2 Edk 18 - BAEBOLO ANZƐƐ BULUKU NWUANZANWUANZA

Nyamenle Kpɔmanvolɛ Maekaya bɔ Ehabe kɔkɔ

¹ Dwuda Belemgbunli Gyɛhɔhyafate akee nyianle ɔ nwo kpole kpalɛ na ɔnyianle ɔ nyunlu kpalɛ wɔ menli nyunlu. Akee ɔ nee Yizilayɛ Belemgbunli Ehabe yɛle agyalɛ ngyehyɛlɛ.

² Mekɛ guale nu la ɔhɔle kɛ ɔkakpɔla Ehabe wɔ Samɛlea. Ehabe noko hunle mboane nee nlankɛ dɔɔnwo zonle Gyɛhɔhyafate nee ye menli mɔɔ ɔ nee bɛ rale la ɛyɛvolɛ, na ɔlile ye adwenle kɛ ɔmaa bɛhɔteta Releemɔto mɔɔ wɔ Geleade la.

³ Belemgbunli Ehabe zele Dwuda Belemgbunli Gyɛhɔhyafate kɛ, “Kɛ ɔde ɛ, ɛ nee me kɛhɔ ɛkɛmaa yɛkɛhɔteta Releemɔto mɔɔ wɔ Geleade la ɔ?” Gyɛhɔhyafate buale kɛ, “Medame a le ɛdawɔ. Me menli le wɔ menli. Yɛ nee wɔ kɛhɔ konle ne.”

⁴ Na akee ɔzele Yizilayɛ belemgbunli ne kɛ, “Maa yɛlumua yɛbiza yɛdie Ɛdɛnkɛma anloa edwɛkɛ kolaa.”

⁵ Yizilayɛ belemgbunli ne manle bɛvɛlɛvɛlɛle Nyamenle kpɔmanvolɛma ne mɔ amuala na bɛrayiale, bɛ dodo le ɛya nna. Na ɔzele bɛ kɛ, “Yɛkadoa menli mɔɔ wɔ Releemɔto mɔɔ wɔ Geleade la yɛ nee bɛ ahɔho. Yɛhɔ anzɛɛ yɛmmakɔ ɔ?” Bɛzele ye kɛ, “Kɔ, ɔluakɛ Nyamenle baye sua ne amaa Nana.”

⁶ Na Belemgbunli Gyɛhɔhyafate mɔɔ vi Dwuda rale la bizale kɛ, “Nyamenle kpɔmanvolɛ bieko ɛnle ɛkɛ mɔɔ yɛbiza ye yɛtie Ɛdɛnkɛma anloa edwɛkɛ a ɔyɛ boɛ ɔ?”

⁷ Yizilayɛ Belemgbunli Ehabe zele Gyɛhɔhyafate kɛ, “Ko bieko tɛbɔ ɛkɛ mɔɔ yɛkola yɛbiza ye yɛtie Ɛdɛnkɛma anloa edwɛkɛ a. Yemɔ a le Yemela ara Maekaya; na mekyi ye kɔkɔkɔkɔ, ɔluakɛ ɔnva Nyamenle nrɛlaleɛ kpalɛ ɔmbɛlɛ me kɛ munzule nrɛlaleɛ ngome ala a ɔfa ɔbɛlɛ me a.” Gyɛhɔhyafate zele ye kɛ, “Nana, mmaka ye zɔhane.”

⁸ Na Belemgbunli Ehabe zoanle ye mbɔlɔba mgbanyinli ne mɔ ko kɛ ɔhɔva Yemela ara Maekaya ɔrɛla ndɛndɛ.

⁹ Akee Yizilayɛ belemgbunli ne nee Dwuda Belemgbunli Gyɛhɔhyafate zieziele bɛ nwo na bɛhɔdɛnlanle aze wɔ suakpole ne anlenkɛ kpole ne mɔɔ bɛfɛlɛ ye Samɛlea la anloa, ɛleka mɔɔ bɛwozo ma ne la. Nyamenle kpɔmanvolɛma ne mɔ amuala rahanle Nyamenle nrɛlaleɛ ne hilele bɛ.

¹⁰ Na bɛ nuhua ko mɔɔ le Kɛneeyana ara Zɛdikaya vale bulalɛ yɛle mɛne na ɔhanle kɛ, “Ɛdɛnkɛma se, ‘Ɛbava ɛhye wɔaha Seleama wɔagua toonwo wɔabɔ bɛ bo zo bɔkɔɔ.’ ”

¹¹ Zɔhane nrɛlaleɛ ne ala a Nyamenle kpɔmanvolɛma mɔɔ hale la hanle a. Bɛzele ye kɛ, “Nana, kɔ Releemɔto mɔɔ wɔ Geleade la kɔli konim. Ɛdɛnkɛma baye suakpole ne amaa Nana somaa.”

¹² Akee ahenle mɔɔ bɛzoanle ye kɛ ɔhɔva Maekaya la zele ye kɛ, “Ayi, Nyamenle kpɔmanvolɛma ne mɔ amuala anloa ɛyɛ ko, bɛbɔ saleɛ bɛmaa belemgbunli ne. Ɛdawɔ noko maa ɛ nloa nee bɛ ɛdeɛ ne ɛyɛ ko.”

¹³ Maekaya zele ye kɛ, “Meka tease Ɛdɛnkɛma kɛ, mɔɔ me Nyamenle ne kɛva kɛmaa me la, yemɔ ala yɛɛ mebaha a.”

¹⁴ Maekaya radwule belemgbunli ne anyunlu ɛkɛ ne la, Belemgbunli Ehabe bizale ye kɛ, “Maekaya, yɛhɔ Releemɔto mɔɔ wɔ Geleade la yɛhɔdoa menli ne yɛ nee bɛ ɛhɔho, anzɛɛ mengyakyi?” Maekaya buale kɛ, “Bɛhɔ na bɛhɔli konim; bɛbaye bɛ bɛamaa bɛ.”

¹⁵ Belemgbunli Ehabe zele ye kɛ, “Fane nyɛ yɛɛ menga mengile wɔ kɛ ɛha nɔhalɛ ne ala ɛhile me wɔ Ɛdɛnkɛma duma nu a?”

¹⁶ Na Maekaya hanle kɛ, “Menwunle kɛ Yizilayɛma amuala ɛbɔ asande wɔ awoka ne mɔ azo lɔ kɛ mboane mɔɔ ɛnlɛ neavolɛ la, na Ɛdɛnkɛma zele kɛ, ‘Ɛhye mɔ ɛnlɛ bɛ menle; yemɔti bɛmaa bɛhɔ sua nu anzonudwolɛ nu.’ ”

¹⁷ Na Yizilayɛ belemgbunli ne hanle hilele Dwuda Belemgbunli Gyɛhɔhyafate kɛ, “Meanga meangile wɔ kɛ ɔnrɛva nrɛlaleɛ kpalɛ biala ɔnrɛrɛlɛ me, kɛ munzule yɛɛ ɔbabɔ yeamaa me a?”

¹⁸ Maekaya zɔle ye edwɛkɛ ne azo kɛ, “Zɔhane ati tie mɔɔ Ɛdɛnkɛma se la. Menwunle kɛ Ɛdɛnkɛma de ye belemgbunli ebia nu na anwuma ɛlɔnema kɔsɔɔti gyigyi ye bɛne nee fema.

¹⁹ Na Ɛdɛnkɛma bizale bɛ kɛ, ‘Nwane a kɛhɔ kɛhɔli Yizilayɛ Belemgbunli Ehabe adwenle, kɛmaa ɔkɛhɔ Releemɔto mɔɔ wɔ Geleade la, kɛmaa ɔkɛhɔ ɔkɛhɔho ɔkɛli akoatɔ a?’ Na mɔɔ ko ɛlɛka edwɛkɛ ɛhye la, ɛnee ko ɛlɛka bie gyɛne.

²⁰ Akee sunsum bie vindele ragyinlanle Ɛdɛnkɛma anyunlu ɛkɛ na ɔhanle kɛ, ‘Mebahɔli ye adwenle.’ Ɛdɛnkɛma bizale ye kɛ, ‘Kɛ ɛsi wɔali ye adwenle ɛ?’

²¹ Na ɔbuale kɛ, ‘Mekɔ na meamaa ye Nyamenle kpɔmanvolɛma ne mɔ amuala abɔ adalɛ.’ Na Ɛdɛnkɛma zele ye kɛ, ‘Kɔbɛlɛbɛla ye na ɛ sa baha ye; kɔ na kɔyɛ ye zɔhane.’

²² “Yemɔti nea, Ɛdɛnkɛma ɛmaa adalɛ sunsum ɛradwu wɔ Nyamenle kpɔmanvolɛma ɛhye mɔ amuala anwo zo kɛ bɛbɔ adalɛ bɛhile wɔ. Ɔdaye mumua ne yeha yedo ɛkɛ ne kɛ munzule ɛnyia wɔ.”

²³ Na Nyamenle kpɔmanvolɛ Zɛdikaya hɔnyikale Maekaya anwo zo, ɔbɔle ɔ nzo nu na ɔhanle kɛ, “Adenle boni azo a Ɛdɛnkɛma Sunsum ne luale gyakyile mame na ɔdendɛle ɔhilele wɔmɔ a?”

²⁴ Maekaya buale ye kɛ, “Kenle mɔɔ ɛbanriandi wɔahɔvea wɔ sua ne akunlu ɛkɛ ne la, kenle ne yɛɛ ɛbanwu ye a.”

²⁵ Yizilayɛ Belemgbunli Ehabe zele kɛ, “Bɛhye Maekaya na bɛva ye bɛhɔmaa Emɔn, mɔɔ le suakpole ye amɛnlado ne, nee belemgbunli ara Dwowahye;

²⁶ na bɛha bɛhile bɛ kɛ, ‘Belemgbunli se bɛva sonla ɛhye bɛdo efiade na bɛmaa ye aleɛ mɔɔ ɛnza ye di nee nzule ekyi bie, kɔdwu kɛ menwɔzia menwɔra anzonudwolɛ nu la.’ ”

²⁷ Na Maekaya buale kɛ, “Saa ɛsia ɛba anzonudwolɛ nu a, ɛnee tɛ Ɛdɛnkɛma a luale me nwo zo dendɛle a.” Na ɔzele menli mɔɔ wɔ ɛkɛ ne la kɛ, “Bɛdie na bɛyɛ mɔɔ meha la nzonlɛ!”

Ehabe ewule

²⁸ Akee Yizilayɛ belemgbunli ne nee Dwuda Belemgbunli Gyɛhɔhyafate zile nu hɔle Releemɔto mɔɔ wɔ Geleade la kɛ bɛkadoa menli mɔɔ wɔ zo la bɛ nee bɛ aho.

²⁹ Na Ehabe hanle hilele Gyɛhɔhyafate kɛ, “Mebahakyi me nwo na meahɔ konle ne anloa, na wɔmɔ, wula wɔ belemgbunli tɛladeɛ ne ala kɔ.” Na Yizilayɛ belemgbunli ne hakyile ɔ nwo na akee bɛhɔle konle ne anloa.

³⁰ Selea belemgbunli ne ɛze ye safohyenlema mɔɔ nea ɛlɔnema mɔɔ fa ehwili ko la kɛ, “Bɛ nee awie biala mmako, kakula o, kpanyinli o, kɛ Yizilayɛ belemgbunli ne ala.”

³¹ Yemɔti mɔɔ safohyenlema ne nwunle Gyɛhɔhyafate la, bɛdwenlenle kɛ Yizilayɛ belemgbunli ne ɔ, na bɛhakyile bɛ nye kɛ bɛ nee ye kaho. Gyɛhɔhyafate deanle nuhua na Ɛdɛnkɛma raboale ye. Nyamenle manle menli ne mɔ hwenle bɛ nzi,

³² ɔluakɛ mɔɔ safohyenlema ne nwunle kɛ tɛ Yizilayɛ belemgbunli ne a bɛdoa ye ndinlizo la, bɛgyakyile ye ɛvoanlɛ.

³³ Na nrenya bie mɔɔ wɔ Selea ɛlɔnema ne anu la dole ye ɛda ne ngyengyene nu bie ala, na ɔhɔwɔle Yizilayɛ belemgbunli ne wɔ ye konle tɛladeɛ ne ayia ne mɔ bie azo. Belemgbunli ne zele ahenle mɔɔ ɛlɛka ye konle ehwili ne la kɛ, “Kakyi ɛ nwo, ye me fi konle ye anloa na meboda.”

³⁴ Konle ne anu yɛle se kenle ko ne, Yizilayɛ belemgbunli ne hisale ye konle ehwili ne anu, ɔ nye hale Seleama ne anwo toonwo nɔsolɛ nu. Na mɔɔ sɛnzɛne ne kadɔ la, ɔwule.