2 Edk 9 - BAEBOLO ANZƐƐ BULUKU NWUANZANWUANZA

Hyiba Belemgbunli Raalɛ ne kpɔla Sɔlɔmɔn

¹ Hyiba belemgbunli raalɛ ne dele duma kpole ne mɔɔ Sɔlɔmɔn ɛnyia ye la nganeɛ, yemɔti ɔrale Gyɛlusalɛm kɛ ɔbado Sɔlɔmɔn abɛla mgbole kpalɛ. Ɔvale menli dɔɔnwo ɔlile ɔ nzi, ɔvale afunlumu mɔɔ zozo ninyɛne evuanlɛ mɔɔ bɛfa bɛto aleɛ, ezukoa nvutuke dɔɔnwo kpalɛ, yɛɛ awolɛ mɔɔ sonle bolɛ la ɔrale. Ɔradole Sɔlɔmɔn la, ɔbizebizale ye edwɛkɛ dodo biala mɔɔ ɔdaye ɔkɛhola la.

² Sɔlɔmɔn yeyele bɛ kɔsɔɔti anloa, ko bɔbɔ ɛnle ɛkɛ ne mɔɔ hyele ye ekyii a.

³ Hyiba belemgbunli raalɛ ne nwunle Sɔlɔmɔn nrɛlɛbɛ ne na ɔnwunle ye belemgbunli awuke mɔɔ yebu la.

⁴ Akee ɔnwunle aleɛ mɔɔ bɛdi wɔ sua nu ɛkɛ nee ye mgbanyima ne mɔ tɛnlabelɛ nu, kɛ ye sonvolɛma si sonle ye, ye nzasuvolɛma ne adɛladeɛ mɔɔ bɛwula, nee ɛyelalɛ azu mɔɔ Sɔlɔmɔn bɔ wɔ Ɛdɛnkɛma Ɛzonlenlɛ Sua ne anu la, ɔzinle ɔ nwo na ɔ nwo bubule ye.

⁵ Na Hyiba belemgbunli raalɛ ne hanle hilele Sɔlɔmɔn kɛ, “Ayi, bɛle nɔhalɛ bɔkɔɔ. Edwɛkɛ mɔɔ fane ɛ nwo nee wɔ nrɛlɛbɛ ne anwo, mɔɔ mendele wɔ me maanle nu lɔ la le nɔhalɛ bɔkɔɔ.

⁶ Saa mese kɛ alumua ne mendele la menliele menlile a, ɛnee mebɔ adalɛ; meradwu ɛke la yɛɛ melie meli a. Nɔhalɛ, mɔɔ bɛhanle bɛhilele me la ɛndwu mɔɔ medame meranwu ye me nye zo la foa ko bɔbɔ.

⁷ Wɔ mraalɛ anwo ɛyɛ moavolɛ, wɔ sonvolɛma ati ɛyɛ boɛ kɛ dahuu bɛtie wɔ, bɛsonle wɔ, na bɛte wɔ nrɛlɛbɛ edwɛkɛ ne mɔ a.

⁸ Ayɛlɛyelɛ ɛha Ɛdɛnkɛma wɔ Nyamenle ne kɛ yehulo wɔ na yemaa bɛva wɔ bɛzie Yizilayɛ belemgbunli ebia ne azo la. Kɛmɔ Ɛdɛnkɛma kulo Yizilayɛma na ɔkulo kɛ bɛtɛnla ɛkɛ dahuu la ati yɛɛ yemaa bɛva wɔ bɛzie belemgbunli a, amaa wɔava pɛlepɛlelilɛ wɔazie bɛ.”

⁹ Akee ɔhyɛle Belemgbunli Sɔlɔmɔn ninyɛne: ezukoa nvutuke mɔɔ bo tone nu kilo apenle nna yɛɛ ninyɛne evuanlɛ mɔɔ bɛfa bɛto aleɛ la dɔɔnwo nee awolɛ mɔɔ sonle bolɛ la. Hyiba belemgbunli raalɛ ne ninyɛne evuanlɛ mɔɔ ɔvale ɔrahyɛle Sɔlɔmɔn la bo ahyɛlɛdeɛ biala mɔɔ sumunli kɛ ɔralile ebia ne la bɛva bɛhyɛ ye la azo.

¹⁰ (Yeanga ɛhye mɔ angome, Belemgbunli Helam sonvolɛma ne nee Belemgbunli Sɔlɔmɔn sonvolɛma ne mɔ mɔɔ nee ezukoa nvutuke vi Ofɛ rale la vale dwunepa mbaka dɔɔnwo nee awolɛ mɔɔ sonle bolɛ la dɔɔnwo rale.

¹¹ Sɔlɔmɔn vale mbaka ne yɛle sika sosɔle Ɛzonlenlɛ Sua ne nee belemgbunli sua ne na ɔvale bie ɔyɛle getaa mgbole nee ngyikyi ɔmanle edwɛndolɛma. Mekɛ zɔhane anu, ɛnee awie ɛtɛnwunle zɛhae dwunepa mbaka ye bie ɛlɛ wɔ Dwuda maanle ne anu.)

¹² Belemgbunli Sɔlɔmɔn noko hyɛle Hyiba belemgbunli raalɛ ne ninyɛne dɔɔnwo, eza debie biala mɔɔ belemgbunli raalɛ ne bizale ye la, ɔvale ɔmanle ye. Akee Hyiba belemgbunli raalɛ ne nee ye menli mɔɔ doa ye la ziale hɔle bɛ maanle nu wɔ Hyiba.

Belemgbunli Sɔlɔmɔn anwonyia ne

¹³ Ɛvolɛ biala Belemgbunli Sɔlɔmɔn asa ka ezukoa nvutuke tone nu kilo apenle ngoko abulanwiɔ nee nsa,

¹⁴ adwule mɔɔ ɔdie ɔfi gualilɛma lɔ nee nvasoɛ mɔɔ ɔnyia ɔfi gualilɛ nu la ɛmboka nwolɛ. Akee Areleebea arelemgbunli nee maanzinli zo neavolɛma fa ezukoa nvutuke nee dwɛtɛ fufule bɛlɛ ye.

¹⁵ Belemgbunli Sɔlɔmɔn yɛle bɛ sa nu enyinlike mgbole ɛya nwiɔ na ɔmanle bɛholole ezukoa nvutuke kilo nsuu bɛguale ko biala anwo,

¹⁶ eza ɔmanle bɛyɛle bɛ sa nu enyinlike ngyikyi ɛya nsa na bɛholole ezukoa nvutuke kilo nsa bɛguale ko biala anwo. Ɔvale bɛ muala ɔziele sua ne mɔɔ bɛfɛlɛ ye Lɛbanɔn Kpɔkɛmile la anu.

¹⁷ Belemgbunli ne eza manle bɛzele belemgbunli ebia kpole ko. Ɔmanle bɛvale ɛzɛlɛ bɛbobɔle foa ko na bɛholole ezukoa nvutuke kpalɛ bɛguale foa ko.

¹⁸ Ebia ne lɛ kpolike nsia mɔɔ bɛfo kolaa na bɛadɛnla zolɛ a, yɛɛ ɔlɛ ɛleka mɔɔ bɛtɛnla zolɛ a bɛfa bɛ gyakɛ bɛsiezie a. Bɛholole ezukoa nvutuke bɛguale kpolike ne mɔ nee mɔɔ bɛfa bɛ gyakɛ bɛsiezie zolɛ la amuala anwo. Ebia ne lɛ ɔ sa nwiɔ mɔɔ bɛfa bɛ sa bɛgua zolɛ a, yɛɛ awenade ananze nwiɔ gyigyi ɔ sa nwiɔ ne azo.

¹⁹ Awenade ananze bulu nee nwiɔ noko gyigyi kpolike ne mɔ azo, kpolike ko biala ati nee ɔ ti lɛ awenade nwiɔ. Belemgbunli ebia mɔɔ le zɛhae la bie ɛnle belemgbunli maanle biala anu.

²⁰ Belemgbunli Sɔlɔmɔn dwora mɔɔ ɔno nu la amuala le ezukoa nvutuke, yɛɛ dwora mɔɔ wɔ sua ne mɔɔ bɛfɛlɛ ye Lɛbanɔn Kpɔkɛmile la anu la le ezukoa nvutuke tagyee. Sɔlɔmɔn mekɛ zo ɛnee bɛnva dwɛtɛ fufule bɛnyɛ ɛhwee.

²¹ Belemgbunli Sɔlɔmɔn lɛ ye meli mɔɔ nee Helam sonvolɛma kɔ Sepeen a. Ɛvolɛ nsa biala meli ne mɔ vi Sepeen ba. Bɛba a bɛfa ezukoa nvutuke, dwɛtɛ fufule, ɛzɛlɛ, motimo, yɛɛ ahomu bɛba.

²² Belemgbunli Sɔlɔmɔn nwunle nrɛlɛbɛ na ɔnyianle ɔ nwo ɔdɛlale arelemgbunli kɔsɔɔti.

²³ Aleɛabo arelemgbunli pelele kɛ bɛkɛnwu Sɔlɔmɔn anyunlu nee ye nrɛlɛbɛ ne mɔɔ Nyamenle ɛva ɛmaa ye la.

²⁴ Ko biala mɔɔ rale la rahyɛle Sɔlɔmɔn ninyɛne mɔɔ bɛva dwɛtɛ fufule nee ezukoa nvutuke bɛyɛ la, adɛladeɛ, alufuanlɛ, ninyɛne mɔɔ bɛfa bɛto aleɛ, mgbɔnwɔ, yɛɛ mgbɔnwɔndua. Ɛhye hɔle zolɛ ɛvolɛ biala.

²⁵ Belemgbunli Sɔlɔmɔn ɛnee eza lɛ mgbɔnwɔ tunli apenle nna mɔɔ ɔsie mgbɔnwɔ nu a, ɔlɛ konle ehwili dɔɔnwo, yɛɛ menli mɔɔ ka mgbɔnwɔ la apenle ngoko bulu nee nwiɔ. Ɔvale bie mɔ ɔhɔle azuamgbole mɔɔ ye konle ehwili ne mɔ wɔ zolɛ la azo, yɛɛ bie mɔ noko wɔ ɔ nwo ɛkɛ ne wɔ Gyɛlusalɛm.

²⁶ Ɔziele arelemgbunli kɔsɔɔti, ɔvi Azule Yufileti ne anloa wɔ Filisitiama azɛlɛ zo toonwo ɔhɔguale Yigyibiti ɛweɛne zo.

²⁷ Na Sɔlɔmɔn manle dwɛtɛ fufule bule yɛle kɛ awolɛ la wɔ Gyɛlusalɛm, yɛɛ sida mbaka bule kɛ Hyifɛla sikamɔ mbaka.

²⁸ Bɛ nee mgbɔnwɔ mɔɔ Sɔlɔmɔn lɛ la vi Yigyibiti nee maanle dɔɔnwo anu a ba a.

Sɔlɔmɔn ebialilɛ ne anwo edwɛkɛ sikalɛ

²⁹ Ninyɛne bieko mɔɔ Sɔlɔmɔn yɛle nee ye nyɛleɛ, ɔvi mɔlebɛbo ne kɔdwu awieleɛ ne la, bɛhɛlɛ bɛ kɔsɔɔti wɔ Nyamenle Kpɔmanvolɛ Neetan Tetedwɛkɛ Buluku ne, Ahaegya mɔɔ vi Hyaelo la Nyamenle Nrɛlaleɛ Buluku ne, yɛɛ Nyamenle Sonla Yedo Ɛnyelɛzodeɛnwunlɛ Buluku ne mɔ anu. Yedo buluku ne eza ka Nibate ara Gyɛlɔbowam mɔɔ lile ebia wɔ Yizilayɛ la anwo edwɛkɛ.

³⁰ Sɔlɔmɔn dɛnlanle Gyɛlusalɛm na ɔziele Yizilayɛ maanle ne amuala ɛvolɛ abulanla.

³¹ Sɔlɔmɔn hɔle ayile nu na bɛwulale ye mrɛlatɛlɛ nu wɔ ɔ ze Devidi Suakpole zo, na ɔ ra Rilihɔbowam lile ebia ne.