2 Arl 19 - BAEBOLO ANZƐƐ BULUKU NWUANZANWUANZA

Belemgbunli ne biza Ayezaya adwenle

¹ Belemgbunli Hɛzikaya dele edwɛkɛ ne la, nyane ngome manle ɔsuosuanle ye tɛladeɛ ne mɔɔ ɔwula la anu, ɔvale ɛrele tɛladeɛ ɔwulale na ɔhɔle Ɛdɛnkɛma Ɛzonlenlɛ Sua ne anu.

² Ɔzoanle Yilayakem, mɔɔ nea belemgbunli suakunlu ɛkɛ ne la, Kɔɔto kɛlɛhɛlɛvolɛ Hyɛbena, nee sɛlɛvolɛ mgbanyinli bie mɔ wɔ Nyamenle kpɔmanvolɛ Ayezaya mɔɔ ɔ ze a le Emɔzo la anwo ɛkɛ. Bɛdabɛ noko bɛwulale ɛrele adɛladeɛ a bɛhɔle a.

³ Nrɛlaleɛ mɔɔ bɛ nee ye hɔle la a le kɛ, “Belemgbunli Hɛzikaya se yɛraze wɔ kɛ, ɛnɛ le nyanelilɛ kenle; abule ɛbu yɛ, anyiemgba ɛha yɛ. Yɛyɛ kɛ raalɛ mɔɔ ɛvo awolɛ zo na ɔ nwo ɛbɛlɛ ye na ɔngola ɔ nwo twe la.

⁴ Aselea belemgbunli ne ɛzoa ye safohyenlema kpanyinli ne yemaa yerabɔ tease Nyamenle ne aholoba. Medie medi kɛ Ɛdɛnkɛma Nyamenle dele mɔɔ ɔhanle la. Yemɔti sɛlɛ Ɛdɛnkɛma wɔ Nyamenle ne kɛ ɔdie zɛhae aholobabɔlɛ ne na ɔdua menli mɔɔ bɔle aholoba ne la kakɛ, na sɛlɛ Nyamenle maa ye menli ekyi ne mɔɔ ɛha la.”

⁵ Ayezaya dele Belemgbunli Hɛzikaya nrɛlaleɛ ne la,

⁶ ɔmanle bɛvale mualɛ bɛhɔmanle ye kɛ, “Ɛdɛnkɛma se ɛmmamaa Aseleama nwunlonwunla wɔ kɛ ɔdaye Ɛdɛnkɛma ɔnrɛhola wɔ die.

⁷ Ɛdɛnkɛma bamaa Aselea belemgbunli ne ade nrɛlaleɛ bie mɔɔ bamaa yeazia yeahɔ ye maanle nu a, na Ɛdɛnkɛma bamaa bɛahu ye wɔ ɛkɛ ne.”

Aseleama nwunlonwunla Hɛzikaya bieko

⁸ Aselea safohyenlema kpanyinli ne dele kɛ ye belemgbunli ne ɛvi Leekehye na yera Lebena ɔ nee ɛkɛ ne amra ɛlɛko, yemɔti ɔhɔle ɛkɛ ne kɛ ɔ nee ye kava adwenle.

⁹ Nrɛlaleɛ radole Aseleama kɛ, Yigyibiti ɛlɔnema mɔɔ Sudan Belemgbunli Tɛheeka a li bɛ ti la ɛlɛba aradoa bɛ nee bɛ aho. Aselea belemgbunli ne dele ɛhye la ɔvale kɛlata ɔmanle bɛhɔmanle Dwuda Belemgbunli Hɛzikaya

¹⁰ kɛ, “Saa wɔ nyamenle ne mɔɔ wɔva ɛ rɛle wɔwula ye nu la ɛze wɔ kɛ me sa ɛnrɛha wɔ a ɛnee mmamaa ɔyɛ wɔ fɛ somaa.

¹¹ Wɔde mɔɔ Aselea belemgbunli fa yɛ azuamgbole mɔɔ ɔkulo kɛ ɔsɛkye bɛ la. Ɛdwenle kɛ ɛkɛvi ɛsalɛ ɔ?

¹² Me mgbanyima a zɛkyele azuamgbole Gozan, Hɛlan, yɛɛ Rilizɛfe na ɔhunle Bɛtɛdɛnema mɔɔ de Telasaa la, noko bɛ awozonle ne mɔ biala angola anlie bɛ.

¹³ Arelemgbunli mɔɔ wɔ Heemate, Aapade, Sifaveeyem, Hina, yɛɛ Ayeva la wɔ nienwu?”

¹⁴ Belemgbunli Hɛzikaya liele kɛlata ne wɔ menli mɔɔ bɛzoanle bɛ la asa anu ɔgengale. Akee ɔhɔle Ɛzonlenlɛ Sua ne anu na ɔvale kɛlata ne ɔdole Ɛdɛnkɛma anyunlu ɛkɛ.

¹⁵ Na ɔzɛlɛle kɛ, “O Ɛdɛnkɛma, Yizilayɛ Nyamenle mɔɔ ɛde wɔ Belemgbunli ebia nu wɔ abɔdeɛ ne mɔ mɔɔ lɛ ndɛbalɛ la azo anwuma a, ɛdawɔ ala a, ɛle Nyamenle mɔɔ sie arelemgbunli maanle maanle mɔɔ wɔ aleɛabo la a. Ɛdawɔ a ɛbɔle azɛlɛ ye nee anwuma a.

¹⁶ Na Ɛdɛnkɛma, ɛdawɔ nea mɔɔ akee ɛlɛsisi yɛ nwo zo a. Tie edwɛkɛ mɔɔ Sɛnakɛlebe ɛlɛkeha agua ɛdawɔ tease Nyamenle ne ɛ nyunlu aze a.

¹⁷ Ɛdɛnkɛma, yɛ muala yɛze kɛ Aselea belemgbunli ɛzɛkye maanle maanle dɔɔnwo, ɛbɔ bɛ bo zo,

¹⁸ ɛyela bɛ awozonle mɔɔ ɛnle ɛhwee na bɛle ananze mɔɔ menli ɛva mbaka nee awolɛ ɛyɛ la.

¹⁹ Ɛdɛnkɛma, yɛ Nyamenle, die yɛ fi Aseleama asa anu, amaa ewiade maanle maanle kɔsɔɔti anwu kɛ ɛdawɔ Ɛdɛnkɛma ala a ɛle Nyamenle a.”

Nrɛlaleɛ mɔɔ Ayezaya vale rɛlɛle belemgbunli la

²⁰ Akee Ayezaya zoanle manle bɛhɔzele Belemgbunli Hɛzikaya kɛ Ɛdɛnkɛma Yizilayɛ Nyamenle ne ɛbua ye nzɛlɛlɛ ne anwo. Ɔse, “Mede wɔ nzɛlɛlɛ ne mɔɔ fane Aselea Belemgbunli Sɛnakɛlebe anwo la.

²¹ Na kɛ medame Ɛdɛnkɛma mese la ɛne: Sɛnakɛlebe, Gyɛlusalɛm suakpole ye azo amra ɛmbu wɔ bie na bɛsele wɔ.

²² Nwane a ɛdwenle kɛ wɔgolo ɔ nwo wɔyɛ ye aholoba la? Wɔambu medame, Yizilayɛ Nyamenle Nwuanzanwuanza ne bie.

²³ Wɔzoa wɔ menli wɔmaa bɛradu bɛ nloa anu bɛhile me kɛ wɔva wɔ konle ehwili dɔɔnwo wɔli Lɛbanɔn awoka mgbole nwo zo konim. Ɛdule ɛ nloa anu kɛ ɛbubule ɛkɛ ne sida mbaka mgbole mɔɔ wowale, nee sepelɛse mbaka ngɛnlɛma ɛguale na ɛwolole ɛhɔle ɛkɛ ne kpɔkɛmile nu.

²⁴ Ɛvale ɛdule ɛ nwo kɛ ɛbɔle bula ɛnlonle nuhua nzule wɔ maanle gyɛne nu, yɛɛ wɔ ɛlɔnema vale bɛ gyakɛ venle Azule Naele ne manle ɔwele resee.

²⁵ Asoo ɛtɛtele kɛ mengyehyɛle ɛhye mendole ɛkɛ ne dɛba dɛba yɛɛ kɛkala memaa yeyɛ zɔhane a? Memanle wɔ anwosesebɛ kɛ ɛva ɛbutubutu azuamgbole mɔɔ bɛbɔ nwolɛ bane la anye aze ɛyɛ bɛ azuadu.

²⁶ Memanle menli mɔɔ ɛnee wɔ azua zɔhane mɔ azo la asa anu tutole na bɛzulole. Bɛyɛle kɛ ɛya nu ndile anzɛɛ ndile mɔɔ ɛfifi sua ti zo mɔɔ aduduleɛ anwoma wuluwulu ɛlɛbɔ bɛ la.

²⁷ “Noko meze ɛ nwo edwɛkɛ biala, meze mɔɔ ɛyɛ nee ɛleka mɔɔ ɛkɔ la. Me nwo ɛya mɔɔ wɔva la meze.

²⁸ Wɔ ɛya kpole ne nee wɔ adubɛnwo ne anwo edwɛkɛ ɛdwu me nzo nu. Kɛkala, mebava koba meazɔ ɛ bonyi, meava kɔleɛ meatosa ɛ kɔmenzia na meahwili wɔ mealua ɛleka mɔɔ ɛpenle ɛrale la meahɔ.”

²⁹ Akee Ayezaya zele Hɛzikaya kɛ, “Mɔɔ bazi la anwo sɛkɛlɛneɛ a le ɛhye. Ɛvolɛ ɛhye nee ɛvolɛ bieko ɛbali ma mɔɔ bɛ ngome bɛfifi la, na ye ɛvolɛ nsa ne azo yemɔ bɛbazo ɛya, bɛalua, bɛabu, bɛalua vanye mbaka na bɛali zolɛ ma.

³⁰ Bɛdabɛ mɔɔ bɛwɔ Dwuda na bɛ nwo kɛvi nu la bakpazi kɛ mbaka mɔɔ bɛ ndinli dwu azɛlɛ bo la na bɛazo ma.

³¹ Menli wɔ Gyɛlusalɛm nee Boka Zayɔn azo mɔɔ anwo bavi nu a, ɔboalekɛ Ɛdɛnkɛma ɛbɔ kpɔkɛ kɛ ɔmaa ɛhye azi.

³² “Mɔɔ Ɛdɛnkɛma ɛha mɔɔ fane Aselea belemgbunli ne anwo la ɛne. Ɔse, ‘Ɔ gyakɛ ɛnrɛtia suakpole ɛhye azo yɛɛ ɔnrɛdo ɛda ko bɔbɔ ɔnrɛbɔ awie wɔ sua ye azo. Ɛlɔnema mɔɔ dedɛ bɛ sa nu enyinlike la ɛnrɛbikye suakpole ye na bɛaze kɛ bɛkuohua ɛnwea bɛala ɔ nzi bɛahɔ suakpole ye anwo nzia.

³³ Adenle ne mɔɔ ɔpenle nu ɔrale la, nuhua ala yɛɛ ɔbape yeahɔ a. Suakpole ye ɛdeɛ, ɔnrɛhola zolɛ fo. Medame, Ɛdɛnkɛma a mese a.

³⁴ Mebalie suakpole ɛhye ati, meawowa ye wɔ me ti, ɔboalekɛ menvale membɔle me akɛlɛ Devidi ɛwɔkɛ.’ ”

³⁵ Kenle ko ne nɔe ne Ɛdɛnkɛma soanvolɛ hɔle Aseleama azokoɛleɛ ne hɔhunle ɛlɔnema ne anu apenle ngoko ɛya ko abulatwɛ nee nnu. Aleɛ kahye la ɛnee bɛwu bɛgua ɛkɛ.

³⁶ Akee Aselea Belemgbunli Sɛnakɛlebe hwenle ɔ nzi na ɔziale ɔhɔle Nenɛvɛ.

³⁷ Kenle ko ɔwɔ ye bozonle Nezelɔko amonle sua ne anu la, ɔ mra mrenya ne mɔ anu nwiɔ, Adelamɛlɛke nee Hyalizɛ rahunle ye na bɛnriandile bɛhɔle Arelalate. Ɔ mra ne mɔ ko mɔɔ bɛfɛlɛ ye Yisaahadɔn la lile ebia ne.