhu ye na wɔva ɔ ye.

¹⁰ Kɛmɔ wɔkpo me na wɔva Yulaya aye ne la, dadeɛ nloa ewule ɛnrɛvi wɔ abusua ne anu ɛlɛ.

¹¹ Ɛdɛnkɛma se, ‘Mebamaa wɔ abusua ne anu sonla adwazo ɛ nwo zo agyegye wɔ kpole kpalɛ, mebava wɔ mraalɛ ne mɔ meamaa ɛ gɔnwo nrenya, na ɔ nee bɛ bala ewia henlema.

¹² Ɛyɛle wɔ ɛtane ɛdeɛ ne fealera nu, na mebamaa ɛhye azi ewiazo meamaa Yizilayɛma kɔsɔɔti anwu ye.’ ”

¹³ Devidi zele Neetan kɛ, “Meyɛ ɛtane metia Ɛdɛnkɛma.” Neetan zele Devidi kɛ, “Ɛdɛnkɛma ɛva wɔ ɛtane ɛhyɛ wɔ; ɛnrɛwu.

¹⁴ Kɛmɔ wɔanli Ɛdɛnkɛma eni fee na wɔyɛ nyɛleɛ ɛhye la, ɛ ra ne mɔɔ bɛbawo ye la bawu.”

¹⁵ Na Neetan hɔle sua nu. Ɛdɛnkɛma manle Devidi ara ne mɔɔ ɔ nee Yulaya aye ne wole la anwo dole ye kpole kpalɛ.

Devidi ara ne ewule

¹⁶ Devidi zɛlɛle Nyamenle kɛ kakula ne kɛde kpɔkɛ; ɔhyele ɛhɔne na nɔɔzo biala ɔlale aze wɔ ye sua ne anu.

¹⁷ Ye mgbanyima ne mɔ hɔbodole ye kɛ ɔdwazo azɛlɛ ne anwo, noko yeandwazo yɛɛ ɔ nee bɛ ando ɛsalɛ.

¹⁸ Ye kenle nsuu ne azo, kakula ne wule, na ɛnee akee mgbanyima ne mɔ sulo kɛ bɛkɛbɔ Devidi amaneɛ. Bɛhanle kɛ, “Mɔɔ kakula ne ɛtɛwule bɔbɔ la, yɛka edwɛkɛ a ɔndie; nienwu bɔbɔ yɛɛ akee yɛpe na yɛabɔ ye amaneɛ kɛ kakula ne ɛwu a? Wɔannea a ɛnee yeyɛ ɔ nwo debie yeyɛ yɛ.”

¹⁹ Mɔɔ Devidi nwunle kɛ mgbanyima ne mɔ ɛlɛtu bɛ nwo azukue ngoko la, ye adwenle vale manle ye kɛ kakula ne ɛwu. Yemɔti ɔbizale bɛ kɛ, “Kakula ne ɛwu ɔ?” Bɛbuale ye kɛ, “Ɛhɛe, yewu.”

²⁰ Akee Devidi dwazole azɛlɛ ne anwo. Ɔbiale ɔ nwo na ɔyɛle ɔ nwo boɛ. Ɔhedale ɛdakpa na ɔhɔle Ɛdɛnkɛma sua ne anu ɔhɔyeyɛle ye. Mɔɔ ɔziale ɔhɔle sua nu la, ɔbizale, na bɛmanle ye debie ɔlile.

²¹ Akee ye mgbanyima ne mɔ zele ye kɛ, “Nana, yɛnde ɛhye mɔɔ wɔyɛ la abo; mɔɔ kakula ne ɛtɛnyianle ɛtɛwule la, ɛzunlɛ ala a ɛnee ɛsu a, wɔanli debie; na ɔwule ala la ɛdwazole ɛlile debie.”

²² Devidi buale kɛ, “Mɔɔ kakula ne de aze la mengyele ɛhɔne menzunle; ɔluakɛ mendwenlenle kɛ, ‘Nwane a ze a? Bie a ɛnee Ɛdɛnkɛma ɛnwu me anwunvɔne na yemaa yede kpɔkɛ.’

²³ Na kɛkala mɔɔ yewu la, duzu ati a ɔwɔ kɛ mekye ɛhɔne a? Anzɛɛ menwɔhola menwɔdwazo ye menwɔra ngoane nu ɔ? Mame yɛɛ kenle bie mebahɔ ɛleka mɔɔ ɔwɔ la a, na yemɔ, ɔnzia ɔmba me nwo ɛke.”

Bɛwo Sɔlɔmɔn

²⁴ Akee Devidi kyekyele ɔ ye Batehyɛba arɛle. Ɔ nee ye lale na ɔwole ralɛ nrenya na Devidi donle ye Sɔlɔmɔn. Ɛdɛnkɛma hulole kakula ne,

²⁵ na ɔmanle Nyamenle kpɔmanvolɛ Neetan hɔdonle ye duma Gyɛdedaya, ɔboalekɛ Ɛdɛnkɛma hulole ye.

Devidi fa suakpole Relaba

²⁶ Dwowabe nee Amɔnoma honle na ɔvale suakpole Relaba.

²⁷ Ɔzoanle ɔmanle bɛhɔbɔle Devidi amaneɛ kɛ, “Mehɔteta suakpole Relaba na meva ɛleka mɔɔ bɛnyia bɛ nzule la.

²⁸ Yemɔti fa wɔ ɛlɔnema ne bava suakpole ne. Menrɛhulo kɛ menwɔva anrɛɛ bɛkɛva me duma bɛkɛdo suakpole ne azo.”

²⁹ Yemɔti Devidi boɔboale ye ɛlɔnema ne anloa. Ɔhɔtetale Relaba na ɔhonle ɔvale.

³⁰ Na ɔdule bɛ belemgbunli ne belemgbunli kyɛlɛ ne. Kyɛlɛ ne ɛnlomboɛ kɛyɛ kilo abulasa nee nnu yɛɛ kpɔba vea nu; na bɛvale bɛzoale Devidi. Bɛnyianle ninyɛne dɔɔnwo wɔ suakpole ne azo,

³¹ na Devidi manle ezuavolɛ ne vale sɛlada, bulalɛ ahoanlɛ nee bulalɛ akuma yɛle gyima, na eza ɔmanle bɛguale belekese. Ɔmanle Amɔnoma mɔɔ wɔ azua gyɛne gyɛne zo la yɛle gyima zɔhane bie. Akee Devidi nee ye ɛlɔnema ne ziale hɔle Gyɛlusalɛm.