2 Arl 5 - BAEBOLO ANZƐƐ BULUKU NWUANZANWUANZA

Neeman anwo ɛza

¹ Nrenya bie, bɛfɛlɛ ye Neeman; ɔle safohyenle kpanyinli mɔɔ nea Selea ɛlɔnema ne anwo zo a. Selea belemgbunli ne bu ye kpalɛ eza ɔkulo ye edwɛkɛ, ɔboalekɛ ɔlua Neeman anwo zo Ɛdɛnkɛma ɛmaa Seleama ɛli Yizilayɛma anwo zo konim. Neeman le katakyie, noko ɔle kokobɛvolɛ.

² Bɛ nee Yizilayɛma konle konle ne mɔ ko anu, Seleama hɔle Yizilayɛma anwo zo na bɛhyele kakula bɛlɛra bie bɛhɔle bɛ maanle nu, na bɛyɛle kɛ ɔzonle Neeman aye ne.

³ Kenle ko kakula bɛlɛra ne zele ɔ menle raalɛ ne kɛ, “Saa me menle kɛhɔ Nyamenle kpɔmanvolɛ ne mɔɔ wɔ Samɛlea la anwo lɔ a, anrɛɛ ɔbayɛ ye kokobɛ ne ayile.”

⁴ Neeman dele edwɛkɛ ne la ɔdaye noko ɔhɔle belemgbunli ne ɛkɛ na ɔhɔhanle mɔɔ kakula bɛlɛra ne hanle la, ɔhilele ye.

⁵ Na Belemgbunli ne zele kɛ, “Ɛnee kɔ ɛ. Mekɛlɛ kɛlata meamaa wɔahɔmaa Yizilayɛ belemgbunli ne.” Yemɔti Neeman vale dwɛtɛ fufule apenle ngoko abulasa, ezukoa nvutuke apenle nsia yɛɛ ɛvoyialilɛ adɛladeɛ ngakyile bulu na ɔzile nu ɔhɔle.

⁶ Na belemgbunli ne vale kɛlata manle ye kɛ ɔva ɔhɔmaa Yizilayɛ belemgbunli ne. Kɛlata ne se, “Saa ɛ sa ka kɛlata ɛhye a, ɛnee nwu ye kɛ medame yɛɛ mezoa me Safohyenlema Kpanyinli ne ɛ nwo ɛkɛ a, amaa wɔayɛ ye kokobɛ ne ayile.”

⁷ Yizilayɛ belemgbunli ne asa hanle kɛlata ne na ɔgengale la, nyane ngome manle ɔsuosuanle ye tɛladeɛ ne mɔɔ ɔwula la anu na ɔzele kɛ, “Na mele Nyamenle ɔ, mɔɔ mekola meku sonla eza metunwue ye mɔɔ yemɔti, bɛva nrenya ɛhye bɛrɛlɛ me kɛ menyɛ ye kokobɛ ayile a? Ɛhye kile kɛ konle ala yɛɛ ɔfa yearadoa me a.”

⁸ Na mɔɔ Nyamenle kpɔmanvolɛ Yilaehya dele edwɛkɛ ne nee kɛ belemgbunli ne zile suosuanle ye tɛladeɛ mɔɔ ɔwula la anu la, ɔzoanle ɔmanle bɛhɔzele ye kɛ, “Na duzu ati yɛɛ wɔsuosua wɔ tɛladeɛ ne anu a? Maa ɔrɛla me nwo ɛke amaa yeanwu kɛ Nyamenle kpɔmanvolɛ wɔ Yizilayɛ.”

⁹ Yemɔti Neeman dɛnlanle ye konle ehwili ne anu na ɔ nee ye mgbɔnwɔ ne mɔ amuala hɔgyinlanle Yilaehya sua nu ɛkɛ ne anuhɔlɛ ne.

¹⁰ Na Yilaehya zoanle ye sonvolɛma ne mɔ ko manle ɔrazele ye kɛ, “Kɔbia Azule Dwɔdan ne anu fane nsuu na ɛ nwo baza na wɔ nwonane ne ayɛ kɛ ye dɛba ne ala la.”

¹¹ Neeman vale ɛya na ɔzele kɛ, “Medwenle kɛ ɔfinde yeara, yearagyinla yeavɛlɛ Ɛdɛnkɛma ye Nyamenle ne, na yeava ɔ sa yeawɔza me ewule ne azo yeayɛ me kokobɛ ne ayile.

¹² Na Azule mgbole mɔɔ le kɛ Abana nee Fapa mɔɔ gua Dɛmasekɛse la ɛnle kpalɛ ɛndɛla azule mɔɔ wɔ Yizilayɛ la ɔ? Duzu ati a mengɔmbia bɛmɛ anu mende kpɔkɛ ɛ?” Yemɔti ɔhakyile ɔ nwo kɛ ɔkɔ.

¹³ Na ye sonvolɛma ne mɔ hɔle ɔ nwo ɛkɛ ne na bɛzele ye kɛ, “Yɛmenle, saa Nyamenle kpɔmanvolɛ ne zele wɔ kɛ ɛyɛ debie ɛsesebɛ bie a anrɛɛ ɛnrɛyɛ ɔ? Duzu ati yɛɛ akee ɛnrɛhɔdɔ Azule ne anu fane nsuu ne na ɛnrɛde kpɔkɛ ɛ?”

¹⁴ Na Neeman hɔle Dwɔdan ne anloa na ɔdɔle nu fane nsuu kɛmɔ Yilaehya zele ye la, na ɔdele kpɔkɛ bɔkɔɔ. Ye nwonane ne yɛle kɛnlɛma kɛ adɔma nwonane la.

¹⁵ Yemɔti ɔziale ɔrale Yilaehya ɛkɛ ne na ɔhanle kɛ, “Kɛkala, akee menwu kɛ Nyamenle ɛnle ɛleka biala kɛ Yizilayɛ ala; zɔhane ati, yɛmenle, die me sa nu ahyɛlɛdeɛ.”

¹⁶ Yilaehya buale kɛ, “Meka tease Nyamenle ne mɔɔ mesonle ye la kɛ, menrɛlie ahyɛlɛdeɛ biala.” Neeman hanle biala, na Yilaehya anlie ahyɛlɛdeɛ ne.

¹⁷ Na Neeman zele ye kɛ, “Saa ye zɛhae ɛdeɛ a ɛnee mebodo wɔ, maa me adenle maa menva ɛke ɛnwea mɔɔ mgbɔnwɔndua nwiɔ kɛhola ye soa la mengɔ, ɔluakɛ ɔvi ɛnɛ mɔɔ kɔ la, menrɛva ɛyelalɛ azubɔdeɛ menrɛmaa kɛ bɛva bɛbɔ azu yɛɛ menrɛbɔ azu menrɛmaa nyamenle biala kɛ Ɛdɛnkɛma ala.

¹⁸ Na ɛhye yɛɛ mesɛlɛ Ɛdɛnkɛma a, saa me nee me belemgbunli ne yɛkɔ Selea bozonle Rileemɔn amonle sua ne anu na mebɔ me ti aze mesonle ye bie a, ɔva ɔhyɛ me.”

¹⁹ Na Yilaehya zele ye kɛ, “Kɔ anzonudwolɛ nu.” Na Neeman hɔle. Mɔɔ Neeman hɔle moa ekyii la,

²⁰ Yilaehya sonvolɛ Gɛheezae, hanle kɛ, “Nea, me menle ɛgyakyi Seleanli Neeman; yeanlie ninyɛne mɔɔ ɔ nee bɛ rale la anu ko bɔbɔ. Meka tease Ɛdɛnkɛma kɛ, menriandi meadoa ye meahɔlie debie wɔ ye ɛkɛ.”

²¹ Yemɔti ɔnriandile ɔdoale Neeman. Neeman dole ɔ nye na ɔnwunle kɛ awie lɛ ɛnriandilɛ doa ye la, ɔvi ye ehwili ne anu ɔdwule ɔhɔyiale ye na ɔbizale ye kɛ, “Edwɛkɛ bie ɔ?”

²² Gɛheezae buale kɛ, “Tɛ edwɛkɛ bie ɔ, edwɛkɛ biala ɛnle ɛkɛ. Na me menle ɛzoa me kɛ membaze wɔ kɛ, ‘Ɛyele ɛ nwo ɛkɛ ne ala la yɛɛ Nyamenle kpɔmanvolɛma asa azo ne mɔ mɔɔ wɔ Yifelaem awoka ne mɔ azo lɔ la anu nwiɔ rale a. Yemɔti fa dwɛtɛ fufule apenle nsa yɛɛ ɛvoyialilɛ adɛladeɛ ngakyile nwiɔ maa memaa bɛ.’ ”

²³ Neeman buale kɛ, “Die dwɛtɛ fufule apenle nsia kɔmaa bɛ.” Ɔgyinlanle zo kɛ ɔlie, na ɔwulale dwɛtɛ fufule ne wɔ ahodoku nwiɔ anu ɔkyekyele na ɔvale ɛvoyialilɛ adɛladeɛ ngakyile nwiɔ ɔbokale nwolɛ ɔvale ɔzoale ye sonvolɛma nwiɔ kɛ bɛva bɛ nee Gɛheezae ɛhɔ.

²⁴ Bɛhɔdwule boka ne mɔɔ Yilaehya wɔ zo la abo la, Gɛheezae liele ninyɛne ne na ɔvale ɔhɔguale ye sua ne mɔɔ ɔda nu la anu na ɔmanle menli ne mɔ ziale.

²⁵ Akee ɔziale ɔhɔle sua nu na Yilaehya bizale ye kɛ, “Gɛheezae, ɛhɔle nienwu?” Gɛheezae buale kɛ, “Meangɔ ɛleka.”

²⁶ Na Yilaehya zele ye kɛ, “Me sunsum nee wɔ a hɔle a. Mɔɔ nrenya ne vi ye ehwili ne anu dwule aze kɛ ɔbayia wɔ la ɛnee mewɔ ɛkɛ. Ɛnea a ɛnee mekɛ mɔɔ bɛfa bɛdie ezukoa, adɛladeɛ, ɔlivi nee vanye egyinli, mboane nee nlankɛ, yɛɛ sonvolɛ mrenya nee mraalɛ la a le ɛhye ɔ?

²⁷ Zɔhane ati Neeman kokobɛ ne badila wɔ nee ɛ bo zo amra dahuu.” Gɛheezae vindele la ɛnee kokobɛ ne ɛdila ye, ɔ nwo ɛyɛ nzelabenle.