2 Arl 24 - BAEBOLO ANZƐƐ BULUKU NWUANZANWUANZA

¹ Mɔɔ Gyɛhɔyakem di belemgbunli la, Babelonia Belemgbunli Nɛbukadenɛza ravale Dwudama aze, ɔholole bɛ nwo zo, ɔmanle Gyɛhɔyakem dole ɔ nloa aze kɛ ɔwɔ ɔ bo na ɔzonlenle ye ɛvolɛ nsa. Nzinlii Gyɛhɔyakem dele atua kɛ ɔnrɛzonle ye bieko.

² Ɛdɛnkɛma manle Babelonia, Selea, Mowabe, nee Amɔn ɛlɔnema rale Gyɛhɔyakem anwo zo na bɛzɛkyele Dwuda bɔkɔɔ, kɛmɔ Ɛdɛnkɛma luale ye sonvolɛma, kpɔmanvolɛma ne anwo zo hanle kɛ ɔbayɛ la.

³ Ɛdɛnkɛma a manle ɛhye zile a, amaa ɔlua ɛtane ne mɔ mɔɔ Belemgbunli Manasɛ yɛle la ati, yeaye Dwudama yeavi ɔ nye zo bɔkɔɔ.

⁴ Ɛtane kpole ko bɔbɔ mɔɔ Manasɛ yɛle la a le menli mɔɔ ɛnze nwolɛ bie na ɔmanle bɛhunle bɛ la. Ɛdɛnkɛma fa Manasɛ ɛtane kyɛ ye wɔ ɛhye anwo a ɔnrɛyɛ boɛ.

⁵ Debie biala mɔɔ Gyɛhɔyakem yɛle la bɛhɛlɛ bɛ muala wɔ Dwuda Arelemgbunli Tetedwɛkɛ Mbuluku ne mɔ anu.

⁶ Gyɛhɔyakem hɔle ayile nu na ɔ ra Gyɛhɔyakɛn lile ye agya, dɛnlanle ebia ne azo.

⁷ Yigyibiti belemgbunli nee ye ɛlɔnema ne vi bɛ maanle ne anu anvinde bieko, ɔboalekɛ ɛnee Babelonia belemgbunli a sie maanle maanle mɔɔ ɛnee wɔ Yigyibiti abo la a, ɔvi Azule Yufileti ne anloa mɔɔ kɔgua Yigyibiti ɛweɛne zo la.

Dwuda Belemgbunli Gyɛhɔyakɛn

⁸ Gyɛhɔyakɛn lile ɛvolɛ bulu nee mɔtwɛ la yɛɛ ɔralile Dwuda belemgbunli a. Ɔdɛnlanle ebia ne azo siane nsa wɔ Gyɛlusalɛm. Ɔ nli a le Ɛleneetan mɔɔ vi Gyɛlusalɛm la ara raalɛ Nɛhɛhyeta.

⁹ Gyɛhɔyakɛn vale ɔ ze agyakɛ na ɔyɛle ɛtane ɔtiale Ɛdɛnkɛma.

¹⁰ Ɔradɛnlanle Dwuda ebia ne azo la yɛɛ Babelonia ɛlɔnema mɔɔ Belemgbunli Nɛbukadenɛza safohyenlema a li bɛ ti la rabɛnrale yiale Gyɛlusalɛm kɛ bɛ nee ye ko a.

¹¹ Mekɛ mɔɔ ɛlɔnema ne bɛnrale yiale Gyɛlusalɛm la yɛɛ Nɛbukadenɛza mumua ne rale Gyɛlusalɛm a,

¹² na Belemgbunli Gyɛhɔyakɛn, nee ɔ nli, ɔ mra, ye safohyenlema, nee suakunlu mgbanyima ne mɔ kɔsɔɔti dole bɛ nloa aze manle Babeloniama ne. Ɛnee Nɛbukadenɛza ɛli ɛvolɛ mɔtwɛ wɔ Babelonia ebia ne azo la yɛɛ ɔrahyele Gyɛhɔyakɛn nuokɛ

¹³ ɔ nee ye hɔle Babelɔn a. Ɔzoale Ɛzonlenlɛ Sua ne anu nee suakunlu ɛkɛ ne ninyɛne kɔsɔɔti ɔhɔle. Kɛmɔ Ɛdɛnkɛma hanle dole ɛkɛ ne la, Nɛbukadenɛza bubule ezukoa nvutuke dwora ne mɔ mɔɔ Belemgbunli Sɔlɔmɔn manle bɛyɛle mɔɔ bɛfa bɛsonle wɔ Ɛzonlenlɛ Sua ne anu la amuala.

¹⁴ Nɛbukadenɛza hyele menli mɔɔ wɔ Gyɛlusalɛm la nuokɛ, arelemgbunli mra mrenya nee menli titile mɔɔ wɔ suakpole ne azo la amuala na ɔ nee bɛ hɔle; bɛlua menli apenle bulu. Eza ɔvale dwinvolɛma nee bɛdabɛ mɔɔ bɛze bɛ sa anloa gyima la kɔsɔɔti ɔhɔle na ɔgyakyile bɛdabɛ mɔɔ ehyia ɛwie bɛ ti enrinli tudu wɔ Dwuda maanle ne anu la.

¹⁵ Nɛbukadenɛza hyele Gyɛhɔyakɛn, ɔ nli, ye mraalɛ, ye mgbanyima nee menli titile mɔɔ wɔ Dwuda la nuokɛ ɔ nee bɛ hɔle Babelɔn.

¹⁶ Nɛbukadenɛza eza dule menli mɔɔ anwo hyia la kɔsɔɔti vile maanle ne anu, ɔ nee bɛ hɔle Babelonia. Bɛlua menli apenle nsuu, yɛɛ menli mɔɔ ze gyima la apenle ko; dwinvolɛma boka nwolɛ. Menli ɛhye mɔ amuala le menli mɔɔ te kpɔkɛ na bɛkola bɛkɔ konle nloa a.

¹⁷ Nɛbukadenɛza vale Gyɛhɔyakɛn awuvuanyi Matanaya yɛle Dwuda belemgbunli na ɔdonle ye Zɛdikaya.

Dwuda Belemgbunli Zɛdikaya

¹⁸ Zɛdikaya lile ɛvolɛ abulanwiɔ nee ko la yɛɛ ɔralile Dwuda belemgbunli a. Ɔlile ebia ne ɛvolɛ bulu Lebena la ara raalɛ Hamutale.

¹⁹ Belemgbunli Zɛdikaya yɛle ɛtane tiale Ɛdɛnkɛma, kɛmɔ Belemgbunli Gyɛhɔyakem yɛle la.

²⁰ Ɛdɛnkɛma vale menli mɔɔ wɔ Gyɛlusalɛm nee Dwuda la anwo ɛya kpole kpalɛ na ɔyele ɔ nye wɔ bɛ nwo zo.