2 Edk 2 - BAEBOLO ANZƐƐ BULUKU NWUANZANWUANZA

Ɛzonlenlɛ Sua ne ɛzilɛ nwo anwomoalɛ

¹ Akee Sɔlɔmɔn yɛle ye adwenle kɛ ɔsi Ɛzonlenlɛ Sua mɔɔ bɛsonle Ɛdɛnkɛma wɔ nuhua la na yeabu ɔdaye ye awuke.

² Ɔyele menli apenle ngoko abulasuu mɔɔ bazoa sua nwo ninyɛne a, ɔyele menli apenle ngoko abulatwɛ mɔɔ bakpukekpuke awolɛ wɔ awoka ne mɔ azo a, yɛɛ ɔyele menli apenle nsa ɛya nsia mɔɔ banlea gyima ne azo a.

³ Akee Sɔlɔmɔn vale nrɛlaleɛ hɔmanle Taya Belemgbunli Helam kɛ, “Kɛmɔ ɛ nee me ze Devidi bɛzile bɛyɛle mɔɔ ɛmanle bɛpɛle sida mbaka bɛrɛlɛle ye bɛmanle ɔzile ye sua ɔdɛnlanle nu la, ɛ nee medame noko ɛyɛ ye zɔhane ala.

⁴ Nea, mesi sua meamaa bɛazonle Ɛdɛnkɛma me Nyamenle ne wɔ nu. Mebadu sua ne meazie ɛkɛ meamaa ye na bɛayela ɛyɛlɛ mɔɔ bɔ evuanlɛ la bɛamaa ye, na yɛava yɛ kpanwo nwuanzanwuanza azubɔdeɛ ne yeamaa ye dahuu. Yɛbayela nane yeabɔ azu wɔ ɛkɛ ne nwonlomɔ nee nɔsolɛ, Ɛnwomenlelielɛ Kenle ne, nee Siane Fofolɛ Ɛvoyialilɛ, yɛɛ ɛvoyia ngakyile mɔɔ ɛha la ɛlilɛ nu. Ɛdɛnkɛma yɛ Nyamenle ne a ɛhyehyɛ na yeyila zolɛ yemaa Yizilayɛma kɛ bɛyɛ ye zɔhane dahuu a.

⁵ Sua ne mɔɔ mesi la bayɛ kpole kpalɛ, ɔluakɛ yɛ Nyamenle ne le kpole tɛla nyamenle kɔsɔɔti.

⁶ Na nwane a kɛhola kɛzi sua kɛmaa Ɛdɛnkɛma a, wɔ mekɛ mɔɔ anwuma nehane, anwuma anwuma nehane bɔbɔ le ekyi maa ye la? Mame bɔbɔ a le nwane mɔɔ mesi sua meamaa ye a? Kyesɛ ɛleka mɔɔ bɛyela ɛyɛlɛ la ala na meahola meazi.

⁷ Zɔhane ati kpondɛ dwinvolɛ mɔɔ kola fa ezukoa nvutuke, dwɛtɛ fufule, kɔbele, yɛɛ bulalɛ yɛ gyima la maa me. Ɔwɔ kɛ ɔyɛ sonla mɔɔ kola nwo arelemgbunli ndanlɛ kɔkɔlɛ, kɔbenle nee buluwu mɔ la, na eza bɛtete ye mɔɔ ɔkola ɔgua ananze mɔ la. Sonla zɔhane nee dwinvolɛma mɔɔ me ze Devidi ɛye bɛ na bɛ nee me wɔ Dwuda nee Gyɛlusalɛm la a badɛnla ayɛ gyima a.

⁸ Eza nwa me sida mbaka, sepelɛse nee dwunepa mbaka mɔɔ vi Lɛbanɔn kpɔkɛ ne anu la. Ɔluakɛ meze kɛ wɔ menli ne a ze mbakabulɛ nye zo kpalɛ wɔ Lɛbanɔn nehane a. Me menli baraboka wɔ menli ne mɔɔ bu mbaka ne la anwo,

⁹ na bɛakpondɛ mbaka dɔɔnwo bɛamaa me, ɔluakɛ sua ne mɔɔ mesi la le kpole, na ɔyɛ ɛzulolɛ.

¹⁰ Mebamaa wɔ menli ne mɔɔ bu mbaka ne la abɛlɛ tone nu tɔno apenle nwiɔ, baale tɔno apenle nwiɔ, nwanye litili apenle ngoko ɛya nna, yɛɛ ɔlivi nwole litili apenle ngoko ɛya nna.”

¹¹ Taya Belemgbunli Helam hɛlɛle kɛlata hɔbuale Sɔlɔmɔn kɛ, “Kɛmɔ Ɛdɛnkɛma kulo ye menli ne la ati, yezie wɔ belemgbunli kɛ ɛnlea bɛ nwo zo.

¹² Ayɛlɛyelɛ ɛha Yizilayɛ Ɛdɛnkɛma Nyamenle ne mɔɔ bɔle anwuma nee aze, mɔɔ ɛmaa Belemgbunli Devidi ɛwo ralɛ nrenya mɔɔ ze nrɛlɛbɛ, mɔɔ lɛ adwenle nee ndelebɛbo, mɔɔ bazi Ɛzonlenlɛ Sua amaa Ɛdɛnkɛma na yeabu ye belemgbunli awuke a.

¹³ Medu Hulam mɔɔ le dwinvolɛ nrɛlɛbɛvolɛ

¹⁴ na ɔ nli le Dan abo zo sonla, na ɔ ze vi Taya la kɛ ɔrɛla. Ɔze kɛ bɛsi bɛfa ezukoa nvutuke, dwɛtɛ fufule, kɔbele, bulalɛ, bolɛ nee mbaka bɛdi adwinli la. Ɔkola ɔdi adwinli ɔgua arelemgbunli ndanlɛ buluwu nee kɔkɔlɛ nee fufule nu. Ɔkola ɔse ninyɛne ngakyile dɔɔnwo, yɛɛ ɔbahola yeali adwinli biala mɔɔ ɛkɛva ɛkɛhile ye la. Maa ɔ nee wɔ dwinvolɛma nee dwinvolɛma mɔɔ yɛle gyima manle ɛ ze Belemgbunli Devidi la ɛyɛ gyima.

¹⁵ Zɔhane ati maa bɛva hwiiti, baale, nwole yɛɛ nwanye ne mɔɔ ɛlile bɛ edwɛkɛ la bɛrɛlɛ yɛ.

¹⁶ Yɛbapɛ mbaka dodo biala mɔɔ ɛkpondɛ wɔ Lɛbanɔn la, na yeakyekye bɛ avile yeava yɛalua nyevile nye yɛara Dwɔpa, na wɔarava wɔahɔ Gyɛlusalɛm.”

Bɛbɔ Ɛzonlenlɛ Sua ne ɛzilɛ bo

¹⁷ Belemgbunli Sɔlɔmɔn manle bɛdianle nyɛvolɛ mɔɔ wɔ maanle ne anu la amuala, kɛmɔ ɔ ze Devidi yɛle la. Bɛnyianle menli apenle ngoko ɛya ko abulanlu nee nsa, menli ɛya nsia.

¹⁸ Ɔyele nuhua apenle ngoko abulasuu kɛ bɛzoa ninyɛne mɔɔ bɛfa bɛazi sua ne la, nuhua apenle ngoko abulatwɛ kɛ bɛkpukekpuke awolɛ wɔ awoka ne mɔ azo na nuhua apenle nsa ɛya nsia ne ɛnlea bɛ nwo zo ɛmaa bɛyɛ gyima ne.