2 Edk 33 - BAEBOLO ANZƐƐ BULUKU NWUANZANWUANZA

Dwuda Belemgbunli Manasɛ

¹ Manasɛ lile ɛvolɛ bulu nee nwiɔ la yɛɛ ɔbɔle ɔ bo kɛ ɔdi belemgbunli a. Ɔdɛnlanle Gyɛlusalɛm na ɔlile ebia ne ɛvolɛ abulanlu nee nnu.

² Mɔɔ ɔyɛle la anzɔ Ɛdɛnkɛma anye. Ɔbɔle bɛkyi ɛbɛla ne mɔɔ maanle maanle mɔɔ Ɛdɛnkɛma voanle bɛ vale bɛ azɛlɛ ne manle Yizilayɛma la bɔle la bie.

³ Ɔziale ɔsisile ɛleka ne mɔ mɔɔ menli mɔɔ ɛnze Nyamenle la sonle, mɔɔ ɔ ze Hɛzikaya gologolole bɛ guale la. Ɔsisile azukponle dɔɔnwo ɔmanle awozonle Beeyale ne mɔ, na ɔyɛle bozonle raalɛ Ahyela ne nee anwomanyunlu ninyɛne ananze ɔmanle bɛzonlenle bɛ.

⁴ Ɔsisile azukponle gyɛne gyɛne wɔ Ɛdɛnkɛma Ɛzonlenlɛ Sua ne anu, wɔ mekɛ mɔɔ Ɛdɛnkɛma ɛha kɛ, “Gyɛlusalɛm ala yɛɛ ɔwɔ kɛ bɛsonle me dahuu a” la.

⁵ Ɔsisile azukponle ɔmanle anwumaneamra ne mɔ amuala wɔ alie nwo nwiɔ ne mɔɔ wɔ Ɛdɛnkɛma Ɛzonlenlɛ Sua ne anu la anwo.

⁶ Ɔyelale ɔ mra mrenya ɔbɔle azu wɔ Henɔm Bɔnza. Ɔhwenle adunyi, ɔyele ngonyia, yɛɛ ɔ nee nyɛne nee menli mɔɔ tendɛ nwomenle nloa zo la dule. Ɔyɛle ɛtane kpole ɔtiale Ɛdɛnkɛma ɔmanle ɔvale ɛya.

⁷ Manasɛ vale ye bozonle ne mɔɔ ɔsonle ye la ananze ne ziele Nyamenle Ɛzonlenlɛ Sua ne anu, wɔ mekɛ mɔɔ Nyamenle ɛha ɛhile Devidi nee ɔ ra Sɔlɔmɔn kɛ, “Sua ɛhye anu, wɔ Gyɛlusalɛm ɛke, mɔɔ mekpa nu meye ye mevi Yizilayɛ mbusua ekpunli ekpunli ne mɔ anu la azo yɛɛ mefa me duma meado kɛ bɛzonle me wɔ mekɛ mɔɔ ɛnlɛ awieleɛ la a.

⁸ Saa bɛnea boɛ na bɛyɛ mɔɔ meze bɛ la amuala, bɛdi me mɛla nee me ngyehyɛlɛ ne mɔ mɔɔ menvale memanle Mosisi la azo a, yemɔ menrɛmaa bɛnrɛdu Yizilayɛma bɛnrɛvi azɛlɛ ne mɔɔ menvale memanle bɛ ze mɔ la azo.”

⁹ Belemgbunli Manasɛ lile Dwudama nee Gyɛlusalɛmma anyunlu manle bɛyɛle bɛkyi ninyɛne kpalɛ bɛdɛlale maanle maanle mɔɔ Ɛdɛnkɛma zɛkyele bɛ wɔ mekɛ mɔɔ Yizilayɛma ɛlɛba la anu amra.

Manasɛ nu ɔ nwo

¹⁰ Ɛdɛnkɛma hakyele Belemgbunli Manasɛ nee menli ne mɔ wɔ bɛ nyɛleɛ nwo, noko bɛandie.

¹¹ Yemɔti Ɛdɛnkɛma manle Aselea belemgbunli ne safohyenlema vale bɛ ɛlɔnema rale bɛ nwo zo na bɛhyele Belemgbunli Manasɛ. Bɛbobɔle ye koba na bɛguale ye kɔbele nwɔnzɔnwɔnzɔ bɛ nee ye hɔle Babelɔn.

¹² Wɔ ye amaneɛnwunlɛ ne anu, ɔzunle ɔvɛlɛle Ɛdɛnkɛma ye Nyamenle ne na ɔnlunle ɔ nwo wɔ ɔ ze mɔ Nyamenle ne anyunlu.

¹³ Ɔzɛlɛle ye, na Nyamenle diele ye ɛzunlɛ na ɔvale ye ɔziale ɔrale Gyɛlusalɛm ɔmanle ɔralile ye ebia ne. Na Manasɛ nwunle kɛ Ɛdɛnkɛma a le Nyamenle a.

¹⁴ Ɛhye anzi, ɔliele bane ɔvale Devidi Suakpole ne bane ne anzi mɔɔ kɔne Gaehɔn adɔleɛ la bɔnza ne anu. Ɔliele bane ne ɔvale Fɛlɛ Anuhɔlɛ ne toonwo ɔhɔdwule suakpole Ofɛle afoa nu. Ɔmanle bane ne hɔle anwuma kpalɛ. Eza ɔvale safohyenlema nee bɛ ɛlɔnema ɔhɔguale Dwuda azuamgbole ne mɔ azo.

¹⁵ Ɔyeyele nyamenle gyɛne gyɛne ne mɔ nee ananze mmonle ne mɔ ɔvile Ɛdɛnkɛma Ɛzonlenlɛ Sua ne anu, na ɔbubule azukponle ne mɔ mɔɔ yesisi wɔ Ɛdɛnkɛma Ɛzonlenlɛ Sua ne boka ne azo nee Gyɛlusalɛm amuala la, na ɔvuandinle bɛ ɔguale suakpole ne kandiba.

¹⁶ Ɔyɛle Ɛdɛnkɛma azukponle ne boɛ na ɔbɔle anzonudwolɛ nee moyɛlɛ azu wɔ zolɛ ɔmanle Ɛdɛnkɛma, na ɔzele Dwudama kɛ bɛzonle Ɛdɛnkɛma, Yizilayɛ Nyamenle ne.

¹⁷ Noko menli ne hɔle zolɛ bɔle azu wɔ ɛleka gyɛne gyɛne manle Ɛdɛnkɛma bɛ Nyamenle ne.

Manasɛ belemgbunlililɛ ne awieleɛ

¹⁸ Debie biala mɔɔ ɛha, mɔɔ Manasɛ yɛle, ye nzɛlɛlɛ mɔɔ ɔzɛlɛle Nyamenle, nee Nyamenle kpɔmanvolɛma edwɛkɛ mɔɔ luale Ɛdɛnkɛma, Yizilayɛ Nyamenle ne duma nu hanle hilele ye la, bɛhɛlɛ bɛ muala wɔ Yizilayɛ Arelemgbunli Tetedwɛkɛ Buluku ne anu.

¹⁹ Akee belemgbunli ne nzɛlɛlɛ nee kɛ Nyamenle zile diele ye, ye ɛtane ne mɔ mɔɔ ɔyɛle nee ye anzosesebɛ, mɔɔ ɔluale zo ɔsisile ɛleka ne mɔ mɔɔ bɛsonle, nee bozonle raalɛ Ahyela ne ananze mɔɔ ɔyɛle kolaa na nzinlii yeanlu ɔ nwo la, bɛhɛlɛ bɛ kɔsɔɔti wɔ Nyamenle Kpɔmanvolɛma Tetedwɛkɛ Buluku ne anu.

²⁰ Belemgbunli Manasɛ hɔle ayile nu na bɛwulale ye mrɛlatɛlɛ nu wɔ ɔdaye ye suakunlu ɛkɛ ne ala. Ɔ ra nrenya Emɔn lile ye agya na ɔlile ebia ne.

Dwuda Belemgbunli Emɔn

²¹ Emɔn lile ɛvolɛ abulanwiɔ nee nwiɔ la yɛɛ ɔbɔle ɔ bo kɛ ɔdi belemgbunli a. Ɔdɛnlanle Gyɛlusalɛm na ɔlile ebia ne ɛvolɛ nwiɔ.

²² Ɔyɛle ɛtane ɔtiale Ɛdɛnkɛma, kɛmɔ ɔ ze Manasɛ yɛle la. Emɔn bɔle azu manle ananze ne mɔ mɔɔ ɔ ze yɛle la amuala, na ɔzonlenle bɛ.

²³ Yeannu ɔ nwo wɔ Ɛdɛnkɛma anyunlu, kɛmɔ ɔ ze Manasɛ yɛle la. Emɔn yɛle ɛtane molozo.

²⁴ Emɔn mgbanyima ne hɔle ɔ ti akpamo na bɛhyele ye wɔ ye sua ne anu bɛhunle ye.

²⁵ Na Dwudama hunle menli mɔɔ hɔle Emɔn ati akpamo hunle ye la amuala, na bɛvale ɔ ra Dwosaya bɛziele belemgbunli.