2 Edk 24 - BAEBOLO ANZƐƐ BULUKU NWUANZANWUANZA

Dwuda Belemgbunli Dwowahye

¹ Dwowahye lile ɛvolɛ nsuu la yɛɛ ɔbɔle ɔ bo kɛ ɔdi belemgbunli a. Ɔdɛnlanle Gyɛlusalɛm na ɔlile belemgbunli ɛvolɛ abulanla. Bɛfɛlɛ ɔ nli Zeebea. Zeebea vi Biyɛhyiba.

² Dwowahye yɛle mɔɔ sɔ Ɛdɛnkɛma anye la wɔ mekɛ mɔɔ sɛlɛvolɛ Gyɛhɔyada de aze la.

³ Gyɛhɔyada gyale mraalɛ nwiɔ manle ye, na ɔwole mralɛ mrenya nee mraalɛ.

⁴ Mekɛ guale nu la, Dwowahye yɛle kɛ ɔyɛ Ɛdɛnkɛma Ɛzonlenlɛ Sua ne boɛ.

⁵ Ɔmanle sɛlɛvolɛma ne nee Livaema ne mɔ rayiale na ɔzele bɛ kɛ, “Bɛhɔ Dwuda azuamgbole ne mɔ azo, bɛhɔlielie ezukoa mɔɔ kɛza la bɛrɛla na ɛvolɛ biala bɛava bɛayɛ bɛ Nyamenle ne Ɛzonlenlɛ Sua ne boɛ. Bɛmaa ɛhye ɛhyia bɛ na bɛyɛ ye ndɛndɛ.” Noko ɛhye angyia Livaema ne.

⁶ Yemɔti belemgbunli ne manle bɛvɛlɛle Sɛlɛvolɛ Kpanyinli Gyɛhɔyada bɛrale, na ɔzele ye kɛ, “Duzu ati a ɛtɛmanle Livaema ɛtɛkɔdieliele adwule ne mɔɔ Ɛdɛnkɛma sonvolɛ, Mosisi, hyehyɛle dole ɛkɛ kɛ bɛlie wɔ menli ne mɔ ɛkɛ bɛva bɛyɛ Ɛdɛnkɛma Ndanlɛ Sua ne boɛ la bɛtɛfile Dwudama nee Gyɛlusalɛm amra ɛkɛ ne a?”

⁷ (Mekɛ ne anu ɛnee menli mɔɔ li Belemgbunli Raalɛ Atalaya, munzuvolɛ ne anzi la, ɛbu Ɛzonlenlɛ Sua ne ɛhɔ nu, ɛhɔsesa ninyɛne mɔɔ bɛdu bɛzie ɛkɛ bɛmaa Ɛdɛnkɛma Ɛzonlenlɛ Sua ne anu ɛzonlenlɛ la na bɛva bɛhɔzonle bɛ bozonle Beeyale ne.)

⁸ Yemɔti belemgbunli ne manle bɛbobɔle ɛlɛka bɛziele Ɛdɛnkɛma Ɛzonlenlɛ Sua ne anlenkɛ kpole ne anloa.

⁹ Akee bɛbɔle nolo wɔ Gyɛlusalɛm nee Dwuda amuala kɛ awie biala ɛradua ye adwule ɛdeɛ ne ɛmaa Ɛdɛnkɛma, kɛmɔ Nyamenle sonvolɛ, Mosisi, hyehyɛle manle Yizilayɛma wɔ fienemgbole ne anu la.

¹⁰ Na menli ne amuala nee mgbanyima ne mɔ amuala anye liele na bɛraduale bɛ adwule ne bɛguale ɛlɛka ne anu, hɔdwule kɛ bɛ muala bɛwiele ye tua la.

¹¹ Kenle ko biala Livaema ne fa ɛlɛka ne kɔ maa belemgbunli mbɔlɔba mgbanyinli ne mɔ nea nu. Saa bɛnea nu na ezukoa mɔɔ wɔ nu la zonle a, ɛnee belemgbunli ne kɛlɛhɛlɛvolɛ ne yɛɛ Sɛlɛvolɛ Kpanyinli ne abɔlɔba ne banea wola sie na bɛmaa bɛfa ɛlɛka ne bɛkɔsie ɔ bo zo ne. Bɛyɛle ye zɛhae kenle biala na bɛnyianle ezukoa dɔɔnwo.

¹² Na belemgbunli ne nee Gyɛhɔyada vale ezukoa ne manle bɛdabɛ mɔɔ bɛnea Ɛdɛnkɛma Ɛzonlenlɛ Sua ne anwo gyimayɛlɛ zo la. Bɛdabɛ noko bɛvale ezukoa ne bɛbɔle kapentama nee belekyama, yɛɛ akee menli mɔɔ ze mbulalɛ nee kɔbele adwinli di la ɛkpa bɛmanle bɛyɛle Ɛdɛnkɛma Ɛzonlenlɛ Sua ne boɛ.

¹³ Menli mɔɔ bɛvale bɛ kɛ bɛyɛ gyima ne la hunle bɛ nwo yɛle gyima ne kpalɛ, na bɛwiele sua ne boɛ yɛ. Bɛyɛle ye kɛ ye dɛba ne ala la, na eza bɛmanle sua ne anwo gyinlanle ye kpalɛ.

¹⁴ Bɛwiele gyima ne yɛ la, bɛvale ezukoa ne mɔɔ hale la bɛhɔmanle belemgbunli ne nee Gyɛhɔyada. Belemgbunli Dwowahye nee Sɛlɛvolɛ Kpanyinli Gyɛhɔyada vale ezukoa ne mɔɔ hale la yɛle ahyɛnze mɔɔ bɛfa bɛsonle wɔ Ɛdɛnkɛma Ɛzonlenlɛ Sua ne anu, nee dwora mɔɔ bɛyela ɛyɛlɛ nu la. Eza bɛyɛle dwɛtɛ fufule nee ezukoa nvutuke dwora. Bɛbɔle azu wɔ Ɛzonlenlɛ Sua ne anu bɛmanle Ɛdɛnkɛma dahuu wɔ mekɛ mɔɔ Gyɛhɔyada de aze la.

Bɛhakyi Gyɛhɔyada maamulɛ ne

¹⁵ Gyɛhɔyada yɛle kpanyinli kpalɛ, ɔyɛle ɛrelera nwosonwoso, na nzinlii ɔwule. Ɔbawu la ɛnee yeli ɛvolɛ ɛya ko abulasa.

¹⁶ Bɛziele ye wɔ Devidi Suakpole zo wɔ arelemgbunli ne mɔ avinli, wɔ mɔɔ ɔyɛle ɔmanle Yizilayɛma, ye ɛzonlenlɛ kpalɛ mɔɔ ɔzonlenle Nyamenle, nee ye nyɛleɛ kpalɛ mɔɔ ɔyɛle wɔ Ɛzonlenlɛ Sua ne anwo la ati.

¹⁷ Gyɛhɔyada wule la, Dwuda mgbanyima ne mɔ dɛle guale Belemgbunli Dwowahye anzo nu toonwo bɛmanle ɔdiele bɛ ne.

¹⁸ Bɛgyakyile ɛzonlenlɛ wɔ Ɛdɛnkɛma, bɛ ze mɔ Nyamenle ne Ɛzonlenlɛ Sua ne anu, na bɛhɔzonlenle bɛ bozonle raalɛ Ahyela ne ananze ne mɔ, na bɛzɔle mmonle. Na Nyamenle ɛya ne rale Gyɛlusalɛm amra nee Dwudama amuala anwo zo.

¹⁹ Nyamenle zoanle ye kpɔmanvolɛma manle bɛrabɔle bɛ kɔkɔ kɛ bɛzia bɛrazonle Ɛdɛnkɛma, noko bɛandie bɛ.

²⁰ Na Nyamenle Sunsum ne dwule sɛlɛvolɛ Gyɛhɔyada ara Zɛkalaya anwo zo; ɔhɔgyinlanle ɛleka mɔɔ awie biala nwu ye la, na ɔzele bɛ kɛ, “Nyamenle se, ‘Duzu ati a bɛtietia Ɛdɛnkɛma Mɛla ne mɔ azo na bɛhwe munzule bɛmaa bɛ nwo ɛ? Kɛmɔ bɛkpo Ɛdɛnkɛma la, ɔdaye noko yekpo bɛ.’ ”

²¹ Bɛhɔle Zɛkalaya ati akpamo. Na Belemgbunli Dwowahye manle bɛzile ye awolɛ wɔ Ɛdɛnkɛma Ɛzonlenlɛ Sua ne alie kpole ne anwo bɛhunle ye.

²² Yemɔti Belemgbunli Dwowahye angakye Zɛkalaya ɔ ze Gyɛhɔyada boɛ mɔɔ ɛyɛ ɛmaa ye la, na ɔmanle bɛhunle ɔ ra ne. Zɛkalaya bawu la ɔzele kɛ, “Ɛdɛnkɛma ɛnlea mɔɔ bɛlɛyɛ la na ɔdua bɛ nwolɛ kakɛ!”

Dwowahye belemgbunlililɛ ne awieleɛ

²³ Ɛvolɛ zɔhane awieleɛ, Selea ɛlɔnema rale Dwowahye anwo zo. Bɛvole Gyɛlusalɛm na bɛhɔle Dwuda maanle ne anu, bɛhunle mgbanyima mɔɔ wɔ nu la amuala, na bɛhwenle bɛ nwo ninyɛne bɛhɔmanle Dɛmasekɛse belemgbunli ne.

²⁴ Ɛnee Selea ɛlɔnema ne anwo le ekyi bɔbɔ ɛdeɛ, noko bɛrale la, Ɛdɛnkɛma yele Dwuda ɛlɔnema ɛwolaa ne manle bɛlile bɛ nwo zo konim, ɔboalekɛ Dwudama ɛkpo Ɛdɛnkɛma, bɛ ze mɔ Nyamenle ne. Ɛnee adenle mɔɔ Ɛdɛnkɛma luale zo deanle Dwowahye la ɛne.

²⁵ Seleama ne bodale Dwowahye kpole bie, na bɛgyakyile ye ɛkɛ bɛhɔle, na ye sonvolɛma ne lile sɛlɛvolɛ Gyɛhɔyada ara ne ati nzenralɛ, bɛlile bɛ nloa na bɛhunle belemgbunli ne wɔ ye ewule ɛkpa ne azo. Yemɔti ɔwule na bɛziele ye wɔ Devidi Suakpole zo, noko bɛanwula ye mrɛlatɛlɛ nu wɔ alehelɛ alaleɛ ne.

²⁶ (Bɛdabɛ mɔɔ bɛlile bɛ nloa bɛhunle ye la a le: Amɔn raalɛ bie mɔɔ bɛfɛlɛ ye Hyemɛyate la ara Zeebade yɛɛ Mowabe raalɛ Hyemelete ara Gyɛhozabade.)

²⁷ Dwowahye amra ne mɔ anwo edwɛkɛ, nee Nyamenle nrɛlaleɛ mɔɔ tia ye nee kɛ ɔzile ɔyɛle Ɛzonlenlɛ Sua ne boɛ la, bɛhɛlɛ bɛ wɔ Arelemgbunli Buluku ne anwo Ngilehilenu Buluku ne anu. Ɔ ra Amazaya a lile ebia ne a.