2 Edk 34 - BAEBOLO ANZƐƐ BULUKU NWUANZANWUANZA

Dwuda Belemgbunli Dwosaya

¹ Dwosaya lile ɛvolɛ mɔtwɛ la yɛɛ ɔbɔle ɔ bo kɛ ɔdi belemgbunli a. Ɔdɛnlanle Gyɛlusalɛm na ɔlile ebia ne ɛvolɛ abulasa nee ko.

² Ɔyɛle mɔɔ sɔ Ɛdɛnkɛma anye la, na ɔvale ɔ ze Devidi agyakɛ. Yeangyea ɔ nye yeangɔ fema anzɛɛ bɛne zo.

Dwosaya kolo awozonlezonlenlɛ zo

³ Belemgbunli Dwosaya lile ɛvolɛ mɔtwɛ wɔ ebia ne azo la, ɛnee ɔtɛde kakula bɔbɔ ɛdeɛ, noko ɔmanle ɔ nye bolole kɛ ɔsonle ɔ ze Devidi Nyamenle ne. Ɔlile ɛvolɛ bulu nee nwiɔ wɔ ebia ne azo la, ɔbɔle ɔ bo kɛ ɔtu awozonle ɛzonlenlɛ bo wɔ Dwuda nee Gyɛlusalɛm amuala, na ɔyeyele bɛ bozonle raalɛ Ahyela ne ananze ne mɔ, nee ananze ngakyile mɔɔ bɛgua nee mɔɔ bɛze la amuala.

⁴ Ɔbubule bɛ bozonle Beeyale ne azukponle ne mɔ, ɔbubule ɛyɛlɛ azukponle ne mɔ mɔɔ gyigyi nwolɛ la, na ɔbubule bozonle raalɛ Ahyela ananze ne mɔ, nee ananze mɔɔ bɛze nee mɔɔ bɛgua la amuala. Ɔdinle bɛ ɔmanle bɛyɛle motomoto kɛ munlutu na ɔkpondenle ye wɔ menli mɔɔ zonlenle ninyɛne zɔhane mɔ na bɛwu la sɛka zo.

⁵ Eza ɔyelale bɛ ahɔmenle ne mɔ wɔ bɛ awozonle ne mɔ azukponle ne mɔ azo. Ɔyɛle ɛhye amaa Dwudama nee Gyɛlusalɛmma amuala anwo ade wɔ Nyamenlezonlenlɛ nu.

⁶ Zɔhane ala yɛɛ ɔyɛle ye wɔ Manasɛ, Yifelaem, nee Semɛyɔn maanzinli ne mɔ anu azuamgbole ne mɔ azo toonwo ɔhɔdwule Nafetalae maanzinli nu a.

⁷ Ɔbubule bɛ azukponle ne mɔ na ɔmanle bɛnlunle bɛ bozonle raalɛ Ahyela ananze ne mɔ nee mmonle ananze ne mɔ motomoto, na ɔbubule azukponle ne mɔ mɔɔ bɛyela ɛyɛlɛ wɔ zolɛ la, wɔ Yizilayɛ maanle ne amuala anu. Na akee ɔziale ɔhɔle Gyɛlusalɛm.

Bɛnwu Mɛla Buluku ne

⁸ Mɔɔ Belemgbunli Dwosaya lile ɛvolɛ bulu nee mɔtwɛ wɔ ebia ne azo, mɔɔ ɛnee yedu awozonle ɛzonlenlɛ bo wɔ maanle ne anu nee Ɛzonlenlɛ Sua ne anu la, ɔyele menli nsa kɛ bɛyɛ Ɛdɛnkɛma Ɛzonlenlɛ Sua ne boɛ. Bɛmɛ a le Azalaya ara Hyeefan, Meeyasaya, mɔɔ le suakpole ne amɛnlado ne, yɛɛ Dwowahaze ara Dwowaa, mɔɔ le abɔlɔba kpanyinli wɔ belemgbunli suakunlu ɛkɛ ne la.

⁹ Bɛvale ezukoa mɔɔ Livaema, mɔɔ le sinzavolɛma la nyianle ye wɔ Manasɛ, Yifelaem, nee Yizilayɛma ekyi ne mɔɔ hale la ɛkɛ, Dwuda nee Bɛngyaman maanzinli ne mɔ anu, nee Gyɛlusalɛm la bɛrɛlɛle Sɛlɛvolɛ Kpanyinli Helekaya.

¹⁰ Bɛvale ezukoa ne bɛmanle menli mɔɔ ɛlɛnea bɛdabɛ mɔɔ bɛlɛyɛ Ɛdɛnkɛma Ɛzonlenlɛ Sua ne anwo gyima ne, nee gyimayɛvoma ne mɔɔ ɛlɛyɛ gyima ne la.

¹¹ Bɛmanle kapentama nee belekyama bie kɛ bɛva bɛdɔ awolɛ nee ndaboa bɛhakyihakyi mgbunla ne mɔ mɔɔ Dwuda arelemgbunli annea bɛ boɛ bɛmaa bɛzɛkye la.

¹² Menli ne noko yɛle gyima ne nɔhalɛ nu. Menli mɔɔ ɛnee nea gyimayɛvoma ne anwo zo la a le Gyeehate nee Obadaya, bɛle Livaema mɔɔ vi Mɛlɛlae abusua nu, yɛɛ akee Zɛkalaya nee Mɛhyɛlam mɔɔ vi Kohate abusua nu la. (Livaema le menli mɔɔ ze edwɛne to, bɛkola agole bɔ kpalɛ a.)

¹³ Livaema bie mɔ noko nleanle menli mɔɔ twe ninyɛne ara bɛamaa bɛava bɛayɛ sua ne boɛ, nee menli mɔɔ yɛ gyima ngakyile la anwo zo. Bie mɔ noko hɛlɛhɛlɛle gyima ne anwo ngɛlata, yɛɛ bie mɔ zinzale nlenkɛ.

¹⁴ Mɔɔ bɛye ezukoa ne mɔɔ bɛva bɛra Ɛdɛnkɛma Ɛzonlenlɛ Sua ne anu bɛavinde la, Sɛlɛvolɛ Kpanyinli Helekaya nwunle buluku ne mɔɔ Ɛdɛnkɛma Mɛla ne mɔɔ ɔluale Mosisi anwo zo ɔvale ɔmanle la wɔ nu la.

¹⁵ Helekaya zele Hyeefan mɔɔ le belemgbunli abɔlɔba ne la kɛ, “Menwu Mɛla buluku ne wɔ Ɛdɛnkɛma Ɛzonlenlɛ Sua ye anu;” na ɔvale buluku ne ɔmanle Hyeefan.

¹⁶ Hyeefan vale buluku ne rale belemgbunli ɛkɛ ne, na ɔhanle gyimayɛlɛ ne anwo edwɛkɛ ɔhilele ye kɛ, “Debie biala mɔɔ ɛvale ɛwulale yɛ sa nu la, yɛmaa bɛlɛyɛ.

¹⁷ Bɛwola ezukoa ne mɔɔ wɔ Ɛdɛnkɛma Ɛzonlenlɛ Sua ne anu la na yɛva yɛmaa menli mɔɔ ɛlɛnea gyima ne azo la nee gyimayɛvoma ne.”

¹⁸ Akee ɔvale ɔzɔle zolɛ kɛ, “Sɛlɛvolɛ Kpanyinli Helekaya ɛva buluku bie ɛmaa me.” Na ɔgengale ɔhilele belemgbunli ne.

¹⁹ Belemgbunli ne dele edwɛkɛ mɔɔ wɔ mɛla buluku ne anu la, ɔsuosuanle ye adɛladeɛ mɔɔ ɔwula la anu.

²⁰ Na ɔzele Helekaya, Hyeefan ara Ahaekam, Maeka ara Abedɛn, belemgbunli abɔlɔba Hyeefan, yɛɛ ye sonvolɛ ko mɔɔ bɛfɛlɛ ye Asaya la kɛ,

²¹ “Bɛbɔ me ti, Dwudama nee bɛdabɛ Yizilayɛma ekyi mɔɔ ɛha la ati bɛhɔbiza Ɛdɛnkɛma bɛdie mɔɔ ɔkɛha ɔkɛhile yɛ wɔ buluku ye mɔɔ bɛnwu ye la anwo la. Ɔluakɛ Ɛdɛnkɛma ɛva yɛ nwo ɛya kpole, kɛ yɛ ze mɔ angola anli Ɛdɛnkɛma edwɛkɛ zo, bɛanyɛ mɔɔ bɛhɛlɛ ye wɔ buluku ɛhye anu la.”

²² Yemɔti Helekaya nee bɛdabɛ mɔɔ belemgbunli ne zoanle bɛ la hɔle Nyamenle kpɔmanvolɛ raalɛ Hɛleda anwo ɛkɛ. (Hɛleda ɔ hu a le Tekeva mɔɔ ɔ ze a le Hahase la ara Hyalɛm. Hyalɛm a nea Ɛzonlenlɛ Sua ne anu adɛladeɛ mɔɔ bɛfa bɛsonle la azo a.) Mekɛ ne anu ɛnee Nyamenle kpɔmanvolɛ raalɛ Hɛleda wɔ Gyɛlusalɛm Sua fofolɛ zo. Soanvolɛma ne hanle edwɛkɛ ne amuala hilele ye na bɛhilehilele nu.

²³ Na ɔzele bɛ kɛ, “Ɛdɛnkɛma, Yizilayɛ Nyamenle ne se, ‘Bɛha bɛhile sonla ne mɔɔ zoanle bɛ la kɛ,

²⁴ Medame, Ɛdɛnkɛma, mebadea suakpole ye nee menli mɔɔ wɔ zolɛ la amuala, na meava munzule ne mɔɔ bɛhɛlɛ ye wɔ buluku ne anu la amuala meagua Dwudama anwo zo, kɛmɔ bɛgenga bɛhile belemgbunli ne ala la.

²⁵ Bɛgyakyi me ɛzonlenlɛ na bɛyela ɛyɛlɛ bɛmaa nyamenle gyɛne na bɛlua bɛ sa anloa gyima zo bɛyɛ nyɛleɛ bɛha me ɛya. Yemɔti mebadea azɛlɛ ɛhye azo amra kpalɛ kpalɛ. Bɛkpɔda me a menrɛdie!

²⁶ Akee bɛze Dwuda belemgbunli ne mɔɔ zoanle bɛ kɛ bɛrabiza Ɛdɛnkɛma edwɛkɛ ne la kɛ, Ɛdɛnkɛma, Yizilayɛ Nyamenle ne se, “Kɛmɔ ɛdele edwɛkɛ ne mɔɔ wɔ buluku ne anu la,

²⁷ ɛnlunle ɛ nwo na ɛbɛlɛle ɛ nwo aze wɔ me nyunlu, na suakpole ye nee menli ne mɔ mɔɔ mebadea bɛ la ati ɛlile nyane, ɛsuosuanle wɔ adɛladeɛ ne mɔ anu na ɛzunle la ati, medame noko medie wɔ ɛzunlɛ ne.”

²⁸ Ɛ nye ɛnrɛnwu munzule ne mɔɔ mebamaa yeara suakpole ye nee menli mɔɔ wɔ zolɛ la anwo zo la amuala. Mebawowa wɔ gyɛlɛɛnye na ɛbava anzonudwolɛ wɔahɔ wɔ mgbanyinli ɛleka.’ ” Na menli ne mɔ ziale bɛ nzi rahanle edwɛkɛ ne amuala hilele Belemgbunli Dwosaya.

Dwosaya nee Ɛdɛnkɛma yɛ ngyekyeleɛ kɛ ɔbayɛ tieyɛ yeamaa ye

²⁹ Belemgbunli Dwosaya zoanle manle bɛhɔyieyiale Dwuda nee Gyɛlusalɛm mgbanyima ne amuala.

³⁰ Akee belemgbunli ne nee Dwuda mgbanyima ne mɔ, Gyɛlusalɛmma, sɛlɛvolɛma, Livaema, nee menli ngakyile kɔsɔɔti, mgbolema nee koahweabanema hɔle Ɛdɛnkɛma Ɛzonlenlɛ Sua ne anu, na ɔmanle bɛgengale buluku ne mɔɔ bɛnwunle ye wɔ Ɛdɛnkɛma Ɛzonlenlɛ Sua ne anu la bɛhilele bɛ.

³¹ Akee belemgbunli ne dwazole gyinlanle na ɔ nee Ɛdɛnkɛma yɛle ngyekyeleɛ kɛ ɔkɛzonle Ɛdɛnkɛma, ɔkɛli ye mɛla nee ngyehyɛlɛ zo, na ɔkɛva ye ahonle muala nee ye ɛkɛla muala ɔkɛli edwɛkɛ biala mɔɔ bɛhɛlɛ wɔ ngyekyeleɛ ne anu, na ɔwɔ buluku ne anu la azo.

³² Akee ɔmanle bɛdabɛ mɔɔ bɛvi Bɛngyaman maanzinli nu nee Gyɛlusalɛm la dwazole na bɛbɔle ɛwɔkɛ kɛ bɛkɛli zolɛ. Na Gyɛlusalɛmma yɛle mɔɔ Nyamenle ngyekyeleɛ ne nee bɛ ze mɔ Nyamenle ne se la.

³³ Na Dwosaya yeyele munzule ninyɛne ne mɔ mɔɔ wɔ Yizilayɛ maanle ne anu la amuala guale, na ɔmanle menli ne zonlenle Ɛdɛnkɛma, bɛ Nyamenle ne. Wɔ ye mekɛ zo amuala menli ne angakyi bɛ nzi anzi bɛ ze mɔ Ɛdɛnkɛma Nyamenle ne, na bɛhɔle zolɛ bɛzonlenle ye dahuu.