2 Arl 21 - BAEBOLO ANZƐƐ BULUKU NWUANZANWUANZA

Dwuda Belemgbunli Manasɛ

¹ Manasɛ lile ɛvolɛ bulu nee nwiɔ la yɛɛ bɛvale ye bɛziele Dwuda belemgbunli a. Ɔlile ebia ne ɛvolɛ abulanlu nee nnu wɔ Gyɛlusalɛm. Ɔ nli a le Hafezeba.

² Ɔyɛle ninyɛne mɔɔ menli mɔɔ Ɛdɛnkɛma dule bɛ azɛlɛ ne azo wɔ mekɛ mɔɔ Nyamenle menli ne ba la bie na ɔyɛle ɛtane ɔtiale Ɛdɛnkɛma.

³ Ɔziale ɔsisile awozonle azua ne mɔ mɔɔ ɔ ze Hɛzikaya manle bɛbubule bɛ la. Ɔsisile azukponle wɔ azua ne mɔ anu kɛ bɛva bɛzonle bozonle Beeyale ne na ɔyɛle bozonle raalɛ Ahyela ne ananze, kɛmɔ Yizilayɛ Belemgbunli Ehabe yɛle la. Manasɛ eza zonlenle nwɔlɔra ne mɔ.

⁴ Ɔsisile awozonle azukponle wɔ Ɛzonlenlɛ Sua ne mɔɔ Ɛdɛnkɛma ɛha kɛ nuhua yɛɛ ɔwɔ kɛ bɛsonle ye la anu.

⁵ Ɔsisile azukponle mɔɔ ɔfa ɔsonle nwɔlɔra ne mɔ la wɔ Ɛzonlenlɛ Sua ne alie nwiɔ ne anwo ɛkɛ.

⁶ Ɔhunle ɔ kunlu ralɛ nrenya ɔyelale ye ɔbɔle azu. Ɔkpale munzule, ɔyele ngonyia na ɔhɔle menli mɔɔ tendɛ nwomenle nloa zo, nyɛne nee menli mɔɔ bɔ menli munzule la anwo ɔhɔbizebizale ɔ nwo. Ɔyɛle ɛtane kpole ɔtiale Ɛdɛnkɛma na ɔmanle ɔvale ɛya.

⁷ Ɔvale bozonle raalɛ Ahyela ne ananze ne ɔziele Ɛzonlenlɛ Sua ne anu ɛleka mɔɔ Ɛdɛnkɛma zele Devidi nee ɔ ra Sɔlɔmɔn kɛ, “Wɔ Gyɛlusalɛm ɛke Ɛzonlenlɛ Sua ɛhye anu yɛɛ mekpa nu meye ye wɔ Yizilayɛ mbusua ekpunli bulu nee nwiɔ ne anu, kɛ ɔle ɛleka mɔɔ bɛsonle me a.”

⁸ Ɛdɛnkɛma zele kɛ, “Saa Yizilayɛma kɛyɛ tieyɛ kɛmaa me na bɛkɛli me Mɛla ne kpokpoti mɔɔ me sonvolɛ Mosisi vale manle bɛ la azo a, anrɛɛ menrɛmaa bɛnrɛdu bɛ bɛnrɛvi azɛlɛ ne mɔɔ menvale memanle bɛ nlenya mɔ la azo.”

⁹ Noko Dwudama anyɛ tieyɛ ammaa Ɛdɛnkɛma, yɛɛ Manasɛ bɔbɔ akee manle menli ne yɛle ɛtane kpole bole mɔɔ maanle maanle mɔɔ ɛnee de azɛlɛ ne azo la yɛle la azo. Ɛdɛnkɛma dule menli zɔhane wɔ mekɛ mɔɔ Yizilayɛma ba la.

¹⁰ Ɛdɛnkɛma luale ye sonvolɛ kpɔmanvolɛma ne mɔ anwo zo hanle kɛ,

¹¹ “Belemgbunli Manasɛ ɛbɔ munzule mgbole mgbole ɛhye mɔ, yeyɛ amumuyɛ yedɛla mɔɔ Keenama yɛle bɔbɔ la, yeva ye awozonle ɛzonlenlɛ yemaa Dwuda amuala ɛyɛ ɛtane.

¹² Yemɔti medame, Yizilayɛ Ɛdɛnkɛma Nyamenle, mebava munzule kpole mearado Gyɛlusalɛm nee Dwudama anwo zo, amaa yeayɛ awie biala mɔɔ kɛde la azibɛnwo.

¹³ Mebadea Gyɛlusalɛm, kɛmɔ mendeanle Samɛlea la, nee kɛmɔ menvale menyɛle Yizilayɛ Belemgbunli Ehabe nee ɔ bo zo amra la. Mebabɔ Gyɛlusalɛm tɔɔ meahu menli mɔɔ wɔ zolɛ la amuala, meakpoɔkpoa zolɛ bɔkɔɔ kɛ bɛkpoa ewula la.

¹⁴ Bɛdabɛ mɔɔ bɛbavi ɛsalɛ la menrɛkpo bɛ bo zo. Mebaye bɛ meamaa bɛ kpɔvolɛma meamaa bɛali bɛ nwo zo konim na bɛava bɛ ninyɛne kɔsɔɔti.

¹⁵ Mebayɛ ɛhye meamaa me menli ne, ɔboalekɛ bɛyɛ ɛtane bɛtia me, yɛɛ sumunli kɛ menyele bɛ nlenya mɔ menvile Yigyibiti toonwo mɔɔ yeradwu ɛnɛ la ɛya ala a bɛka me a.”

¹⁶ Manasɛ hunle menli dɔɔnwo mɔɔ ɛnze nwolɛ bie la ɔmanle Gyɛlusalɛm gua bile ne mɔ azo yɛle mogya ngome. Ɔyɛle ɛhye na eza ɔmanle menli ne zonlenle awozonle, bɛzɔle mmonle, na bɛyɛle ɛtane bɛtiale Ɛdɛnkɛma.

¹⁷ Debie bieko mɔɔ Manasɛ yɛle nee ye ɛtane ne mɔ mɔɔ ɔyɛle la, bɛhɛlɛ bɛ wɔ Dwuda Arelemgbunli Tetedwɛkɛ Mbuluku ne mɔ anu.

¹⁸ Manasɛ hɔle ayile nu na bɛwulale ye mrɛlatɛlɛ nu wɔ suakunlu ɛkɛ ne tola ne anu. Tola ne le Ɛza ɛdeɛ. Na Manasɛ ara nrenya Emɔn lile ebia ne.

Dwuda Belemgbunli Emɔn

¹⁹ Emɔn lile ɛvolɛ abulanwiɔ nee nwiɔ la yɛɛ bɛvale ye bɛlile belemgbunli a. Ɔlile ebia ne ɛvolɛ nwiɔ wɔ Gyɛlusalɛm. Ɔ nli a le Mɛhyɛlɛmɛte mɔɔ ɔ ze a le Hɛlɛse la. Ɔvi Dwɔtoba sua zo.

²⁰ Ɔvale ɔ ze Manasɛ agyakɛ na ɔyɛle ɛtane ɔtiale Ɛdɛnkɛma.

²¹ Ɔzukoale ɔyɛle ɔ ze nyɛleɛ ne bie na ɔzonlenle ɔ ze awozonle nee mmonle ne mɔ mɔɔ ɔzonlenle bɛ la bie.

²² Ɔkpole Ɛdɛnkɛma, ɔ nlenya mɔ Nyamenle ne, na ɔkpole kɛ ɔnrɛli Ɛdɛnkɛma mɛla zo.

²³ Emɔn safohyenlema ne hɔle ɔ ti akpamo na bɛhunle ye wɔ suakunlu ɛkɛ ne.

²⁴ Akee menli mɔɔ wɔ Dwuda la hunle menli mɔɔ hunle Emɔn la, na bɛvale Emɔn ara nrenya Dwosaya bɛziele belemgbunli.

²⁵ Debie biala mɔɔ Emɔn yɛle la bɛhɛlɛle bɛ wɔ Dwuda Arelemgbunli Tetedwɛkɛ Mbuluku ne mɔ anu.

²⁶ Bɛziele Emɔn wɔ ɔdaye ye nla nu wɔ Ɛza tola ne anu na ɔ ra Dwosaya lile ebia ne.