2 Arl 7 - BAEBOLO ANZƐƐ BULUKU NWUANZANWUANZA

¹ Yilaehya buale kɛ, “Tie edwɛkɛ mɔɔ Ɛdɛnkɛma ɛha la. Ɔse, Ɛhyema kabezɛ ala, bɛbadɔne abɛlɛ ɛdɔkɛ kilo nsa anzɛɛ baale kilo nsia dwɛtɛ fufule ko wɔ Samɛlea ɛke.”

² Na belemgbunli sonvolɛ ne mɔɔ nee ye lua la zele Yilaehya kɛ, “Ɛhye, yemɔ tafela. Saa Ɛdɛnkɛma mumua ne tukuedukue anwuma nvɛnzɛlɛ bɔbɔ a, ɔnrɛzi zɔhane ɛlɛ.” Yilaehya buale kɛ, “Ɛ nye banwu ye na ɛnrɛli bie.”

Selea ɛlɔnema nriandi avi Samɛlea

³ Menli nna bie mɔɔ kokobɛ ɛdila bɛ la ɛnee de Samɛlea suakpole ne anuhɔlɛ kpole ne anzi. Na bɛhanle bɛhilele bɛ nwo ngoko kɛ, “Duzu ati a yɛtɛnla ɛke dedee yɛawu ɛ?

⁴ Saa yɛse kɛ yɛkɔ suakpole ne azo lɔ a, ɛhɔne wɔ lɔ, yɛbawu; yɛɛ saa yɛde ɛke noko a ewule ko ne ala ɔ. Zɔhane ati bɛmaa yɛhɔ Selea ɛlɔnema ne azokoɛleɛ lɔ. Saa bɛnwu yɛ anwunvɔne a, yɛ ti ngoane ɔ, saa bɛku yɛ noko a, ɔ muala wie ewule ko ne ala.”

⁵ Yemɔti mɔɔ maanle nu ɛlɛdudu la bɛdwazole kɛ bɛkɔ Seleama azokoɛleɛ ne. Bɛhɔdwule ɛkɛ ne la bɛnwunle kɛ awie biala ɛnle ɛkɛ.

⁶ Ɔluakɛ Ɛdɛnkɛma manle Selea ɛlɔnema ne dele ɛnelɛ kpole bie mɔɔ kile kɛ ɛlɔne ɛva bɛ aze a. Ɛnelɛ ne zɔho konle ehwili dɔɔnwo nee mgbɔnwɔ nee ɛlɔne kpole bie agyakɛ abo. Yemɔti bɛhanle bɛhilele bɛ nwo ngoko kɛ, “Bɛnlea kɛ Yizilayɛ belemgbunli ɛhɔbɔ Hɛte nee Yigyibiti arelemgbunli ɛkpa yemaa bɛva bɛ ɛlɔne bɛra yɛ nwo zo a.”

⁷ Na nɔsonɔso ne ala bɛguale ndwɛlɛ aze bɛgyakyile bɛ ndanlɛ azua, bɛ mgbɔnwɔ nee bɛ asoaso ne mɔ bɛ nzi kɛ bɛ gyakɛ anzi ndinli kɛlie bɛ ngoane.

⁸ Mɔɔ menli nna ne mɔɔ kokobɛ ɛdila bɛ la radwule azokoɛleɛ ne la bɛwolole ndanlɛ sua ko anu, bɛnyianle debie bɛlile na bɛnlonle, bɛvale dwɛtɛ fufule, ezukoa nvutuke, yɛɛ adɛladeɛ bɛvindele bɛhɔveale. Bɛziale bɛrale bieko na bɛwolole ndanlɛ sua fofolɛ nu, na bɛvale ninyɛne bɛvile ɛkɛ bɛhɔveale.

⁹ Na akee bɛzele kɛ, “Yɛnyɛ ye boɛ; ɛnɛ kenle ye nee edwɛkɛ fɛlɛko lua. Saa yɛfea zolɛ toonwo ɔdwu alehyenlɛ a, yɛbanyia ndeanlɛ. Zɔhane ati bɛmaa yɛhɔbɔ belemgbunli mgbanyima ne mɔ sua nu amra amaneɛ.

¹⁰ Yemɔti bɛrale na bɛhanle bɛhilele anlenkɛ kpole sinzavolɛma ne kɛ: Yɛhɔle Seleama azokoɛleɛ lɔ na yɛnwunle kɛ awie biala ɛnle ɛkɛ. Anloma nee akɔlɛ bɔbɔ, yeande bie nganeɛ kɛ bɛ mgbɔnwɔ nee bɛ asoaso ne mɔ mɔɔ bɛhendɛhenda bɛ la a yɛnwunle bɛ a, yɛɛ bɛ ndanlɛ azua ne mɔ noko bɛanyɛ bɛ ɛhwee.”

¹¹ Anlenkɛ Kpole sinzavolɛma ne bɔle edwɛkɛ ne nolo na bɛhɔhanle edwɛkɛ ne wɔ belemgbunli suakunlu ɛkɛ.

¹² Na belemgbunli dwazole nɔe ne na ɔzele ye mgbanyima ne mɔ kɛ, “Bɛdie, bɛze mɔɔ Seleama ne ɛyɛ la ɔ? Bɛze kɛ ɛhɔne ɛlɛku yɛ, yemɔti bɛ nye fuu bɛvi bɛ azokoɛleɛ ne bɛhɔvea fienemgbole ne anu lɔ; bɛ adwenle a le kɛ, yɛvi suakpole ye azo yɛbavinde na bɛarahye yɛ na bɛava suakpole ye.”

¹³ Ye mgbanyima ne mɔ ko zele ye kɛ, “Ewule ɛbɔ sua ye ɛwie; yemɔti ɔsi ɛkɛ ne ko ne ala. Bɛmaa yɛzoa menli yɛmaa bɛva mgbɔnwɔ mɔɔ ɛha la anu nnu bɛhɔnlea ye bɛ nye zo.”

¹⁴ Yemɔti bɛyele menli nwiɔ mɔɔ tɛnla mgbɔnwɔ zo ko la na belemgbunli zoanle bɛ kɛ bɛhɔnlea.

¹⁵ Menli nwiɔ zɔhane dinle Seleama toonwo hɔdwule Dwɔdan ne anloa, na bɛnwunle kɛ, ye ndɛndɛ mɔɔ bɛkpondɛ la ati, Seleama nriandi ahɔ la ɛnee bɛlɛwɔlɔwɔlɔ bɛ adɛladeɛ na bɛfuandi bɛ konle ninyɛne bɛgua. Na soanvolɛma ne ziale rabɔle belemgbunli amaneɛ.

¹⁶ Na menli ne vindele na bɛhɔfonyianle Seleama ndanlɛ azua ne mɔ anu bɛsesale bɛ debie biala. Yemɔti bɛdɔnenle abɛlɛ ɛdɔkɛ kilo nsa yɛɛ baale kilo nsia dwɛtɛ fufule ngoko, kɛmɔ Ɛdɛnkɛma hanle ala la.

¹⁷ Ɔrale ye zɛhae la, belemgbunli ne yɛle kɛ safohyenle ne mɔɔ nee ye lua la ɛhɔnlea suakpole ne anlenkɛ kpole sinzavolɛma ne anwo zo, na menli ne tietiale ɔ nwo zo manle ɔwule kɛmɔ Yilaehya hanle dole ɛkɛ ne, wɔ mekɛ mɔɔ ɔ nee belemgbunli bɛrale ɔ nwo zo la.

¹⁸ Ɔluakɛ mɔɔ Yilaehya zele belemgbunli kɛ, “Bɛbadɔne abɛlɛ ɛdɔkɛ kilo nsa yɛɛ baale kilo nsia dwɛtɛ fufule ngoko ɛhyema kabezɛ wɔ Samɛlea ɛke la,”

¹⁹ safohyenle ne buale ye kɛ, “Saa Ɛdɛnkɛma mumua ne tukuedukue anwuma nvɛnzɛlɛ bɔbɔ a ɔnrɛzi zɔhane ɛlɛ.” Na Yilaehya zele ye kɛ, “Ɛ nye banwu ye na ɛnrɛli bie.”

²⁰ Na ɔyɛle zɔhane. Menli ne tietiale ɔ nwo zo wɔ anlenkɛ kpole ne anloa manle ɔwule.