2 Arl 2 - BAEBOLO ANZƐƐ BULUKU NWUANZANWUANZA

Bɛva Yilaegya bɛhɔ anwuma.

¹ Mekɛ dwule kɛ akee Ɛdɛnkɛma bafa Yilaegya wɔ ahumuakyima nu kɔ anwuma. Yilaegya nee Yilaehya vi Gelegale zile nu,

² na Yilaegya zele Yilaehya kɛ, “Mebodo wɔ, kendɛ ɛke na Ɛdɛnkɛma ɛzoa me wɔ Bɛtɛle.” Yilaehya buale kɛ, “Meka tease Ɛdɛnkɛma nee ɛdawɔ kɛ menrɛkpɔkye me nwo menrɛvi ɛ nwo ɛlɛ.” Yemɔti bɛ mu nwiɔ bɛhɔle Bɛtɛle.

³ Nyamenle kpɔmanvolɛma asa azo bie mɔ mɔɔ wɔ Bɛtɛle la razele Yilaehya kɛ “Asoo ɛze kɛ ɛnɛ demua ye Ɛdɛnkɛma barava ɛ menle ye ahɔ ɔ?” Yilaehya buale kɛ, “Ɛhɛe, meze; noko bɛmɛ bɛmua bɛ nloa.”

⁴ Yilaegya zele Yilaehya kɛ, “Mebodo wɔ, kendɛ ɛke na Ɛdɛnkɛma ɛzoa me wɔ Gyɛleko.” Yilaehya buale kɛ, “Meka tease Ɛdɛnkɛma nee ɛdawɔ kɛ menrɛkpɔkye me nwo menrɛvi ɛ nwo ɛlɛ.” Yemɔti bɛ mu nwiɔ bɛhɔle Gyɛleko.

⁵ Nyamenle kpɔmanvolɛma asa azo bie mɔ mɔɔ wɔ ɛkɛ ne la razele Yilaehya kɛ, “Asoo ɛze kɛ ɛnɛ demua ye Ɛdɛnkɛma barava ɛ menle ye ahɔ ɔ?” Yilaehya buale bɛ kɛ, “Ɛhɛe, meze, bɛmɛ bɛyɛ koonwu.”

⁶ Yilaegya zele Yilaehya kɛ, “Mebodo wɔ, kendɛ ɛke na Ɛdɛnkɛma ɛzoa me wɔ Azule Dwɔdan ne anloa.” Yilaehya buale kɛ, “Meka tease Ɛdɛnkɛma nee ɛdawɔ kɛ menrɛkpɔkye me nwo menrɛvi ɛ nwo ɛlɛ.” Yemɔti bɛzile nu bɛhɔle.

⁷ Nyamenle kpɔmanvolɛma asa azo ne mɔ anu abulanlu doale bɛ na bɛgyinlanle amozi ekyi wɔ mekɛ mɔɔ Yilaegya nee Yilaehya gyi azule ne anloa la.

⁸ Yilaegya yele ye ɛdanlɛ ne mɔɔ gua ɔ nwo zo la, ɔbɛkale na ɔvale ɔfinle azule ne anu. Azule ne kpakyele nwiɔ, pianle hɔle foa ko nee foa ko. Ɔyele azɛlɛ resee ɔdole ɛkɛ ne na bɛpɛle bɛhɔle ɔ nzi lɔ.

⁹ Mɔɔ bɛpɛle bɛhɔle azule ne anzi lɔ la, Yilaegya akee zele Yilaehya kɛ, “Biza me debie mɔɔ menyɛ memaa wɔ la kolaa na bɛarava me bɛahɔ.” Yilaehya buale kɛ, “Mebodo wɔ, maa menyia wɔ sunsum ne mɔnwo.”

¹⁰ Yilaegya zele kɛ, “Wɔbiza debie ɛsesebɛ kpalɛ. Noko saa bɛbava me bɛahɔ na ɛnwu me ɛhɔlɛ nu a, ɛbanyia mɔɔ wɔbiza la, na saa wɔannwu me a, yemɔ ɛnrɛnyia ye.”

¹¹ Mɔɔ bɛtendɛ la ɛnee bɛ gyakɛ wɔ zolɛ, na arɛlevilɛ nu ala senle ehwili mɔɔ senle mgbɔnwɔ ɛlɛtwe ye la rakpakyele bɛ avinli, na anwoma kpole ne manle Yilaegya zo ɔ nee ye hɔle anwuma.

¹² Yilaehya nwunle ye na ɔdeanle ɔvɛlɛle Yilaegya kɛ, “Egya! Egya! Yizilayɛ konle ehwili ne nee menli mɔɔ ka mgbɔnwɔ ne mɔ la, bɛmɛ ɛhye o!” Na yeannwu ye bieko. Nyane ngome manle Yilaehya yele ɔdaye mumua ne ye tɛladeɛ mɔɔ ɔwula la na ɔdele nu nwiɔ.

¹³ Ɔvale Yilaegya aguzo ne mɔɔ wɔlɔle guale aze la na ɔziale ɔ nzi. Ɔradwule Azule Dwɔdan ne anloa,

¹⁴ ɔvale Yilaegya aguzo ne mɔɔ guale aze la ɔfinle azule ne anu na ɔzele kɛ, “Yilaegya Ɛdɛnkɛma Nyamenle ne wɔ nienwu?” Na ɛkɛ ne ala azule ne kpakyele nwiɔ na ɔpɛle ɔrale ɔ nzi nehae.

¹⁵ Nyamenle kpɔmanvolɛma asa azo mɔɔ vi Gyɛleko la nwunle ye na bɛhanle kɛ “Yilaegya sunsum ne ɛdwu Yilaehya anwo zo.” Na bɛrayiale ye na bɛbɔle bɛ ti aze bɛmanle ye.

¹⁶ Bɛzele ye kɛ, “Nea, yɛdayɛ mɔɔ yɛwɔ ɛke la yɛle menli kpukputili abulanlu. Maa yɛhɔkpondɛ ɛ menle ne. Ɔkɛyɛ kɛ Nyamenle Sunsum ne vale ye hɔle anwuma la, yehɔgyakyi ye yedo boka bie azo anzɛɛ bɔnza bie anu.” Yilaehya buale bɛ kɛ, “Kyɛkyɛ, bɛmmakɔ.”

¹⁷ Bɛamkponle na bɛdinle zolɛ kɛ ɔwɔ kɛ bɛkɔkpondɛ ye. Ɛhye manle Yilaehya ati zile aze na ɔzele bɛ kɛ bɛhɔ. Bɛzoanle menli abulanlu ne bɛmanle bɛhɔkpondɛle ye dedee kenle nsa. Noko bɛannwu ye.

¹⁸ Na bɛziale bɛrale ɔ nwo ɛkɛ wɔ Gyɛleko. Ɛnee ɔlɛkendɛ bɛ wɔ ɛkɛ, na ɔzele bɛ kɛ, “Se menzele bɛ kɛ bɛmmakɔ.”

Yilaehya nwanwane sɛkɛlɛneɛ ne mɔ

¹⁹ Menli bie mɔɔ wɔ Gyɛleko la hɔhanle hilele Yilaehya kɛ, “Yɛmenle, kɛmɔ ɛdawɔ ɛnwu ye la, suakpole ye le kɛnlɛma noko nzule ne ɛnle kpalɛ yɛɛ ɔmaa nrenzɛvolɛ ko kpɔne.”

²⁰ Yilaehya zele bɛ kɛ, “Bɛva dwora fofolɛ na bɛgua ngyenle nu bɛrɛlɛ me.” Bɛvale bɛrɛlɛle ye.

²¹ Ɔvale ɔhɔle nzubula ne mɔɔ bɛsa la anloa na ɔvuandinle ngyenle ne ɔguale nu, na ɔzele kɛ, “Ɛdɛnkɛma se: Meyɛ nzule ye nzukpa. Ɔvi ɛnɛ mɔɔ kɔ la, awie no bie a ɔnwu yɛɛ ɔmkpɔne ɛkolɛ bieko.”

²² Ɔvi mekɛ zɔhane nzule ne ɛyɛ nzukpa toonwo a yeradwu ɛnɛ a, kɛmɔ Nyamenle manle Yilaehya hanle la.

²³ Yilaehya akee hɔle Bɛtɛle. Mɔɔ ɔlua adenle nu ɔlɛkɔ la, ngakula mrenya bie vi sua ne azo vindele ragolole ɔ nwo kɛ, “Atizo kpawee, ɛvi ɛke kɔ!”

²⁴ Yilaehya hakyile ɔ nwo nleanle bɛ na ɔvale Ɛdɛnkɛma ɔwale bɛ amonle; na ɛkɛ ne ala bɛdi mbelɛ nwiɔ vi kpɔkɛ ne anu vindele ratetele bɛ nuhua abulanla nee nwiɔ anu.

²⁵ Yilaehya vi ɛkɛ ne la ɔhɔle Kamɛle Boka na nzinlii ɔziale ɔhɔle Samɛlea.