2 Edk 6 - BAEBOLO ANZƐƐ BULUKU NWUANZANWUANZA

Sɔlɔmɔn tendɛ ahile menli ne

¹ Na Belemgbunli Sɔlɔmɔn zɛlɛle kɛ, “Ɛdɛnkɛma ɛha kɛ ɔbadɛnla awozinli kabii nu.

² Kɛkala, mezi Ɛzonlenlɛ Sua kpole ɛhye memaa wɔ kɛ ɛleka mɔɔ ɛbadɛnla dahuu a.”

³ Akee belemgbunli ne hakyile ɔ nye menli ne anwo na ɔzɛlɛle Nyamenle nyilalɛ ɔmanle bɛ. Mekɛ ɛhye amuala, ɛnee Yizilayɛma amuala gyi nzisi.

⁴ Na ɔzele bɛ kɛ, “Bɛye Yizilayɛ Ɛdɛnkɛma Nyamenle ne ayɛlɛ! Ɔluakɛ yeva ye tumi ne yeli ye ɛwɔkɛ ne mɔɔ ɔbɔle me ze Devidi la azo. Ɔzele ye kɛ,

⁵ ‘Sumunli kɛ menyele me menli ne menvile Yigyibiti azɛlɛ zo la, metɛneanle Yizilayɛ mbusua ekpunli ekpunli ne mɔ anu metɛtule suakpole ko metɛmanle me nwo kɛ bɛzi sua wɔ ɛkɛ ne na me duma ɛla zolɛ, eza metɛneanle nu metɛtule awie ko kɛ ɔli belemgbunli ɔnlea me menli Yizilayɛma anwo zo.

⁶ Noko kɛkala, menlea nu meye Gyɛlusalɛm kɛ ɛkɛ ne yɛɛ bɛzonle me a, yɛɛ meye Devidi kɛ ɔli belemgbunli ɔzie me menli Yizilayɛma.’ ”

⁷ Sɔlɔmɔn hɔle zo hanle kɛ, “Me ze Devidi a hyehyɛle kɛ ɔsi Ɛzonlenlɛ Sua yeamaa bɛazonle Yizilayɛ Ɛdɛnkɛma Nyamenle ne wɔ nu a.

⁸ Na Ɛdɛnkɛma zele ye kɛ, ‘Ɔle kpalɛ kɛ wɔdwenle nwolɛ kɛ ɛsi sua wɔamaa me a.

⁹ Noko akee tɛ wɔmɔ yɛɛ ɛsi sua wɔamaa me a. Ɛ ra nrenya, ɛdawɔ ɛ kunlu ralɛ nrenya yɛɛ bazi sua ne amaa me a.’

¹⁰ “Kɛkala, Ɛdɛnkɛma ɛli ye ɛwɔkɛ ne azo. Medame yɛɛ meli egya agya meli Yizilayɛ belemgbunli a, yɛɛ mezi Ɛzonlenlɛ Sua kɛ bɛzonle Yizilayɛ Ɛdɛnkɛma Nyamenle ne wɔ nu.

¹¹ Meva Ngyekyeleɛ Ɛlɛka ne mezie Ɛzonlenlɛ Sua ne anu. Nuhua yɛɛ awolɛ ndɛbandɛba ne mɔɔ Ɛdɛnkɛma nee Yizilayɛma ngyekyeleɛ ne mɔɔ bɛyɛle la wɔ zolɛ la wɔ a.”

Sɔlɔmɔn nzɛlɛlɛ ne

¹² Akee Sɔlɔmɔn ragyinlanle azukponle ne anyunlu ɛkɛ ne wɔ mekɛ mɔɔ Yizilayɛma amuala wɔ ɛkɛ ne la, na ɔdɛlɛle ɔ sa nu ɔzɛlɛle.

¹³ (Mekɛ ne anu ɛnee Sɔlɔmɔn ɛva kɔbele ɛbo sɛlɛdwee wɔ alie nwo ɛkɛ ne avinli. Sɛlɛdwee ne anwumahɔlɛ le asɛɛ mita ko nee foa yɛɛ ye tɛtɛlɛ nee ye tendenle sɛ; biala le mita nwiɔ nee ekyi. Ɔvole sɛlɛdwee ne azo mɔɔ awie biala nwu ye la na akee ɔhotole, ɔmanle ɔ sa zo anwuma.)

¹⁴ Akee ɔzɛlɛle kɛ, “O Ɛdɛnkɛma, Yizilayɛ Nyamenle, nyamenle biala nee wɔ ɛnzɛ wɔ anwuma anzɛɛ aze ɛke, mɔɔ di ye ngyekyeleɛ mɔɔ ɔ nee ye ngɛkɛlɛ kɛkyekye la azo, na ɔkile ye ɛhulolɛ ne mɔɔ ɛmbɔ aze ɛlɛ la wɔ ye ngɛkɛlɛ mɔɔ kɛyeye bɛ ahonle nu kɛyɛ tieyɛ kɛmaa ye la anwo a.

¹⁵ Wɔli wɔ ɛwɔkɛ mɔɔ ɛbɔle me ze Devidi la azo na wɔlua wɔ tumi zo wɔmaa ɛnɛ debie biala ɛyɛ zɔhane.

¹⁶ Yemɔti, O Ɛdɛnkɛma, Yizilayɛ Nyamenle, mesɛlɛ wɔ, di wɔ ɛwɔkɛ mɔɔ ɛha la azo, ɛwɔkɛ ne mɔɔ ɛbɔle me ze Devidi kɛ saa ɔ bo zo amra di wɔ mɛla ne mɔ azo na bɛyɛ tieyɛ bɛmaa wɔ kɛmɔ ɔdaye Devidi ɔyɛle la a, dahuu bɛ bie bali belemgbunli azie Yizilayɛma la.

¹⁷ Yemɔti, O Ɛdɛnkɛma, Yizilayɛ Nyamenle, maa mɔɔ wɔha la biala ɛyɛ nɔhalɛ, kɛmɔ ɛvale ɛbɔle me ze Devidi ɛwɔkɛ la.

¹⁸ “Na asoo amgba ɛdawɔ Nyamenle ɛ nee menli badɛnla ewiade ye anu? Anwuma nehane tɛtɛtɛlɛlɛ ne bɔbɔ, ɛnzo lɔ, na akee Ɛzonlenlɛ Sua ekyi ɛhye mɔɔ mezi la yɛɛ ɛbazo nu a?

¹⁹ Noko akee, Ɛdɛnkɛma me Nyamenle, tie wɔ akɛlɛ nzɛlɛlɛ nee ye modolɛ na yɛ mɔɔ mebiza la maa me.

²⁰ “Mesɛlɛ wɔ, buke ɛ nye na sinza Ɛzonlenlɛ Sua ɛhye nɔɔzo nee ewiazo. Wɔbɔ ɛwɔkɛ kɛ ɛke yɛɛ bɛzonle wɔ a, yemɔti saa medame wɔ sonvolɛ, mekakyi me nye Ɛzonlenlɛ Sua ɛhye anwo na mesɛlɛ a, anrɛɛ tie me.

²¹ Saa medame wɔ sonvolɛ o, anzɛɛ wɔ menli Yizilayɛma o, saa biala kakyi ɔ nye Ɛzonlenlɛ Sua ye anwo na ɔsɛlɛ a, anrɛɛ tie ye wɔ wɔ sua nu anwuma lɔ. Saa ɛtie yɛ a eza fa yɛ ɛtane ne mɔ kyɛ yɛ.

²² “Saa awie fo ɔ gɔnwo na bɛ nee ye ba wɔ azukponle ye anyunlu wɔ Ɛzonlenlɛ Sua ye anu kɛ ɔraha ndane ɔza ɔ ne a,

²³ tie bɛ wɔ anwuma lɔ, twe mɔɔ di fɔlɛ la anzo kɛmɔ ɔfɛta la, na yileyila mɔɔ di benle la.

²⁴ “Saa wɔ menli Yizilayɛma yɛ ɛtane tia wɔ na ɛmaa bɛ kpɔvolɛma di bɛ nwo zo konim, na nzinlii bɛsia bɛtoa ɛ bo zo, na bɛba Ɛzonlenlɛ Sua ye anu bɛbakpa wɔ kyɛlɛ kɛ ɛva bɛ ɛtane ne mɔ ɛhyɛ bɛ a,

²⁵ tie bɛ wɔ anwuma lɔ, fa bɛ ɛtane ne mɔ kyɛ bɛ na fa bɛ sia bɛla azɛlɛ ne mɔɔ ɛvale ɛmanle bɛ la azo.

²⁶ “Saa wɔ menli ne yɛ ɛtane tia wɔ na ɛmaa ezule gyakyi ɛdɔlɛ kɛ ɛfa wɔadea bɛ, na bɛnu bɛ nwo, na bɛkakyi bɛ nye Ɛzonlenlɛ Sua ye anwo bɛsɛlɛ wɔ a,

²⁷ tie bɛ wɔ anwuma lɔ, fa wɔ menli Yizilayɛma ɛtane ne mɔ kyɛ bɛ, kilehile bɛ maa bɛli boɛ na tɔ ezule gua azɛlɛ ye mɔɔ wɔva wɔmaa bɛ kɛ bɛ ɛdeɛ ɔ la azo.

²⁸ “Saa ɛhɔne ba azɛlɛ ye azo, anzɛɛ ahumu nee ngɛkɛba sɛkye bɛ aleɛ, saa bɛ kpɔvolɛma fa konle batoa bɛ, bɛbɛnra bɛ azuamgbole bɛyia mɔɔ awie ɛngola ɛnvi sua zo ɛnvinde la, anzɛɛ ewule nzane bie tɔ bɛ avinli, anwonyane biala mɔɔ kɛbɔ bɛ la,

²⁹ nzɛlɛlɛ biala anzɛɛ modolɛ biala mɔɔ bɛ nuhua ko biala anzɛɛ wɔ menli Yizilayɛma amuala kɛbɔ nu, kɛva bɛ nyane ngakyile ne mɔ kɛdende bɛ sa wɔ Ɛzonlenlɛ Sua ɛhye anwo kɛzɛlɛ la,

³⁰ tie bɛ wɔ anwuma lɔ, ɛleka mɔɔ ɛde la, na fa bɛ ɛtane ne mɔ kyɛ bɛ. Ɛ ngomekye yɛɛ ɛze sonla ahonle nu a, yɛ maa awie biala kɛmɔ bɛ nzɛlɛlɛ ne mɔ se la,

³¹ amaa bɛazulo wɔ na mekɛ biala bɛayɛ tieyɛ bɛamaa wɔ wɔ mekɛ mɔɔ bɛde azɛlɛ ye mɔɔ ɛvale ɛmanle bɛ nlenya mɔ la azo la.

³² “Zɔhane ala yɛɛ saa ɛyɛvolɛ mɔɔ ɛnle Yizilayɛnli la te wɔ nganeɛ wɔ ninyɛne mgbole mɔɔ wɔyɛ, wɔ tumi nee wɔ ɛlolɛ, na ɔvi ye maanle nu moa moa ɔba kɛ ɔbazonle wɔ wɔ Ɛzonlenlɛ Sua ye anu a,

³³ tie ye wɔ anwuma lɔ, ɛleka mɔɔ ɛde la na yɛ debie biala mɔɔ ɔkpondɛ la maa ye. Ɛhye bamaa menli kɔsɔɔti mɔɔ wɔ aleɛabo la anwu wɔ na bɛazulo wɔ, kɛmɔ wɔ menli Yizilayɛma ɛnwu wɔ na bɛsulo wɔ la. Eza bɛbanwu kɛ amgba ɔwɔ kɛ bɛsonle wɔ wɔ Ɛzonlenlɛ Sua ɛhye mɔɔ mezi memaa wɔ la anu.

³⁴ “Saa wɔ menli ne kɔ kɛ bɛ nee bɛ kpɔvolɛma kaho na adenle biala mɔɔ ɛkɛva zo ɛkɛzoa bɛ la, saa bɛkakyi bɛ nye wɔ suakpole ɛhye mɔɔ ɛdawɔ wɔkpa nu wɔdu wɔmaa ɛ nwo la azo nee Ɛzonlenlɛ Sua ye mɔɔ mezi memaa wɔ la anwo na bɛsɛlɛ a,

³⁵ tie bɛ nzɛlɛlɛ nee bɛ modolɛ wɔ anwuma lɔ na gyinla bɛ nzi maa bɛli konim.

³⁶ “Kɛmɔ ɛtane ɛmkpa sonla nwo la, saa wɔ menli ne yɛ ɛtane tia wɔ, maa ɛfa bɛ nwo ɛya na ɛmaa bɛ kpɔvolɛma di bɛ nwo zo konim, kye bɛ donvula kɔ nlɔnu wɔ maanle gyɛne nu moa moa anzɛɛ amozi ɛke ala bie,

³⁷ na bɛto bɛ nwo aze wɔ maanle ne mɔɔ bɛhye bɛ bɛhɔ nu la anu, na bɛnu bɛ nwo bɛsɛlɛ wɔ kɛ, ‘Ɛdɛnkɛma, yɛvo wɔ, yɛyɛ ninyɛne mɔɔ ɛnfɛta la yɛtia wɔ’,

³⁸ na bɛnu bɛ nwo wɔ maanle ne mɔɔ bɛhye bɛ bɛhɔ nu la anu, bɛyeye bɛ munli nu bɛkakyi bɛ nye wɔ bɛ azɛlɛ ye mɔɔ ɛvale ɛmanle bɛ ze mɔ la azo, nee suakpole ne mɔɔ wɔdu wɔmaa ɛ nwo la anwo, nee Ɛzonlenlɛ Sua ye mɔɔ mezi memaa wɔ la anwo a,

³⁹ tie bɛ nzɛlɛlɛ nee bɛ modolɛ wɔ anwuma lɔ, ɛleka mɔɔ ɛde la, gyinla bɛ nzi na fa wɔ menli ne mɔɔ ɛvo wɔ la ɛtane ne mɔ kyɛ bɛ.

⁴⁰ “O me Nyamenle, maa ɛ nye ɛrɛla yɛ nwo zo na tie yɛ nzɛlɛlɛ mɔɔ yɛkɛyɛ wɔ ɛke la.

⁴¹ Dwazo, O Ɛdɛnkɛma Nyamenle, na ɛ nee wɔ Ngyekyeleɛ Ɛlɛka ne mɔɔ kile wɔ tumi kpole ne la ɛwolo Ɛzonlenlɛ Sua ne anu na bɛlie bɛ ɛnwomenle wɔ ɛkɛ ne na bɛdɛnla ɛkɛ ne dahuu. Yila wɔ sɛlɛvolɛma wɔ debie biala mɔɔ bɛyɛ la anu na maa wɔ menli anye ɛlie kɛ ɛle kpalɛ ɛmaa bɛ a.

⁴² O Ɛdɛnkɛma Nyamenle, mmakakyi ɛ nzi ɛsi wɔ belemgbunli ne mɔɔ wɔkpokpa ye la. Kakye wɔ ɛhulolɛ kpundii ne mɔɔ ɛnyianle ye wɔ wɔ akɛlɛ Devidi anwo la.”