2 Edk 16 - BAEBOLO ANZƐƐ BULUKU NWUANZANWUANZA

Yizilayɛma amaneɛnwunlɛ

¹ Belemgbunli Esa lile ɛvolɛ abulasa nee nsia wɔ ebia zo la, Yizilayɛ Belemgbunli Beeyahya vale konle doale Dwudama, na ɔbɔle ɔ bo kɛ ɔkyekye Releema, amaa yeadua adenle mɔɔ awie ɛngɔ awie ɛmba Dwuda la.

² Yemɔti Esa vale dwɛtɛ fufule nee ezukoa nvutuke wɔ Ɛdɛnkɛma Ɛzonlenlɛ Sua ne gya nu nee belemgbunli suakunlu ɛkɛ ne manle bɛhɔmanle Selea Belemgbunli Bɛneheedade wɔ Dɛmasekɛse, na ɔzele ye kɛ,

³ “Maa yɛyɛ konle nu agɔnwolɛyɛlɛ ngyehyɛlɛ, kɛmɔ yɛ ze mɔ yɛle la. Melɛfa dwɛtɛ fufule nee ezukoa nvutuke ɛhye mɔ mearɛlɛ wɔ, amaa wɔazɛkye agɔnwolɛyɛlɛ ne mɔɔ la wɔ nee Yizilayɛ Belemgbunli Beeyahya avinli la, na Yizilayɛ belemgbunli ne aye ye ɛlɔnema mɔɔ wɔ me maanle ye anu la ahɔ.”

⁴ Bɛneheedade kponlenle Belemgbunli Esa nzuzulɛ ne azo na ɔzoanle ɛlɔnema ɔmanle bɛhɔtetale Yizilayɛ azuamgbole ne bie mɔ. Bɛhonle bɛvale Yidwɔn, Dan, Ebɛle Bɛte Meeyaka, yɛɛ azuamgbole mɔɔ wɔ Nafetalae mɔɔ bɛsie konle ninyɛne zolɛ la.

⁵ Beeyahya dele ɛhye anwo bie la, ɔgyakyile Releema ɛkyekyelɛ nee nwolɛ gyima biala.

⁶ Na Belemgbunli Esa vale Dwudama amuala manle bɛhɔzoale awolɛ nee ndaboa mɔɔ Beeyahya lɛ ɛlɛkyekye Releema la, na ɔvale ɔrakyekyele Giba nee Mezepa.

Nyamenle Kpɔmanvolɛ Haneenae

⁷ Mekɛ zɔhane anu ala, Nyamenle sonla Haneenae rale Dwuda Belemgbunli Esa ɛkɛ ne razele ye kɛ, “Kɛmɔ ɛvale ɛ rɛle ɛwulale Selea belemgbunli ne anu na wɔanva ɛ rɛle wɔanwula Ɛdɛnkɛma wɔ Nyamenle ne anu la ati, Selea belemgbunli ne ɛlɔnema ɛnriandi wɔ ɛwie ala ɛne.

⁸ Na ɛnee Sudan nee Lebeya ɛnlɛ ɛlɔnema pemgbenleamgbe nee konle ehwili yɛɛ menli mɔɔ ka mgbɔnwɔ la dɔɔnwo ɔ? Noko kɛmɔ ɛvale ɛ rɛle ɛwulale Ɛdɛnkɛma nu la, ɔyele bɛ ɔmanle wɔ.

⁹ Ɔluakɛ Ɛdɛnkɛma fa ɔ nye bɔ ewiade ye anwo mgbɔlɔka, na ɔfa tumi ɔdie bɛdabɛ mɔɔ bɛdi nɔhalɛ bɛmaa ye la. Wɔli kɔnwɔne edwɛkɛ wɔ ɛhye anu, yemɔti ɔvi ɛnɛ mɔɔ kɔ la konle ɛnrɛkpa ɛ nwo ɛlɛ.”

¹⁰ Belemgbunli Esa vale Nyamenle sonla ne anwo ɛya kpole kpalɛ wɔ mɔɔ ɔhanle la anwo, na ɔmanle bɛhyele ye, bɛdole ye efiade, na bɛbɔle ye kpanwu. Eza ɔvi mekɛ zɔhane anu ala, Belemgbunli Esa bɔle ɔ bo kɛ ɔyɛ menli ne bie mɔ asa.

Esa belemgbunlililɛ ne awieleɛ

¹¹ Bɛhɛlɛ Belemgbunli Esa gyima mɔɔ ɔlile, ɔvi mɔlebɛbo ne mɔɔ kɔdwu awieleɛ ne la wɔ Dwuda nee Yizilayɛ Arelemgbunli Tetedwɛkɛ Buluku ne anu.

¹² Ɔlile ɛvolɛ abulasa nee ngɔnla wɔ ebia zo la, ɔ gyakɛ hunle ye. Ye ewule ne anu yɛle se, noko wɔ ye anwonyane ne anu, yeamkpondɛ Ɛdɛnkɛma abo zo, na ɔbizale moalɛ ɔvile ninsinlima ɛkɛ.

¹³ Belemgbunli Esa hɔle ayile nu wɔ mekɛ mɔɔ ɛnee yeli ɛvolɛ abulanla nee ko wɔ ebia ne azo la.

¹⁴ Bɛwulale ye mrɛlatɛlɛ nu wɔ bolɛ nla bie mɔɔ ɔdaye ɔpɛle ɔmanle ɔ nwo wɔ Devidi Suakpole zo la anu. Bɛdole ye ngɛnlamo funli ɛlɛka bie mɔɔ bɛva alufuanlɛ ngakyile mɔɔ menli mɔɔ ze ɔ nye zo la boɔboale yɛle la anu na bɛhuanle sendɔlɔra kpole bie bɛvale bɛhakyele ye.