2 Edk 19 - BAEBOLO ANZƐƐ BULUKU NWUANZANWUANZA

Nyamenle kpɔmanvolɛ twi Gyɛhɔhyafate anyunlu

¹ Belemgbunli Gyɛhɔhyafate vale ɔ nwo kɔlɔnwo ziale hɔle ye sua zo Gyɛlusalɛm.

² Na Nyamenle sonla Gyihu, mɔɔ le Haneenae ara ne, hɔyiale ye na ɔbizale belemgbunli ne kɛ, “Asoo ɛnea a ɛnee ɔle kpalɛ kɛ ɔwɔ kɛ ɛboa amumuyɛma na ɛkɛhulo menli mɔɔ kyi Ɛdɛnkɛma la ɔ? Ɔlua ɛhye ati, Ɛdɛnkɛma ɛva ɛ nwo ɛya.

³ Noko akee, bɛnwu kpalɛ ekyi bie wɔ wɔ nuhua, ɔluakɛ wɔzɛkye bozonle raalɛ Ahyela ne ananze ne mɔ na wɔdua bɛ ɛzonlenlɛ wɔ maanle ye anu. Eza wɔva wɔzie wɔ ahonle nu kɛ ɛsonle Ɛdɛnkɛma ala.”

Gyɛhɔhyafate kakyihakyi ninyɛne

⁴ Belemgbunli Gyɛhɔhyafate dɛnlanle Gyɛlusalɛm, yɛɛ ɔyɛ a ɔkɔkpɔlɔkpɔla ye menli ne mɔ, ɔvi Biyɛhyiba toonwo kɔdwu Yifelaem awoka ne mɔ azo lɔ la, na ɔmanle bɛziale bɛrazonlenle Ɛdɛnkɛma, bɛ ze mɔ Nyamenle ne.

⁵ Ɔyeyele ndɛnebuavolɛma wɔ Dwuda azuamgbole ne mɔ mɔɔ bɛbɔ nwolɛ bane la azo, suakpole biala azo ɛdeɛ,

⁶ na ɔzele bɛ kɛ, “Bɛnlea mɔɔ bɛyɛ la, ɔluakɛ bɛnyɛ bɛ gyima ne bɛmmaa sonla, bɛyɛ bɛamaa Ɛdɛnkɛma. Ɔbaboa bɛ wɔ mekɛ biala mɔɔ bɛkɛze kɛ bɛbua ndɛne la.

⁷ Bɛzulo Ɛdɛnkɛma na bɛnlea boɛ wɔ mɔɔ bɛkɛze kɛ bɛyɛ la anwo, ɔluakɛ Ɛdɛnkɛma yɛ Nyamenle ne ɛnli mɔguazo, ɔnnea sonla nyunlu, yɛɛ ɔnlie ndoloboa.”

⁸ Eza Gyɛhɔhyafate yeyele Livaema, nee sɛlɛvolɛma bie mɔ, yɛɛ Yizilayɛ mbusua mgbanyinli ne bie mɔ kɛ bɛyɛ ndɛnebuavolɛma wɔ Gyɛlusalɛm, bɛli menli mɔɔ kɛvo Nyamenle Mɛla ne la edwɛkɛ na bɛziezie kpolera biala mɔɔ kɛdɔ bɛ avinli la.

⁹ Akee ɔyɛle ngyehyɛlɛ ɛhye ɔmanle bɛ kɛ, “Bɛva bɛ ahonle muala bɛyɛ ɛhye wɔ Ɛdɛnkɛma ɛzulolɛ nee nɔhalɛlilɛ nu.

¹⁰ Saa bɛ mediema mɔɔ wɔ azuamgbole ne mɔ bie azo la ba na ɔ nee kɔdiawuyɛlɛ, mɛladonlɛ, mɛla anzɛɛ amaamuo ɛzɛkyelɛ edwɛkɛ bie ba bɛ nyunlu a, bɛhilehile bɛ, amaa bɛanyɛ bɛanli fɔlɛ wɔ Ɛdɛnkɛma anyunlu, na ye ɛya ne ara bɛdabɛ nee bɛ mra anwo zo. Mɔɔ ɔwɔ kɛ bɛyɛ na bɛanli fɔlɛ wɔ Nyamenle anyunlu la ɛne.

¹¹ Akee Sɛlɛvolɛ Kpanyinli Amalaya a banlea na yeagua Nyamenlezonlenlɛ nu kpolerazulɛ biala abo a, Yehyemeeyɛle ara Zɛbadaya, Dwuda amɛnlado ne yɛɛ banlea agua maanle ye anu edwɛkɛ biala abo a, yɛɛ Livaema ne mɔ banlea amaa edwɛkɛ biala mɔɔ bɛkɛha wɔ edwɛkɛlilɛ ɛleka ne mɔ la ayɛ zɔhane, kɛmɔ bɛhanle la. Bɛzi ahonle bɛyɛ gyima ne na Ɛdɛnkɛma baboa mɔɔ di nɔhalɛ la.”