2 Edk 28 - BAEBOLO ANZƐƐ BULUKU NWUANZANWUANZA

Dwuda Belemgbunli Ehaze

¹ Ehaze lile ɛvolɛ abulanwiɔ la yɛɛ ɔbɔle ɔ bo kɛ ɔdi belemgbunli a. Ɔdɛnlanle Gyɛlusalɛm, yɛɛ ɔlile ebia ne ɛvolɛ bulu nee nsia. Yeanva ɔ ze Devidi agyakɛ; yeambɔ ɛbɛla kpalɛ mɔɔ sɔ Ɛdɛnkɛma anye a.

² Ɔvale Yizilayɛ arelemgbunli agyakɛ. Ɔyɛle bozonle Beeyale ne ananze;

³ ɔkpunle ɛyɛlɛ ɔbɔle azu wɔ Henɔm Bɔnza, na ɔyelale ɔ mra mrenya ɔbɔle azu. Ɔbɔle ɛbɛla mgbane mgbane ne mɔ mɔɔ menli mɔɔ ɛnee de azɛlɛ ne azo la bɔle a Ɛdɛnkɛma dule bɛ vile Yizilayɛma anyunlu la bie.

⁴ Eza ɔbɔle azu na ɔkpunle ɛyɛlɛ wɔ ɛleka ne mɔ mɔɔ menli mɔɔ ɛnze Nyamenle la sonle la: awoka zo, yɛɛ baka buzuu biala abo.

Dwudama yɛɛ Seleama nee Yizilayɛma konle ne

^5-6 Kɛmɔ Belemgbunli Ehaze yɛle ɛtane la ati, Ɛdɛnkɛma ye Nyamenle ne manle Selea belemgbunli ne ralile ɔ nwo zo konim na ɔhyele Dwudama dɔɔnwo nuokɛ ɔhɔle Dɛmasekɛse. Ɛdɛnkɛma eza manle Yizilayɛ Belemgbunli Pikaa, mɔɔ ɔ ze a le Relɛmalaya la, lile Ehaze anwo zo konim na ɔhunle Dwuda ɛlɔnema mɔɔ ze ko kpalɛ la anu apenle ngoko ɛya ko abulanwiɔ kenle ko. Ɛdɛnkɛma, bɛ ze mɔ Nyamenle ne manle ɛhye zile Dwudama anwo zo, ɔboalekɛ ɛnee bɛkpo ye.

⁷ Na Yizilayɛnli sogya ko mɔɔ vi Yifelaem abusua ekpunli ne anu, mɔɔ bɛfɛlɛ ye Zekelae la hunle Dwuda belemgbunli ne ara nrenya Meeyasaya nee Azelaekam mɔɔ nea belemgbunli suakunlu ɛkɛ ne la, nee Ɛlekeena mɔɔ saa belemgbunli ɛnle ɛkɛ a ɛnee yemɔ a ɔwɔ ɛkɛ ne la.

⁸ Yizilayɛ ɛlɔnema ne hyele bɛ mediema Dwudama, mraalɛ nee ngakula, apenle ngoko ɛya nwiɔ nuokɛ, na bɛvale bɛ nee ninyɛne dɔɔnwo mɔɔ bɛnyianle bɛ wɔ konle ne anu la bɛhɔle Samɛlea.

Nyamenle Kpɔmanvolɛ Odɛde

⁹ Nyamenle kpɔmanvolɛ bie woale Samɛlea, bɛfɛlɛ ye Odɛde. Ɔhɔyiale Yizilayɛ ɛlɔnema ne mɔɔ ɛlɛba Samɛlea la adenle, na ɔzele bɛ kɛ, “Kɛmɔ Ɛdɛnkɛma, bɛ ze mɔ Nyamenle ne vale Dwudama anwo ɛya la ati yɛɛ ɔyele bɛ ɔmanle bɛlile bɛ nwo zo konim a. Noko bɛmɛ, bɛhu Dwudama somaa bɛmaa Nyamenle akunlu ɛhwe.

¹⁰ Akee eza kɛkala bɛkpondɛ kɛ bɛsisi Dwuda nee Gyɛlusalɛm mraalɛ nee mrenya anwo zo bɔkɔɔ na bɛyɛ bɛ kɛ ahanra. Na bɛnze kɛ bɛdabɛ noko bɛyɛ ɛtane bɛtia Ɛdɛnkɛma, bɛ Nyamenle ne ɔ?

¹¹ Akee bɛdie me ɛ! Bɛ mediema ne mɔ mɔɔ bɛhye bɛ nuokɛ bɛ nee bɛ ɛra la, bɛva bɛ bɛzia bɛhɔ, ɔluakɛ Ɛdɛnkɛma ɛva bɛ nwo ɛya.”

¹² Mgbanyima nna bie, Gyɛhoheenan ara Azalaya, Mɛhyelɛmo ara Bɛlikaya, Hyalɛm ara Gyɛhezekaya, yɛɛ Hadeleeyae ara Ameesa, mɔɔ bɔ Yifelaem abusua ekpunli ne bie la bɛdabɛ bɛdwazole bɛtiale ɛlɔnema ne mɔɔ vi konle ne anloa ɛlɛba la,

¹³ na bɛzele bɛ kɛ, “Bɛmmafa menli mɔɔ bɛhye bɛ nuokɛ la biala bɛba ɛke. Saa bɛyɛ ye zɔhane a ɛnee bɛlɛmaa yɛayɛ ɛtane kpole yɛatia Ɛdɛnkɛma yɛadɛla dɛba ɛdeɛ ne. Yɛdayɛ mumua ne yɛ ɛtane mɔɔ yɛzo la, yɛngola ye, yɛɛ Nyamenle ɛya mɔɔ ɛva wɔ Yizilayɛma anwo la le kpole.”

¹⁴ Yemɔti ɛlɔnema ne gyakyile menli mɔɔ bɛhyele bɛ nuokɛ la nee ninyɛne mɔɔ bɛnyianle bɛ la amuala wɔ mgbanyima ne mɔ anyunlu ɛkɛ ne.

¹⁵ Na mgbanyima nna ne mɔɔ bɛ aluma a bɛbobɔ la vale menli ne nee ninyɛne mɔɔ ɛlɔnema ne nee bɛ rale la; bɛvale ninyɛne ne anu adɛladeɛ ne bie bɛmanle menli ne mɔɔ lɛ bɛ nwo zɔ la wulale, bɛmanle bɛ mgbɔlaboa bɛwulale, bɛmanle bɛ aleɛ nee nzule, na bɛmanle bɛbiale. Bɛmanle menli mɔɔ anwo ɛyɛ bɛ bɛtɛɛ la zo bɛguale asoaso zo, na bɛvale bɛ bɛhɔmanle bɛ nwo amra wɔ Gyɛleko, suakpole ne mɔɔ mrɛlɛ dɔɔnwo wɔ zolɛ la. Akee mgbanyima ne mɔ ziale hɔle Samɛlea.

Ehaze biza Aselea moalɛ

^16-17 Yidɔmma bɔle ɔ bo kɛ bɛwua Dwudama bieko, na bɛhyele menli dɔɔnwo nuokɛ. Yemɔti Belemgbunli Ehaze zɛlɛle Aselea Maanle Maanle Belemgbunli Tegelate Paelisɛ kɛ ɔraboa ye.

¹⁸ Filisitiama noko rale Dwuda anwo zo wɔ Dwuda nyiakɛ nee ye adɔleɛ azuamgbole ne mɔ mɔɔ wɔ awoka ngyikyi ne mɔ azo la azo na bɛvale Bɛte Hyimɛhye, Ayegyalɔn, Gɛdilo, Soko nee ye namunamu ne mɔ, Temena nee ye namunamu ne mɔ, yɛɛ Gemezo nee ye namunamu ne mɔ, na bɛdɛnlanle zolɛ.

¹⁹ Ɔlua Ehaze ati, Ɛdɛnkɛma manle Dwuda yɛle kɛ maanle mgbane bie la, ɔboalekɛ Ehaze ɛkpo Ɛdɛnkɛma na yeyɛ Dwudama mgbane mgbane.

²⁰ Yemɔti kɛ Aselea Belemgbunli Tegelate Paelisɛ kɛraboa Ehaze la, ɔvale ngyegyelɛ dɔɔnwo ɔrɛlɛle ye.

²¹ Ehaze sesale ezukoa mɔɔ wɔ Ɛdɛnkɛma Ɛzonlenlɛ Sua ne anu, belemgbunli suakunlu ɛkɛ, nee mɔɔ wɔ ye mgbanyima ne mɔ sua nu la amuala hɔmanle Aselea belemgbunli ne, noko ngyenle ande tolo.

Ehaze ɛtane ne mɔ

²² Mɔɔ ye amaneɛnwunlɛ ne yɛle kpole la, Belemgbunli Ehaze akee arɛle vile Ɛdɛnkɛma bɔkɔɔ.

²³ Ɔhɔle Dɛmasekɛsema awozonle ne mɔ mɔɔ ɛli ɔ nwo zo konim la azo ɔhɔbɔle azu ɔmanle bɛ na ɔzele kɛ, “Selea awozonle ne mɔ boale bɛ, yemɔti mebɔ azu meamaa awozonle ne mɔ na bɛaboa medame noko.” Na bɛmɛ bɔbɔ yɛɛ akee bɛmanle ɔdaye nee Yizilayɛma amuala nwunle bɛ nyunlu a.

²⁴ Ehaze sesale Nyamenle sua ne anu ninyɛne kɔsɔɔti, ahyɛnze nee dwora ne mɔ, na ɔpepɛle bɛ nu azinli azinli, ɔtotole Ɛdɛnkɛma Ɛzonlenlɛ Sua ne nlenkɛ ne mɔ anu, na ɔyɛle azukponle dɔɔnwo wɔ Gyɛlusalɛm ɛleka biala.

²⁵ Ɔsisile ɛleka ɛleka wɔ Dwuda suakpole biala azo mɔɔ bɛkpu ɛyɛlɛ wɔ ɛkɛ bɛmaa awozonle, na ɔhanle Ɛdɛnkɛma, ɔ ze mɔ Nyamenle ne ɛya kpole kpalɛ.

²⁶ Akee ye nyɛleɛ mɔɔ ɔyɛle, ɔvi mɔlebɛbo ne mɔɔ kɔdwu awieleɛ ne mɔɔ ɛha la, bɛhɛlɛ bɛ kɔsɔɔti wɔ Dwuda nee Yizilayɛ Arelemgbunli Tetedwɛkɛ Buluku ne anu.

²⁷ Ehaze hɔle ayile nu na bɛwulale ye mrɛlatɛlɛ nu wɔ Gyɛlusalɛm. Bɛanva ye bɛangɔ Yizilayɛ arelemgbunli alaleɛ ne. Ɔ ra Hɛzikaya lile ebia ne.