2 Arl 9 - BAEBOLO ANZƐƐ BULUKU NWUANZANWUANZA

Bɛkpokpa Gyihu nwole kɛ ɔle Yizilayɛ belemgbunli

¹ Yilaehya vɛlɛle Nyamenle kpɔmanvolɛma asa azo ne mɔ anu ko na ɔzele ye kɛ, “Boɔboa ɛ nwo na fa nwole toba ko ye kɔ Releemɔto mɔɔ wɔ Geleade maanle nu la.

² Saa ɛdwu ɛkɛ ne a kpondɛ Gyɛhɔhyafate ara Gyihu, mɔɔ le Nemehyae anlɔnra ne. Ɛnwu ye a fa ye kɔ ahane, awie bie sua kunlu,

³ wola nwole toba ko ne gua ɔ ti avinli na se ye kɛ, Ɛdɛnkɛma se, ‘Meyɛ wɔ Yizilayɛma belemgbunli.’ Akee ɛvi sua ne anu finde na nriandi bɛla, mmasisi aze fee.”

⁴ Nyamenle kpɔmanvolɛ asa azo ne hɔle Releemɔto.

⁵ Ɔhɔle la ɛnee safohyenlema ne mɔ ɛyia nu ɛlɛfa adwenle, na kpavolɛ ne zele kɛ, “Safohyenle, me nee wɔ nrɛlaleɛ ɛra.” Gyihu bizale ye kɛ, “Yɛ nuhua boni a ɛlɛtendɛ wɔ ahile ye a?” Kpavolɛ ne zele kɛ, “Yɛmenle, ɛdawɔ ɔ?”

⁶ Yemɔti Gyihu dwazole na ɔ nee ye hɔle sua ne anu. Kpavolɛ ne wolale nwole toba ko ne guale ɔ ti zo na ɔzele ye kɛ, “Ɛdɛnkɛma, Yizilayɛ Nyamenle ne se, ‘Meyɛ wɔ Yizilayɛ belemgbunli kɛ ɛzie Ɛdɛnkɛma menli ne.

⁷ Ɛbahu ɛ menle Ehabe nee ɔ bo zo amra, amaa meanyia adenle meazenra Gyɛzɛbɛle kɛ ɔhunle Ɛdɛnkɛma kpɔmanvolɛma ne mɔ, na ɔhanle me sonvolɛma mogya ɔguale a.

⁸ Ɔwɔ kɛ bɛku Ehabe abo zo amra kɔsɔɔti, na meaminli Ehabe sua nu mrenya alehelɛ nee ngɛkɛlɛ kɔsɔɔti mɔɔ wɔ Yizilayɛ la abo zo.

⁹ Mebayɛ Ehabe sua nu kɛ menyɛle Nibate ara Gyɛlɔbowam nee Ahaegya ara Beeyahya azua nu la.

¹⁰ Awie ɛnrɛzie Gyɛzɛbɛle, ahwea yɛɛ bali ye nwonane wɔ Gyɛzɛlii a.’ ” Kpavolɛ ne hanle ɛhye wiele la ɔdukuele anlenkɛ ne na ɔnriandile ɔhɔle.

¹¹ Gyihu vindele rale ɔ gɔnwo mɔ anu la, bɛbizale ye kɛ, “Ɔle bɛtɛɛ ɔ? Duzu a ɛzɛlɛ ɛhye kpondɛ wɔ wɔ ɛkɛ a?” Gyihu zele bɛ kɛ, “Bɛdabɛ bɛze sonla ne nee ye ɛdendɛlɛ dɛba ko ye.”

¹² Bɛzele ye kɛ, “Mɔɔ wɔha la ɛnle nɔhalɛ. Ka mɔɔ ɔhanle la kile yɛ.” Ɔzele bɛ kɛ, “Ye edwɛkɛ a le kɛ, Ɛdɛnkɛma se, ‘Meyɛ wɔ belemgbunli mɔɔ bazie Yizilayɛma a.’ ”

¹³ Ɛkɛ ne ala Gyihu agɔnwo safohyenlema ne yeyele bɛ adɛladeɛ ne mɔ guale ɔ gyakɛ anu kɛ ɔtietia zolɛ. Akee bɛbɔle aweɛne ndendenle nu na bɛzele kɛ, “Bɛyɛ Gyihu belemgbunli!”

Bɛhu Yizilayɛ Belemgbunli Dwɔlam

^14-15 Ɔrale ye zɛhae la akee Gyihu nyianle adwenle kɛ ɔku Belemgbunli Dwɔlam, mɔɔ ɛnee ɛboda na ɔwɔ Gyɛzɛlii la. Ɔbodale konle ne mɔɔ ye ɛlɔnema nee Selea Belemgbunli Hazeeyɛle ɛlɔnema ne honle wɔ Releemɔto mɔɔ wɔ Geleade la anu. Gyihu hanle hilele ɔ gɔnwo mɔ safohyenlema ne kɛ, “Saa bɛgyi me nzi a ɛnee awie biala mmawolo ɔ bo kɔ Gyɛzɛlii kɔka kile menli mɔɔ wɔ Gyɛzɛlii la. Awie biala ɛwoa Releemɔto ɛke.”

¹⁶ Akee Gyihu vole ye konle ehwili ne anu na ɔzile nu kɛ ɔkɔ Gyɛzɛlii. Ɛkɛ ne a ɛnee Belemgbunli Dwɔlam wɔ ɛlɛyɛ ɔ nwo ayile na Dwuda Belemgbunli Ehazaya ɛhɔ ye ɛkpɔlalɛ a.

¹⁷ Sinzavolɛ bie ɛnee gyi Gyɛzɛlii tawa ne azo na ɔnwunle Gyihu nee ye ɛlɔne ne mɔɔ ɛlɛba la. Ɔzele kɛ, “Menwu kɛ menli bie ɛlɛba.” Dwɔlam zele kɛ, “Maa sonla mɔɔ ze ɛkpɔnwɔ ka la ɛhɔyia bɛ na ɔbiza bɛ saa bɛlɛba ye anzonudwolɛ nu a.”

¹⁸ Yemɔti sonla vole ɛkpɔnwɔ zo yiale Gyihu na ɔbizale ye kɛ “Belemgbunli se membambiza bɛ saa bɛlɛba ye anzonudwolɛ nu a.” Gyihu zele ye kɛ, “Se di me nzi. Anzonudwolɛ a le duzu?” Sinzavolɛ ne manle belemgbunli dele kɛ, “Ahenle mɔɔ bɛzoanle ye la ɛdwu menli ne anwo lɔ, noko mennwu kɛ ɔlɛba.”

¹⁹ Eza belemgbunli zoanle sonla fofolɛ na ɔdaye noko ɔyiale Gyihu nee ye ɛlɔne ne na ɔbizale bɛ saa bɛlɛba ye anzonudwolɛ nu a. Na Gyihu zele ye kɛ, “Se di me nzi. Anzonudwolɛ a le duzu?”

²⁰ Sinzavolɛ ne eza manle belemgbunli dele kɛ ahenle mɔɔ bɛzoanle ye la ɛdwu noko ɔmba. Akee ɔzele kɛ, “Ahenle mɔɔ nee ɛlɔne ne ɛlɛba la zɔho Gyihu, ɔluakɛ ɔlɛka ye konle ehwili ne kpole kpalɛ.”

²¹ Belemgbunli Dwɔlam zele kɛ, “Bɛva me konle ehwili ne bɛrɛlɛ me.” Ɔvole nu yɛɛ Dwuda Belemgbunli Ehazaya ɔdaye ɔvole ye ɛdeɛ ne anu na bɛzile nu bɛhɔyiale Gyihu. Bɛyiale ye wɔ Neebɔto mɔɔ vi Gyɛzɛlii la egyinli ne anloa.

²² Dwɔlam bizale Gyihu kɛ, “Ɔle bɛtɛɛ ɔ?” Na Gyihu buale ye kɛ, “Kɛ ɔsi ɔyɛ bɛtɛɛ ɛ, wɔ mekɛ mɔɔ ɛ nli Gyɛzɛbɛle ɛva ye ayɛne nee awozonle ɛzonlenlɛ nu tuutuulilɛ ɛbɛla ɛyɛ maanle ye totɔɔ zɛhae la?”

²³ Dwɔlam deanle nu, “Ehazaya! Maamɔvo ɛbɛla a le ɛhye.” Na ɛkɛ ne ala ɔhakyile ye ehwili ne anye kɛ ɔnriandi yeahɔ.

²⁴ Na Gyihu vale ye anwosesebɛ hwenle ye ɛda ne anu dole wɔle Dwɔlam. Ɛda ne liele ye kutue bo na ɔhanle ye ahonle. Dwɔlam golole guale ye ehwili ne anu.

²⁵ Gyihu zele ye boavolɛ Bedekaa kɛ, “Kɔvuandi ye to Neebɔto azɛlɛ ne azo. Ɛkakye mɔɔ Ɛdɛnkɛma hanle tiale ɔ ze Ehabe la. Mekɛ ne anu ɛnee yɛ mu nwiɔ yɛ nee ye a lua a. Ɛdɛnkɛma zele Ehabe kɛ,

²⁶ ‘Anoma ɛmanle menwunle Neebɔto nee ɔ mra mogya, yemɔti mebadea wɔ wɔ azɛlɛ ɛhye ala azo.’ Zɔhane ati bɛmaa ye zo bɛhɔdo ye azɛlɛ ne azo, kɛmɔ Ɛdɛnkɛma hanle ala la.”

Bɛhu Dwuda Belemgbunli Ehazaya

²⁷ Dwuda Belemgbunli Ehazaya nwunle ye zɛhae la ɔnriandile na ɔvale ɔ ti ɔbɔle Bɛte Heegan. Gyihu kpole ye na ɔ sa hanle ye wɔ Gɛɛ Boka ne anye anwo na ɔhanle kɛ, “Bɛhu ɔdaye.” Na bɛdole ye ɛda bɛhunle ye wɔ ye konle ehwili ne anu. Gɛɛ Boka ne bikye Yebelɛyam suazo. Ehazaya nriandile hɔle Mɛgedo na ɛkɛ ne yɛɛ ɔwule a.

²⁸ Ye mgbanyima ne vale ye funli ne dole ehwili nu hɔle Gyɛlusalɛm na bɛhɔdole ye wɔ ɔ nlenya anwo ɛkɛ wɔ Devidi suakpole zo.

²⁹ Ehazaya kali Dwuda ebia ne la ɛnee Dwɔlam ɛli ɛvolɛ bulu nee ko wɔ Yizilayɛ ebia ne azo.

Bɛhu Belemgbunli Raalɛ Gyɛzɛbɛle

³⁰ Gyihu rale Gyɛzɛlii. Ɛnee Gyɛzɛbɛle ɛde mɔɔ ɛzi la ati ɔdole ɔ nye anzi na ɔyɛle ɔ ti kɛnlɛma bie na ɔ nye gyi nvɛnzɛlɛ ne anu ɔlɛnea gua ne azo lɔ.

³¹ Gyihu dwule anuhɔlɛ ɛkɛ ne ala la, ɔbizale ye kɛ, “Gyihu maamɔvo, kɔdiawu mɔɔ ɔbɔ ye ɛbɛla kɛ Zemelae mɔɔ ɔku ɔ menle a! Ɛrale ye anzonudwolɛ nu ɔ?”

³² Gyihu manle ɔ ti zo nleanle ye wɔ nvɛnzɛlɛ ne anu na ɔbizale kɛ, “Nwane mɔ a wɔ me nzi a?” Ɛkɛ ne ala suakunlu ɛkɛ ne sonvolɛma nwiɔ anzɛɛ nsa wulale bɛ ti nvɛnzɛlɛ ne mɔ ko anu nleanle Gyihu anyunlu.

³³ Gyihu zele bɛ kɛ, “Bɛvuandi raalɛ ne bɛde ye aze.” Na amgba noko bɛvuandinle ye bɛdele ye aze. Ɔkpukele na ye mogya bɔle guale bane ne nee mgbɔnwɔ ne mɔ anwo, na bɛtietiale ɔ nwo zo

³⁴ bɛhɔle sua nu ɛkɛ. Gyihu hɔlile debie na ɔnlonle na akee ɔzele kɛ, “Bɛnlea bɛye raalɛ musuɔfoɔ ne bɛhɔzie ye, ɔluakɛ ɔle belemgbunli ra.”

³⁵ Bɛhɔle bɛkava ye bɛahɔzie ye la bɛannwu ɛhwee kɛ ɔ ti kanrɛlɛ ne, ɔ gyakɛ yɛɛ ɔ sa adaakɛ ne mɔ ala.

³⁶ Bɛziale bɛrabɔle Gyihu amaneɛ na ɔzele kɛ, “Ɛdɛnkɛma a luale ye sonvolɛ Yilaegya anwo zo hanle dole ɛkɛ a. Ɔse, ‘Ahwea bali Gyɛzɛbɛle nwonane wɔ Gyɛzɛlii suazo,

³⁷ na Gyɛzɛbɛle funli bayɛ kɛ ewula la wɔ Gyɛzɛlii guabile zo, amaa awie annwu ye sonla holɛ na yeaze kɛ, Gyɛzɛbɛle a la ɛke la.’ ”