2 Edk 7 - BAEBOLO ANZƐƐ BULUKU NWUANZANWUANZA

Bɛtu Ɛzonlenlɛ Sua ne bɛamaa Nyamenle

¹ Belemgbunli Sɔlɔmɔn wiele nzɛlɛlɛ ne yɛ la, senle vi anwuma rayelale ɛyelalɛ azubɔdeɛ ne nee azubɔdeɛ mɔɔ ɛha la, na wienyi kpole bie mɔɔ kile Ɛdɛnkɛma anyunlunyia la rayile Ɛzonlenlɛ Sua ne.

² Sɛlɛvolɛma ne angola Ɛdɛnkɛma Ɛzonlenlɛ Sua ne anu wolo, ɔboalekɛ Ɛdɛnkɛma anyunlunyia ne ɛyi ɛkɛ ne.

³ Mekɛ mɔɔ Yizilayɛma nwunle senle ne kɛ ɔvi anwuma yerayela azubɔlɛ ninyɛne ne mɔ nee Ɛdɛnkɛma anyunlunyia ne mɔɔ ɛyi Ɛzonlenlɛ Sua ne la, bɛbutubutule bɛ nye aze na bɛyeyɛle Ɛdɛnkɛma, bɛyɛle ye mo kɛ, “Ɔle kpalɛ, ɔluakɛ ye ɛhulolɛ kpundii ne wɔ ɛkɛ ne dahuu.”

⁴ Akee belemgbunli ne nee menli ne amuala bɔle azu manle Ɛdɛnkɛma.

⁵ Belemgbunli Sɔlɔmɔn vale nlankɛ apenle ngoko abulanwiɔ nee nwiɔ yɛɛ mboane apenle ngoko ɛya ko abulanwiɔ a bɔle azu ne a. Yemɔti belemgbunli nee menli ne amuala dule Ɛzonlenlɛ Sua ne manle Nyamenle.

⁶ Sɛlɛvolɛma ne gyinlanle ɛleka mɔɔ ɔwɔ kɛ bɛgyinla la, Livaema ne noko gyinlanle bɛ bo zo ne na bɛvale edwɛnedolɛ nwo ninyɛne mɔɔ Belemgbunli Devidi vale manle bɛ la bɛdole edwɛne bɛyeyɛle Ɛdɛnkɛma kɛ, “Ye ɛhulolɛ kpundii ne wɔ ɛkɛ ne dahuu.” Sɛlɛvolɛma ne bɔle aweɛne ndendenle nu na menli ne amuala dwazole gyinlanle.

⁷ Akee Sɔlɔmɔn dule Ɛdɛnkɛma Ɛzonlenlɛ Sua ne anyunlu alie ne anwo avinli ɛkɛ ne manle Nyamenle, na ɔbɔle nane mumua ɛyelalɛ, ma ɛyelalɛ, nee anzonudwolɛ azubɔdeɛ ne mɔ ɛnlome azu wɔ ɛkɛ, ɔboalekɛ ɛnee ɛyelalɛ azubɔlɛ ninyɛne ne, ma azubɔdeɛ ne, nee nane ɛnlome azubɔdeɛ ne mɔ ɛnzo kɔbele azukponle ne mɔɔ Sɔlɔmɔn zile la azo.

⁸ Sɔlɔmɔn nee Yizilayɛma lile Kpɔda Bo Ɛdɛnlanlɛ Ɛvoyia ne kenle nsuu. Menli dɔɔnwo vi Heemate Ademgbolezo, wɔ maanle ne sɔlɔ toonwo mɔɔ kɔkpula Yigyibiti ɛweɛne zo, wɔ maanle ne nyiakɛ la rale.

⁹ Bɛvale kenle nsuu bɛdule Ɛzonlenlɛ Sua ne bɛmanle Nyamenle yɛɛ bɛvale kenle nsuu noko bɛlile ɛvoyia ne. Ye kenle mɔtwɛ ne azo bɛyɛle nzɛlɛlɛ bɛvale ayia ne bɛrale awieleɛ.

¹⁰ Ye alehyenlɛ nu, siane nsuu ne kenle abulanwiɔ nee nsa ne azo, Sɔlɔmɔn manle menli ne amuala hɔle bɛ azua nu. Bɛlile fɛlɛko wɔ nyilalɛ dɔɔnwo mɔɔ Ɛdɛnkɛma ɛva ɛyila Devidi nee Sɔlɔmɔn nee ye menli Yizilayɛma la anwo.

Nyamenle ye ɔ nwo ahile Sɔlɔmɔn bieko

¹¹ Mɔɔ Belemgbunli Sɔlɔmɔn wiele Ɛdɛnkɛma Ɛzonlenlɛ Sua ne si, ɔbule ye awuke ne na ɔwiele debie biala mɔɔ ɔhyehyɛle la yɛ la,

¹² akee Ɛdɛnkɛma yele ɔ nwo hilele ye kenle ko nɔɔzo na ɔzele ye kɛ, “Mede wɔ nzɛlɛlɛ ne, yɛɛ meva Ɛzonlenlɛ Sua ɛhye kɛ nuhua yɛɛ ɔwɔ kɛ bɛbɔ azu bɛmaa me a.

¹³ Saa memaa ewia pe mɔɔ ezule ɛndɔ, anzɛɛ meye abɛbɛ kɛ bɛzɛkye bɛ aleɛ, anzɛɛ saa meye ewule nzane meto me menli ne anwo,

¹⁴ na saa me menli ne mɔɔ bɛfa me duma a bɛfɛlɛ bɛ la bɛlɛ bɛ nwo aze, sɛlɛ na bɛkpondɛ me bo zo, na bɛgyakyi bɛ ninyɛndane ne mɔ ɛyɛlɛ a, yemɔ mebadie bɛ wɔ anwuma lɔ, na meava bɛ ɛtane ne mɔ meahyɛ bɛ, na meamaa bɛ azɛlɛ ne ahye aleɛ.

¹⁵ Akee mebavede me nye meanlea Ɛzonlenlɛ Sua ɛhye kpalɛ na meabuke me nzo meadie nzɛlɛlɛ biala mɔɔ bɛbayɛ ye wɔ ɛke la.

¹⁶ Ɔluakɛ kɛkala, meva Ɛzonlenlɛ Sua ɛhye na medu ye mezie ɛkɛ memaa me nwo mekɛ biala kɛ nuhua yɛɛ ɔwɔ kɛ bɛsonle me a. Me nye nee me ahonle bawoa ɛkɛ ne mekɛ biala.

¹⁷ Na wɔmɔ, saa ɛ nee me dua, kɛmɔ ɛ ze Devidi nee me luale la, na ɛyɛ mɔɔ meze wɔ la amuala, ɛdi me mɛla nee me ngyehyɛlɛ ne mɔ azo a,

¹⁸ menwɔmaa wɔ belemgbunlililɛ ne kɛgyinla, kɛmɔ me nee ɛ ze Devidi kyekyele la kɛ, ‘Ɛ bo zo amra ala a bali Yizilayɛ ebia ne dahuu a.’

¹⁹ Na saa ɛdawɔ nee wɔ menli ne bɛanli me mɛla ne mɔ mɔɔ meva memaa bɛ la azo, na bɛsonle nyamenle gyɛne gyɛne a,

²⁰ yemɔ mebadu bɛ meavi azɛlɛ ne mɔɔ meva memaa bɛ la azo, na meakpo Ɛzonlenlɛ Sua ɛhye mɔɔ medu memaa me nwo kɛ nuhua a ɔwɔ kɛ bɛsonle me la, na meamaa yeayɛ ɛrɛlɛ nee ɛfenle wɔ menli kɔsɔɔti anloa anu.

²¹ “Ɔbazi menli kɔsɔɔti mɔɔ barapɛ nu ɛke la anwo kɛ Ɛzonlenlɛ Sua ɛhye mɔɔ bɛdi ye eni la ɛra ye zɛhae a, na bɛabiza kɛ, ‘Duzu ati a Ɛdɛnkɛma ɛyɛ azɛlɛ ye nee Ɛzonlenlɛ Sua ye zɛhae a?’

²² Na bɛbabua kɛ, ‘Ɔboalekɛ bɛkpole Ɛdɛnkɛma, bɛ ze mɔ Nyamenle ne mɔɔ yele bɛ vile Yigyibiti azɛlɛ zo rale la, na bɛdoale nyamenle gyɛne gyɛne bie mɔ bɛbɔle bɛ ti aze bɛmanle bɛ na bɛzonlenle bɛ; yemɔti yɛɛ Ɛdɛnkɛma ɛmaa munzule ɛhye ɛdo bɛ a.’ ”