2 Edk 8 - BAEBOLO ANZƐƐ BULUKU NWUANZANWUANZA

Ninyɛne mɔɔ Sɔlɔmɔn yɛle la

¹ Belemgbunli Sɔlɔmɔn vale ɛvolɛ abulanwiɔ a zile Ɛdɛnkɛma Ɛzonlenlɛ Sua ne na ɔbule ɔdaye ye awuke ne a.

² Sɔlɔmɔn eza kyekyele azuamgbole ne mɔ mɔɔ Belemgbunli Helam vale manle ye la fofolɛ, na ɔmanle Yizilayɛma bie mɔ hɔdɛnlanle zolɛ.

³ Sɔlɔmɔn hɔhonle vale Heemate nee Zoba.

⁴ Ɔkyekyele Palemela (Tademɔ) wɔ fienemgbole ne anu, yɛɛ ɔkyekyele azuamgbole mɔɔ bɛfa ninyɛne bɛkɔsiezie zolɛ la wɔ Heemate maanle ne anu.

⁵ Ɔkyekyele Sɔlɔ Bɛte Hɔlɔn nee Aleze Bɛte Hɔlɔn (ɔliele biala anwo bane na ɔvale mbulalɛ ɔguguale bɛ nlenkɛ mgbole ne mɔ anzi).

⁶ Ɔkyekyele Beeyalate nee azuamgbole mɔɔ ɔdaye Sɔlɔmɔn ɔfa ye ninyɛne ɔkɔsiezie zolɛ, azuamgbole mɔɔ ɔfa ye konle ehwili ɔkɔsiezie zolɛ, azuamgbole mɔɔ menli mɔɔ ka konle ehwili la wɔ zolɛ, yɛɛ azuamgbole mɔɔ menli mɔɔ ka mgbɔnwɔ la wɔ zolɛ la. Akee ɔyɛle debie biala mɔɔ ɔhulole kɛ ɔkɛyɛ wɔ Gyɛlusalɛm, Lɛbanɔn, yɛɛ ye maanle ne anu ɛleka biala la.

^7-8 Hɛtema mɔɔ hale maanle ne anu, Amɔlema, Pɛlɛzema, Haevaema nee Gyibɛsema mɔɔ hale, mɔɔ Yizilayɛma angu bɛ la nee bɛ bo zo amra kɔsɔɔti, Sɔlɔmɔn manle bɛyɛle gyima kɛ bɛle ahanra, yɛɛ zɔhane ala a ɛnɛ nee ɛnɛ bɛtɛyɛ a.

⁹ Noko Yizilayɛma ɛdeɛ, Sɔlɔmɔn ammaa bɛanyɛ mialera nu gyima kɛ ahanra. Ɔyɛle bɛ ye ɛlɔnema, ye mgbanyima nee safohyenlema mɔɔ nea ye konle ehwili nee mgbɔnwɔ ɛhanlɛ ɛlɔnema anwo zo a.

¹⁰ Belemgbunli Sɔlɔmɔn mgbanyima mɔɔ nea ye gyima ne mɔ azo la le ɛya nwiɔ abulanlu.

¹¹ Sɔlɔmɔn vale Yigyibiti belemgbunli ne ara raalɛ ne mɔɔ ɛnee yegya ye la rale Devidi suakpole zo wɔ sua ne mɔɔ yezi yemaa ye la anu. Ɔzele kɛ, “Ɔnle kɛ me ye tɛnla awuke ne mɔɔ Yizilayɛ Belemgbunli Devidi ɛbu la anu, ɔluakɛ ɛleka biala mɔɔ Ɛdɛnkɛma Ngyekyeleɛ Ɛlɛka ne ɛhɔ ɛlɛ la le nwuanzanwuanza.”

¹² Sɔlɔmɔn bɔle ɛyelalɛ azu wɔ Ɛdɛnkɛma azukponle ne mɔɔ yezi ye wɔ Ɛzonlenlɛ Sua ne anyunlu ɛkɛ ne la azo manle Ɛdɛnkɛma.

¹³ Ɔbɔle ɛyelalɛ azu ne kɛmɔ Mosisi Mɛla ne kile kɛ bɛyɛ ye kenle ko biala la: Ɛnwomenlelielɛ Kenle ne, Siane Fofolɛ Ɛvoyia ne nee ɛvoyia nsa ne, Angye Ɛvoyia ne, Bɛyɔba Ɛvoyia ne, yɛɛ Kpɔda Bo Ɛdɛnlanlɛ Ɛvoyia ne.

¹⁴ Kɛmɔ ɔ ze Devidi hyehyɛle la, Sɔlɔmɔn hyɛle sɛlɛvolɛma gyima ne manle bɛ. Eza ɔhyɛle Livaema ne mɔ mɔɔ bado ayɛlɛyelɛ edwɛne aboa sɛlɛvolɛma ne la gyima ne ɔmanle bɛ, kɛmɔ kenle ko biala gyima ne si de la. Ɔhyɛle nlenkɛ mgbole sinzavolɛma ɔmanle ekpunli ko biala nwunle nlenkɛ mgbole mɔɔ bɛbazinza la, kɛmɔ Nyamenle sonla Devidi hyehyɛle dole ɛkɛ ne la.

¹⁵ Bɛangakyi debie biala mɔɔ Belemgbunli Devidi hyehyɛle mɔɔ fane sɛlɛvolɛma nee Livaema ne mɔ anwo la, yɛɛ bɛangakyi debie biala mɔɔ fane gya nwo ngyehyɛlɛ ne mɔ anwo la. Bɛyɛle debie biala pɛpɛ.

¹⁶ Akee Sɔlɔmɔn wiele Ɛdɛnkɛma Ɛzonlenlɛ Sua ne si. Ɔwiele debie biala, ɔvi sua ne aze ɛwulalɛ toonwo ɔhɔdwule ye awieleɛ.

¹⁷ Sɔlɔmɔn akee hɔle Ɛzeɔngibɛ yɛɛ Yilate mɔɔ wɔ Yidɔm nyevilenloa wɔ Akaba Ebolo ne anu la.

¹⁸ Belemgbunli Helam manle ye sonvolɛma mɔɔ ze nyevile nye zo kpalɛ la vale meli rɛlɛle Sɔlɔmɔn. Bɛ nee Sɔlɔmɔn sonvolɛma vale meli hɔle Ofɛ, na bɛhɔnyianle ezukoa nvutuke mɔɔ bo kilo apenle ngoko bulu nee nnu la bɛrɛlɛle Sɔlɔmɔn.