Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

2 Edk 12 - BAEBOLO ANZƐƐ BULUKU NWUANZANWUANZA


Yigyibitima fa Dwuda aze
( 1 Arl 14.25-28 )

1 Mɔɔ Rilihɔbowam belemgbunlililɛ ne gyinlanle zo na ɔnyianle gyinlagyakɛ la, ɔkpole Ɛdɛnkɛma Mɛla ne mɔ na ɔmanle Yizilayɛma kɔsɔɔti kpole Ɛdɛnkɛma.

2 Kɛmɔ bɛanli nɔhalɛ bɛammaa Ɛdɛnkɛma la ati, mɔɔ Rilihɔbowam lile ɛvolɛ nnu wɔ Dwuda ebia ne azo la, Yigyibiti Belemgbunli Hyaehyake ratetale Gyɛlusalɛm.

3 Ɔvale ɛlɔnema mɔɔ ka konle ehwili la apenle ko ɛya nwiɔ yɛɛ ɛlɔnema mɔɔ ka mgbɔnwɔ la apenle ngoko abulasia a ɔrale a. Na menli mɔɔ ɔ nee bɛ vi Yigyibiti rale: Lebeyama, Sɛkema, nee Sudanema, bɛmɛ, awie ɛnze bɛ nloa.

4 Ɔhonle ɔvale Dwuda azuamgbole ne mɔ mɔɔ bɛbɔ nwolɛ bane la toonwo ɔradwule Gyɛlusalɛm.

5 Nyamenle kpɔmanvolɛ Hyɛmaya rale Belemgbunli Rilihɔbowam nee Dwuda mgbanyima ne mɔ kɔsɔɔti mɔɔ ɛnee Hyaehyake ati bɛyia Gyɛlusalɛm la anwo ɛkɛ na ɔzele bɛ kɛ, “Ɛdɛnkɛma se, ‘Bɛkpo me, yemɔti medame noko mekpo bɛ memaa Hyaehyake.’ ”

6 Ɛkɛ ne ala, belemgbunli ne nee ye mgbanyima ne mɔ nlunle bɛ nwo na bɛhanle bɛ nloa edwɛkɛ kɛ bɛyɛ ɛtane na bɛhanle kɛ, “Ɛdɛnkɛma di pɛlepɛle.”

7 Mɔɔ Ɛdɛnkɛma nwunle kɛ menli ne ɛnlu bɛ nwo la, ye edwɛkɛ ne zile Nyamenle kpɔmanvolɛ Hyɛmaya anwo zo bieko kɛ, “Menli ne ɛnlu bɛ nwo, yemɔti menrɛbɔ bɛ bo zo, mebalie bɛ. Gyɛlusalɛm ɛnrɛnwu me ɛya ne amuala, noko Hyaehyake baho ava ye.

8 Bɛbayɛ ahanra bɛamaa Hyaehyake, amaa bɛanwu ngakyile mɔɔ wɔ me ɛzonlenlɛ nee maanle gyɛne gyɛne nyamenle ne mɔ ɛzonlenlɛ nu la.”

9 Na Yigyibiti Belemgbunli Hyaehyake rale Gyɛlusalɛmma anwo zo; ɔravale Ɛdɛnkɛma Ɛzonlenlɛ Sua ne anu ezukoa nee ninyɛne nee belemgbunli suakunlu ɛkɛ ne gya nu ninyɛne kɔsɔɔti ɔhɔle; ɔvale debie biala. Eza ɔsesale bɛ sa nu enyinlike ne mɔ mɔɔ Belemgbunli Sɔlɔmɔn vale ezukoa nvutuke yɛle la ɔhɔle.

10 Belemgbunli Rilihɔbowam vale kɔbele yɛle bie ziele bɛ bo zo, na ɔvale ɔwulale sinzavolɛma mɔɔ sinza belemgbunli ɛkɛ ne la mgbanyima ne mɔ asa anu.

11 Mekɛ biala mɔɔ belemgbunli ne ɛlɛkɔ Ɛdɛnkɛma Ɛzonlenlɛ Sua ne anu la, sinzavolɛma ne basoa di ɔ nyunlu kɔ eza bɛsoa bɛba, na akee yeava yeahɔzie bɛ bo zo ne wɔ sinzavolɛma sua ne anu.

12 Kɛmɔ ɔnlunle ɔ nwo la ati, Ɛdɛnkɛma yele ye ɛya kpole ne ɔ nwo zo, yeangu ye, na eza Dwuda maanle ne anu yɛle kpalɛ.


Rilihɔbowam belemgbunlililɛ ne anwo edwɛkɛ sikalɛ

13 Belemgbunli Rilihɔbowam dɛnlanle Gyɛlusalɛm a lile ye ebia ne a. Ɔlile ɛvolɛ abulanla nee ko la yɛɛ ɔbɔle ɔ bo kɛ ɔdi belemgbunli a, yɛɛ ɔlile ebia ne ɛvolɛ bulu nee nsuu. Gyɛlusalɛm yɛɛ Ɛdɛnkɛma ɛkpa nu ɛye ɛvi Yizilayɛ mbusua ekpunli ekpunli ne mɔ anu kɛ yemɔ ala a ɔle suakpole mɔɔ ye duma ɛla zolɛ a. Bɛfɛlɛ Rilihɔbowam ɔ nli Neeyama. Ɔ nli le Amɔnonli.

14 Ɔyɛle ɛtane ɔtiale Ɛdɛnkɛma, ɔboalekɛ ɔkpole Ɛdɛnkɛma.

15 Rilihɔbowam nyɛleɛ mɔɔ ɔyɛle, ɔvi mɔlebɛbo ne mɔɔ kɔdwu awieleɛ ne la, bɛhɛlɛ bɛ muala wɔ Nyamenle Kpɔmanvolɛ Hyɛmaya nee Nyamenle Sonla Yedo Tetedwɛkɛ Mbuluku ne mɔ anu. Ɛnee mekɛ biala konle wɔ Dwuda Belemgbunli Rilihɔbowam nee Yizilayɛ Belemgbunli Gyɛlɔbowam avinli.

16 Belemgbunli Rilihɔbowam hɔle ayile nu na bɛwulale ye mrɛlatɛlɛ nu wɔ Devidi Suakpole zo; ɔ ra nrenya Abaegya a lile ebia ne a.

Bible in Nzema © Bible Society of Ghana, 1998.

Bible Society of Ghana
ကြှနျုပျတို့နောကျလိုကျပါ:



ကြော်ငြာတွေ