2 Arl 23 - BAEBOLO ANZƐƐ BULUKU NWUANZANWUANZA

Dwosaya sɛkye awozonle ɛzonlenlɛ

¹ Belemgbunli Dwosaya yieyiale Dwuda nee Gyɛlusalɛm mgbanyima ne mɔ

² na bɛ muala bɛhɔle Ɛzonlenlɛ Sua ne anu. Sɛlɛvolɛma, Nyamenle kpɔmanvolɛma, nee menli ne mɔ amuala, sukoavolɛma nee ehyianvolɛma amuala boka nwolɛ a bɛhɔle a. Akee belemgbunli ne gengale ngyekyeleɛ buluku ne mɔɔ bɛnwunle ye wɔ Ɛzonlenlɛ Sua ne anu la hilele bɛ

³ ɔgyinlanle mpila ne anwo na ɔvuale ɔhilele Ɛdɛnkɛma kɛ ɔbayɛ tieyɛ yeamaa ye, ɔbali ye mɛla ne mɔ azo, na yeayɛ debie biala mɔɔ ngyekyeleɛ ne kile kɛ bɛyɛ la, kɛmɔ bɛhɛlɛ ye wɔ buluku ne anu la. Na menli ne kɔsɔɔti bɛdabɛ bɛbɔle ɛwɔkɛ kɛ bɛkɛli ngyekyeleɛ ne azo.

⁴ Akee Belemgbunli Dwosaya zele Sɛlɛvolɛ Kpanyinli Helekaya, sɛlɛvolɛma mɔɔ boa ye, yɛɛ sinzavolɛma mɔɔ wɔ gyima nu wɔ Ɛzonlenlɛ Sua ne nlenkɛ ne mɔ anloa la kɛ bɛhwe debie biala mɔɔ bɛfa bɛsonle bozonle Beeyale, bozonle raalɛ Ahyela, yɛɛ anwumaneamra ne mɔ mɔɔ wɔ Ɛzonlenlɛ Sua ne anu la bɛvinde. Belemgbunli vale bɛ kɔsɔɔti hɔle Gyɛlusalɛm kandiba mɔɔ kɔne Azule Kedelɔn ne anloa la na ɔyelale bɛ, na ɔmanle bɛvale bɛ nzonle ne bɛhɔle Bɛtɛle.

⁵ Ɔyele sɛlɛvolɛma mɔɔ Dwuda arelemgbunli vale bɛ manle bɛbɔle azu wɔ awozonle azua mɔɔ wɔ Dwuda nee Gyɛlusalɛm la anu la amuala ali. Sɛlɛvolɛma ɛhye mɔ bɔle azu manle bozonle Beeyale ne, sɛnzɛne ne, siane ne, yɛɛ nwɔlɔra nee anwumaneamra kɔsɔɔti.

⁶ Ɔyele bozonle raalɛ Ahyela ananze ne ɔvile Ɛzonlenlɛ Sua ne anu ɔvale ɔhɔle Gyɛlusalɛm kandiba wɔ Azule Kedelɔn ne anloa, ɔhɔyelale ye na ɔpele ɔmanle ɔyɛle motomoto, na ɔvale ɔkpondenle ye wɔ menli mgbanema nla zo wɔ maanle azie ne azo.

⁷ Belemgbunli Dwosaya eza manle bɛzɛkyele ɛleka mɔɔ bɛzieziele bɛmanle tuutuuma wɔ Ɛzonlenlɛ Sua ne anu la. (Ɛkɛ ne yɛɛ mraalɛ ne mɔ nwo adɛladeɛ mɔɔ bɛfa bɛsonle bozonle raalɛ Ahyela ne la a.)

⁸ Ɔmanle bɛ nee sɛlɛvolɛma mɔɔ wɔ Dwuda maanle ne anu la amuala rale Gyɛlusalɛm na ɔzɛkyele azukponle biala mɔɔ bɛyɛle maanle ne anu, ɔvi Giba mɔɔ kɔdwu Biyɛhyiba la. Eza ɔmanle bɛbubule azukponle ne mɔ mɔɔ bɛsisile bɛmanle mmonle ne mɔ mɔɔ ɛnee wɔ anlenkɛ kpole ne mɔɔ Dwɔhyua, mɔɔ le suakpole ne azo neavolɛ ne zile la anloa la. Mmonle zɔhane, saa ɛlɛwolo suakpole ne azo anuhɔlɛ kpole ne anu a ɛnee ɔwɔ bɛne zo.

⁹ Sɛlɛvolɛma zɔhane mɔ mɔɔ rale la yeammaa bɛanyɛ gyima wɔ Ɛzonlenlɛ Sua ne mɔɔ wɔ Gyɛlusalɛm la anu, noko bɛmanle bɛ adenle bɛmanle bɛlile kpanwo ne mɔɔ mgbɔvonle ɛnle nu mɔɔ bɛkɛva bɛkɛmaa sɛlɛvolɛma la bie.

¹⁰ Belemgbunli Dwosaya eza zɛkyele Tofɛte amonle sua ne mɔɔ wɔ Henɔm Bɔnza ne anu la, amaa awie anyela ɔ ra raalɛ anzɛɛ nrenya wɔ ɛkɛ ne ambɔ azu ammaa bozonle Molɛke.

¹¹ Eza ɔyeyele mgbɔnwɔ ne mɔ mɔɔ Dwuda arelemgbunli ɛdu ɛzie ɛkɛ ɛmaa sɛnzɛne ne ɛzonlenlɛ la. Ɔmanle bɛyelale ehwili ne mɔ mɔɔ bɛfa bɛyɛ ɛzonlenlɛ ne la. (Ninyɛne ɛhye mɔ ɛnee wɔ Ɛzonlenlɛ Sua ne alie kpole ne anlenkɛ kpole ne anloa mɔɔ kɔne ɛleka mɔɔ abɔlɔba kpanyinli Neetan Milɛke de la.)

¹² Azukponle ne mɔ mɔɔ Dwuda arelemgbunli ɛsisi wɔ suakunlu ɛkɛ ne azua ne mɔ ati zo ɛleka mɔɔ Belemgbunli Ehaze dɛnlanle la, Belemgbunli Dwosaya bubule bɛ. Eza ɔbubule nuhua ne mɔ mɔɔ Belemgbunli Manasɛ sisile wɔ Ɛzonlenlɛ Sua ne alie nwiɔ ne anwo la. Ɔbubule azukponle ne mɔ anu ngyikyi ngyikyi na bɛvuandinle bɛguale Kedelɔn bɔnza ne anu.

¹³ Dwosaya eza zɛkyele azukponle ne mɔɔ Belemgbunli Sɔlɔmɔn zile wɔ Gyɛlusalɛm aduduleɛ, wɔ Ɔlivi Boka ne nyiakɛ kɛ bɛva bɛzonle Saedɛn bozonle raalɛ Asetate, Mowabe bozonle Kimɔhye, nee Amɔn bozonle ne la.

¹⁴ Belemgbunli Dwosaya manle bɛbubule awolɛ mpila ne mɔ na bɛzɛkyele bozonle raalɛ Ahyela ananze ne. Ɔvulale menli avunli mbowule ɔraguguale ɛleka mɔɔ anrɛɛ mmonle ɛhye mɔ gyigyi la.

¹⁵ Belemgbunli Dwosaya manle bɛbubule ɛzonlenlɛ sua bie mɔɔ Belemgbunli Gyɛlɔbowam, Nibate ara ne zile wɔ Bɛtɛle la. Gyɛlɔbowam ɛhye a manle Yizilayɛma kɔsɔɔti yɛle ɛtane la. Dwosaya bubule azukponle ne, ɔbubule ye awolɛ ne mɔ anu na ɔmanle bɛpele ye motomoto. Eza ɔmanle bɛyelale Ahyela ananze ne.

¹⁶ Dwosaya nleɛnleanle nu na ɔnwunle kɛ sɛka bie mɔ wɔ boka ne azo lɔ. Ɔmanle bɛzale avunli zɔhane mɔ mbowule na ɔyelale bɛ wɔ azukponle ne azo. Ɔvale ɛhye ɔzɛkyele azukponle ne ɔmanle mɔɔ Nyamenle kpɔmanvolɛ ne hanle ye dɛba wɔ mekɛ mɔɔ Belemgbunli Gyɛlɔbowam ɛnee gyi azukponle ne anyunlu la yɛle nɔhalɛ.

¹⁷ Dwosaya nwunle nla bie. Na ɔbizale kɛ, “Nwane nla a wɔ nehane la?” Bɛtɛlema buale kɛ, “Nyamenle kpɔmanvolɛ ne mɔɔ vi Dwuda rahanle ninyɛne ɛhye mɔ mɔɔ ɛnɛ wɔva wɔyɛ azukponle ɛhye la nla ɔ.”

¹⁸ Belemgbunli ne zele bɛ kɛ, “Bɛgyakyi ye ɛkɛ. Bɛmmafa bɛ sa bɛka ye bɛtu ye mbowule.” Yemɔti bɛanza ye mbowule ne yɛɛ bɛanza Nyamenle kpɔmanvolɛ ne mɔɔ vi Samɛlea la noko mbowule ne.

¹⁹ Belemgbunli Dwosaya bubule azukponle nee azua mɔɔ Yizilayɛ arelemgbunli ɛsisi wɔ azuamgbole ne mɔ azo na bɛfa bɛsonle awozonle la. Ninyɛne ɛhye mɔ a manle Ɛdɛnkɛma vale ɛya la. Mɔɔ ɔvale ɔyɛle Bɛtɛle azukponle ne mɔ la bie a ɔvale ɔyɛle azukponle ne mɔ mɔɔ ɛha la a.

²⁰ Ɔhunle ahɔmenle ne mɔ kɔsɔɔti wɔ bɛ azukponle ne mɔ mɔɔ bɛfa bɛyɛ bɛ ɛzonlenle la azo na ɔyelale menli mbowule wɔ azukponle ne mɔ azo. Akee ɔziale ɔhɔle Gyɛlusalɛm.

Dwosaya di Akpabɛnwo Ɛvoyia ne

²¹ Belemgbunli Dwosaya akee yɛle kɛ ɔwɔ kɛ bɛdi Akpabɛnwo Ɛvoyia ne bɛfa bɛwula Ɛdɛnkɛma bɛ Nyamenle ne anyunlunyia, kɛmɔ bɛhɛlɛ ye wɔ ngyekyeleɛ buluku ne anu la.

²² Ɔvi mekɛ mɔɔ ɛnee ndɛnebuavolɛma a bu Yizilayɛ maanle ne toonwo mɔɔ radwule Dwuda nee Yizilayɛ arelemgbunli mekɛ zo la, bɛtɛdile Akpabɛnwo Ɛvoyia zɛhae bie ɛlɛ.

²³ Mɔɔ Dwosaya lile ɛvolɛ bulu nee mɔtwɛ wɔ ebia ne azo la yɛɛ ɔmanle bɛlile ɛvoyia ne bieko wɔ Gyɛlusalɛm a.

Ngakyile bie mɔ mɔɔ Dwosaya yɛle la

²⁴ Amaa menli ne ahola ali mɛla ne mɔ mɔɔ bɛhɛlɛ wɔ buluku ne mɔɔ Sɛlɛvolɛ Kpanyinli Helekaya nwunle ye wɔ Ɛzonlenlɛ Sua ne anu la azo la, Belemgbunli Dwosaya manle bɛdule menli mɔɔ tendɛ nwomenle nloa azo nee menli mɔɔ bɔ menli munzule la wɔ Gyɛlusalɛm nee Dwuda maanle ne anu, na bɛzɛkyele sua nu mmonle nee awozonle ɛzonlenlɛ nee debie biala mɔɔ Nyamenle kyi na bɛsonle ye la.

²⁵ Arelemgbunli mɔɔ lumuale Dwosaya anyunlu la, biala ɛnle ɛkɛ mɔɔ yeyele ye ahonle nu zonlenle Nyamenle kpalɛ kɛ ɔdaye Dwosaya la. Ɔvale ye adwenle nee ye anwosesebɛ ɔlile Mosisi Mɛla ne azo, yɛɛ sumunli kɛ ɔvile ɛkɛ ne la belemgbunli biala ɛtɛbale mɔɔ nee ye sɛ a.

²⁶ Noko akee Belemgbunli Manasɛ ɛtane mɔɔ yɛle tiale Ɛdɛnkɛma la ati Ɛdɛnkɛma vale Dwuda anwo ɛya kpole, na ɛya zɔhane ɛtɛdwole.

²⁷ Ɛdɛnkɛma zele kɛ, “Mɔɔ meva meyɛ Yizilayɛma la zɔhane ala yɛɛ mebava meayɛ Dwudama a. Mebaye Dwudama meavi me nye zo, mebakpo Gyɛlusalɛm suakpole ne mɔɔ medame mekpa nu meye la, ɔ nee Ɛzonlenlɛ Sua ne mɔɔ mese ɛkɛ ne a le ɛleka mɔɔ bɛzonle me la.”

Dwosaya belemgbunlililɛ ne awieleɛ

²⁸ Debie biala mɔɔ Belemgbunli Dwosaya yɛle la bɛhɛlɛ bɛ muala wɔ Dwuda Arelemgbunli Tetedwɛkɛ Mbuluku ne mɔ anu.

²⁹ Mɔɔ Dwosaya a di belemgbunli la Yigyibiti Belemgbunli Niko vale ye ɛlɔnema rale Azule Yufileti ne anloa kɛ bɛbaboa Aselea belemgbunli ne. Belemgbunli Dwosaya yɛle kɛ ɔsi Yigyibiti ɛlɔnema ne aze wɔ Mɛgedo, na konle zɔhane anu yɛɛ Belemgbunli Niko hunle ye a.

³⁰ Ye safohyenle mgbanyinli ne mɔ vale ye dole konle ehwili nu na bɛ nee ye rale Gyɛlusalɛm bɛrawulale ye mrɛlatɛlɛ nu wɔ ɔdaye ye nla mɔɔ ɔpɛle la anu. Dwudama yele Dwosaya ara Dwowahaze, bɛkpokpale ye nwole na bɛziele ye belemgbunli.

Dwuda Belemgbunli Dwowahaze

³¹ Dwowahaze lile ɛvolɛ abulanwiɔ nee nsa la yɛɛ bɛziele ye Dwuda belemgbunli a, yɛɛ ɔdɛnlanle ebia ne azo siane nsa wɔ Gyɛlusalɛm. Ɔ nli a le Gyɛlɛmaya mɔɔ vi Lebena la ara raalɛ Hamutale.

³² Ɔvale ɔ nlenya mɔ agyakɛ na ɔyɛle ɛtane ɔtiale Ɛdɛnkɛma.

³³ Ye belemgbunlililɛ ne bɔle aze wɔ mekɛ mɔɔ Yigyibiti belemgbunli Niko hyele ye wɔ Relebela mɔɔ wɔ Heemate azɛlɛ zo la, na ɔmanle Dwudama duale adwule dwɛtɛ fufule kilo apenle nsa ɛya nna yɛɛ ezukoa nvutuke kilo abulasa nee nna manle ye.

³⁴ Akee Belemgbunli Niko manle bɛvale Dwosaya ara Yelayakem bɛziele Dwuda belemgbunli ɔlile Dwosaya agya. Ɔhakyile Yelayakem duma ɔyɛle ye Gyɛhɔyakem. Belemgbunli Niko vale Dwowahaze hɔle Yigyibiti, na ɛkɛ ne a ɔwule a.

Dwuda Belemgbunli Gyɛhɔyakem

³⁵ Belemgbunli Gyɛhɔyakem dele adwule manle menli ne duale, kɛmɔ biala ezukoa gyinlabelɛ de la, amaa yeanyia ezukoa mɔɔ sa adwule ne mɔɔ Yigyibiti ɛde ɛmaa Dwudama kɛ bɛdua la tua.

³⁶ Gyɛhɔyakem lile ɛvolɛ abulanwiɔ nee nnu la yɛɛ ɔyɛle Dwuda belemgbunli a, yɛɛ ɔlile ebia ne ɛvolɛ bulu nee ko wɔ Gyɛlusalɛm. Ɔ nli a le Pɛdaya mɔɔ vi Wulumaa la ara raalɛ Zɛbaeda.

³⁷ Ɔvale ɔ nlenya mɔ agyakɛ na ɔyɛle ɛtane ɔtiale Ɛdɛnkɛma.