2 Edk 17 - BAEBOLO ANZƐƐ BULUKU NWUANZANWUANZA

Gyɛhɔhyafate di belemgbunli

¹ Belemgbunli Esa ara Gyɛhɔhyafate lile ɔ ze agya dɛnlanle ebia ne azo, na ɔboɔboale ɔ nwo kpalɛ wɔ Yizilayɛma ati.

² Ɔvale ɛlɔnema ɔhɔguale azuamgbole mɔɔ bɛbɔ nwolɛ bane wɔ Dwuda la amuala azo. Ɔvale ɛlɔnema ekpunli ekpunli ɔkpondenle Dwuda maanle ne anu yɛɛ Yifelaem azuamgbole mɔɔ Belemgbunli Esa honle vale bɛ la azo.

³ Ɛdɛnkɛma nee Gyɛhɔhyafate luale, ɔboalekɛ ɔbɔle ɔ ze Esa ɛbɛla ne mɔɔ ɔlumuale ɔbɔle la bie, yeandoa bozonle Beeyale ne mɔ abo zo.

⁴ Ɔzonlenle ɔ ze mɔ Nyamenle ne na ɔlile ye mɛla ne mɔ azo. Yeanyɛ ye kɛmɔ Yizilayɛma yɛle la.

⁵ Zɔhane ati Ɛdɛnkɛma manle maanle ne gyinlanle wɔ ye mekɛ zo, na Dwudama amuala rahyɛle ye ninyɛne. Ɔnyianle ɔ nyunlu na ɔnyianle anwonyia dɔɔnwo noko.

⁶ Ɔgyinlanle kpundii wɔ Ɛdɛnkɛma ɛzonlenlɛ nu, yɛɛ eza ɔzɛkyele ɛleka ne mɔ mɔɔ menli mɔɔ ɛnze Nyamenle la sonle la, na ɔdule bɛ bozonle Ahyela ne abo wɔ Dwuda maanle ne anu.

⁷ Mɔɔ Gyɛhɔhyafate lile ɛvolɛ nsa wɔ ebia ne azo la, ɔzoanle ye mgbanyima Bɛneheli, Obadaya, Zɛkalaya, Nɛtaniile, yɛɛ Maekaya kɛ bɛhɔhilehile wɔ Dwuda azuamgbole ne mɔ azo.

⁸ Ɔmanle Livaema ngɔnla ɛhye mɔ nee bɛ hɔle: Hyɛmaya, Nɛtanaya, Zɛbadaya, Asahɛle, Hyɛmaelamo, Gyɛhɔnatan, Adonaegya, Tobaya, yɛɛ Tobadonaegya. Sɛlɛvolɛma Yilaehyama yɛɛ Gyɛhɔlam, nee Livaema ne hɔle.

⁹ Bɛvale Ɛdɛnkɛma Mɛla Buluku ne bɛhɔle na bɛhilehilele wɔ Dwuda maanle ne anu amuala. Bɛhɔle Dwuda suakpole biala azo na bɛhilehilele menli ne.

Gyɛhɔhyafate kpoleyɛlɛ

¹⁰ Ɛdɛnkɛma ɛzulolɛ dɔle maanle maanle mɔɔ zuozua Dwuda la amuala anwo zo, yemɔti bɛanva konle bɛandoa Gyɛhɔhyafate.

¹¹ Filisitiama bie mɔ bɔbɔ vale ahyɛlɛ ninyɛne rɛlɛle Gyɛhɔhyafate. Eza bɛrɛlɛle ye dwɛtɛ fufule. Arelabema rɛlɛle ye mboane apenle nsuu ɛya nsuu yɛɛ mbɔnkye nyinli apenle nsuu ɛya nsuu.

¹² Na Gyɛhɔhyafate hɔle zo yɛle kpole, ye tumi yɛle kpole. Ɔsisile aranemgbole wɔ Dwuda amuala, ɔkyekyele azuamgbole mɔɔ bɛfa konle ninyɛne bɛsiezie zolɛ la,

¹³ yɛɛ ɔlɛ konle ninyɛne dɔɔnwo kpalɛ wɔ Dwuda azuamgbole ne mɔ azo. Ɔlɛ ɛlɔnema mɔɔ ze ko kpalɛ la wɔ Gyɛlusalɛm.

¹⁴ Bɛ dodo, kɛmɔ bɛ ze mɔ mbusua ne mɔ de la ɛne: wɔ Dwuda, Adena le safohyenle kpanyinli mɔɔ nea ɛlɔnema apenle ngoko ɛya nsa mɔɔ ze ko kpalɛ la anwo zo.

¹⁵ Mɔɔ doa Adena la a le Gyihɔheenan, ɔdaye noko ɔnea ɛlɔnema apenle ngoko ɛya nwiɔ abulatwɛ anwo zo,

¹⁶ yɛɛ mɔɔ tɔ zo nsa la a le Zekelae ara Amasaya (mɔɔ ɛdu ɔ nwo ɛmaa kɛ ɔsonle Ɛdɛnkɛma la). Ɔnea ɛlɔnema apenle ngoko ɛya nwiɔ mɔɔ ze ko kpalɛ la anwo zo.

¹⁷ Wɔ Bɛngyaman maanzinli nu, nrenya katakyie Yilayada a le safohyenle kpanyinli a, ɔnea ɛlɔnema apenle ngoko ɛya nwiɔ mɔɔ ze ɛda to na bɛdedɛ enyinlike la anwo zo.

¹⁸ Mɔɔ doa ye la a le Gyɛhozabade, ɔlɛ ɛlɔnema apenle ngoko ɛya ko abulatwɛ mɔɔ konle ti bɛboɔboa bɛ nwo bɛwie la.

¹⁹ Menli ɛhye mɔ amuala wɔ belemgbunli ne gyima nu. Ɛye bɛmɛ ɛsie ahane a, eza belemgbunli ne lɛ ɛlɔnema wɔ Dwuda azuamgbole mɔɔ bɛbɔ nwolɛ bane la amuala azo.