2 Arl 20 - BAEBOLO ANZƐƐ BULUKU NWUANZANWUANZA

Belemgbunli Hɛzikaya anwondolɛ nee ye kpɔkɛdelɛ

¹ Mekɛ ne anu anwonyane bɔle Belemgbunli Hɛzikaya manle ɔhale ye nee ewule. Na Nyamenle kpɔmanvolɛ Ayezaya, Emɔzo ara ne, rakpɔlale ye na ɔzele ye kɛ, “Ɛdɛnkɛma se ɛtoto wɔ sua nu ɛke boɛ na ɛnrɛde kpɔkɛ, ɛbawu.”

² Hɛzikaya hakyile ɔ nye bane nwo na ɔzɛlɛle kɛ,

³ “Ɛdɛnkɛma, mebodo wɔ, kakye kɛ meyeye me ahonle nu mezonle wɔ nɔhalɛ nu yɛɛ mebɔ mɔdenle biala kɛ menwɔyɛ debie biala mɔɔ ɛkpondɛ kɛ meyɛ la.” Na ɔbɔle ɔ bo kɛ ɔsu.

⁴ Ayezaya vindele kɛ ɔkɔ, noko mɔɔ ɔhɔdwule suakunlu ɛkɛ ne alie ne anwo la Ɛdɛnkɛma zele ye

⁵ kɛ ɔzia ɔhɔ Hɛzikaya mɔɔ sie Ɛdɛnkɛma menli ne la anwo ɛkɛ ɔhɔze ye kɛ, “Medame Ɛdɛnkɛma, ɛ nlenya Devidi Nyamenle ne, mede wɔ nzɛlɛlɛ ne, menwu wɔ monle mɔɔ wɔhwi la. Mebayɛ wɔ ayile na ɛnɛ anwo zo kenle nsa, ɛbahɔ Ɛzonlenlɛ Sua ne anu.

⁶ Mebamaa wɔadɛnla aze ɛvolɛ bulu nee nnu bieko. Mebalie wɔ nee Gyɛlusalɛm suakpole ye meavi Aselea belemgbunli ne asa anu. Ɔlua me ɛwɔkɛ ne mɔɔ membɔle me sonvolɛ Devidi, nee me duma ne ati, mebalie sua ɛhye ati.”

⁷ Akee Ayezaya zele belemgbunli ne sonvolɛma ne kɛ, bɛdi feege ma bɛrado ye nyila ne azo bɛmaa ɔkpuke.

⁸ Belemgbunli Hɛzikaya bizale kɛ, “Duzu sɛkɛlɛneɛ yɛɛ bahile kɛ Ɛdɛnkɛma bayɛ me ayile na ɛnɛ anwo zo kenle nsa meahɔ Ɛzonlenlɛ Sua ne anu a?”

⁹ Ayezaya buale kɛ, “Ɛdɛnkɛma bamaa wɔ sɛkɛlɛneɛ yeahile kɛ ɔbali ye ɛwɔkɛ zo. Boni yɛɛ ɛkulo a; ɛkɛhulo kɛ ɛlawolɛ ye mɔɔ wɔ kpolike anlenkɛ ye anloa la kɛhɔ ɔ nyunlu egyakɛ bulu anzɛɛ ɔkɛzia ɔ nzi egyakɛ bulu?”

¹⁰ Hɛzikaya zele kɛ, “Ɔnyɛ se kɛ ɛlawolɛ ne kɛhɔ ɔ nyunlu egyakɛ bulu a; maa ɔzia ɔ nzi egyakɛ bulu.”

¹¹ Ayezaya zɛlɛle Ɛdɛnkɛma, na Ɛdɛnkɛma manle ɛlawolɛ ne hwenle ɔ nzi egyakɛ bulu wɔ kpolike ne mɔɔ Belemgbunli Ehaze zile la anloa.

Soanvolɛma mɔɔ vi Babelonia rale la

¹² Mekɛ zɔhane ala anu Babelonia Belemgbunli Mɛlodake Baladan, mɔɔ ɔ ze a le Baladan la dele kɛ Belemgbunli Hɛzikaya anwo dole ye, yemɔti ɔvale kɛlata nee ahyɛlɛdeɛ ɔzoanle kɛ bɛva bɛhɔmaa ye.

¹³ Hɛzikaya liele menli mɔɔ bɛzoanle bɛ la gyɛlɛɛnye na ɔvale ye anwonyia muala, ye dwɛtɛ fufule, ezukoa nvutuke, ninyɛne evuanlɛ, nee ye ɛlɔne ninyɛne ɔhilele bɛ. Debie biala ɛnle ɛkɛ mɔɔ yeanva yeangile bɛ a. Ɔvale debie biala mɔɔ wɔ ye belemgbunli maanle ne anu la ɔhilele bɛ.

¹⁴ Na Nyamenle kpɔmanvolɛ Ayezaya hɔle Belemgbunli Hɛzikaya ɛkɛ ne hɔbizale ye kɛ, “Menli ɛhye mɔ vi nienwu a rale a, yɛɛ bɛ amaneɛ se duzu?” Hɛzikaya buale kɛ, “Bɛvi Babelonia a bɛrale a.”

¹⁵ Ayezaya bizale kɛ, “Yɛɛ duzu debie a bɛnwunle ye wɔ suakunlu ɛkɛ a?” Belemgbunli ne buale kɛ, “Mengilele bɛ debie biala. Meanva ɛhwee meanvea bɛ.”

¹⁶ Ayezaya zele belemgbunli ne kɛ, “Tumivolɛ Ɛdɛnkɛma se

¹⁷ mekɛ bara mɔɔ bɛbarahwe debie biala mɔɔ wɔ suakunlu ɛke, nee debie biala mɔɔ wɔ mgbanyima ɛgyakyi wɔ la bɛahɔ Babelonia a. Bɛnrɛgyakyi wɔ ɛhwee.

¹⁸ Ɛdawɔ ɛ bo zo amra fɔɔnwo ne, bɛbahye bie mɔ nuokɛ, bɛaza bɛ bɛamaa bɛazonle Babelonia belemgbunli suakunlu ɛkɛ.”

¹⁹ Belemgbunli Hɛzikaya dele ɛhye abo kɛ ɔ nwo badɔ ye, ɔ nzo nu adwo ye wɔ mekɛ mɔɔ ɔde aze la, yemɔti ɔbuale kɛ, “Nrɛlaleɛ mɔɔ ɛ nee ye vi Ɛdɛnkɛma ɛkɛ ne ɛra la ɛnle ɛtane.”

Hɛzikaya belemgbunlililɛ ne awieleɛ

²⁰ Debie biala mɔɔ Belemgbunli Hɛzikaya yɛle, ye akɛnrasesebɛ gyima mɔɔ ɔlile nee kɛ ɔzile ɔmanle bɛdule kuma bɛmanle nzule luale nu rale suakpole ne azo la, bɛhɛlɛ bɛ muala wɔ Dwuda Arelemgbunli Tetedwɛkɛ Mbuluku ne mɔ anu.

²¹ Hɛzikaya hɔle ayile nu na ɔ ra Manasɛ lile ebia ne.