2 Arl 14 - BAEBOLO ANZƐƐ BULUKU NWUANZANWUANZA

Dwuda Belemgbunli Amazaya

¹ Mɔɔ Gyɛhowahaze ara Gyɛhowahye lile ɛvolɛ nwiɔ wɔ Yizilayɛ ebia ne azo la, yɛɛ Dwowahye ara Amazaya bɔle ɔ bo kɛ ɔdi belemgbunli wɔ Dwuda a.

² Amazaya bɔ ye belemgbunlililɛ ne abo la ɛnee yeli ɛvolɛ abulanwiɔ nee nnu, yɛɛ ɔlile ebia ne ɛvolɛ abulanwiɔ nee ngɔnla wɔ Gyɛlusalɛm. Ɔ nli a le Gyɛhowaden mɔɔ vi Gyɛlusalɛm la.

³ Ɔyɛle mɔɔ sɔ Ɛdɛnkɛma anye la, noko yeanwie ɔ nlenya Devidi agyakɛ fa. Ɔyɛle mɔɔ ɔ ze Dwowahye yɛle la bie.

⁴ Yeanzɛkye ɛleka ne mɔ mɔɔ bɛsonle awozonle la, yemɔti ɛnee menli kpu ɛyɛlɛ bɔ azu wɔ ɛleka ɛleka zɔhane mɔ.

⁵ Mɔɔ belemgbunli tumi ne amuala ralile ɔ sa nu la, Amazaya manle bɛhunle safohyenlema ne mɔɔ hunle ɔ ze la.

⁶ Noko akee yeangu bɛ mra ne mɔ, na ɔlile Ɛdɛnkɛma mɛla ne mɔɔ ɔvale ɔmanle Mosisi la azo. Mɛla ne se; “Ɔnle kɛ awovolɛma ɛtane ti bɛku mralɛ; yɛɛ ɔnle kɛ mralɛ ɛtane ti bɛku awovolɛma. Awie biala ɔdaye ɔwɔ kɛ di ye ɛtane mɔɔ ɔkɛyɛ la anwo ɛzonle.”

⁷ Amazaya hunle Yidɔm ɛlɔnema apenle bulu wɔ Ngyenle Bɔnza. Eza ɔhonle ɔvale Selea suakpole ne na ɔhakyile sua ne duma ɔvɛlɛle ye Dwɔketii. Duma ɛhye ala a ɛnɛ nee ɛnɛ bɛtɛfa bɛtɛfɛlɛ suakpole ne a.

⁸ Akee Amazaya zoanle manle bɛhɔzele Yizilayɛ Belemgbunli Gyɛhowahye kɛ, “Bɛla maa yɛ mu nwiɔ yɛva yɛ kɛnra yɛbɔ zo.”

⁹ Na Belemgbunli Gyɛhowahye manle bɛvale mualɛ ɛhye bɛhɔmanle ye, “Kenle ko kolokolonyɛma bie mɔɔ wɔ Lɛbanɔn awoka zo la vale nrɛlaleɛ manle bɛhɔmanle sida baka bie kɛ, ‘Fa ɛ ra raalɛ ne maa memaa me ra nrenya ɛgya ye. Na Lɛbanɔn nane kpole bie ratietiale kolokolonyɛma ne azo.’

¹⁰ Akee tie, Amazaya, kɛmɔ wɔli Yidɔmma anwo zo konim la ati yɛɛ ɛlɛtu ɛ nloa anu a. Maa ɛ kunlu ɛdwo ɛ nyunlu mɔɔ wɔnyia ye la anwo na tɛnla wɔ ɛleka bie. Duzu ati a ɛtwehwe munzule wɔamaa ɛ nwo nee wɔ menli ne ɛ?”

¹¹ Noko Amazaya andie, yemɔti belemgbunli Gyɛhowahye vale ɛlɔnema nee bɛ hɔhonle wɔ Bɛte Hyimɛhye mɔɔ wɔ Dwuda la.

¹² Gyɛhowahye lile Dwudama anwo zo konim na Amazaya ɛlɔnema ne guale ɛbɔ nu; biala nriandile hɔle ye sua zo.

¹³ Gyɛhowahye hyele Amazaya, na akee ɔhɔvole Gyɛlusalɛm, ɔbubule suakpole ne bane ne foa ko, ɔvi Yifelaem Anlenkɛ kpole ne anloa ɔhɔkpulale Muleɛ Anlenkɛ kpole ne anloa. Ye tendenle le kɛyɛ mita ɛya nwiɔ.

¹⁴ Gyɛhowahye zoale dwɛtɛ fufule nee ezukoa nvutuke biala mɔɔ ɔ sa dɔle zo, Ɛzonlenlɛ Sua ne anu ninyɛne nee belemgbunli sua nu gya ne anu ninyɛne ne mɔ amuala hɔle Samɛlea. Eza ɔhyele menli ɔhɔle.

¹⁵ Debie biala mɔɔ Gyɛhowahye yɛle, ye anwosesebɛ nee kɛ ɔzile ɔ nee Dwuda Belemgbunli Amazaya honle la, bɛhɛlɛ bɛ muala wɔ Yizilayɛ Arelemgbunli Tetedwɛkɛ Mbuluku ne mɔ anu.

¹⁶ Belemgbunli Gyɛhowahye hɔle ayile nu na bɛwulale ye mrɛlatɛlɛ nu wɔ Samɛlea alehelɛ alaleɛ ne. Ɔ ra Gyɛlɔbowam a lile ebia ne a na bɛvɛlɛle ye Gyɛlɔbowam mɔɔ tɔ zo Nwiɔ.

Dwuda Belemgbunli Amazaya ewule

¹⁷ Yizilayɛ Belemgbunli Gyɛhowahye hakyile ɔ nwo la, ye ɛvolɛ bulu nee nnu anzi ɛnee Dwuda Belemgbunli Amazaya tɛdi ye ebia ne.

¹⁸ Debie biala mɔɔ Amazaya yɛle la bɛhɛlɛ bɛ muala wɔ Dwuda Arelemgbunli Tetedwɛkɛ Mbuluku ne mɔ anu.

¹⁹ Menli bie wɔ Gyɛlusalɛm, bɛhɔle Belemgbunli Amazaya ati akpamo kɛ bɛku ye. Amazaya dele nwolɛ bie na ɔnriandile ɔhɔle Leekehye. Noko ye kpɔvolɛma ne doale ye lɔ hɔhunle ye.

²⁰ Bɛvale ye funli ne bɛdole ɛkpɔnwɔ zo bɛrale Gyɛlusalɛm na bɛziele ye wɔ ɔ nlenya mɔ anwo ɛkɛ wɔ Devidi Suakpole zo.

²¹ Akee Dwudama vale ɔ ra Yuzaya mɔɔ ɛnee ɛli ɛvolɛ bulu nee nsia la ziele Dwuda belemgbunli.

²² Yuzaya nee Yilatema honle, ɔvale sua ne na ɔkyekyele ye fofolɛ. Ɛhye zile mekɛ mɔɔ ɛnee ɔ ze ɛwu la.

Yizilayɛ Belemgbunli Gyɛlɔbowam mɔɔ tɔ zo nwiɔ

²³ Amazaya lile ɛvolɛ bulu nee nnu wɔ Dwuda ebia ne azo la yɛɛ bɛvale Gyɛhowahye ara Gyɛlɔbowam bɛziele Yizilayɛ belemgbunli wɔ Samɛlea a. Ɔlile ebia ne ɛvolɛ abulanla nee ko.

²⁴ Ɔyɛle ɛtane ɔtiale Ɛdɛnkɛma; ɔvale ɔ nlenya Gyɛlɔbowam agyakɛ. Ɔyɛle ninyɛndane ne mɔɔ ɔ nlenya yɛle a ɔmanle Yizilayɛma kɔsɔɔti yɛle ɛtane la bie.

²⁵ Ɔhonle ɔliele azuamgbole mɔɔ Yizilayɛma minlinle bɛ wɔ konle nu la amuala; ɔvi Heemate Ademgbolezo mɔɔ wɔ sɔlɔ toonwo kɔdwu Nyevile Wulera ne anloa wɔ nyiakɛ nehane. Ɛhye a Ɛdɛnkɛma, Yizilayɛ Nyamenle ne luale ye kpɔmanvolɛ Dwona, Ametae ara ne anwo zo hanle wɔ Gate Hifa la.

²⁶ Ɛdɛnkɛma nwunle kɛ Yizilayɛma anzosesebɛ ɛmaa bɛlɛnwu amaneɛ kpole, yɛɛ awie ɛnle ɛkɛ mɔɔ ɔboa bɛ a.

²⁷ Noko ɛnee ɔnle Ɛdɛnkɛma adwenle nu kɛ ɔbɔ bɛ bo zo yeazɛkye bɛ bɔkɔɔ, yemɔti ɔluale Belemgbunli Gyɛlɔbowam mɔɔ tɔ zo Nwiɔ la anwo zo ɔliele bɛ.

²⁸ Debie biala mɔɔ Gyɛlɔbowam mɔɔ tɔ zo Nwiɔ la yɛle, ye anwosesebɛ wɔ konle nu, nee kɛ ɔzile ɔliele Dɛmasekɛse mɔɔ kɔkpula Heemate mɔɔ wɔ Yizilayɛ la, bɛhɛlɛ bɛ kɔsɔɔti wɔ Yizilayɛ Arelemgbunli Tetedwɛkɛ Mbuluku ne mɔ anu.

²⁹ Belemgbunli Gyɛlɔbowam mɔɔ tɔ zo Nwiɔ la hɔle ayile nu na bɛwulale ye mrɛlatɛlɛ nu wɔ Yizilayɛ arelemgbunli alaleɛ ne. Ɔ ra Zɛkalaya lile ebia ne.