2 Edk 3 - BAEBOLO ANZƐƐ BULUKU NWUANZANWUANZA

¹ Mekɛ ne anu ɛnee Sɔlɔmɔn ɔ ze Belemgbunli Devidi ɛziezie ɛleka mɔɔ bɛbazi Ɛzonlenlɛ Sua ne la ɛwie. Ɛleka ne wɔ Gyɛlusalɛm, wɔ Molaya Boka, ɛleka mɔɔ Ɛdɛnkɛma yele ɔ nwo hilele Devidi mɔɔ Gyibɛsenli Alɔna (Ɔnan) ɛnee wozo ye ma ne la. Belemgbunli Sɔlɔmɔn bɔle sua ne ɛzilɛ bo

² wɔ mekɛ mɔɔ ɛnee yeli ɛvolɛ nna wɔ ebia ne azo la, ye siane nwiɔ ne azo.

³ Ɛzonlenlɛ Sua ne mɔɔ Belemgbunli Sɔlɔmɔn zile la tendenle le mita abulanwiɔ nee nsuu yɛɛ ye tɛtɛlɛ le mita ngɔnla.

⁴ Ekpumgbunli ne mɔɔ bɛdua nu bɛwolo sua ne anu la tɛtɛlɛ le mita ngɔnla kɛ sua mumua ne tɛtɛlɛ la, yɛɛ ye anwumahɔlɛ le mita abulanlu nee nna. Sɔlɔmɔn vale ezukoa nvutuke tagyee fɔlele sua ne anu amuala.

⁵ Bɛvale sida mbaka bɛzɛle sua ne anye yɛɛ bɛholole ezukoa nvutuke tagyee bɛguale mbaka ne mɔɔ bɛvale bɛzɛle sua ne anye la azo na bɛlile mrɛlɛ nee nwɔnzɔnwɔnzɔ adwinli bɛguale zolɛ.

⁶ Belemgbunli Sɔlɔmɔn vale awolɛ ngɛnlɛma mɔɔ sonle bolɛ nee ezukoa nvutuke mɔɔ ɔhɛlale ɔvile Paveeyem la zieziele Ɛzonlenlɛ Sua ne anu.

⁷ Ɔholole ezukoa nvutuke ne ɔguale sua ne bane ne mɔ, aakɔ ne mɔ, sua ne nwolodo ne bane ne mɔ, nee nlenkɛ ne mɔ anwo. Ɔmanle bɛlile adwinli mɔɔ le kɛ abɔdeɛ mɔɔ lɛ ndɛbalɛ la bɛguale sua ne bane ne mɔ anwo.

⁸ Sua ne akunlu ɛleka ne mɔɔ bɛfɛlɛ ye Nwuanzanwuanza Nu Nwuanzaanwu la tendenle le mita ngɔnla yɛɛ ye tɛtɛlɛ le mita ngɔnla kɛ Ɛzonlenlɛ Sua mumua ne tɛtɛlɛ la. Ezukoa nvutuke mɔɔ ye ɛnlomboɛ kɛyɛ tone nu tɔno abulanwiɔ la yɛɛ bɛholole bɛguale Nwuanzanwuanza Nu Nwuanzaanwu Ɛleka ne bane ne mɔ anwo a.

⁹ Bɛvale ezukoa nvutuke gelamo ɛya nnu abulasuu bɛyɛle agbɛlɛko, yɛɛ anwuma ekpumgbunli ne mɔ noko, bɛholole ezukoa nvutuke bɛguale bɛ bane ne mɔ anwo.

¹⁰ Belemgbunli eza manle ye dwinvolɛma ne vale mbulalɛ yɛle abɔdeɛ mɔɔ lɛ ndɛbalɛ la nwiɔ na bɛholole ezukoa nvutuke bɛguale nwolɛ, na bɛvale bɛziele Nwuanzanwuanza Nu Nwuanzaanwu Ɛleka ne.

^11-13 Bɛziele bɛ mɔɔ ɛnee bɛ mu nwiɔ bɛfoamo nwolɛ na bɛ nye kɔ anuhɔlɛ lɔ la. Ko biala lɛ ndɛbalɛ nwiɔ, ndɛbalɛ ko biala le mita nwiɔ nee ekyi; bɛdɛlɛdɛlɛ bɛ ndɛba ne mɔ anu; ko andɛba yia ɔ gɔnwo ɛdeɛ zo wɔ sua ne avinli sɛsɛ, yɛɛ bɛ ndɛba ngoko ne mɔ mɔɔ ɛha la, ko ɛdeɛ kpula ye tɛbanu bane ne. Ɛhye kile kɛ bɛ ndɛba ne mɔ mɔɔ bɛdɛlɛdɛlɛ nu la nee Ɛzonlenlɛ Sua ne tɛtɛlɛ mɔɔ kɛyɛ mita ngɔnla la sɛ.

¹⁴ Bɛvale lenen ɛdanlɛ, ɛdanlɛ buluwu, ɛdanlɛ kɔkɔlɛ, yɛɛ ɛdanlɛ bie mɔɔ anye le buluwu nee kɔkɔlɛ afonla, mɔɔ bɛnwo abɔdeɛ mɔɔ lɛ ndɛbalɛ bɛgua nuhua la bɛyɛle mgbɛnu bɛpɛle Nwuanzanwuanza Nu Nwuanzaanwu Ɛleka ne.

Kɔbele mpila nwiɔ ne

¹⁵ Belemgbunli ne manle bɛyɛle kɔbele mpila nwiɔ mɔɔ ko anwumahɔlɛ le mita bulu nee nnu nee foa ko la na ɔziele bɛ wɔ Ɛzonlenlɛ Sua ne anyunlu. Ko biala lɛ ɔ ti mɔɔ ye anwumahɔlɛ le mita nwiɔ nee ekyi a.

¹⁶ Bɛnwonle debie bie mɔɔ le kɛ nwɔnzɔnwɔnzɔ la bɛguale mpila ne mɔ ati ne mɔ azo na bɛvale kɔbele debie ahunguma mɔɔ le kɛ akutue la ɛya ko bɛguale zolɛ.

¹⁷ Bɛvale mpila ne mɔ bɛzieziele Ɛzonlenlɛ Sua ne anuhɔlɛ ne: ko gyi nyiakɛ, bɛfɛlɛ ye Gyeeken, yɛɛ ko gyi ye sɔlɔ, bɛfɛlɛ ye Bowaze.