2 Edk 26 - BAEBOLO ANZƐƐ BULUKU NWUANZANWUANZA

Dwuda Belemgbunli Ɛzaya

¹ Menli ne amuala vale Ɛzaya mɔɔ ɛnee ɛli ɛvolɛ bulu nee nsia la ziele Dwuda belemgbunli.

² (Mɔɔ ɔ ze Amazaya wule la, Ɛzaya hɔhonle vale Yilate, na ɔkyekyele sua ne fofolɛ ɔmanle Dwudama.)

³ Ɛzaya lile ɛvolɛ bulu nee nsia la yɛɛ ɔbɔle ɔ bo kɛ ɔdi belemgbunli a. Ɔdɛnlanle Gyɛlusalɛm, yɛɛ ɔlile ebia ne ɛvolɛ abulanlu nee nwiɔ. Bɛfɛlɛ ɔ nli Gyɛkɔlaya; ɔvi Gyɛlusalɛm.

⁴ Ɔvale ɔ ze Amazaya agyakɛ, ɔbɔle ɛbɛla kpalɛ ɔmanle ɔzɔle Ɛdɛnkɛma anye.

⁵ Mekɛ mɔɔ Zɛkalaya, mɔɔ yemɔ a ɛnee kilehile ye Nyamenle ɛzonlenlɛ la de ngoane nu la, Belemgbunli Ɛzaya vale ziele ɔ nyunlu ɔzonlenle Ɛdɛnkɛma, na Nyamenle manle ɔkpazile.

⁶ Ɛzaya nee Filisitiama nyianle konle, na ɔbubule Gate, Gyabenɛ (Gyamenea) nee Ahyedɔdo bane ne mɔ, na ɔkyekyele azuamgbole wɔ Ahyedɔdo afoa nu, nee Filisitia maanle ne anu ɛleka dɔɔnwo.

⁷ Nyamenle boale ye manle ɔlile Filisitiama nee Arelabema mɔɔ de Gɛbeeyale la, yɛɛ Mɛyunɛmma anwo zo konim.

⁸ Amɔnoma duale adwule manle Ɛzaya. Ɛhye manle Ɛzaya anwo yɛle ɛzulolɛ na ye nganeɛ dendenle dwule Yigyibiti ɛweɛne zo.

⁹ Akee Ɛzaya bɔle Gyɛlusalɛm suakpole ne anwo bane bieko kpalɛ. Ɔsisile esanwu wɔ Muleɛzo Anuhɔlɛ ne, Bɔnza Anuhɔlɛ ne, yɛɛ bane ne mgbonleɛ biala azo ɛleka biala mɔɔ bele la.

¹⁰ Akee ɔsisile bie noko wɔ fienemgbole ne anu, na ɔdudule bula dɔɔnwo mɔɔ ko biala se kɔgua ko anu la, ɔboalekɛ ɛnee ɔlɛ nlankɛ dɔɔnwo wɔ adɔleɛ awoka ne mɔ abo nee fienemgbole ne anu. Ɔyɛle ɛhye, ɔboalekɛ ɔkulo egyinliyɛlɛ. Ɔlɛ ye ɛyazonlɛma yɛɛ menli mɔɔ nea yɛ ye vanye egyinli ne mɔ mɔɔ wɔ awoka ne mɔ azo la, yɛɛ ɔso ɛya wɔ ɛleka ne mɔ mɔɔ kye aleɛ la.

¹¹ Eza Ɛzaya lɛ ɛlɔnema mɔɔ ze ko kpalɛ a. Bɛhyɛ bɛ nu ekpunli ekpunli. Menli mɔɔ nleanle hyɛle bɛ ekpunli ekpunli la a le kɛlɛhɛlɛvolɛ Gyiayɛle yɛɛ abɔlɔba kpanyinli Meeyasaya. Belemgbunli safohyenlema ne ko mɔɔ bɛfɛlɛ ye Hananaya la a nleanle menli mɔɔ yɛ gyima ne la anwo zo a.

¹² Safohyenlema mɔɔ gyigyi bɛ ze mɔ awuke ti mɔɔ ɛnee nea ɛlɔnema ne mɔ anwo zo la le apenle nwiɔ ɛya nsia.

¹³ Ɛlɔnema mɔɔ wɔ bɛ bo, mɔɔ gyinla belemgbunli ne anzi ko tia ye kpɔvolɛma la le apenle ngoko ɛya nsa nee nsuu menli ɛya nnu, mɔɔ kola gyinla konle nloa kpalɛ kpalɛ a.

¹⁴ Ɛzaya manle ɛlɔnema ne bɛ sa nu enyinlike, atwɛ, konle ahyɛlɛ, mbulalɛ adɛladeɛ, ɛda, yɛɛ totoabɔ awolɛ.

¹⁵ Wɔ Gyɛlusalɛm sua zo noko, ɔmanle menli mɔɔ anye ka aze la hyehyɛle melahyinli mɔɔ to ɛda nee mɔɔ kola fuandi awolɛ mgbole la na bɛvale bɛzieziele tawa ne mɔ azo anwuma nee muleɛ ne mɔ azo. Ɛhye manle ye duma yɛle kpole na ye nganeɛ hɔle moa, ɔluakɛ ɔnyianle moalɛ kpalɛ toonwo ɔhɔdwule kɛ akee ye tumi ne yɛle kpole la.

Bɛdea Ɛzaya wɔ ye mgbanyizonle nwo

¹⁶ Akee mɔɔ ye tumi ne wiele kpole yɛ la, Ɛzaya memanle ɔ nwo zo na ɔzɛkyele ɔ nwo. Ɔbɔle adalɛ ɔhilele Ɛdɛnkɛma ye Nyamenle ne na ɔhɔwolole Ɛdɛnkɛma Ɛzonlenlɛ Sua ne anu kɛ ɔkakpu ɛyɛlɛ wɔ ɛyɛlɛ azukponle ne azo.

¹⁷ Na sɛlɛvolɛ Azalaya vale Ɛdɛnkɛma sɛlɛvolɛma abulatwɛ mɔɔ anwo yɛ se kpalɛ la doale ye;

¹⁸ bɛhɔduale belemgbunli ne adenle na bɛzele ye kɛ, “Tɛ wɔmɔ, Ɛzaya, yɛɛ ɔwɔ kɛ ɛkpu ɛyɛlɛ ɛbɔ azu ɛmaa Ɛdɛnkɛma a. Sɛlɛvolɛma mɔɔ le Aalɔn nlɔnra ne mɔ mɔɔ bɛmɛ a bɛdu bɛ bɛmaa Ɛdɛnkɛma la yɛɛ ɔwɔ kɛ kpu ɛyɛlɛ ne wɔ ɛyɛlɛ azukponle ne azo a. Ɛvi ɛleka nwuanzanwuanza ye finde, ɔluakɛ wɔyɛ ɛtane, yemɔti mɔɔ ɛlɛyɛ la ɛnrɛzɔ Ɛdɛnkɛma Nyamenle ne anye.”

¹⁹ Belemgbunli Ɛzaya vale ɛya. Mekɛ ne anu ɛnee belemgbunli ne lɛ kyɛnze kuloonwu mɔɔ bɛfa bɛyela ɛyɛlɛ la ɔ sa nu. Belemgbunli ne vale ɛya la, ɛkɛ ne ala kokobɛ guale ye na bie vindele ɔ nwoma azo, wɔ sɛlɛvolɛma ne amuala anyunlu ɛkɛ ne. Ɛhye zile Ɛdɛnkɛma Ɛzonlenlɛ Sua ne anu, ɛleka mɔɔ ɛyɛlɛ azukponle ne gyi la.

²⁰ Sɛlɛvolɛ Kpanyinli Azalaya nee sɛlɛvolɛma ne amuala nwunle kɛ kokobɛ ɛgua belemgbunli ne anwoma zo, na bɛvoanle ye bɛvile Ɛzonlenlɛ Sua ne anu. Belemgbunli mumua ne ɔdaye ɔnwunle kɛ Ɛdɛnkɛma ɛdea ye, yemɔti ɔvindele ndɛndɛ ne ala.

²¹ Belemgbunli Ɛzaya kokobɛ ne angɔ toonwo ɔwule, yɛɛ kɛmɔ ɛnee ɔle kokobɛvolɛ la ati, bɛammaa yeangɔ Ɛdɛnkɛma Ɛzonlenlɛ Sua ne anu bieko, yɛɛ ɔvile belemgbunli suakunlu ɛkɛ ne ɔhɔdɛnlanle ɔdaye ye sua nu. Ɔ ra Dwotam a nleanle belemgbunli suakunlu ɛkɛ ne na ɔziele menli ne amuala a.

²² Belemgbunli Ɛzaya nyɛleɛ mɔɔ hale nee ye gyima mɔɔ ɔlile, ɔvi mɔlebɛbo ne mɔɔ kɔdwu awieleɛ ne la, bɛhɛlɛ bɛ kɔsɔɔti wɔ buluku ne mɔɔ Emɔzo ara Nyamenle Kpɔmanvolɛ Ayezaya hɛlɛle la anu.

²³ Na Ɛzaya hɔle ayile nu na bɛwulale ye mrɛlatɛlɛ nu wɔ arelemgbunli azɛlɛ ne azo. Bɛ nee ye angɔ Devidi Suakpole zo, ɔboalekɛ ɛnee ɔle kokobɛvolɛ. Na ɔ ra Dwotam lile ebia ne.